1 Əbay 7

Salumun a zlazl ga əbay ŋgar

1 Salumun aka zlazl ga ŋgar mbaŋa. A ge aà mazlazla ŋa fit ka, mive kurwa gər ŋgar makər (13). 2 A ge ga ana tə zalar ga ɗaf Liban a dzekwiŋ. Zubul ŋa ka, metir dzik əzləm (50), zlabatum ŋa, metir dzik səla gər ŋgar əzləm (25), zubul ŋana ndara mbulum a ka, metir kurwa gər ŋgar əzləm (15). A zlazl ga ata ka, aka gər gà mendweŋe dizl seder are faɗ, a dzaya aaka gà sla aram biy gà dizl seder. 3 Zligidiŋ ga ata ka, ta ge nda dizl seder asa mbaŋa. Tə danaya gà dizl zligidiŋ ata aà gà sla aram ata dzik faɗ gər ŋgar əzləm (45). Ika gər zligidiŋ ga ata ka, gà meɗìkwir riŋ are makər. Kəla a aà are ilik ka, gà meɗìkwir kurwa gər ŋgar əzləm (15) mege ŋa nda dizl seder mbaŋa. 4 Kəla à gà tseke ga ata ka, gà biye mendiwek ihər are makər, kəla aà matəma gà biye mendiwek ka, tə daya akaba ser ser. 5 Gà biye hərmaga ŋa, nda gà biye mendiwek ŋa fit ka, gà tseke ŋa ata ka, megeye akaba ŋa fit. Gà biye mendiwek ŋa ka, ser ser akaba are makər.

6 I dəba ŋa ya Salumun a ge ga sala. Zubul ŋa, metir dzik səla gər ŋgar əzləm (25), zlabatum ŋana tekeɗe metir kurwa gər ŋgar əzləm (15). Ta ge ahəraha màsàpàr ndaka miɗ ŋa, ser aka varavada ga Liban.

7 I dəba ŋa ya, a zlazl ga təv mendze mekwere əbay. Tə zal a ga ata asa mbaŋa ka, ga seriye. Salumun a gewa iɗəm seriye ka, i fata. A kumbuhwe a ga ata nda dizl seder, gəs ika ahəɗ a ndisl aà məvaha ga. 8 A zlazl ga ŋgar ana a ndzawa a iɗəm a kalkal kamala ga təv mendze mekwere əbay ya, aka varavada ŋgiɗ pam, ika dəba ga təv mendze mekwere əbay. A ge ga ŋgiɗ pam asa, kamala ga təv mendze mekwere əbay ya, a məkəs ŋgar dəm əbay Firawna ana a zla ya.

9 Gà ga ata tə zlazlaya ya fit tserdze ya ka, nda gà ŋgwal gà bàba gà kur, ana ta papaza mepepeze ya. Gəs aà madzàha ga ya, ndisl aà məvaha ga. Tə zlazl zlagam ana nda bəra ya ka, nda gà kur ata asa mbaŋa. 10 Gà madzàha ŋana ka, nda gà bàba gà kur ana ta papazaya mipepeze ya. Zubul gà kur ata ka, metir faɗ kige tsa əzləm. 11 Aka gər gà kur madzàyaha ŋa ata ka, tə dzaya aaka gà kur ana ta papaza mipepeze ya, ti liveye melive, nda gà dizl seder. 12 Tə lawara batsah varavada ata nda zlagam, nda gà kur ana ta papaza mipepeze ya are makər, dizl seder are ilik, kamala taŋa ya mbaŋa, na tə zlazl zlagam varavada ana i huɗ ŋa, aà ga BATSAH kwa ŋa ya, nda màsàpàr ana aà batsah ga mbulum a.

Salumun a zal a Hiram mala məvəɗa virzegene

13 əbay Salumun a slər mburma a Tirus aka Hiram. 14 Ŋgat ka, kəla madakwa məkəs duwa i gwala Naftali. Tsir ŋgar ka, gà Tirus. Hiram ka, a sər məvəɗaya dukw ana ta gewa nda virzegene ya fit. Ŋgat maraha ŋa nda metsehe dite masəra dukw ŋgar ka, hinne. A sər megeye gà megemir nda virzegene ka, kalkal lele. A dara a bəra Salumun a, a geyer gà megemir ŋgar fit.

