1 Əbay 11

Salumun aka zazam BATSAH kwa ŋa hiywe tsa

1 əbay Salumun aka waya ɗa, gà dəm gà slele hinne: A zla dəm Firawna, əbay gà Ezipt, gà dəm gà Muwabiya, gà dəm gà Ammuniya gà dəm gà Edumiya, gà dəm gà Siduniya, nda gà dəm gà Hittiya. 2 Tsaatsa ka, BATSAH kwa ŋa a gwaɗa a gà Isərayel, aka gər gà mayahaba gər gà mburma ata: « Ka ta gawum ba nda gà mburma ata tsa, tar tekeɗe tə ta gaw ba nda gà kurum tsa. Tsəka ti ta bene a kurum aà mazambaɗa à gà mbulum tar . » Ama Salumun aka waya gà məkəs ata, a dan ba aà tar. 3 Gà mandərkwasla gà məkəs Salumun ka, dərməka təsəla (700). Dite gà kəra gà məkəs ŋgar dərməka makər (300). Gà məkəs ata fit tserdze ya, ta mbə̀ɗar à gəzləŋ a Salumun. 4 I təv ana Salumun a ge mandawal a ka, gà məkəs ŋgar ata ta mbə̀ɗar a gəzləŋ aà mazazam gà mbulum ŋgiɗ. Kərga taŋa ya na, aka waya BATSAH kwa ŋa Mbulum ŋgar kamala dede ŋgar Dawda a asa tsiye. 5 Salumun a zazam mbulum gà Siduniya məkəs ŋana zləm ŋgar Astarte ya, a zazam Milkun mbulum gà Ammuniya ana ŋgwal ŋa tsa ndeyndey ya mbaŋa. 6 Salumun a gewa ka, dukw ana ŋgwal ŋa tsa ndeyndey na i təv are BATSAH kwa ŋa ya, aka zazam BATSAH kwa ŋa nda ndzer kamala dede ŋgar Dawda a tsa. 7 I fata ya ka, Salumun a zlazlaya gà təv mewisle aka gər kwite ana ser aka Yeruzalem a, a mbulum gà Muwabiya ana tə zalar Kemus, ŋgwal ŋa tsa ndeyndey ya, dite a Muluk mbulum gà Ammuniya ana ŋgwal ŋa tsa ndeyndey a asa mbaŋa. 8 A zlazlaya, kataya a gà mbulum gà məkəs ŋgar ana fit, a ndzakara tar i slele ya ya. Aà dite tə dùlawa aaka gà dukw ana a ze hwaŋŋa lele ya, dite nda məbatsar gà dukw gənaw a gà mbulum tar ata. 9 BATSAH kwa ŋa a ge matsəɓatsəɓ aka gər Salumun aɗaba ana gəzləŋ ŋgar aka mbəɗ aba i təv BATSAH kwa ŋa Mbulum gà Isərayel a, tsaatsa ka, aka a patayar aba sik sula. 10 Ama aka mbər metsikar aba ya parakka ka, ka tə dza gurmits a bəɗ aka miɗ gà mbulum ŋgiɗ tsa. Ama Salumun aka gəs ahəm aà dukw ana BATSAH kwa ŋa a tsìkar a tsa. 11 BATSAH kwa ŋa a gwaɗa a Salumun, kàa ge ŋgwal tsa, kàa tike gər a masla ma nda məpala ahəm gà tsa, a dukw ana i tsikik a tsa ka, Kinehe ka, i zle a aà kər mekwere ya, dite i vile a a mala meslire yak ilik. 12 Agəra tsir yak Dawda, i zle a a kər əbay ya tsa, na kər riŋ nda are mba ya. Ama i ti zle a əbay ka, ihər kəla yak a. 13 Ama ka, i zle a ihər mekwere ya fit tsa. I misekere a à gwala ilik agəra dede yak Dawda nda Yeruzalem kwite ana i zla ya.

