1 Əbay 5

Mandza zay akahər mekwere Salumun

1 Salumun a kwere a asa ka, gà ahəɗ ana gəsara ika dulwa Efəratiya ya, tsikw a kwite gà Filistiya ya, dite tsikw aka kwiye ahəɗ gà Ezipt. Gà əbay gà kwite ata ka, tar aà huɗ mekwere Salumun, tə dzawar hadam, dite te gewa megemir a Salumun i huɗ mandza aà bəra ŋgar a fit. 2 Dukw mezime ana gà Salumun tə zəmawa nda gà mburma ŋgar i huɗ mehinne ilik a ka, araha: Gufa ana məmbàɗa ŋa kizlizizze ya, buhwa dzik tswiɗ (90), dite masaka gufa, buhwa dərməka nda dzik tsamakər (180), 3 gà magala gà sla kurwa, gà sla ana ta gasara tar ika dats a, dzik səla (20), dite gà təmaŋ dərməka. Taŋa ka, tàa ɗama aɗəm gà dukw dala ana kamala, gà arewe, gà miyak, gà təŋgəm, nda gà magala gà asiŋ gà ɗiyeŋ ŋgiɗ a tsa. 4 Salumun a kwere a gà ahəɗ ana ndaka tseke pat ana a dəɗawa aɗəm i dulwa Efrat ya fit. A gəsara i Tifsa ya ndisl a Gaza. A kwere a, gà əbay ana ndaka tseke lide dulwa Efrat ŋgiɗ a. Ŋgat mandzaŋa zay nda gà asiŋ gà kwite ana tə lawara ŋgat tits a. 5 Gà mburma gà Yahuda nda gà Isərayel, gəsara i Dan a, ndisl a Beer-Seva ka, tar mandza ŋa nda zay, ku mege weke a fətawa aba guvah dizl ɗaf viŋye nda figiye ŋgar na i huɗ mandza bəra əbay Salumun a.

Salumun a za gà mburma fit nda metsehe.

6 Gà ga gà piris nda biy muta gà piris Salumun riŋ dəbuw dzik faɗ (40 000). Dite gà ɓəzla matsala aka gà piris ata, dəbuw kurwa gər ŋgar sula (12 000). 7 Gà bàba gà ɓəzla makwara gà ahəɗ ata kurwa gər ŋgar sula (12) ya ka, ku mege weke kəla kiye a vəlawa dukw mezime a gà əbay Salumun nda gà mburma ŋgar ana tə zəmawa akaba dukw mezime ya. Ta gewa metsehe, aà dite kuɗa duwa mege a tar ilik tsa, 8 tə ndzəkawaha gà urga, gà kwizir a gà piris ana tə tsalawa aaka ya, nda gà piris ana ta ŋgəlawa à muta ya fit, a təv ana əbay iɗəm a. Ku mege weke a zazamawa dukw ana ta vəlar ahər vatwa aà mege ŋa ya terwihhwe lele. 9 Mbulum aka mbər mivile metsehe a Salumun nda masəra duwa hinne. Gà dukw ana a vəlar ba ŋgar aà masəra ŋa ya ka, hinne kamala hewyeŋ ana i dulwa ya. 10 Metsehe Salumun ka, a za dər biy gà mburma ana tar mandza ŋa i gà Arabiya ya nda Ezipt a fit kweleŋ. 11 Metsehe ŋgar ka, a za dər biy gà mburma fit kweleŋ. A za dər biy Etan gà Ezrakiya, dite a za dər biy gà ɓəza Makul: Gà Heman, Kalkul, nda Darda. Zləm ŋgar aka ɗe zləm hinne, ika gà ahəɗ kwite ana tə lawara ŋgat a. 12 Aka tsikeye gà bazlam minew dəbuw makər (3 000), dite aka tamaya gà dimis dəbuw əzləm (5 000). 13 Aka fafəl aka gər gà dizl ɗaf, dite asa ka, aka gər dizl Seder ana i Liban a, dite ndisl aka gər gà izup ana a sləlawa aà dava ga ya. Aka fafəl aka gər gà dukw dala, nda gà dukw gənaw, aka gər gà ɗiyeŋ, aka gər gà dukw ana tə dawa nda huɗ a, nda gà aka gər gà kilif. 14 Gà mayahaba gər gà mburma ŋgiɗ, nda gà əbay ana ika gər ahəɗ tserdze ya, tàa tsaraka meɗe zləm metsehe əbay Salumun a ka, tə dawa a mandza zləm a metsehe ŋgar ata.

