Meheme Ezra
9
1 I dəba gà dukw ata a geye ba ya ka, gà bàba ŋana, tə dara ta gweɗiŋ: « Gà mayahaba gər gà Isərayel, gà ɓəzla məbatsa duwa a Mbulum, nda gà gwala Lewi ka, wura aka ndza tsakalak, aà gà mayahaba gər gà mburma aaha ika ahəɗ aaha ya tsa. Tə zazam ka, mege gà dukw zlaŋgatsak gà Kananiya, gà Hittiya, gà Perizziya, gà Yebusiya, gà Ammuniya, gà Muwabiya, gà Ezipt ya nda gà Amuriya ana, ta gewa ŋgwal ŋa tsiye. 2 Tàa ndzàka gà dəm gà mburma ata, a ba tar, nda gà a gà ɓəza tar aà daala. Kamala taŋa ya, na gà mayahaba gər gà mburma ana, ti ne gà biy Mbulum a, tàa gaw ba nda gà mburma ana ɗa, ika ahəɗ aaha ya. I mege dukw ata kamala taŋa ya ka, gà ɓəzla aka miɗ gà mburma, nda gà dzagal ŋana, tar na gà malahalah gà mburma ana, tə dzəba aà mə̀ɓəla aka məpala ahəm Mbulum a . »3 I təv ana i tsaraka kataya ya ka, i kwayaɗa ikaba a tumbulum nda gà petek gà ya, i ndzàhabara ambəz i gər a, i ndzàha aba gumət a, dite i ndza a bəɗ, təpasə̀sə̀sa aka wisiŋ à gər fit fetitte kweleŋ. 4 I ndza i fata ka, gər a riŋ ihər a wisìŋ a hiywe, haa tsikw a ndze akahər mevə̀là dukw taf ana a Mbulum i mala hawa ya. Gà mburma ana ta ge magəɗa a seriye ana Mbulum gà Isərayel, a ta ge a aka gər mege dukw bakal gà Yahuda ana tə mara i slele ya, ti yahàba gər, tə lawara iye tits.
5 Iye Ezra, a ndze akahər məvəla dukw taf a Mbulum ana i hawa ya ka, i hitsera i huɗ batsah matsəɓatsəɓ gà ata ya, gà petek gà ana i kwayaɗa dər a tekeɗe ka, tar ika iye mba, i dəɗ a bəɗ, aà mandza gurmits a biye, i ndzək ahər a mbulum, ndara a təv BATSAH kwa ŋa Mbulum gà. 6 I dzàraha ba aà meheme i gwa: « Mbulum gà, hwarwa a giŋŋa, hwarwa a giŋŋa ka, hinne na aà mazla are gà a mbulum aà məfəraha ndara təv yak a. Aɗaba gà bakal mə̀r ka, hinne a za mə̀r i gər a, dite mege gà dukw bakal mə̀r ata ka, a ndzeweha tsikw a mbulum. 7 A gər mendze gà bàba gà tsir mə̀r ana tə ndzawa akahər ŋa ata ya, haa mbakum, maa geye gà bàba gà bakal. Agəra gà bakal mə̀r ata ka, mə̀r ŋa, gà Əbay nda gà ɓəzla məbatsa duwa a Mbulum, tàa dza mə̀r ahər a gà Əbay gà slele. Tàa bats mə̀r, tàa gasa mə̀r aka ahəɗ ŋgiɗ. Tàa kazala gà limana mə̀r, tàa ndaɗa aka mə̀r hwarwa, kamala taŋa ya, na dukw ana a riŋ ihər a ge a ba mbakum asa ya. 8 Ama kinehe, a gər mendze zaakwa ya ka, BATSAH kwa ŋa Mbulum mə̀r, kàa pat a mə̀r aà mege ŋgwal yak. Kàa vəl vatwa a gà misle ŋgiɗ ika magər mə̀r a, aà mandza a bəra nda mesife, dite aà ma ti ndze ika ahəɗ ana a ne biy yak a tsəɗaŋŋa ya. Asa ka, i təv ana mə̀r mandza ŋa, i ɓele ya ka, kər Mbulum mə̀r, kàa vəl a mə̀r mandza a bəra, kàa məmər aba a mesife zaakwa. 9 Haya, Mbulum mə̀r, mì ndzawa akahər ŋa ata ka, i ɓele. Ama kər ka, kàa miyak a mə̀r tsa. Kàa vəl vatwa, a gà Əbay gà Perisiya, tàa ge a mə̀r ŋgwal, tàa məma mə̀r à mandza a bəra, aà məmàk à ga yak batsah ŋa ata à bəra, malambaɗa ya à gà dukw ana a mbazla ya ya, dite kàa vəl a mə̀r təv aà mibeye aɗəm, i Yahuda nda Yeruzalem .
10 Dite kinehe asa ka, da Mbulum mə̀r, mìi gweɗe ana meme, na agəra dukw ana a le a mə̀r a? Haya maa miyak aà mazàzàma gà məpala ahəm yak, 11 ana kà vəl a mə̀r nda ahər gà ɓəzla məma à guma yak a. Kàa tsik a mə̀r aba ya, kə gwa: 'Ahəɗ ana ki dwim a, ki ta ndzwim a iɗəm a ka, təv dukw zlaŋgatsak. Aɗaba gà mburma ana mandza ŋa ikəka ya ka, tar gà ɓəzla mege dukw zlaŋgatsak, dite tàa rah aà mege dukw zlaŋgatsak tar ata aɗəm a fata fit. 12 Ka ta dzayum gà dəm kurum a zal a bəra gà ɓəza gà slele ata tsa. Ka ta ndzəkum gà məkəs ana ika ahəɗ ata ya, a gà ɓəza a kurum tsa. Ka ta yahum mene à gà mburma ata gà ɓəzla limana, nda mendze barbarərra diydiy tsa. Na dite, ki ti nwim a gà ɓəzla ndzəɗa, ki ti zimwim a gà ŋgwal gà dukw ana ika ahəɗ ata ya. Dite gà ɓəza kurum, ti sle a aà mezime a gà limana ata tserdze aà biybiy a'. 13 Da Mbulum mə̀r, gà mesle gà dukw ata a leye a mə̀r a fit tserdze ya ka, agəra ana mì ge bakal a. Haya nda ndzer, mə̀r kaɗəŋ kà, gà ɓəzla bakal batsah ŋa. Tsaatsa ka, kàa tike gà bakal mə̀r ata aà ahər kamala ana a da dər a tsa. Kàa miyak a mə̀r, mì ndza à bəra nda mesife. A gà mə̀r ana mì zeha ya. 14 Kamala taŋa ya, kinehe ana, mìi sle a aà mime à menìwe magəsa ahəm, aà gà məpala ahəm yak asa ya? Tsəna wànà mìi me a aà mandzə̀ka gà dəm gà mburma ata, ta gewa gà dukw zlaŋgatsak a asa ya? Taŋa ana wànà a tsiɓeke a aà mə̀r a, dite ki dzeye a à mə̀r a fit, ilik a be a tsa tsiye? 15 BATSAH kwa ŋa Mbulum gà Isərayel, kər ka, mala ndzer. Mbakum ka, kàa vəl vatwa a gà asiŋ a, ika magər a, tə ndza a bəra nda mesife asa. Mər naha kinehe ka, ika miɗ yak nda gà bakal mə̀r. Tsaatsa ka, wura a sle a mehitsek a aka miɗ, na i huɗ medzibe mendze aaha kamala naha ya tsa . »