15 Hiram a geye gà mendweŋe sula nda virzegene, zubul ŋana a da aà mbulum a ka, metir tswiɗ dite dagwalum ŋa tekeɗe ka, metir ndilik. 16 A vaɗaya gà felère sula nda virzegene, a dzaya aka gər gà mendweŋe ata. Ar ka, metir sula nda mezehe ŋa, na gà zubul ŋa ya. 17 A vaɗaya aà gà felère ata, gà asiŋ gà dukw metsehine ŋgiɗ pam pam nda virzegene, a ndzekeɗeye ba, gà ndzàràwà, nda gà ɓəza tsitsirɓe, təsəla təsəla aka gər gà mendweŋe ata. 18 A vaɗa aka gər gà felère ata asa, gà mawa dizl Grenadiye ya, nda virzegene. Are sula tilèw tits aka gər gà ndzàràwà ata, ta kumbuhwe a dər gà felère ata. 19 Ika gər gà felère mendweŋe màsàpàr ka, a vaɗaya aaka gà mendiwiɗe gər, gà mendzikiɗe a ba mibìzè liy a, metir sula sula. 20 Gà felère ana ika gər gà mendweŋe ata sula ya ka, tseke biy ŋgiɗ ilik ka, batsah ŋa, a za gà ndzàràwà nda gà mawa dizl Grenadiye ata, dərməka sula (200), a lewer dər tits. 21 Hiram a ndwaŋaya gà mendweŋe ata sula ya aà màsàpàr ga mbulum batsah ŋa ata. Malahalah ŋa aka tseke ahər mezime, a zalar Yakin^ª, masula ŋa aaha aka tseke ahər gwala, a zalar Buwaz^ª. 22 Ika metsemiɗ a gà gər gà mendweŋe ata ka, gà ŋgwal gà mibìzè liy a ikəka, kərga taŋa ya na Hiram a ndəv à məvàɗà, gà mendweŋe ata ya.

Batsah tugwàɗ virzegene ya

23 Hiram a vəɗ batsah tugwàɗ nda virzegene, a zalar duluv. Zlabatum ŋana i magər a ka, metir əzləm dite dzəgəɗaf ŋa tekeɗe ka, metir sula nda mezehe ŋa. Tarərra ŋa ka, metir kurwa gər ŋgar əzləm (15). 24 Aà huɗ ahəm tugwàɗ ata ka, a geye aaka gà mawa kulukit a, nda virzegene. Kəla aà metir ilik ka, dzik səla (20), ti ler dər tiwlik tits are sula. Ta vəɗ dər akaba nda tugwàɗ ata. 25 Tugwàɗ ata ka, matika ŋa ika gər gà sla ana kurwa gər ŋgar sula (12) ta ge nda virzegene ya. Makər ta mbəɗ ahəm ser aka yam, makər ta mbəɗ ahəm aka tseke pat ana a diɗe a ya, makər ta mbəɗ ahəm a gular, makər ta mbəɗ ahəm aka tseke pat ana a mɓə̀zawara ya. Gà sla ata ta mbaɗaya aba gà mendzwil tar fit, aà huɗ duluv ata. 26 Dabasaŋa ka, nda zlabatum huɗ ahər ide. Ahəm ŋa tekeɗe ka, ar kamala biy kəzləm yam a. Mibìzè liy ikəka. Yam a da a tugwàɗ ata ka, a ge a ka, liter dəbuw dzik tsamakər (80 000).

