1 Əbay 12

Mekwere Isərayel a sas ba ikaba ya

1 Rubuwam a da a Sisem, i fata na gà Isərayel fit, tə daha aà məvəlar əbay a. 2 I təv ana Yerubuwam kəla Nevat a tsaraka taŋa ya ka, ar ka i Ezipt mba, daga ana a val à əbay Salumun a, a ndza ba riŋ i fata i Ezipt. 3 Tə slər mburma aà mazalaha a Yerubuwam. Tə dara, nda gà Isərayel a. Ta gwaɗa a Rubuwam: 4 « Dede yak ka, aka sle mə̀r za ka, kər kinehe ka, nikìɗ ika mə̀r, aà megemir ata dede yak a tike aka mə̀r mibeŋa ya te, i fata ya, mìi geweke megemir. 5 Rubuwam a gwaɗa a tar: « Dum kà mumara, i huɗ mehinne makər a . » Gà mburma ata tə da ba.

6 əbay Rubuwam a zal a gà bàba gà mburma ana tə ndza ɗa nda gà dede ŋgar a akahər ana riŋ nda are ya, ta gewar megemir a, a wiz aà tar metsehe. A gwaɗa a tar: « Metsehe wara na ki vilwimiŋ a dite ka, i ŋgeme a dər aka mewize gà mburma aaha ya? » 7 Ta gwaɗar aaka: na mbakum kàa ge tar dukw ana ta wiz a ka, na kàa tsik a tar gà ŋgwal gà bazlam, i fata ya ka, ti ne a gà ɓəzla meslire yak aà biybiy. 8 Ama Rubuwam aka gəs metsehe gà bàba ŋa ata ti tsikar a tsa. A da a təv gà ɓəza gà gawla ana ta gala akaba ba ya, ta gewer megemir a. 9 A gwaɗa a tar: « Metsehe wara na ki tsìkekwe a gà mburma aaha ta gwaɗìŋ ka, nikìɗ ika mə̀r à dukw ana dede yak a tike aka mə̀r a . »

10 Gà mandala ŋgar ata ta gala akaba ba ya ta gwaɗar: « Araha na dukw ana ki gweɗe a ter a aaka ya. Ki gweɗe a ter a ka, kəla ahər gà ka, a za ahər dede gà. 11 Dede gà ka, aka tike aka kurum mibe duwa, ama iye ka, i sikehe a aka kurum a à mibe dukw ata. Dede gà, a ɗife kurum à metsehe ka, nda megwiymbiɗ, ama iye ka i ɗe kurum a dər ka, nda makurakur . »

12 Gà Yerubuwam nda gà mayahaba gər gà mburma fit, tə dara a təv Rubuwam, i huɗ mehinne makər ŋa ata kamala ana əbay a pasla a tar ahər a, 13 əbay a məlak à metsehe gà bàba ŋana ana ti tsikar a, a fafəl a gà mburma ata nda arah ana ŋgwal ŋa tsiye, nda magala. 14 A fafəl a tar ka, nda mazazama metsehe gà mandala ŋgar ata ti tsikar a. Dede gà aka tike aka kurum ɗa mibe duwa, ama iye ka, i sikehe a dər. Dede gà aka gazla ɗa kurum, nda megwiymbiɗ, ama iye ka, nda makurakur. 15 I fata ya ka, əbay aka tike gər a metsehe gà mburma ata tsa. Aɗaba BATSAH kwa ŋa na riŋ a ge a megemir ata fit a. Aà maraha à dukw ana a tsik nda bazlam Ahiya gà Silu a, a Yerubuwam kəla Nevat a.

16 I təv ana gà Isərayel tə sər ka, əbay aka tike metsehe tar ata aà ahər tsiye ka, gà mburma ta gwaɗa a əbay: « Dukùla na a ləm akaba aà mə̀r nda gà gwala Dawda a? Dukw mə̀r akaba nda gà gwala Yese tsa? Takwa ba a ma kwa, kwa gà Isərayel. Kər ana ka zla təv mendze Dawda a ka, kwara ba yak. I fata ya ka, tə daba a ma » . 17 Ama gà Isərayel ana ika ahəɗ Yahuda ya ka, Rubuwam a kwara tar.

