Esdras 8

Gà mburma ana ta makabara nda gà Ezra ya

1 Araha na gà zləm gà bàba gà ɓəzla ga ana mì mbìɗa akabara gər i Babila ya nda gà iye a Yeruzalem a, akahər mekwere Artahsasta ya: 2 Gersum ana a dara i gwala Pinihas a; Daniyel ana a dara i gwala Itamar a; Hatus ana a dara i gwala Dawda a, 3 ŋgat ka, i liwiŋ gà ɓəza Sekaniya ya; Zakariya a dara i gwala Parusa, gà mburma ana tə da akabara i gwala tar nda gà ŋgat a ka, gà mburma 150, na ta wetse ba ya; 4 Eliyuhənay kəla Zərahiya ana a dara i gwala Pahat-Muwab a, tə da akabara nda gà mburma ya 200; 5 Sekaniya kəla Yahaziyel ana a dara i gwala Zattuw a, tə da akabara nda gà mburma ya 300; 6 Ebed kəla Yunatan ana i gwala Adin a, tə da akabara nda gà mburma ya 50; 7 Yesaya kəla Ataliya ana a dara i gwala Elam a, tə da akabara nda gà mburma ya 70; 8 Zəbadiya kəla Mikayel ana a dara i gwala Səfata ya ya, tə da akabara nda gà mburma ya 80; 9 Ubadiya kəla Yehiyel ana a dara i gwala Yuwab a, tə da akabara nda gà mburma ya 218; 10 Səlumit kəla Yusafiya ana a dara i gwala Bani ya, tə da akabara nda gà mburma ya 160; 11 Zakariya kəla Bebay ana i gwala Bebay a, tə da akabara nda gà mburma ya 28; 12 Yuhanan kəla Hakkatan ana a dara i gwala Azgad a, tə da akabara nda gà mburma ya 110; 13 Elifelet, Yeyel dite Semaya, gà mburma ata makər a, tə dara ka, i dəba ya, tar ka, i gwala Adunikam a, tə da akabara nda gà mburma ya 60; 14 Gà Utaya nda Zakkur ana tə dara i gwala Bigvay ya, tə da akabara ka, nda gà mburma ya 70.

Ezra a hadzal ba aà məmbəɗa gər a Yeruzalem

15 I yaha akaba gər a gà mburma ata fit tserdze aà guva dulwa ana a da nda Ahava ya, mi kirweye gà ga petek, mi ndza i fata mehinne makər. I fara ikaba ìzliɗ ìzliɗ ika magər gà mayahaba gər gà mburma ya, nda gà ɓəzla məbatsa duwa a Mbulum a ka, ama Yàa le aɗəm aà gà gwala Lewi ilik ika magər tar tsa. 16 I fata ya ka, i zalaha a gà bàba gà ɓəzla ga, gà Eliyazer, Ariyel, Semaya, Elnatan, Yarib, Elnatan, Natan, Zakariya, Mesullam, nda gà ɓəzla masəra medzeŋge duwa, gà Yuyarib nda Elnatan. b 17 I gwaɗa a tar, tə da a bəra Iddu. mala ga ana mandza ŋa, i Kasifiya ya. Yàa mbər metsike a tar aba dukw ana ti ta tsik a a gà Iddu, nda gà damər ŋgar ana, tar gà ɓəzla megemir i təv tsəɗaŋŋa ŋana i Kasifiya ya. Kərga taŋa ya, na dite ti ndzike a mə̀rra gà mburma ana ta ge a megemir i batsah ga mbulum mə̀r a. 18 Ŋgwal ahər Mbulum mə̀r aka zlak mə̀r, aka slər a mə̀rra Serebiya wele ana a sər duwa i gwala Mahli, a dara i gwala Lewi kəla Zakup a, tə dara nda gà ɓəza ŋgar, nda gà damər ŋgar a, tar tserdze ka, 18. 19 Tàa ndzək a mə̀rra gà Hasabiya nda damər ŋgar, Yesaya ana tə dara i gwala Merari ya. Tar nda gà damər ŋgar, dite nda gà ɓəza tar gà mburma 20 na fit a. 20 Tàa ndzək a mə̀rra gà mburma ya, 220, nda mewetse gà zləm tar, zləm nda zləm, ika magər gà ɓəzla megemir ana ta ge a, i təv tsəɗaŋŋa ata ya. Gà ɓəzla megemir ata ka, gà Dawda nda gà bàba ŋana, tàa mbər medze aɗəm tar, aà mazlaka gà gwala Lewi.

