Esdras 10

Gà Yahuda tə dagaza aba gà dəm gà slele ya

1 I təv ana Ezra a riŋ, mandza gurmits ŋa a biye, a heme a nda gà tuwa ika miɗ batsah ga mbulum a, a wiz məpəla a bakal à Mbulum, akahər ŋa ata ka, gà Isərayel tàa yahàba gər hinne ti ɗeme a ba tsa, gà asləka, gà məkəs nda gà ɓəza, ti yahàba gər a təv ŋgar, tar ata tserdze ya ka, tàa tuwa hinne. 2 Kamala taŋa ya, Sekaniya kəla Yehiyel ana a dara i gwala Elam a, a gwaɗa a Ezra: « Kàa ɓəl a kwa aka məpala ahəm Mbulum kwa, na nda mandzə̀ka gà dəm gà slele ana ɗa, ika magər gà mburma ana tar ɗa mandza ŋa ika ahəɗ aaha ya. Ama mege gara gà Isərayel a riŋ hiywe mba. 3 Kinehe ka, gəsakwa masla nda gà Mbulum kwa, nda madalawa gà dəm gà slele aaha nda gà ɓəza tar tserdze. Kamala taŋa ya, na ki zezèmèkwe a metsehe yak ana ka ɗif dər a batsah gà ŋa, dite nda biy gà na ta gəs ahəm aà gà məpala ahəm Mbulum kwa ya. Gekwa ka, kamala na məpala ahəm a tsik a kwa ya. 4 Hitse a mbulum, aɗaba dukw aaha a pər ka, aà kər, mìi zleke a ahər a kər. Mər aba aà megiŋ a » .

5 I fata ya ka, Ezra a hitse a mbulum, a vəl mimbeɗe a gà bàba gà ɓəzla məbatsa duwa a Mbulum, nda gà gwala Lewi, dite nda gà Isərayel tserdze, aà megiŋ a, kamala na Sekaniya a gwa ya, ta mbaɗa. 6 I fata ya asa ka, Ezra a da ika varavada batsah ga mbulum ata ya. A da a bəra Yəhuhanan kəla Eliyasib, a həna i fata. Ama aka zəm duwa tsa, aka sa duwa tsidze. Aɗaba ar mandza ŋa ka, nda gà tuwa aà are, agəra dukw bakal gà mburma ana ta mara a ma i slele ya.

7 I dəba ŋa ya ka, gà mburma ana tar mandza ŋa i Yahuda nda Yeruzalem a, tə tsaraka məpala ahəm aaha parakka. Gà tar ata ta marà i slele ya ka, tə yahaba gər a Yeruzalem. 8 Na wura aka ndzeha a faha i huɗ mehinne makər a tsəka, kamala ana gà ɓəzla aka miɗ, nda gà bàba gà mburma, tə zla ahər madzala gà gər ŋa ya tsəka, ti ndzeke a ihər gà limana ŋgar a, dite ti delewe a ŋgat i mayaha ba gà mburma ana ta mara a ma i slele ya. 9 I fata ya ka, gà mburma ana i gwala gà Yahuda nda Bendzamen a ka, ti yahàba gər i Yeruzalem tserdze, na ələk mehinne makər ŋa ata a ndzere a ya ka, taŋa ka, nda mehinne 20, kiye Metswiɗ ŋa, aka varavada ga mbulum ata. Tar ata tserdze ya, tə dzadzàr aɗaba dukw ata, dite asa ka, aɗaba ana yam a riŋ a dzeye a ya. 10 Mala məbatsa duwa a Mbulum Ezra a hitse a mbulum, a gwaɗa a tar: « Kurum gà Isərayel, kàa ɓəlum aka məpala ahəm Mbulum nda mandzə̀ka gà dəm gà mbəlakw. Taŋa, kà səkwahum ka, à gà bakal ana gà mayahaba gər gà mburma kwa gà Isərayel ta gewa ya. 11 Kinèha ka, pəlum à gà bakal kurum aka miɗ BATSAH kwa ŋa Mbulum gà bàba gà tsir kurum, nda mege dukw ana a waya ya: ndzwum tsakalak aà gà mburma ana, ɗa ika ahəɗ aaha ya, dite ka dum ikaba nda gà məkəs kurum ana, tar gà dəm gà mbəlakw a . »

12 Gà mayahaba gər gà mburma tserdze, ta ŋgama aaka nda biye ɗa ŋgəlakəkka ŋa, nda ndzəɗa: « Haya, mìi ge a dukw ana kà tsik a. 13 Ama gà mayahaba gər gà mburma ka, hinne, dite araha ka, viye. Mìi sle a aà mehitse i bəra tsa, ndeyndey ŋana ka, a zle a ahər ka, pat ilik, kige tsa sula pəra tsa. Aɗaba gà mburma a riŋ ka, hinne na tàa ge bakal, nda mege dukw ata ya. 14 Gà ɓəzla aka miɗ mə̀r, ta ge megemir ŋa, nda zləm gà mayahaba gər gà mburma fit tserdze. Gà na i gà bàba gà huɗ gà kwite kwa ya tserdze, gà na tàa ndzək gà dəm gà mbəlakw a ka, ti deriŋa ta pete a aba aka miɗ tar, a pat mehinne ana ki tsikikwe a a ter a ya. Ti de a akabara ka, nda gà bàba ŋana, nda gà ɓəzla seriye tar, ana i huɗ gà kwite ya. Ki zezèmèkwe a megemir aaha ka, tsikw a təv ana batsah matsəɓatsəɓ Mbulum kwa, a nikiɗe a i təv kwa ya ya . »

