1 Əbay 6

Salumun a zlazl ga a BATSAH kwa ŋa

1 I dəba mive madzik faɗ gər ŋgar tsamakər (480) ŋana gà Isərayel tə dara ika ahəɗ Ezipt a ya ya, i huɗ mive məfaɗ ŋana Salumun a ge i makwara gà Isərayel a, nda kiye Ziv, masula kiye, na Salumun a dzəba aà mazlazla ga a BATSAH kwa ŋa ya.

2 Ga ata əbay Salumun a zlazl a BATSAH kwa ŋa ya ka, zubul ŋa ka, metir dzik makər (30), zlabatum ŋa tekeɗe metir kurwa (10), zubul ŋana a da aà mbulum a tekeɗe ibam metir kurwa gər ŋgar əzləm (15). 3 Ika miɗ batsah ga ata ka, meɗikwir ahəm riŋ na ki de a iɗəm a dite ki de a ga mbulum a. Tseke zubul ga ata ka, metir kurwa (10) kamala zlabatum ga mbulum ata ya, dite zlabatum ŋa ka, metir 5 ndaka miɗ ga ata. 4 A geye gà biye mendiwek aà ga mbulum ata, a dza ahər gà kàtà ndzemde. 5 A zlazl ahəraha ga nda bəra aà dəba dəduŋ ga mbulum ata, nda dəduŋ ga təv tsəɗaŋŋa ata ndeyndey ya, tiwlik tits metsile makər. 6 Malahalah ga ana i bəɗ a ka, metir sula nda mezehe ŋa, na zlabatum ŋa ya. Ga masula ŋana ika màgər a ka, metir makər. Ga məmakər ŋana ika dala gər a ka, metir makər nda mezehe ŋa. Dəduŋ ga mbulum ata nda dəba ŋa ya ka, dabasum ŋa a geye akaba tsa, daga i bəɗ a ndisl a gər ŋa. Kəla aà metsile ga ata ka, melive ŋa a nikiɗewe ihər a, ta gewe a dər kataya ka, aà dite ka, dizl gà zligidiŋ ga ata tə dzahəraha a dəba ŋa ya ka, ma ta patsaya a dəduŋ ga batsah ŋa ata tsa.

7 Ga ata tə zlazl ka, nda gà kur ana tə ndzəkara məpapazaya ŋa aàba ya ya. Aɗaba taŋa na akahər mazlazla ga ka, wura aka tsaraka miɓizle gà ndəvəl, nda gà dukw ana ta papazawa dər kur a, kige tsa, ku mege meɗe ndzemde wara ya tekeɗe tsiye.

8 Biye hərmaga malahalah ga ata i bəɗ tə dzàha aà dəba dəduŋ ga, ga mbulum ata ya ka, ndaka tseke ahər mezime. Tə zlazl ahəraha təv metsile aà mada a ga ana ika magər a, dite tə zlazl ahəraha təv metsile, aà mada a ga ana ika dala gər ga ana ika màgər a 9 I təv ana Salumun a ndəv aà mazlazla ga mbulum ata ya ka, a dza aaka zligidiŋ nda sla aram, dite ta papazaya aaka aram seder slarra slarra. 10 Kəla aà gà ga ata tə zlazla ahəraha, tə lawar dər tits a ka, ar metir sula nda mezehe ŋa, na zubul ŋana a da aà mbulum a. Tə ləma akaba a gà ga ata nda ga mbulum a ka, nda dizl seder.

11 BATSAH kwa ŋa a gwaɗa a Salumun: 12 « Kər riŋ ihər ki zlezliŋ a ga. Kinehe ka, na kàa zazam gà dukw ana i hitse dərra fit tserdze, na kàa tike a gər a seriye gà, dite kàa gəs ahəm aà gà məpala ahəm gà ka, i fata ya ka, i rèh a à bazlam gà ana i tsik a tsir yak Dawda aka gər yak a. 13 I ti ndze a ika magər gà Isərayel, i ta miyeke a à gà mayahaba gər gà mburma gà, gà Isərayel diydiy tsidze.

