1 Əbay 9

Mbulum a ŋgama aka meheme Salumun

1 I dəba ana əbay Salumun a ndəv aàba aà mazlazla ga BATSAH kwa ŋa, nda ga əbay, nda gà dukw ana ŋgat a waya aà mege ya tserdze ya ka, 2 BATSAH kwa ŋa a patar aàba masula ŋa kamala ana a patar aàba i Gabawun a. 3 BATSAH kwa ŋa a gwaɗar:

« Yàa tsaraka meheme yak, nda mege kamkam yak ana ki giŋ a, i ne a tsəɗaŋŋa aà ga aaha ka zlazl, ti zlibewe a iɗəm à zləm gà aà biybiy ya, gà are gà nda gəzləŋ gà ka, ti ndzewe a iɗəm aà biybiy.

4 Na kər, mede yak aka ge ika miɗ gà kamala tsir yak Dawda a, nda gəzləŋ yak ilik a, nda mege dukw ana ndzer a, na kàa ge dukw ana tserdze i gwaɗak ge ya, na kàa gəs ahəm aà gà dukw ana i hitse dər a, nda gà məpala ahəm gà, 5 na kàa ge kataya ka, təv mendze mekwere gà Isərayel a ndze a hiywe i ahər yak aà biybiy, kamala ana i tsik a Dawda tsir yak a: '' Wura ilik i gwala yak a, a ti ndzewe ika təv mendze mekwere gà Isərayel hiywe, i dəba yak ka ''.

6 Ama kurum nda gà gwala yak, na kàa mbə̀ɗwìmiŋ a dəba, kàa ɓəlum aka məpala ahəm gà, nda gà dukw ana i tsik a kurum a, na kàa zambaɗum à gà mbulum ŋgiɗ, kàa dzum a tar gurmits a biye, 7 na kàa gwim kataya ka, i ta gwitse a ikaba aà gà Isərayel ika ahəɗ ana i vəl a tar a. I ye a ga ana i ne dər tsəɗaŋŋa biy mazambaɗa iɗəm à zləm gà ya, a dala diriŋ. I fata ya ka, gà mayahaba gər gà mburma fit tserdze ti ta sewle a aà gà Isərayel, dite ti ndeveye a teriŋa. 8 I təv ana gà mburma tàa da nda təv batsah ga Mbulum ata, a ne təv mayaha gər gà kur a ka, a ge a à ter a kamala dukw mene aà mburma a ya, ta fefìkwe a aheriŋa, dite ta gweɗiŋ a: « Aàla na BATSAH kwa ŋa a ge aà kwite aaha nda batsah ga Mbulum aaha kamala naha ya ya? » 9 Ta gweɗe a a terekiŋa : « Agər ana tàa məsak à BATSAH kwa ŋa Mbulum tar ana a ndzəkara gà tsir tar ika ahəɗ Ezipt a ya, agəra ana tàa zambaɗa a gà mbulum ŋgiɗ a, tə dzawa tar gurmits a biye, tàa ge a tar megemir a. Aɗaba taŋa, na BATSAH kwa ŋa a vəl a tar gà mesewere are aaha fit a.

Gà asiŋ gà megemir ana Salumun a ge ya ya

10 I huɗ mive dzik səla (20) ya, na Salumun a zlazla gà ga aaha sula ya, gà ga BATSAH kwa ŋa nda biy əbay ŋgar a. 11 Hiram əbay gà Tir a dzàha a Salumun gà dizl seder nda gà dizl sipir nda gà gura ana Salumun a wiz fit a, kamala ana gəzləŋ ŋgar a waya ya. I fata ya ka, əbay Salumun a dza a Hiram gà bàba gà huɗ kwite dzik səla (20) ika ahəɗ Galile. 12 I fata ya ka, ka, Hiram a dara i kwite Tir a, aà masamata gà huɗ kwite ana əbay Salumun a dzar a ka, ama a dar a gər tsa. 13 Hiram a gwaɗar « damər gà, gà huɗ kwite aaha ka dzeɗìŋ a ka, a giŋ a ŋgulum tsa. Agəra taŋa na tə zalawa a ahəɗ ata haa mbakum ka, ahəɗ Kabul a. 14 Tsaatsa ka, Hiram aka dzàha a Salumun gura kiliw dəbuw makər nda dərməka əzləm (3 500).

