1 Əbay 8

Tə zlara sahər magəsa masla nda BATSAH kwa ŋa a batsah gà Mbulum a

1 I fata ya ka, Salumun a yaha gər a gà bàba gà mburma ana i Isərayel a fit, gà ɓəzla aka miɗ ana i gà gwala ya, gà ɓəzla aka miɗ gà ɓəzla ga, gà mburma ana ika kwile ŋa ilik a. A yaha tar gər a təv ŋgar a Yeruzalem aà mazla sahər magəsa masla BATSAH kwa ŋa a ga ana ta zlazlar awiya ŋa ya. Tə zlara ka, i kwite Dawda i Siyuŋ a, a ga BATSAH kwa ŋa. 2 Gà mburma gà Isərayel fit tə yahàba aaha gər a təv əbay Salumun nda matəsəla ŋa, kiye Etanim, akahər megirive, mekiriwe ga petek. 3 Akahər ana gà bàba ŋana i Isərayel fit a tə ndzeha ya ka, gà ɓəzla məbatsa duwa a Mbulum tə zla sahər magəsa masla ata. 4 Gà ɓəzla məbatsa duwa a Mbulum nda gà gwala Levi tə ndzək dər gà sahər magəsa masla ata, nda gà mekiriwe ga petek, nda gà kazlaŋa megemir ana i ga mekiriwe gà petek ata tsəɗaŋŋa ya. 5 I fata ya ka, gà əbay Salumun nda gà mayahaba gər gà Isərayel fit na tə daha a təv Salumun aka miɗ sahər ata ya. Ta bàtsaya, gà təmaŋ nda gà sla hinne, a ɗeme a ba tsa. 6 I fata ya ka, gà ɓəzla məbatsa duwa a Mbulum tə zlara sahər magəsa masla BATSAH kwa ŋa ata ya, a təv ana tə ləmbaɗar aàba i huɗ ga ana tsəɗaŋŋa ndeyndey ya, ti tike aà huɗ gà gwezleviyek gà sereben ata sula ya. 7 Aɗaba gà sereben ata ka, ta pà aà gà gwezleviyek tar aka gər təv ana te tike aɗəm sahər ata ya. kərga taŋa ya na a kasla gà sahər ata nda gà zəva ŋa ya. 8 Gà zəva ŋa ata ka, gà zababul ŋa, na wura i ga ata tsəɗaŋŋa ya ka, aka pər ser ndaka biye hərmaga mada a ga ata tsəɗaŋŋa ya ka, a ŋgetaha a gà mendzwìl gà zəva ata . Ama kər i bəra ka, ka sle aà maŋgataraha tsa. Tar riŋ haa mbakum. 9 Dukw ana i sahər ata ya ka, gà beeliŋ kur ana ta wetse ahər gà məpala ahəm Musa ya, sula. Duwa ŋgiɗ iɗəm tsa. say gà beeliŋ kur ata sula Musa a dza aɗəm a. A ndzəkara ka, i kwite Hureb a, akahər ana BATSAH kwa ŋa a gəs masla nda gà Isərayel aka mede tar ana tə dara ika ahəɗ Ezipt a ya.

10 I təv ana gà ɓəzla məbatsa duwa a Mbulum tə dara i huɗ ga ata tsəɗaŋŋa ndeyndey ya ka, hulɓukw a rah a batsah ga BATSAH kwa ŋa ata. 11 Gà ɓəzla məbatsa duwa a Mbulum ata ti sle aà mendze riŋ i ga ata aà mege megemir tar asa tsa, aɗaba hulɓukw ata. Agər ana mezlibe BATSAH kwa ŋa a rah, a ga ata ya.

Mene tsəɗaŋŋa a batsah ga Mbulum

12 I fata ya ka, Salumun a gwa:

« BATSAH kwa ŋa kə gwa ka,

a ti ndze a i hulɓukw ziŋziŋ a.