Gà ɓəzla mene are Salumun

14 BATSAH kwa ŋa a sləraha mala mene are ilik aka Salumun. Zləm ŋgar Hadad gà Edumiya, a dara ka i gwala əbay gà Edum a. 15 Gà dukw ata a ge ba ka, akahər ana Dawda a mba aà gà Edumiya ya. Dite Zuwab mala aka miɗ gà sliwdze ŋgar, a da a huɗ kwite a melèyè gà məməta gà sliwdze gà Isərayel ana ta mata aà miɗ guvəl a ya, dite ta bats gà asləka gà mburma hinne i Edum a. 16 Gà Zuwab nda gà Isərayel tə ndza riŋ i fata, kiye ndilik. Haa tə ndəv aà məbatsa gà asləka gà mburma ana i Edum a fit. 17 Ama Hadad ka, gawla ŋa mba, tə təz a aba nda gà asiŋ gà Edumiya ana gà ɓəzla meslire dede ŋgar a, aka ahəɗ Ezipt. 18 Gà Hadad nda gà mburma ŋgar ta hitsera i Madiyan a, ti ndze aka mandazla Paraŋ, tə ndzək dər gà asiŋ gà mburma ana i Paraŋ a. Tə da a təv Firawna, əbay gà Ezipt. əbay ata a vəlar ga, a hənawa iɗəm. A dzàyar gà dukw mezime dite a sasar ahəɗ. 19 Hadad a ŋgat medze are tsehe i təv əbay Firawna ya. A vəlar wudama ŋgar aà daala. damər məkəs ŋgar Tahpenes. 20 damər Tahpenes ata a war kəla a ɗər zləm Genubat. Tahpenes a gəl kəla ata i bəra Firawna. Gà Genubat ta gala akaba ba, nda gà ɓəza Firawna.

21 Hadad a tsarakaha a Ezipt a ka, gà Dawda nda Zuwab mala aka miɗ gà sliwdze ŋgar ka, tàa mata. I fata ya ka, a gwaɗa a əbay Firawna, viliŋ vatwa i mbiɗe a gər a kwite gà.

22 Firawna a gwaɗar: « Dukùla na i təv gà kàa ŋgat tsiye, na ka waya ki mbiɗe a gər a kwite yak a ? . » A gwaɗar aaka: « Duwa riŋ tsa, ama kəla ka, viliŋ vatwa i mbiɗe a gər pərra . »

23 Mbulum a slə̀raha aka Salumun mala mene are ŋgar ŋgiɗ pam asa, zləm ŋgar Rezun kəla Eliyada ana a valara piŋŋe i bəra Hadadezer batsah ŋgar ŋa, əbay gà Tsubiya ya. 24 Akahər ana Dawda a bats gà mburma gà Hadadezer a ka, Rezun a yaha gər a gà mburma aka miɗ ŋgar, a ne mala aka miɗ tar a. Tə da a Damas, tə ndza riŋ i fata a ne əbay tar.

Ga Rezun nda Hadad ka, gà ɓəzla mene are gà Isərayel

25 Rezun a ne mala mene are gà Isərayel ka, i huɗ mandza aà bəra Salumun a. Kamala Hadad ana a gewa a tar gà dukw ana gà ŋgwal ŋa tsiye. Rezun a ne mala mene are aà gà Isərayel ka, akahər ana ŋgat əbay gà Siriya ya.

Yerubuwam a hitse a aà əbay Salumun

26 Yerubuwam mala meslire Salumun, kəla Nevat, gà Efəratiya ana i Tserida ya, mama ŋgar Tseruya ka, madakwa ŋa, ama a zla ahər ŋgar a mbulum aka əbay Salumun. 27 Araha akahər wara na a ŋgat vatwa aà mazla ahər ŋgar a mbulum aka əbay ya: Akahər ana Salumun riŋ zlezle a məvah Milu a, dite riŋ a rereɗe a gà biye ana aà zlagam huɗ kwite Dawda a. 28 Yerubuwam ka, kəla gawla ana ndzəɗa ŋa, yam a dzar are tsiye. Salumun a pər ahər meme na riŋ a ge a megemir a ka, a zla ŋgat a ne aà ŋgat mala aka miɗ gà ɓəzla megemir ŋgar ana i gwala Yusufa ya.

