1 Əbay 13

Mala məma à guma Mbulum a mà à dukw ana BATSAH kwa ŋa a gwa a ta ge ba ya, a Yerubuwam

1 Tsaatsa mburma Mbulum duwa a dara i Yahuda ya, a de a a Betel, kamala na Mbulum a tsikar a. Akahər ata ka, Yerubuwam riŋ mehitseŋa ika miɗ təv madula aaka duwa, aà madula makərɗa dizl ana a ze hwaŋŋa lele ya . 2 Mburma Mbulum ata a fafəl, bazlam Mbulum ana, a gwaɗar tsik aà təv madula aaka dukw ata ya: « Təv madula aaka dukw aaha, təv madula aaka dukw aaha, tsaraka dukw ana BATSAH kwa ŋa a gwa ya. ‹ Araha ti ta we a kəla i gwala Dawda, ti ta ɗere a zləm Zuziyas, a ta betse a aka kər a, gà ɓəzla məbatsa dukw ana i gà təv mewisle, tə dulawa aaka kər gà makərɗa dizl ana a ze hwaŋŋa lele ya, dite ti ta dwile a aka kər a, gà atasl gà mburma asa mbaŋa . » 3 A pat ŋa ata ka, mburma Mbulum a tsik dukw mene a mburma ana BATSAH kwa ŋa a gwa a ta ge a ba ya: « Araha dukw mene a mburma ana a pete a dər ka, BATSAH kwa ŋa na a fafəl a, mazlazla təv mewisle aaha ka, a betse a ba ika ba ya, dite mimbeetir mawulazla gà məŋgəl, a nde a aka ahəɗ . » 4 I təv ana əbay Yerubuwam a tsaraka, bazlam mburma Mbulum ata a fafəl nda magala aka gər mazlazla təv mewisle ata i Betel a ka, a zla ahər ŋgar aka gər mazlazla təv mewisle ata, a gwa: « Gəsum ŋgat! » Ama ahər ana a zla, aka mburma Mbulum ata ya ka, a kula suraŋ, a sle à mime a dərra aba ŋgar a asa tsa. 5 Mazlazla təv mewisle ata, a bats ba ikaba ya, dite mimbeetir mawulazla gà məŋgəl ata, a nda diriŋ aka ahəɗ aà təv madula aaka dukw ata ya, kamala ana dukw mene à mburma ata, mburma Mbulum a tsik a kərga ana Mbulum a gwaɗar a. 6 I fata ya ka, əbay a gwaɗa a mburma Mbulum ata: « I gik kamkam, vəl magəsa gəzləŋ a BATSAH kwa ŋa Mbulum yak, hamar agəra iye, dite ka, ahər gà məmiŋara aàba ya te . » I fata ya ka, mburma Mbulum ata a kàkəsl gəzləŋ a BATSAH kwa ŋa. Dite ahər əbay ata a mà a aba ŋgar kamala ana piŋŋe ya. 7 əbay a gwaɗa a mala mburma Mbulum ata: « Tàma a ma gà, ka tə zəm duwa, kə ŋgat ndzəɗa, dite i ta vileke a dukw taf . » 8 Mburma Mbulum ata a gwaɗa a əbay: « Ku mege, ki ta viliŋa ka, mezehe ga yak tekeɗe ka, i pitse a a ga ma yak tsa. I zime a dukw mezime i ma yak a tsa, dite i se a yam, i təv aha ya tsa asa, 9 aɗaba taŋa ka, dukw ana BATSAH kwa ŋa a gweɗìŋ a: « Ki zime a duwa tsa dite ki se a yam tsa, dite asa ka, ki mbiɗe a gər a ma ndaka vatwa ana ka da dər a tsa asa . » 10 I fata ya ka, mburma Mbulum ata a zla vatwa ŋgiɗ, a mbəɗ gər a ma i Betel a ka, ndaka vatwa ana a da dərraha ya asa tsa.

Mala məma guma Mbulum a ɓəl aka məpala ahəm BATSAH kwa ŋa

11 Tsaatsa i Betel ka, mala məmà à bazlam Mbulum duwa riŋ mandawal ŋa. Gà ɓəza ŋgar, tə dara tə ɗamar dukw ana mburma Mbulum, a ge i Betel, a pat ŋa ata ya fit, nda gà bazlam ana a tsikeye a əbay ya fit mbaŋa. 12 Tsir tar a gwaɗa a tar: « A zla na vatwa wara? » Gà ɓəza ŋgar ti ɗifer a vatwa ana, ta ŋgatar a mburma Mbulum ata, a dara i Yahuda ya, a zla a da dər a. 13 I fata ya ka, a gwaɗa a gà ɓəza ŋgar: « Dzwìmiŋ lidza aka hezwèŋe ga. » Gà ɓəza ŋgar tə dzar aaka dite a tsəl aaka. 14 I fata ya ka, a zazam mburma Mbulum ata. A le ahər riŋ a mandzaŋa aà huɗ dizl Terebin, a gwaɗar: « Wànà kər ana mburma Mbulum ata, a dara ika ahəɗ Yahuda ya ya? » Wele ata a gwaɗar aaka: « Haya iye ŋa . » 15 Mala məma à guma Mbulum ata mandawal ŋa ya, a gwaɗar: « Dara tama a ma gà, kà ta sama yam. 16 Mburma Mbulum ata a gwaɗar aaka: « I sle a aà mimbìɗe a gər a dəba tsa, ku mege mada a ma yak a i sle a tsa. Ki zimim a akaba dukw mezime, kige tsa, ki seme a akaba dukw mese tsa na i faha ya. 17 Aɗaba araha na dukw ana BATSAH kwa ŋa a gweɗiŋ a: ‹ ki zim a duwa tsa, dite ki se a yam tsa na i faha ya, ki mbiɗe a gər a ma, ndaka vatwa ana ka da dərra ya tsa asa.› » 18 Tsam ka, mala məmà à bazlam Mbulum ata mandawal ŋa ya, a gwaɗar: « Iye mbaŋa ka, mala məmà à bazlam Mbulum kamala kər a. Gawla Mbulum a mìŋ à bazlam BATSAH kwa ŋa: « Mara aà ŋgat a dəba a ma yak a, ma zəm dukw mezime, ma sa dukw mese i ma yak a . » Tsaatsa a sasar ka, parsa. 19 I dəba ŋa ya ka, ta mbəɗara gər a, a zəm dukw mezime, a sa dukw mese i ma ŋgar a.