13 Ama iye ka, Yàa gək ŋgwal ga ana a tsahən hinne ya,

təv ana ki ndze a iɗəm aà biybiy a . »

14 Gà mburma gà Isərayel fit mehitseŋa dzìrìkka. əbay a mbəɗ aba, a təv gà Isərayel a pise tar ahəm.

15 I fata ya kuɗa ka a gwa: « Mipise ahəm mege biy BATSAH kwa ŋa Mbulum gà Isərayel, ana a gwa ɗa nda bazlam ŋgar a tsir ga Dawda a, dite a ge a dukw ana a tsik a, nda ahər ŋgar: 16 '' Daga a gər pat ana i ndzəkara gà mayahaba gər gà mburma gà, gà Isərayel ika ahəɗ Ezipt a ya ka, Yàa zla huɗ kwite ŋgiɗ ilik i liwiŋ gà huɗ kwite gà gwala ana i Isərayel a tsa, aà mege aɗəm ga ana zləm ga a ti ndze a iɗəm a tsa. Ama i zla kər Dawda aà mene əbay ika gər gà mayahaba gər gà mburma gà, gà Isərayel ''.

17 Salumun a gwa asa: « Dawda tsir gà ka, aka waya nda gəzləŋ ŋgar aà mazlazla ga a BATSAH kwa ŋa Mbulum gà Isərayel. 18 Ama BATSAH kwa ŋa a gwaɗa a tsir gà Dawda: '' Kər ka waya aà mezleliŋ ga, aà mazləba iɗəm aà zləm gà, madzala gà gər yak ata ka, ŋgwal ŋa lele ndzer. 19 Ama Kər tsa na ki zlezliŋ a ga ya, kəla yak, na a ta zlezliŋ a, ga ata à mazləba iɗəm aà zləm gà ya ''.

20 BATSAH kwa ŋa aka rah a bazlam ŋgar ana a tsik a: « Yàa zla təv mendze Dawda tsir gà, Yàa ndza aka təv mendze mekwere əbay gà Isərayel kərga ana BATSAH kwa ŋa a tsik a. Yàa zlazl ga aà mazləba iɗəm a zləm BATSAH kwa ŋa Mbulum gà Isərayel. 21 I fata ka, i ge aɗəm təv mendze sahər magəsa masla BATSAH kwa ŋa Mbulum gà Isərayel ana a gəs nda gà tsir kwa i təv ana a ndzəkara tar ika ahəɗ Ezipt ya . »

Salumun a hama a BATSAH kwa ŋa ika miɗ gà mayahaba gər gà mburma

22 Salumun a hitse aka miɗ təv ata ta dulawa aaka duwa a BATSAH kwa ŋa ya, a mbəɗ ahəm a təv gà Isərayel fit tserdze. A ndzək ahər ŋgar a Mbulum 23 dite a gwa:

« BATSAH kwa ŋa Mbulum gà Isərayel, Mbulum ŋgiɗ riŋ kamala kər a tsa. Ku mege i gər ŋa i Mbulum, kige tsa ɗa i bəɗ ika gər ahəɗ a. Kər riŋ ki tike gər a magəsa masla, dite ki ge a ŋgwal a gà ɓəzla meslire yak ana ta gəs aà kər ahəm nda gəzləŋ tar ilik a. 24 Kərga taŋa ya, kàa ge dukw ana, ka tsik a mala meslire yak Dawda tsir gà ya. Dukw ana ka tsikar nda bazlam yak ka, kàa ge nda ahər yak kamala ana riŋ ihər a ŋgetere ba mbakum a. 25 Kinehe ka, BATSAH kwa ŋa Mbulum gà Isərayel, ge dukw ana ka tsik, a mala meslire yak Dawda tsir gà ya asa. Kə gwaɗar: '' Na gà ɓəza yak tàa gəs aà iye ahəm kamala kər ana kə gəs aà iye ahəm a ka, mekwere gà Isərayel a ka, a de a i ahər tar a diydiy tsidze. 26 Kərga taŋa ya Mbulum gà Isərayel, i gək kamkam ge dukw ana ka tsik a tsir gà Dawda mala meslire yak a.

27 Ama nda ndzer dzena ana wànà Mbulum ana a sle a aà mendze a ɗa ika gər ahəɗ aaha ya? Ku mege gəza Mbulum ana batsah ŋa tekeɗe ya ka, a slek tsa ana sakwàn nda ga aaha i zlazlak kwizikw a ya? 28 Ama kinehe ka, BATSAH kwa ŋa Mbulum gà mbəɗara aba a təv gà ya, dza zləm a meheme nda mezele mala meslire yak, tsaraka matuwa aba gà, nda meheme mala meslire yak a aaha mbakum a te. 29 Kasla ga yak aaha nda həpat nda həvəɗ, aɗaba təv aaha kə gwa ka: « I faha na ti ɗevawa iɗəm à zləm gà ya » Dza zləm a meheme mala meslire yak aaha a hemekeha i təv aaha ya te.