27 I dəba ŋa ya Hiram a geye gà dukw metike aaka ŋa, kurwa nda virzegene. Gà tseke gà zubul tar ka, metir sula, gà zlabatum tar metir sula mbaŋa, dite dzəgəɗaf tar ka, metir ilik nda mezehe ŋa. 28 Araha meme na Hiram a geye gà dukw metike aaka ŋa ata ya: A geye ka, nda gà virzegene ana kaslpaɗamɗam, dite rèhhe rèhhe ya. Gà dukw ata ka, mandzàya ŋa ika magər gà dukw metike aaka ŋa ata a da aà mbulum a. 29 Aka gər gà virzegene ana kaslpaɗamɗam, dite rèhhe rèhhe ya ka, a geye aaka gà mendzikiɗe ba gà azil nda gà sla nda gà Sereben. Aka gər gà mendzikiɗe ba gà dukw ata ka, a geye gà dukw metsehine ŋgiɗ hinne kamala mibìzè gà duwa ya, nda huɗ ŋa, dite ndaka gər ŋa asa. 30 Kəla aà təv metike aaka dukw ata ka, gà sik aà tar faɗ kaɗawùrwùr, mege ŋa nda virzegene. Gà sik ŋa ata ta mbaɗawa aba ka, ika ndzemde virzegene ana i magər a. Gà sik tar madana ŋa ka, aà ndzemde ana aà gà guva təv metike aaka dukw ata tseke faɗ a. Gà zəva sik ŋa ata ka, mege ŋa aba, ta ge ka, ahər ŋa ilik nda dukw ata. Ama tə za i gər a gà mibìzè dukw ata ihər a tsa. 31 Ika gər təv metike aaka dukw ata kamala sik a ka, biye riŋ kəɗəwurwur. Kwitsikw ŋa ka, mezehe metir, dite magər ahəm ŋa tekeɗe a ge metir ilik. Mege megemir tar ka, metike aaka tugwàɗ ata. Hiram aka ge ahər gà dukw metsehine pampam aà təv ata. Təv mendze ŋa ata ka, gà tseke ŋa faɗ fit kalkal, tsəka kəɗəwurwur tsa. 32 Gà sik ŋgar ata kaɗawùrwùr faɗ a ka, tar madzàvà ŋa aà guva təv metike dukw ata. Gà ndzemde virzegene tə zlalaya i gà sik təv metike aaka dukw ata, a mbaɗawa iɗəm aba ya. Zlabatum magər sik dukw ata kəɗəwurwur a ka, aka aà mege metir ilik. 33 Gà sik ŋa ata kəɗəwurwur a ka, kamala biy gà sik muta piris a. Ta geye gà ndzemde ana i magər a, gà zender ŋa, nda gà ariyuŋ ka, nda virzegene ana mawulazla ŋa ya. 34 Gà sik ŋa ata faɗ ika guva ya ka, magawa ŋa aba a təv ilik ŋa nda təv metike aaka dukw ata. 35 Ika gər təv metike aaka dukw ata ka, duwa riŋ ikəka kəɗəwurwur ika ahəm biye ata, zlabatum ŋa ana i magər a ka, mezehe biy mezehe metir. Tseke ata mbaŋa ka, gà təv magəsa ahər riŋ ihər, ta ge nda virzegene akaba nda sik təv metike aaka dukw ata. 36 A geye ahər gà sereben asa, gà azil nda gà slàmbah təɓah aka gà təv ana kaslə̀paɗamɗamma. Tilèw a ler dər asa mbaŋa ka, nda gà dukw metsehine pampam hinne. 37 Ta vaɗa gà sik ata kurwa ya fit ka, nda virzegene ana ta wulazl a, ku mege awara ka, melive tar ilik. Dite mendzikiɗe ba tar ka, ilik mbaŋa asa. 38 Hiram a vaɗaya gà tugwàɗ ŋgiɗ kurwa nda virzegene aà madzaya aka gər gà sik ŋa ata kurwa ya. Gà tugwàɗ ata ka, zubul ŋana a da aà mbulum a ka, metir sula, dite yam a da aɗəm ka, kàa mege a liter dəbuw nda dərməka ndilik (1 600). 39 Tə dzaya gà sik ŋa ata əzləm nda gà tugwàɗ a, aka tseke ahər mezime batsah ga mbulum ata, dite gà əzləm ŋa gà biy ŋgiɗ aaha ndaka tseke ahər gula batsah ga mbulum ata. Batsah tugwàɗ ata ti tike ka, aka tseke ahər mezime batsah ga mbulum ata, ika magər gà tseke pat ana a mbizere a ya, nda gular.