Azil a kəɗ mala məmà à bazlam Mbulum

20 Tsaatsa akahər ana tar riŋ aà mazəma dukw mezime mba ya ka, BATSAH kwa ŋa a gwaɗa a mala məmà à bazlam Mbulum ata mandawal ŋa, i Betel a, a mara à mala məma guma Mbulum ata aà vatwa ya. 21 I fata ya ka, mala məmà à bazlam Mbulum ata mandawal ŋa ya, a fafəl nda magala a mburma Mbulum ata a dara i Yahuda ya, a gwaɗar: « Araha na BATSAH kwa ŋa a gwa ya, aɗaba kàa tsalaba à segeme a gər, aka dukw ana BATSAH kwa ŋa a gwaɗak ge ya, dite kàa zazam məpala ahəm BATSAH kwa ŋa Mbulum yak tsa. 22 Kà mbəɗara gər a, ka zəm dukw mezime, ka sa dukw mese i faha, tsaatsa ka, BATSAH kwa ŋa aka mbər megweɗek ka, ki zime a duwa tsa, ki se a yam tsa. Aɗaba taŋa, ti tike a məməta yak a dive gà bàba gà tsir yak tsa . » 23 I dəba ana a zəm aba dukw mezime ya, dite a sa aba dukw mese ya ka, mala məmà à bazlam Mbulum ata mandawal ŋa ya, a dzar lidza aka hezweŋe a mburma Mbulum ata a mədərra à vatwa ya. 24 Wele ata a daba, azil a le ahər aà vatwa, a kəɗ ŋgat, dite məməta ŋa, ɓəlarra ika vatwa. Hezwèŋè ŋgar ata mehitseŋa i tsaka məməta ata, dite azil tekeɗe mehitseŋa ndaka tseke ŋgiɗ mbaŋa. 25 Gà mburma ana ti deye a nda taŋa ya ka, ta ŋgatawa məməta wele ata ika magər gà vatwa ɓəlarra, azil riŋ mehitse ŋa i tsaka məməta ata, tə da, tə ta ma aà labara ŋa, a huɗ kwite ata mala məmà à bazlam Mbulum ata mandawal ŋa, mandzaŋa iɗəm a. 26 I təv ana mala məmà à bazlam Mbulum ata mandawal ŋa a mbəɗara aà ŋgat gər ika vatwa ya, a tsaraka ka, a gwa: « Taŋa ka, Mburma Mbulum ana a tsala aba a segeme a gər, aka dukw ana BATSAH kwa ŋa a gwaɗar ge ya, BATSAH kwa ŋa na a vəl ŋgat a azil a, a haɓar à gà atasl ŋgar dite a kəɗ a kamala ana BATSAH kwa ŋa a tsikar a . » 27 Tsam ka, a gwaɗa a gà ɓəza ŋgar: « Dzwìmiŋ lidza aka hezweŋe gà » Tə dzar aaka. 28 A da, a le a aà məməta ata, ika magər gà vatwa ɓəlarra, araha, gà hezweŋe nda azil tar riŋ mehitseŋa aà guva ŋa. Azil ka, aka papəɗ tsa, dite aka sasa ikaba à hezwèŋe ya tsa asa. 29 Mala məma à guma Mbulum ata, a zla məməta mburma Mbulum aaha a tike aka hezweŋe ŋgar. A mbəɗ dərra gər a Betel a, tə tuwa, ti le. 30 A tike məməta ŋa a dive ŋgar, a tuwa, a gwa: « Waya, damər gà aka mət . » 31 I dəba ana a le aba ya ka, a gwaɗa a gà ɓəza ŋgar: « Na Yàa mət ka, ki ti tikwim a iye, a dive ana ti tike aɗəm məməta mburma Mbulum a. Ki ti dzume a gà atasl gà a təv gà atasl ŋgar. 32 Aɗaba BATSAH kwa ŋa na a vəlar vatwa, aà məfafəl aka gər təv madula aaka dukw ata i Betel a, nda gà, aà gà ga, gà təv mewisle ana i huɗ gà kwite Samariya ya. Dukw ana a tsik a ka, a ta ge a ba kaɗəŋ ndzer. 33 Akaba nda taŋa fit ka, Yerubuwam aka məlak aà mendze ŋgar ata ŋgwal ŋa tsiye tsa. A ndiɗik gər à mandzàkaya gà ɓəzla məbatsa duwa a mbulum ana ika gà təv mewisle ya, i liwiŋ gà mayahaba gər gà mburma ya hiywe. Na wura aka waya mene mala məbatsa duwa a Mbulum ka, a mbiɗere a mal a gər a ne a mala məbatsa duwa i gà təv mewisle. 34 Taŋa na bakal gà mburma Yerubuwam a, agəra taŋa na, ta bats tar, ti dzeye à tar ika gər ahəɗ a, fit kweleŋ a.