1 Əbay 10

Məkəs əbay gà Sabba a da məpəra aka Salumun

1 Məkəs əbay gà Sabba a tsaraka batsah meɗe zləm Salumun, ana a ŋgat agəra zləm BATSAH kwa ŋa ya, məkəs ata a dara a təv ŋgar a, aà medzìkè à ŋgat, nda mewizeye ahər gà mewize ana gà mawuraba ŋa, ma ŋgama aaka ŋa ka, mawuraba ŋa hinne ya. 2 A dara a Yeruzalem a ka, gà mburma hinne na tə zazamara ŋgat a, nda gà zlìgwèmè, nda gà wirdè aà tar hinne. Gà gura nda gà kur ana tsakala ŋa hinne à sikim a ba tsiye ya. A da a təv Salumun, a wizeye ahər gà dukw ana a waya mewizeye ahər a fit. 3 Salumun a ŋgamayar, aka gà mewize ŋgar ana a wizeye ahər a fit kweleŋ a. Mewize ŋgiɗ riŋ ilik na aka zar ndzəɗa ya tsa. 4 Məkəs əbay gà Sabba ata, a tsaraka mifefile Salumun ata ka, gà metsehe iɗəm hinne, a ŋgat a ga ana a zlazl a fit. 5 A ŋgata gà dukw mezime ana ika miɗ ŋgar a, dite ga gà ɓəzla megemir ŋgar, gà megemir tar, nda gà petek tar, nda gà ɓəzla məmandzaraya gà dukw mezime nda gà dukw mese ŋgar, nda gà dukw matawala fəla ana tə dulawaha a Mbulum fit kweleŋ i ga BATSAH kwa ŋa ya. A fər aà gà dukw ata ka, a ge ahər kamala dukw mene aà mburma ya. 6 I fata ya ka, a gwaɗa a Salumun: « Ika ahəɗ kwite gà ka, Yàa tsaraka gà mifefile aka gər yak nda gà metsehe yak, gà dukw ata tserdze ya ka, ndzer kaɗəŋ. 7 Ama aka taŋa ka, Yàa ger gər tsa, say iye ŋa i dara ndisl i ŋgatar nda are gà. Ama na i tsaraka ya ka, a sle aà mezehe kwizikw tsidze. Gà metsehe yak nda gà limana yak a ka, tə za gà dukw ana i tsaraka ya fit. 8 Maŋgayaba a zlara a gà mburma ana i ga i ma yak a, maŋgayaba a zlara a gà mburma ana ta gawak megemir ika miɗ yak kəla pat a, Tə dzawa a zləm a metsehe yak a. 9 Mipise ahəm mege biy BATSAH kwa ŋa Mbulum yak ana a zla kər, a tike kər aka makwara gà Isərayel a. Aɗaba ana BATSAH kwa ŋa a waya gà Isərayel aà biybiy ya, agəra taŋa na a tike kər a əbay dite ka, kə kwara gà mburma ndaka vatwa ŋa, nda magəsa ahəm aà gà məpala ahəm . »

10 I fata ya ka, məkəs əbay ata, a dza gà gura, a əbay Salumun a ge a kiliw dəbuw makər nda dərməka əzləm (3 500), gà wirdè nda gà kur ana tsakala ŋa hinne a sìkim a ba tsiye. Daga a gər pat ŋa ata ya ka, wura aka ŋgata a gà wirde nda taŋa ide, tàa ndzəkaha a Isərayel ilik asa tsidze, na məkəs əbay gà Sabba ata a dzàɗa a Salumun a.

11 Gà zlə̀lah yam əbay Hiram ana tə ndzakara gà gura ika ahəɗ Ufir ka, tàa ndzakaha gà dizl Santal hinne, nda gà kur ana tsakala ŋa, hinne à sikìme a ba tsiye asa mbaŋa. 12 Nda gà dizl Santal ata ka, əbay a geye dər zlagaw, a ga BATSAH kwa ŋa nda biy ga əbay. A geye dər gà dukw maslawa megirive, gà gandzavəl a gà ɓəzla malaha dimis. A gər pat ŋa ata ya, haa mbakum ka, wura aka ŋgata a gà dizl Santal ata tàa ndzakaha a Isərayel diydiy nda taŋa ide asa tsidze. 13 əbay Salumun a dzàɗa a məkəs əbay gà Sabba ata, gà dukw ana gəzləŋ ŋgar a waya ya fit a. A dzar aaka gà dukw ana, say əbay Salumun ilik na a sle aà madzàŋa ya. I dəba ŋa ya, ta mbə̀ɗaba gər a ma, nda gà mburma ŋgar.