Salumun a hadzal ba aà mazlazla ga a BATSAH kwa ŋa

15 Hiram əbay gà Tir a slər gà ɓəzla sik ŋgar a təv Salumun. Aɗaba aka tsaraka ka, tàa mbəɗar mal a gər, tàa ne à ŋgat əbay aka təv mendze mekwere dede ŋgar, Hiram ka, a waya Dawda hinne. 16 Salumun a slər gà mburma a təv Hiram mbaŋa, aà ta gwaɗar: 17 « Kà sər tsir gà Dawda ka, gà ɓəzla mene are ŋgar ti ler ka, tits. Tàa sler za nda mege aà ŋgat guvəl hinne, aka sle aà mazlazlar ga a BATSAH ŋgar ŋa Mbulum ŋgar tsa, ama kinehe ka, BATSAH kwa ŋa aka dzar gà ɓəzla mene are ŋgar ahər. 18 BATSAH gà ŋa Mbulum gà, aka viliŋ mesifikaba, ku mege ndaka tseke wara ya tserdze, gà ɓəzla mene are gà riŋ asa tsa. Duwa riŋ na a seweriŋ a are ya asa tsa. 19 Araha kinehe ka, Yàa dzala gà gər aà mazlazla ga a BATSAH gà ŋa Mbulum gà, kamala ana BATSAH kwa ŋa a tsik a tsir gà Dawda a. Say kəla yak ana, ana i te vilere a təv mendze mekwere yak a, na a ta zlezliŋ a ga ana ti ta zlibewe a iɗəm à zləm gà ya. 20 Kinehe ka, vəl vatwa aà ti sesiŋara gà dizl seder i gər kwite Liban a. Gà ɓəzla meslire gà ti te ge akaba megemir nda gà ɓəzla meslire yak, i te dzeke a dukw mayaba gà ɓəzla meslire yak kamala ana ki ti tsikiŋ a ya. Aɗaba kər kà sər ka, wura riŋ ilik i təv mə̀r tsa na, a sər masasa dizl ɗaf kamala gà mburma ana i Siduniya ya. »

21 I təv ana Hiram a tsaraka mifefile Salumun ata ya ka, a ŋgayar ba i gəzləŋ hinne, dite a gwa: « Mipise ahəm mege mbakum ka, biy BATSAH kwa ŋana a vəl kəla ana metsehe ŋgar riŋ hinne ya, a Dawda aà makwara gà mayahaba gər gà mburma aaha tar mawa ba ŋa hinne ya. » 22 Hiram a slər mburma aà ma ta gwaɗa a Salumun ka, « Yàa tsaraka dukw ana ka tsikiŋara ya fit. I dzekeha gà dizl Seder nda biy sipir ana kà wiz a. » 23 Gà ɓəzla meslire gà ti ndzekera gà dizl ata ika gər kwite Liban a ndisl aka batsah dulwa. Ti deneyiŋa, ti dzeye aka gər yam, yam a zlele a a dəraha ndisl a təv ana ki ɗifiŋ a dər a. Te pileye a dər ikaba ya, dite gà ɓəzla meslire yak ti dehe a, ti ndzekiŋa. Ndaka tseke yak kuɗa kəla ka, i waya na ki viliŋa dukw mezime a gà mburma ana i ga i ma gà ya. 24 Hiram a dza gà dizl gà seder nda gà biy sipir a Salumun kamala ana gəzləŋ ŋgar a waya ya. 25 Dite Salumun a dza ble kiliw dəbuw dərməka ndilik (600 000), biy gà mburma ana i ga i ma ŋgar a, dite mal uliviye, liter dəbuw tswiɗ (9 000) a Hiram kəla viye.

26 BATSAH kwa ŋa aka vəl metsehe a Salumun kamala ana a tsiker a. kərga taŋa ya na mandza zay a ge riŋ ika magər gà Hiram nda Salumun a. Ta gəs aàba masla tar ata sula ya.

Salumun a tike megemir balaari aka gà mburma

27 Əbay Salumun a dzaya megemir balaari aà gà Isərayel, mburma dəbuw dzik makər (30 000). 28 A slərayawa gà mburma ata a kwite Liban dəbuw kurwa (10 000) kəla kiye. Te gewa i Liban kiye ilik dite, kiye sula te ge a i ma. Aduniram ŋgat ka, mala aka miɗ gà ɓəzla megemir ndzəɗa ata. 29 Gà ɓəzla mandzaka gà duwa a Salumun riŋ debuw dzik təsəla (70 000). Dite gà ɓəzla məpapazayar kur ara i gər kwite ya, dəbuw dzik tsamakər (80 000). 30 Tàa ɗama aɗəm gà ɓəzla aka miɗ ana, gà ɓəzla makwara ahəɗ Salumun tə ndzək tar aà megemir a tsa. Tar ka, dəbuw makər nda dərməka makər (3 300), na te kwere a gà mburma ana ta ge a megemir ndzəɗa ata ya. 31 əbay a vəl vatwa aà matapaslayarra gà bàba gà kur a, aà məpapazaya gà ŋgwal gà kur aà mandza dəraha ga mbulum ata. 32 Gà ɓəzla megemir Salumun nda gà biy Hiram dite nda gà mburma Giviliya tə dzəba aà mapapazaya gà dizl nda gà kur aà mazlazla ga BATSAH kwa ŋa.