30 Tsaraka mezele gà nda mezele gà mayahaba gər gà Isərayel na təv ana miì hemekeha i təv aaha ya te. Tsaraka mə̀r dər te, ku mege kər i gər ŋa i Mbulum ka, tsaraka mə̀r dər dite pəl a mə̀r aà bakal mə̀r te!

31 I təv ana wura aka ge bakal nda təv damər ŋgar, dite tàa tike aaka bàlaari aà mazəma mimbeɗe ka, na wele ata aka dara aka zəm mimbeɗe ika miɗ təv madula aaka duwa a Mbulum i ga yak aaha ka, 32 kər tsarakar dər daga ara i gər ŋa i mbulum a, dara ki ge seriye a gà ɓəzla meslire yak, aà məvə̀l a mesewere are a wele ana a ge bakal a, aà bakal ŋgar mə mar a gər ŋgar ŋa, dite aà məməlak a aà mala ndzer, agəra ndzer ŋgar.

33 Na gà mayahaba gà mburma yak gà Isərayel, gà ɓəzla mene are tar, tàa mba aà tar, agəra ana ta gik bakal a ka, ama idə̀ba ŋa ya, na tàa wiz aà kər məpəla a bakal, tàa zlə̀b aà kər, tàa hamak, tàa gək kamkam i ga aaha ka, 34 kər BATSAH kwa ŋana i gər ŋa, i gəza Mbulum a tsaraka, pəl a tar aà bakal tar a gà mburma yak gà Isərayel. Màrà à tar aka ahəɗ tar ana ka vəl a gà tsir tar daga piŋŋa ya.''

35 I təv ana gəza mbulum a həndək akaba ahəm, yam a dze a asa tsiye, agəra bakal ana ta gik a, na tàa hamak i faha, tàa zlə̀b a zləm yak, dite tàa mbəɗ dəba a mege bakal tar, agər ana ka vəl a tar mesewere are ya ka, 36 kər tsaraka meheme tar daga ara i mbulum i gər ŋa ya, pəl à bakal a gà ɓəzla meslire yak nda gà mayahaba gər gà mburma yak gà Isərayel. Ada asa ka, ki ɗif a ter a à ŋgwal vatwa ana ti zezeme a ya. Dite dzara yam, aka ahəɗ kwite ata kà vəl a gà mayahaba gər gà mburma yak a.

37 I təv ana may a ge a ika ahəɗ kwite ata ya ka, gà dukw məməta pampam, gà dukw mezime ana i dala ya, ta kwiliŋa, ta gwinekiŋa, gà heyew, gà dzara ti nise a à duwa, na gà ɓəzla mene are mə̀r tàa ndara dìf a kwite yak, aka gà biye hərmaga gà huɗ kwite yak, na gà dukw mesle, nda gà dukw məməta, a tàa ge a riŋ, 38 na gà mayahaba gər gà mburma yak gà Isərayel tàa sər mesewere are ana a le a tar a dara ka, i bakal tar a ka, tàa hamak aaha, tàa gik aaha kamkam, tàa mbəɗ aba ser aka ga yak, tàa ndzək ahər tar aà mbulum aà mahamak aaha ka, 39 i fata ya ka, kər BATSAH kwa ŋa na mandzaŋa i gər ŋa i Mbulum a, dzə tar zləm, pəl a tar à bakal tar, ge tar seriye ku mege a weke tits à dukw ana a ge ya. Aɗaba na ka sər gəzləŋ ku mege i weke ya, kər ilik na ka sər gəzləŋ gà mburma fit tserdze ya. 40 kərga taŋa ya, na gà Isərayel ti te gewek a ɗa magəɗa kəla pat, i huɗ mandza aà bəra tar a, ika ahəɗ kwite aaha ka vəl a gà tsir mə̀r a.