15 Yunatan kəla Asayel nda Yahziya kəla Takiva ka, tàa gəs akaba kamala taŋa ya tsa, dite gà Mesullam nda gà gwala Lewi, Sabbətay tə zlak ahər tar mbaŋa. 16 Ama gà asiŋ gà Isərayel ana ta mara a ma i slele ya ka, ta gəs akaba dukw ana mayahaba gər gà mburma ata ta gwa ya. Mala məbatsa duwa a Mbulum Ezra a pala gà mburma kəla a aà gwala, gà ɓəzla ga, dite a zalawa tar, ku mege weke nda zləm ŋgar. Gà mburma ata tə dzəba aà mege seriye dukw ata ka, nda mehinne ilik ŋa, i huɗ kiye ma kurwa ŋana ya. 17 Ndizìŋ ŋana nda mehinne ilik i malahalah kiye ma ilik ŋana ya ka, tə ndəv aà masəra ikaba aà gà mburma ana tàa ndzək gà dəm gà slele ata ya.

Zləm gà na tə ndzək gà dəm gà slele ya

18 Ika magər gà ɓəzla məbatsa duwa a Mbulum ana tə ndzək gà dəm gà mbəlakw a ka, ti le a, aà gà mburma ana i gwala Yeesuwa ya, tar nda gà damər ŋgar ana tar gà ɓəza Yusadak a. Tar ka, Massaya, Eliyazer, Yarib, Gedaliya. 19 Ta mbaɗa, aɗaba tàa gəs akaba madagaza gà məkəs tar nda ahər tar ŋa, dite tə vəl dukw taf hagwala aà məpəla a bakal i təv Mbulum a; 20 Gà mburma ana i gwala Immer a; Hanani nda Zəbadiya; 21 Gà mburma ana i gwala Harim a: tar ka, Massaya, Eliya, Semaya, Yehiyel, Uze; 22 Gà mburma ana i gwala Pashura, tar ka, Eliyuhaniya, Massaya, Ismayel, Netaneyel, Yuzabad, Elasa.

23 Ika magər gà gwala Lewi, na a riŋ ka, Yuzabad, Simay, Kelaya, ana tə zalar asa ka, Kelita ya, Petahiya, Yahuda, Eliyazer. 24 Ika magər gà ɓəzla malaha dimis ka, Eliyasib na a riŋ a. Ika magər gà ɓəzla makasla gà biye gà hərmaga ka, gà Sallum, Telem nda Uriya.

25 Ika magər gà asiŋ gà Isərayel aaha tserdze ya: gà mburma ana tar i gwala Parusa ka, gà Ramiya, Izziya, Malkiya, Miyamin, Eliyazar, Malkiya nda Benaya; 26 Gà mburma ana i gwala Elam a, Mattaniya, Zakariya Yehiyel, Abdi, Yeremut, Eliya; 27 Gà mburma ana i gwala Zattuw a, gà Eliyuhaniya, Eliyasib, Mattaniya, Yeremut, Zabad, Aziza; 28 Gà mburma ana i gwala Bebay a, gà Yəhuhanan, Hananiya, Zabbay, Atalay; 29 Gà mburma ana i gwala Baniya ka, Mesullam, Mallukw, Adaya, Yasub, Seyal, Ramut; 30 Gà mburma ana i gwala Pahat-Muwab a ka, Adna, Kelal, Benaya, Massaya, Mattaniya, Betsalel, Binuwa, Manasse; 31 Gà mburma ana i gwala Harim a, Eliyazer, Yissiya, Malkiya, Semaya, Simun, 32 Bendzamen, Mallukw, Semariya; 33 Gà mburma ana i gwala Hasum a, Mattənay, Mattatta, Zabad, Elifelet, Yeremay, Manasse, Simay; 34 Gà mburma ana i gwala Baniya, Maday, Amram, Uwel, 35 Benaya, Bediya, Keluhu, 36 Vaniya, Meremut, Eliyasib, 37 Mattaniya, Mattənay, Yasay; 38 Gà mburma ana i gwala Binuwa ya ka, Simay, 39 Selemiya, Natan, Adaya, 40 Mahnadbay, Sasay, Saray, 41 Azarel, Selemyahu, Semariya, 42 Sallum, Amariya, Yusufa; 43 Gà mburma ana i gwala Nebuw a ka, Yeyiyel, Mattitiya, Zabad, Zəbina, Yadday, Zuwel, Benaya.

44 Gà mburma ata fit tserdze ya ka, tàa ndzaka gà dəm gà slele. Gà asiŋ gà məkəs ata ka, tàa waya gà ɓəza a bəɗ.