1 Əbay 14

Mbulum a ge seriye a Yerubuwam, a mət

1 Akahər ata ka, Aviya kəla Yerubuwam a dəɗ a dukw məməta. 2 Yerubuwam a gwaɗa a məkəs ŋgar: « kamkam Hitse mbəɗ ba ŋgiɗ pam, wura ma sər kər ka, məkəs gà tsa, ka da a Silu. Mala məma à guma Mbulum duwa riŋ, zləm ŋgar Ahiya i fata, ŋgat na a gwa aà iye ka, i ti ne a əbay aka gər gà mayahaba gər gà mburma aaha ya. 3 Ki dzik a dər, gà peŋ kurwa nda gà gatuw mbaŋa nda dis amum ilik, da a təv ŋgar, a tsikike a dukw ana a te ge ara ba agər a kəla aaha ya . » 4 Məkəs Yerubuwam ata a ge dər kərga na zal a tsikar a, a hitse a da a Silu a bəra Ahiya. Tsaatsa Ahiya ka, a ŋgat a vatwa asa tsa. A fir a ka, ndazləzla, agəra mandawal. 5 BATSAH kwa ŋa aka tsik aba a Ahiya ya: « Araka məkəs Yerubuwam riŋ aà vatwa a dehe a təv yak, aà mewize a à kər duwa aka gər kəla ŋgar, ana ŋgwal ŋa tsiye. BATSAH kwa ŋa a ɗifer à dukw ana a gweɗere aaka ya. A dehe ka, a ge aàba kamala ana ŋgat ka, məkəs ŋgiɗ a.

6 I təv ana Ahiya a tsaraka təv sik ŋgar ika biye hərmaga ya ka, a gwaɗar: « Dara a ga ya, məkəs Yerubuwam! Aàla na ki ge aàba kamala ana kər ka, məkəs ŋgiɗ a? BATSAH kwa ŋa aka slər iye a təv yak, aà i tsikik mifefile naha mawuraba ŋa. 7 Da, gwaɗa a Yerubuwam ka: « Araha na BATSAH kwa ŋa Mbulum gà Isərayel a gwa ya: Yàa ne aà kər batsah ŋa, ika magər gà mayahaba gər gà mburma ya, i tike kər aka gər gà mburma gà, gà Isərayel, 8 Yàa kəzala əbay ihər gà mburma Dawda a, Yàa vəlak. Ama kər ka, kamala mala meslire gà Dawda a tsa. Ŋgat ka aka tike gər a məpala ahəm gà ndaka vatwa ŋa, aka zazam iye nda gəzləŋ ŋgar ilik a gewiŋ ka, dukw ana a diŋ gər a ɗekɗek. 9 Kàa ge dukw ana ŋgwal ŋa tsa ndeyndey, a za dər gà mburma ana tə da, a dəba ya. Dite kàa da a məvaɗaba gà mendzikiɗe ba gà mbulum ŋgiɗ, nda gà mendzikiɗe ba gà duwa nda virzegene biy miviliŋ dər matsəɓatsəɓ, dite kàa mbiɗiŋ dəba. 10 Aɗaba taŋa ka, i ti zlere a gà mesewere are a huɗ ga, a bəra Yerubuwam a. I ti dzeye a à gà asləka gà mburma ana i ga i bəra Yerubuwam a fit, ku mege weke. Gà ɓele nda gà na ti ziwe a gər tar i Isərayel a. I ta feɗe a, gà gwala Yerubuwam kamala ana ta faɗawa gwastak ɗeŋŋè i təv are ya. 11 Zləməŋa wele ana i gwala Yerubuwam, a ta mite a i huɗ kwite ya ka, gà kəra na ta pepiɗe ya. Ama wele ana a ta mite a i dala ya ka, gà məmba na ti zime a ŋgat a . » Taŋa ka, dukw ana BATSAH kwa ŋa a tsik a.

12 Kər ka, hitse daba a ma, tsìm ŋana ki ti ndze a huɗ kwite ya ka, kəla yak a mitiŋa. 13 Gà Isərayel fit ti te tiwe ŋgat, ti te le a ŋgat. Ŋgat ilik na i gwala Yerubuwam dive ŋgar a ta ge riŋ a. Aɗaba i liwiŋ gà gwala Yerubuwam ka, i təv ŋgar na BATSAH kwa ŋa, Mbulum gà Isərayel a le aà dukw ana ŋgwal ŋa ya. 14 Mba ka, BATSAH kwa ŋa a tike aba wura ilik a əbay aka gər gà Isərayel, na a dwiŋa iɗəm gà gwala Yerubuwam a fit a. Aslaka, pat ŋa, aka ndzera, dite a ge a ba kinehe ata ! 15 BATSAH kwa ŋa a ti leke a a Isərayel, ti ta ne a kamala gà awasl ana aà guva dulwa yam a ɓezle a dər a. A ndzehe Isərayel ika ŋgwal ahəɗ ata, a vəl a gà tsir tar a. A ta gwitse a ter a ndaka tseke batsah duluv ŋgiɗ, aɗaba tàa vəl matsəɓatsəɓ a BATSAH kwa ŋa hinne, nda megeye aba gà mendweŋe biy mazləba a mbulum Asera. 16 BATSAH kwa ŋa a ta miyek a à gà Isərayel, aɗaba gà bakal Yerubuwam. Agəra bakal ŋgar ata, a bana aɗəm gà Isərayel a . »