18 əbay Rubuwam a slər Aduram, aka gà Isərayel ana ika tseke are yam a. Aduram ka, mala aka miɗ gà ɓəzla megemir balaari. I təv ana a ndzeha ya ka, ta kalawa ŋgat nda kur, a mət. Rubuwam tsəma tsara a tsəl a muta piris, a be aà ba ŋgar a Yeruzalem. 19 Kərga taŋa ya, na haa mbakum ka, gà Isərayel ana ika tseke are yam a, ta gəsawa aàba ahəm nda gà gwala Dawda tsiye hiywe.

20 I təv ana gà Isərayel ana ika tseke are yam a fit, tə tsaraka ka, Yerubuwam aka mara ya ka, tə slər mburma aà mazalaraha, a batsah mayahaba gər gà mburma. Ti tike ŋgat a əbay aka gər gà Isərayel. Say gà gwala Yahuda ɗekɗek na tə ndikìɗ gər à zazam gà gwala Dawda a.

21 Rubuwam a ndzeha a Yeruzalem, tsara ka, a yaha gər a gà gwala, gà Yahuda fit. Nda gà gwala Bendzamen, ta ŋgat mburma dəbuw dərməka nda dzik tsamakər (180 000) gà ŋgwal gà ɓəzla guvəl, aà mege guvəl aà gà Isərayel ana ika tseke are yam a, Aà məma à mekwere a ahər Rubuwam kəla Salumun aà makwara tar. 22 Ama Mbulum a fafəl a Shimaya mburma Mbulum, a gwaɗar: 23 « Fafəl a Rubuwam kəla Salumun əbay gà Yahuda, tsik a gà mburma gà Yahuda fit, nda gà mburma gà Bendzamen nda gà asiŋ gà mburma ka, 24 iye BATSAH kwa ŋa i gwa ka, kà dum a guvəl tsa. Kə gwim guvəl nda gà Isərayel tsa, tar ka, gà damər kurum. Ku mege weke mə mbəɗ gər a ma ŋgar. Aɗaba iye na a ge dukw ata ya . » Tə dza zləm a bazlam BATSAH kwa ŋa ata, Ku mege weke a mbə̀ɗaba gər a ma ŋgar kamala ana BATSAH kwa ŋa a tsik a tar a.

25 Yerubuwam a zlazl zlagam aà kwite Sisem ana ika ahəɗ gà kwite Efərayim a, aà makasla ŋgat. A ndza i huɗ kwite ata. A da i fata ya ka, a zlazl huɗ kwite Penuwel. 26 I fata ya ka, Yerubuwam a gwaɗa a ba, kinehe ka, mekwere a ta me a ahər gà gwala Dawda. 27 Na gà mburma aaha tàa da a Yeruzalem aà məbatsa duwa a ga BATSAH kwa ŋa ka, gəzləŋ tar a ta mbiɗe a aba a təv batsah tar ŋa Rubuwam əbay gà Yahuda. Ti ta kiɗe iye, ta me a a təv ŋgar.

28 Yerubuwam a wiz gà metsehe. A vaɗa gà ɓəza gà sla sula nda gura, a gwaɗa a gà mburma: « Ka dawum a Yeruzalem ka, sik diŋ diŋ! Taŋa ka, aka sle ide. Isərayel, araha na gà mbulum kurum ana tə ndzəkara kurum ika ahəɗ Ezipt ya. 29 A tike ilik ŋa a Betel, biy ŋgiɗ aaha a tike a Dan. 30 Kərga taŋa ya na a bana tar a bakal a, gà mburma tə laka sla ata masula ŋa ya ndisl a Dan. 31 A geye gà ga təv mewisle. A ndzàka ika magər gà mburma ana tar gà gwala Lewi tsiye, a neye a à tar gà ɓəzla məbatsawa duwa a mbulum tar.

32 Yerubuwam a tike batsah megirive nda mehinne 15 nda kiye matsamakər ŋa. Kamala batsah megirive ana a gewa ba ika ahəɗ Yahuda ya. əbay a bats gà duwa aka təv mewisle ata. A ge kamala taŋa ya mbaŋa i Betel. A bats duwa, a gà ɓəza gà sla ata sula a vaɗaya ya. A dzək gà ɓəzla məbatsa duwa ŋgiɗ i Betel, aà mege megemir i təv mewisle ata. 33 A vəl dukw taf aka gər təv mewisle ata a zlazl i Betel a. I huɗ mehinne kurwa gər ŋgar əzləm (15) nda kiye matsamakər ŋa, kiye ana ŋgat ŋa a dzala i gà gər ŋgar a zla ya. A ge megirive a gà Isərayel fit. A dùl gà dukw ana a ze hwaŋŋa lele ya, aka gər gà təv mewisle ata