Gà limana Salumun

14 Kəla mive ka, əbay Salumun a ŋgatawa gura kiliw dəbuw dzik səla (20 000). 15 Tàa ɗama aɗəm mala ana gà ɓəzla madzawa à duwa tə dzawar dzaŋgal ŋa ya, ika gər gà dukw ana tə dawa dərra ika ahəɗ ŋgiɗ a tsa, nda gà hadam gà əbay Arabiya ya, nda gà biy gà ɓəzla makwara ahəɗ ŋgar a tsa.

16 əbay Salumun a vaɗa gà bàba gà slakwa dərməka sula (200) nda gura. Kəla slakwa ka, kiliw gura ndilik. 17 A vaɗa gà ɓəza gà slakwa, dərməka makər (300), a geye ahər gura, kəla slakwa ka, a da ahər kiliw gura ilik nda mezehe ŋa. əbay a dza gà slakwa ata, a ga ana tə zalar ga ɗaf Liban a.

18 əbay a və̀ɗ batsah təv mendze nda zlir mbele, a bah ahər gura ana za iɗəm tsiye. 19 Təv mendze ata ka, gà təv metsile ihər ndilik. Dəba ŋana ka, kəɗəwurwur. Gà ahər ihər aà guva, aà guva. Ta papaza gà mendzikiɗe ba gà azil sula, ta hitseye dər kəla aà guva ahər ata. 20 Gà mendzikiɗe ba gà azil ŋgiɗ kurwa gər ŋgar sula(12) ika gà təv metsile ata ndilik a, aà guva aà guva. Tàa ge medzibe gà dukw ata ilik ika ahəɗ ŋgiɗ tsa.

21 Gà dukw masa duwa əbay Salumun fit ka, nda gura, dite gà dukw maslawa zlaŋgwaɗ ana i ga ɗaf Liban a ka, nda gura ana terhin terhin a. Duwa riŋ ilik na megeŋa nda ndzemde məvə̀ɗa kur siŋgwe ya tsa. Aɗaba akahər mekwere əbay Salumun a ka, duwa riŋ na tàa vaɗaya nda ndzemde məvə̀ɗa kur siŋgwe ya tsa. 22 Gà muta yam əbay riŋ, a slərawa tar nda gà biy əbay Hiram diriŋ. I huɗ mive makər a, na gà muta yam ata ta mayawara, maràhàya ŋa nda gà gura, siŋgwe, zlir gà mbele, gà bìre nda gà zìrwe ya.

23 əbay Salumun a za gà əbay ŋgiɗ ana ika gər ahəɗ a tserdze, nda limana dite nda metsehe. 24 Gà mburma ana ika gər ahəɗ a, ti yahawa vatwa aà maləma akaba nda gà Salumun, aà mandza zləm a metsehe ŋgar ana Mbulum a vəlar a. 25 Kəla mive ka, gà mbəlakw ana tə dawaha a təv ŋgar a, tə ndzàkawar dəraha gà dukw taf: 'gà dukw ana məvəɗaŋa nda ndzemde məvə̀ɗa kur siŋgwe ya, nda gura ya, gà petek, gà dukw ahər, gà wirdè, gà piris nda gà mule. 26 Salumun a yaha gər a gà muta piris guvəl ŋgar ka, dəbuw nda dərməka faɗ (1 400) gà ɓəzla matsala aaka ŋa ka, dəbuw kurwa gər ŋgar sula (12 000). A dzaya tar a gà huɗ kwite ana gà təv mandzəba gà sliwdze iɗəm a. Gà asiŋ ŋa ka, a məsak à tar i Yeruzalem i təv ŋgar. 27 Agəra əbay, na gà ndzemde məvə̀ɗa kur siŋgwe a ge riŋ i Yeruzalem hinne, kamala gà kur a. Dite asa ka, gà dizl seder riŋ hinne, dirikikke, kamala gà kàvə̀ra ana ika varavada ya. 28 Gà piris Salumun ka, tə ndzàkawarra ka, i Ezipt ya, nda gà i Silisiya. Gà ɓəzla masakamar ŋa, tə sakamawar a ka, i Silisiya ya. 29 Muta piris guvəl ana a dara ika ahəɗ Ezipt ya, ilik ŋa ka, kur siŋgwe dərməka ndilik (600). Dite piris ilik mbaŋa ka, kur siŋgwe dərməka nda dzik əzləm (150). Gà ɓəzla masàkàmà ŋa ata ka, tə sakamawara a gà əbay gà Hittiya nda gà Siriya ya mbaŋa.