41-42 Gà asiŋ gà gwala ŋgiɗ ti te tsereke a maɗə̀va zləm yak ana hinne ya, ndzəɗa yak nda dukw yak ana ke ge batsah ŋa ya. Ku mege gà mayahaba gər gà slele ti tserekiŋ a, na bəla mbəlakw, wele ana i gwala gà mayahaba gər gà Isərayel tsiye, a dere a ika ahəɗ ŋgiɗ a diriŋ, aà mahamak i batsah ga mbulum aaha ka, 43 kər BATSAH kwa ŋana mandzaŋa i gər ŋa i Mbulum a, dzar zləm. Vəlar dukw ana a wiz a à kər a. Dite na gà mburma ana ika gər ahəɗ a fit tserdze tə sir a zləm yak a, dite ta gik a magəɗa, kamala gà mayahaba gər gà mburma yak, gà Isərayel ana ta gik a, magəɗa ya. Tə sər ka, batsah ga mbulum aaha i zlazlak a ka, biy mazləba aà zləm yak.

44 I təv ana gà Isərayel tàa da à mege guvəl nda gà ɓəzla mene are tar, na tàa zazam məpala ahəm yak ana ka vəl a tar ahər a, na ta hama a BATSAH kwa ŋa ser aka kwite ana ka zla nda gà, ga ana i gək aà mazləba à zləm yak a ka, 45 I fata ya ka, ka, kər BATSAH kwa ŋana mandzaŋa i gər ŋa i mbulum a, dza zləm a meheme tar, nda mege kamkam, dite ka zlak tar.

46 Na gà Isərayel tàa gik bakal ka, aɗaba wura riŋ na a ge a bakal a tsiye ka, riŋ tsa. Matsəɓatsəɓ yak a ge a ika gər tar. Ki dze a tar ahər gà ɓəzla mene are tar, ti ne a ter a gà ɓele, ti de a à ter a aka ahəɗ kwite tar ana bise, kige tsa diriŋ a. 47 Ama, i gà kwite ana tàa gasa aɗəm tar aà ɓele ya ka, na tàa dzala gà gər tàa pəl à bakal ka, dite na tàa gik kamkam i gà kwite gà mburma ata ta gasa aɗəm tar a, nda magwaɗak: « Maa ge bakal, maa ge dukw ana ŋgwal ŋa tsiye! bakal mə̀r aka gasa mə̀r. 48 Biy tsa tàa dara aka miɗ yak a, nda gəzləŋ tar ilik, nda mesife tar fit ka, i huɗ kwite gà ɓəzla mene are tar ana ta gasa aɗəm tar a. Tàa hamak ser aka ahəɗ kwite ana ka vəl ɗa a gà tsir tar a, aka huɗ kwite ana kər ka zla ya, nda gà ser aka ga ana i zlazl biy mazləba a zləm yak a, 49 kər BATSAH kwa ŋana mandzaŋa i gər ŋa i mbulum a, dza zləm a meheme tar nda kamkam tar dite ka zlak tar. 50 Pəl à bakal a gà mayahaba gər gà mburma yak, ana ta gik bakal a, pəl à tar aà gà segeme ana ta ge ndaka təv yak a, tə ndzàk are tsehe, tə ndza are tsehe a gà mburma ana ta gasa tar aà ɓele ya. 51 Nda ndzer ka, tar gà mayahaba gər gà mburma yak. gà mburma ana gà biy yak a, tar ana, kà ndzəkara tar ika ahəɗ Ezipt a ya, i təv ana tə sèwèrewa iɗəm are hinne ya.

52 Dza zləm, dite ka tsaraka mege kamkam mala meslire yak, nda biy gà mayahaba gər gà mburma yak gà Isərayel, kəla ana miì tìwèk aaha aàba ya. 53 Aɗaba kər na kà ndzək tar pam, ka ne à tar gà mburma yak, ika magər gà mayahaba gər gà mburma ana ika gər ahəɗ a, kamala ana kù gwa nda ahər mala meslire yak Musa ya. I təv ana kər Batsah mə̀r ŋa, Mbulum ka ndzəkara gà tsir mə̀r ika ahəɗ Ezipt ya . »

Salumun a pise ahəm aka gà mburma.