17 Məkəs Yerubuwam a hitse a mbəɗ gər a Tirtsa, tsim ŋana a ndze aka biye hərmaga ya ka, kəla ŋgar ata a mət. 18 Ti le, gà Isərayel fit tə tuwa ŋgat, kamala ana BATSAH kwa ŋa a tsik nda ahər mala məma à guma ŋgar Ahiya ya.

19 Gà asiŋ gà labara Yerubuwam, gà guvəl ŋgar ana a ge ya, nda mekwere ŋgar ana a kwara ya ka, tar riŋ mewetseye ŋa i wakita gà əbay gà Isərayel. 20 Yerubuwam a ndza ika mekwere ka, mive dzik sela gər ŋgar sula, (22) a mət, kəla ŋgar Nevat a zla təv mendze mekwere ŋgar.

Rubuwam a ne əbay gà Yahuda

2 Labara 12:13-16

21 Rubuwam kəla Salumun a ne əbay gà Yahuda ka, ŋgat mive dzik faɗ gər ŋgar ilik (41). A kwara mive kurwa gər ŋgar təsəla (17) i Yeruzalem, huɗ kwite ana BATSAH kwa ŋa a zla i liwiŋ gà gwala Isərayel a. Aà tə zləbawa iɗəm à zləm ŋgar. Zləm mama ŋgar, Naama dəm gà Ammunitiya. 22 Gà mburma gà Yahuda tàa ge dukw ana ŋgwal ŋa tsiye, na i təv are BATSAH kwa ŋa ya. Bakal tar ata ta ge ya ka, a vəl matsəɓatsəɓ a BATSAH kwa ŋa hinne a za dər na gà tsir tar ta geyera ya asa. 23 Tar mbaŋa ka, tàa zlazla aba gà təv mewisle, ta hitseye à gà kur nda gà mandwàŋaya gà dizl aà mazləba a mbulum Asera, aka gər gà zababul gà diyis nda gà huɗ gà dizl ɗaf ana mewiɗeŋa ya. 24 Gà mburma riŋ mbaŋa na i batsah kwite ata ka, megemir tar ka, megeye muva biy məvəla mezlibe a gà mbulum tar ata ya. Tàa geye gà dukw ana gà ŋgwal ŋa tsa, ndeyndey hinne, kamala biy gà mayahaba gər gà mburma ana, BATSAH kwa ŋa a dəgəz tar, ika miɗ gà Isərayel a. 25 I huɗ mive miìzləm ŋana Rubuwam a ge a ika mekwere ya ka, Sisak əbay gà Ezipt, a hitse aà mege guvəl aà Yeruzalem. 26 A ndzək gà limana ana i ga BATSAH kwa ŋa ya, nda gà na i ga i bəra əbay ya, a ndzək fit. Aka ndzək gà slakwa gura Salumun ana a vaɗaya fit mbaŋa. 27 əbay Rubuwam a vaɗaya aɗəm gà slakwa virzegene, a dza ahər gà ɓəzla aka miɗ gà sliwdze ana, ta kaslawa biye hərmaga əbay a. 28 Kəla ana əbay a dawa a ga BATSAH kwa ŋa ya ka, gà sliwdze tə ndzàkawa gà slakwa ata, dite ta mawa dərra a ga ana tə ndzawa iɗəm a

29 Gà asiŋ gà labara Rubuwam, nda gà dukw ana a geye ya, riŋ mewetseye ŋa i wakita labara gà əbay gà Yahuda ibam a? 30 Gà Rubuwam nda Yerubuwam tə ndzawa kəla wur gà pat ka, i guvəl hiywe. 31 I təv ana Rubuwam a mət a ka, ti le ŋgat a liwiŋ gà tsir ŋgar i huɗ kwite Dawda. Zləm mama ŋgar Naama dəm gà Ammunitiya. Abiyam kəla ŋgar a zla təv mendze mekwere ŋgar.