14 Salumun a zlazl ga ata a ndəv dər fit. 15 Gà ɓəzla mazlazla ga ata ta hitseye à gà dizl seder ana slarra slarra, aà dəduŋ ga ana nda huɗ ga ya, gəs i bəɗ a, ndisl à gər ŋa. Dambazla ŋana i bəɗ a, ta ge nda dizl sipir ana slarra slarra ya. 16 Ta hitseye aà gà dizl seder ata slarra slarra ya asa mbaŋa, aà dəduŋ ga tsəɗaŋŋa ŋa ata ndeyndey ya, nda huɗ ŋa, gəs i bəɗ a ndisl a gər ŋa. Zubul ga ata ka, metir kurwa. 17 Mezehe ga mbulum ata, kamala megweɗe ya, batsah huɗ ga ata a zeha ihər a ya ka, ar metir dzik səla (20) na zubul ŋa ya. 18 Gà dizl seder ana ta kumbuhwe a dər dəduŋ ga ana nda huɗ ga ata ya ka, ta harwàtsayara iɗəm gà mendzikiɗe ba gà mawa dizl ɗaf a, nda gà mibìzè dukw ana aka ndə̀zl ikaba ahəm a, lele zukw tsiye. Ama kəla ka, gà kur ana tə zlazl dər ga ata ya ka, are a ŋgatar ba tsa. 19 Salumun a ləmbaɗa huɗ gà ata tsəɗaŋŋa ndeyndey ya, təv ana ŋgwal ŋa, aà batsah ga mbulum ata ya, aà metike aɗəm sahər magəsa masla nda BATSAH kwa ŋa. 20 Ga ata tsəɗaŋŋa ndeyndey ya ka, zubul ŋa, metir kurwa, zlabatum ŋa, metir kurwa. Zubul ŋana a da mbulum a, metir kurwa mbaŋa. A bah huɗ ga ata nda gura ana za iɗəm tsiye, dite təv ana tə dulawa aaka duwa a mbulum a ka, a kumbuhwe a nda dizl seder, metikiŋa dər ika miɗ biye hərmaga mada a ga mbulum ata tsəɗaŋŋa ndeyndey ya. 21 Salumun a bah huɗ ga ata, nda gura ana za iɗəm tsiye. A dan tsitsirɓe gura, aka biye hərmaga mada a huɗ ga ata tsəɗaŋŋa ndeyndey ya. 22 A bah batsah ga mbulum ata fit nda gura, kamala taŋa ya mbaŋa, na a bah təv madula aaka duwa Mbulum ana ika biye hərmaga mada a huɗ ga ata tsəɗaŋŋa ndeyndey ya ya.

23 Salumun a papaza gà mendzikiɗe ba gà sereben sula nda dizl uliviye, a huɗ ga ata tsəɗaŋŋa ndeyndey ya, zubul ŋa, metir əzləm əzləm. 24 Ma ilik sereben ata ka, gwezleviyek ŋa ilik ka, metir sula nda mezehe ŋa. Gəs ika ahəm gwezleviyek ŋgiɗ a tsikw aka ahəm gwezleviyek ŋgiɗ ka, metir əzləm. 25 Masula sereben ata aka, metir əzləm kalkal malahalah ŋa aaha mbaŋa. Mendzikiɗe ba tar ka, ilik. 26 Gà zubul gà sereben ata ka, metir əzləm əzləm kalkal. 27 A dza gà sereben ata aka magər huɗ ga ata tsəɗaŋŋa ndeyndey ya. Gà gwezleviyek tar mendìɗe ŋa ikaba ya. Gwezleviyek ma ilik sereben ŋgiɗ ilik ka, a ləm aà dəduŋ ga. Dite biy masula ŋa aaha tekeɗe a ləm a dəduŋ ga ndaka tseke ŋgiɗ mbaŋa. Gà asiŋ gà gwezleviyek tar aaha sula, ika magər ga ya, tə ləma akaba. 28 A bah gura aà gà sereben ata sula ya.

29 Aà gà dəduŋ ga, gà ga ata sula məma ya, nda bəra, nda huɗ ŋa ka, ta geye ahər gà sereben, gà ahər gà dizl təɓah nda gà mibìzè duwa. 30 A bah dambazla gà ga ata sula ya nda gura. 31 Ta ge dukw mahəndəka a biye hərmaga huɗ ga ata tsəɗaŋŋa ndeyndey ya, tseke sula nda dizl uliviye. Gà mezlembel ŋa nda sik dukw mahəndəka biye hərmaga ata ŋa ka, a sas aà dabasum dəduŋ ga ata ya, dukw ilik i huɗ dukw əzləm a. 32 Aà dukw mahəndəka biye gà hərmaga ata sula, nda dizl uliviye ya ka, a bahaya aà tar gura, a papazayarra iɗəm a, gà mendzikiɗe ba, gà sereben, gà ahər dizl təɓah, nda gà mibìzè duwa ya. A bahaya gura aà gà sereben nda ahər dizl təɓah ata mbaŋa.

33 Kərga taŋa ya mbaŋa, na a ge aà biye hərmaga mada a batsah ga mbulum ata ya, gà sik dukw mahəndəka biye hərmaga ata ka, nda dizl uliviye. A zla zlabatum ga ata ilik, i huɗ dukw faɗ a. 34 Gà dukw mahəndəka ga ata sula ya, ta ge nda dizl sipir a ya ka, ku mege awara, a mbiɗe aba ka, ika gər gà dizl ŋgiɗ ana slarra slarra ya. 35 A papazayarra iɗəm gà mendzikiɗe ba sereben a, nda gà ahər dizl təɓah ata nda gà mibìzè duwa ya. I fata ya ka, a bah ahər gura aà gà dukw ata. 36 Tə zlazl zlagam aà varavada ana i huɗ ga ya, nda kur are makər, ti tike aaka dizl seder ilik ɓə̀làr tiwlik tits.

37 I huɗ mive faɗ ŋana Salumun a ge a ika əbay ya, nda kiye Ziv ŋa, na a dzàha batsah ga mbulum a BATSAH kwa ŋa ya. 38 I huɗ mive 11 ŋana, nda kiye Bul ŋa, kiye matsamakər, na tə ndəv aà mazlazla ga ata ya, nda gà dukw ana ta waya aà mege ahər fit a, Salumun a ge aà mazlazla ga ata ka, mive təsəla.