29 Akahər ata, Yerubuwam a dere a i Yeruzalem a ka, tə ləma aà vatwa nda mala məmà à bazlam Mbulum Ahiya ana i Silu a, ar nda gà awiya baramusa aà ɗa, Tar ka, susula na i dala i fata ya. 30 Ahiya a zlara baramusa ŋgar ata awiyaŋa ya, a kwayaɗaya dər ika ba ya 12. 31 I fata ya ka, a gwaɗa a Yerubuwam, ndzək 10 biy yak, aɗaba araha na BATSAH kwa ŋa Mbulum gà Isərayel a gwa ya: « I ti zle a mekwere gà Isərayel ihər Salumun a, a dzeke a gà gwala kurwa. 32 Ama gwala ilik ka, a mitseriŋa, agəra mala meslire gà Dawda dite agəra huɗ kwite Yeruzalem asa mbaŋa, huɗ kwite ana i zla i liwiŋ gà huɗ kwite gà Isərayel fit a. 33 I ta ge a taŋa ka, agəra ana a məlak aà iye, a dza gurmits a bəɗ a Astarte mbulum gà Siduniya məkəs ŋa ata, a Kemus mbulum gà Muwabiya, dite a Milkum mbulum gà Ammun, dite aka zazam vatwa gà, aà mege dukw ana i waya ya, nda magəsa ahəm aà gà məpala ahəm gà, nda dukw ana i hitse dər kamala tsir ŋgar Dawda a tsa. 34 Ama ka, i zle a mekwere ihər ŋgar a fit tsa. Aɗaba Yàa ne à ŋgat əbay i huɗ mandza a bəra ŋgar a fit. Taŋa ka, agəra Dawda mala meslire gà ana i zla ya. Aka zazam gà dukw ana i tsikar a nda məpala ahəm gà ya. 35 Ama i ti zle a mekwere ihər kəla Salumun a, i ti dzeke a à kər Yerubuwam, gà gwala kurwa (10). 36 Ama i miseke à gwala ilik a kəla ŋgar dite ka, wura ma gewa riŋ ika əbay hiywe i gwala Dawda mala meslire gà ika miɗ gà i Yeruzalem. Taŋa ka, kwite ana i zla, ti zlibewe a iɗəm à zləm gà ika magər kurum aà biybiy ya. 37 Kər Yerubuwam ka, i zla kər ki ne a əbay ika gər gà Isərayel kamala ana ka waya ya ^ª. 38 Na kàa dza zləm a dukw ana i gwaɗak ge fit a, na kàa zazam vatwa gà, na kàa ge dukw ana ŋgwal ŋa i təv are gà ya, nda magəsa ahəm aà gà məpala ahəm gà nda gà dukw ana i hitse dər a, kamala Dawda mala meslire gà ya ka, i fata ya ka, i ndze a nda kər. I ge a dukw ana gà gwala yak hiywe ti ndzewe a ɗa ika mekwere ya, kamala ana i ge à Dawda a. I dzeke a gà gwala gà Isərayel ahər yak. 39 I fata ya ka, i ti nìkìɗe a à gà gwala Dawda a bəɗ, agəra bakal^ª Salumun ana a ge ya, ama ka, aà biybiy tsa.

40 I fata ya ka, Salumun a waya makəɗa Yerubuwam, ama Yerubuwam a val aba aka ahəɗ Ezipt a təv Sisak əbay gà Ezipt. A ndza riŋ i fata tsikw aà məməta Salumun . 41 Gà mezehe gà labara Salumun ŋgiɗ, gà dukw ana a geye ya fit, nda gà metsehe ŋgar, fit ka, tàa wetseye a wakita labara Salumun. 42 Salumun a kwara gà Isərayel fit i Yeruzalem ka, mive dzik faɗ (40). 43 Akana Salumun a mət a ka, ti le ŋgat a kwite Dawda tsir ŋgar. Kəla ŋgar Rubuwam a zla təv mendze mekwere ŋgar.