15 əbay Salumun a tike megemir balaari aà gà mburma, aà mazlazla batsah ga mbulum BATSAH kwa ŋa, ga mekwere əbay ŋgar, nda mazlazla məvah Milu, nda gà zlagam Yeruzalem, dite nda gà huɗ gà kwite Hatsur, Megiddu nda Gezer. 16 Firawna əbay gà Ezipt a ge guvəl aà Gezer, a zla ahəɗ kwite ata, a wànà iɗəm a, dite a bats iɗəm gà Kananiya ana tə ndzawa iɗəm i huɗ kwite ata ya. A vəl huɗ kwite ata kamala dukw taf ŋa ya, a dəm ŋgar akahər ana a da a zal a bəra Salumun a. 17 Aɗaba taŋa na Salumun a mà aà mazlazla huɗ kwite Gezer nda gà kwite Bet-Hurun ana i bəɗ a, a bəra, 18 gà Baalat nda Tamar ana i dala i kusak ika ahəɗ kwite ata ya. 19 A zlazla gà huɗ kwite ana a dzawa aɗəm gà dukw mezime ŋgar a, gà muta piris ŋgar a, dite gà huɗ kwite ana gà piris ŋgar tə ndzawa a iɗəm a. A zlazla gà dukw ana tserdze a waya ya, i huɗ kwite Yeruzalem a, i Liban a, dite ika ahəɗ gà kwite ana aà huɗ mekwere ŋgar a fit tserdze.

20 Gà asiŋ gà mayahaba gər gà mburma ana ti zeha iɗəm a ka, gà Ammuniya, gà Hittiya, gà Perizziya, gà Hivviya, nda gà Yebusiya ana tar gà ɓəza Isərayel tsiye. 21 Gà ɓəza tar ana ti zeha i dəba tar a, nda gà asiŋ ŋana gà Isərayel tàa bats tar tsiye ka, Salumun a tike aà tar megemir balaari, haa mbakum ka, tar riŋ ta hinnere a à gər a bəɗ. 22 Ama gà Isərayel ka, Salumun aka ne aà tar gà ɓele tsa. Ama tar ka, gà sliwdze guvəl, gà ɓəzla aka miɗ gà sliwdze, gà ɓəzla megemir ŋgar, nda gà ɓəzla aka miɗ gà ɓəzla matsala a gà muta piris, nda gà ɓəzla aka miɗ gà ɓəzla matsala aka piris. 23 Gà mburma dərməka əzləm nda dzik əzləm (550) na ika miɗ gà ɓəzla megemir ndzəɗa Salumun a. Tar na ta pir a, aà megemir ana gà mayahaba gər gà mburma ta ge a ya.

24 Dəm Firawna ata, a ndə̀zl i kwite Dawda a, a ga ana tə zlazlar a. I dəba taŋa ya na, Salumun a zlazl məvah Milu a.

25 Salumun a dzawa gà dukw taf matawala fəla ana tə dulawaha a Mbulum fit kweleŋ a, nda biy matawala fəla magawuba gà mburma nda Mbulum, sik makər i huɗ mive ya, aka gər təv madula aaka duwa a Mbulum ana tə zlazl a BATSAH kwa ŋa ya. A dùlar gà dukw ana a ze hwaŋŋa lele ya, ika miɗ BATSAH kwa ŋa^ª. Kərga taŋa ya na Salumun a ndəv a megeye aɗəm gà duwa a ga ata ya. Biy ana ka, ga ata mege megemir ana tə zlazl dər ahər a.

26 Salumun a papaza gà zlə̀lah yam i Essiyum-geber bise nda Ela, aà guva duluv Awasl ana ika ahəɗ kwite Edum a. 27 əbay Hiram a sləraha gà mburma ana tə sər məpaka slə̀làh yam a, a Salumun, ta gaw ba nda gà biy Salumun. 28 Tə da a Ufir tə ndzakara iɗəm gà gura ya, a za kiliw dəbuw kurwa gər ŋgar sula (12 000), tə dza a əbay Salumun.