54 I təv ana Salumun a ndəv à heme nda mege kamkam a BATSAH kwa ŋa ya ka, a hitse a mbulum ika miɗ təv madula aaka duwa a Mbulum a, i təv ata a dza gurmits a biye ya, na a ndzək ahər aà mbulum a. 55 A hitse aà mbulum, a pise ahəm aka gà mayahaba gər gà Isərayel fit tserdze nda magala a gwa:

56 « Mipise ahəm mege ka, biy BATSAH kwa ŋa, ana a vəl mandza zay a gà Isərayel gà mburma ŋgar kamala ana a gwaɗa a tar a. Gà ŋgwal gà bazlam ana a tsik nda ahər Musa mala meslire ŋgar ka, aka geye ilik nda ilik fit tserdze. 57 Kinehe ka, i wiz aà BATSAH kwa ŋa Mbulum kwa, mandza nda kwa kamala ana a ndza nda gà tsir kwa akahər ata ya. Mə mə̀sak à kwa tsa, mə mbə̀ɗakwa dəba tsa. 58 Mə mbəɗ à gəzləŋ kwa a təv ŋgar biy ana ki zezemekwe a gà vatwa ŋgar a. Dite ka, ki gìsekwe a ahəm aà məpala ahəm ŋgar ana vəl a kwa ya, aà dukw ana a gwa gwim a, a dukw ana a hitse dərra, kamala ana a vəl a gà bàba gà tsir kwa ya. 59 Gər a gwa BATSAH kwa ŋa mə mawabara gər à mege kamkam gà aaha i ge ara, ndaapat, ndaavəɗ. Dite ka, kəla wur gà pat madara mazlakawa iye, iye mala meslire ŋgar, nda gà mayahaba gər gà Isərayel gà mburma ŋgar. 60 kərga taŋa ya, na gà mburma ana ika gər ahəɗ, ti sir a dər ka, kər na BATSAH kwa ŋa Mbulum a. Mbulum ŋgiɗ riŋ i dəba yak a tsa. 61 Vəlum gəzləŋ kurum fit a BATSAH kwa ŋa, Mbulum kwa, aà magəsa ahəm aà gà dukw ana a hitse dər a nda gà məpala ahəm ŋgar, kamala ana kurum riŋ ihər ki giswim a ahər a ahəm mbakum a . »

Mandə̀ɗa batsah ga Mbulum a bər a

62 Gà əbay Salumun nda gà Isərayel fit tə dzaya gà dukw matawala fəla a BATSAH kwa ŋa. 63 Salumun a dza gà dukw taf matawala fəla, magawuba gà mburma nda Mbulum a BATSAH kwa ŋa. A bats gà sla (22 000), gà təmaŋ nda gà awak (120 000) biy mege kəkaaha. Kərga taŋa ya, na gà əbay Salumun nda gà Isərayel fit ta ge megirive biy mandəɗa ga BATSAH kwa ŋa ata a bəra ya. 64 A pat ŋa ata ka, əbay a ne à təv varavada ana ika ahəm ga BATSAH kwa ŋa ya, tsəɗaŋŋa. A bats gà dukw matawala fəla ana tə dulawaha a Mbulum fit kweleŋ a, gà dukw taf gà dukw ana ta pala i bəɗ a, gà məŋgəl gà dukw taf matawala fəla magawuba gà mburma nda Mbulum a fata. Aɗaba təv məvəl aaka duwa a Mbulum ata i fata ta ge nda virzegene ya ka, hinne tsa ndeyndey, na aà mandza aaka gà dukw matawala fəla ana tə dulawaha a Mbulum fit kweleŋ a, gà dukw taf gà dukw ana ta pala i bəɗ a, gà məŋgəl gà dukw taf matawala fəla magawuba gà mburma nda Mbulum a.

65 Nda kiye matəsəla ŋa, na Salumun a ge megirive mandəɗa ga ata bəra, nda gà Isərayel fit tserdze ya. Taŋa ka, batsah mayahaba gər gà mburma. Tə dara ka, daga ara ika ahəɗ Lebu-Hamat a, ndisl aka lilik Ezipt. Tar ata fit a ta ge megirive mehinne təsəla, dite mehinne təsəla asa, a gaw ba fit ka, mehinne kurwa gəra faɗ. 66 I dəba gà mehinne ata ya ka, gà mayahaba gər gà mburma ta pise ahəm a Salumun, dite Salumun a gwaɗa tar, tə daya aba a ma. Tar i maŋgayaba, gəzləŋ tar ndzəɗakkà agəra ŋgwal ana BATSAH kwa ŋa a ge a Dawda, mala meslire ŋgar a, nda gà Isərayel gà mburma ŋgar a.