40 Hiram a vaɗa gà asiŋ gà tugwàɗ ŋgiɗ asa, gà pel, nda gà səra magwatsaka aà məmbəz. I fata ya ka, Hiram a ndəv à məvaɗa ya, gà dukw ana əbay Salumun a gwaɗar vaɗa ya fit, nda biy ana i ga BATSAH kwa ŋa ya. 41 Gà dukw ana a vaɗaya fit a ka, araha: gà mendweŋe sula, gà felère sula madzàŋa ika gər gà mendweŋe ata sula ya, gà ndzàràwà pampam sula, aà mendewiɗeye dər gər a gà felère ata ika gər gà mendweŋe ata sula ya. 42 Gà mawà dizl Grenadiye ata dərməka faɗ (400), madana ya ŋa aà gà ndzàrawa ata are sula, biy na a kah dər gà gər gà felère gà mendweŋe ata sula ya. 43 Gà sik ŋa ata kurwa, nda gà ɓəza tugwàɗ madzaya ŋa ika gà sik ŋa ata kurwa ya. 44 Batsah tugwàɗ kəɗəwurwur ika gà sla kurwa gər ŋgar sula (12). 45 Gà dukw manda aɗəm à bitekwe, nda gà pel, nda gà ɓəza səra magwatsaka à məmbəz, Hiram a vaɗaya, a əbay Salumun nda biy ana i ga BATSAH kwa ŋa ya. A vaɗaya ka, nda virzegene ana lìmbetlìmbet a.

46 əbay a wulazlayarra gà dukw ana ta vaɗaya nda virzegene ata ya fit a ka, i tulwah Yurdan ika magər gà Sukut nda Sartan a, ta vaɗayarra ka, i tìrkwin a. 47 I dəba ŋa ya, Salumun a dzaya gà dukw ata a vaɗaya a ga BATSAH kwa ŋa, wura a sər mibe virzegene ata tsa, aɗaba ar ka, hinne.

48 Salumun a vaɗa gà kazlaŋa megemir a ga BATSAH kwa ŋa, nda gura asa mbaŋa. Təv madula aaka makərɗa dizl ana a ze hwaŋŋa lele ya, nda gà tabəl ana tə dzawa aaka gà peŋ ana tə dzawa gà dukw taf ŋa ya, nda gura. 49 A vaɗa gà dukw ana ti dzawa aaka gà lalampa ya, kurwa (10). A dza aka miɗ ga ata tsəɗaŋŋa ndeyndey ya, əzləm aka tseke ahər mezime, əzləm aka tseke ahər gula, gà mibìzè duwa, gà lalampa nda gà ɓəza bìyla. Gà dukw ata ta vaɗaya fit ka, nda gura. 50 Gà səra, nda gà awis, gà səra magwàtsakàyà à məmbəz, gà kivit, gà dukw madula aɗəm gà dizl ana a ze a lele ya, ta vaɗa gà dukw ata fit ka, nda gura ana za iɗəm tsiye. Gà dukw mahandakaya a gà biye hərmaga mada a huɗ ga ata tsəɗaŋŋa ndeyndey ya, nda gà dukw mahandakaya dər a gà biye hərmaga mada a ga mbulum batsah ŋa ata, ta mbaɗawa ikəka aàba ya ka, nda gura. 51 I təv ana əbay Salumun a ndəv à megeye gà megemir fit tserdze, biy ga BATSAH kwa ŋa ya ka, a ndzakara gà kazlaŋa megemir ana dede ŋgar Dawda aka mbər mene dər tsəɗaŋŋa biy BATSAH kwa ŋa ya: Gà ndzemde məvəɗa kur siŋgwe, gà gura, gà kazlaŋa megemir ŋgiɗ pampam, dite a dza a huɗ a ga ana tə dzayawa aɗəm gà limana BATSAH kwa ŋa ya.