21 I fata aà guva dulwa Ahava ka, i gwaɗa a gà mburma fit tserdze, ge kwa a ndəra aà mahə̀na a gər kwa a bəɗ aka miɗ Mbulum kwa. Nda mege kamala taŋa ya, mìi wiz a dər ahər ka, mada ika vatwa mə̀r a, mege nda zay, mə̀r nda gà mburma ana i ma mə̀r a, nda gà limana mə̀r. 22 Hwarwa a giŋ, aà mewize gà sliwdze aà Əbay, gà sliwdze ana tar nda gà piris a, aà makasla mə̀r i təv gà ɓəzla guvəl mə̀r ana i huɗ mesiweye mə̀r a. Tsaatsa, maa gwaɗa a Əbay ka: « Mbulum mə̀r aka kesle a gà na, ti zlibe a a ŋgat a. Ama batsah matsəɓatsəɓ ŋgar ka, ika gər gà na ta miyak a ŋgat a . » 23 Aɗaba taŋa, na mì ge ndəra, dite mì wiz à Mbulum mə̀r ka, ma kasla mə̀r a, i fata ya ka, aka tsaraka meheme mə̀r ata.

24 I dəba ŋa ya, i dza gà ɓəzla aka miɗ, gà ɓəzla məbatsa duwa a Mbulum pam 12. Dite asa ka, gà Serebiya, Hasabiya nda gà gwala Liwi ŋgiɗ 10. 25 I keye a tar ndzemde məvə̀ɗa kur siŋgwe, gura, nda gà asiŋ gà dukw maslawa ana gà ŋgwal ŋa, tsakala ŋa hinne, a sìkim a ba tsiye. Gà Əbay nda gà ɓəzla meɗifer à metsehe, gà ɓəzla megemir ŋgar, dite nda gà Isərayel ana tar a riŋ i kwite ata ya. Na tə dzaya gà dukw ata aà batsah ga mbulum mə̀r ata ya. 26 Gà dukw ana i keye a tar ahər a ka, ndzemde məvə̀ɗa kur siŋgwe kiliw 20 000, gà dukw ana gà ŋgwal ŋa, ta və̀ɗ nda ndzemde məvəɗa kur siŋgwe ya ka, kiliw 3 000, gura tekeɗe ka, kiliw 3 000, 27 gà tugwaɗ ana ta vaɗa nda gura ya 20, tsakala tar ka, biy kur siŋgwe gura 1 000. Gà ŋgwal gà gah ana ta və̀ɗ nda virzegene ana wùzlwùzl a, 2. Asa ka, tar gà ŋgwal ŋa kamala gà tugwaɗ aaha ta vaɗa nda gura ya. 28 I dəba ŋa ya ka, i gwaɗa a tar: « Kurum mandza ŋa ka, pam, aà meger megemir a BATSAH kwa ŋa. Gà dukw aaha mbaŋa asa ka, pam kamala kurum ŋa ya. Gà ndzemde məvə̀ɗa kur siŋgwe nda gura aaha tar ka, gà dukw taf ana gà mburma tə dza, nda meziwe gà gər tar, a BATSAH kwa ŋa Mbulum gà bàba gà tsir kurum a. 29 Gà dukw aaha aà kurum a ka, kaslum ndaka vatwa ŋa lele, ndzwim dər tsim a Yeruzalem. I fata ka, ki ta kwim a gà dukw ata ika miɗ gà bàba gà ɓəzla məbatsa duwa a Mbulum, nda gà gwala Lewi, dite ika miɗ gà bàba gà ɓəzla ga gà Isərayel, i huɗ gà ga ana a riŋ i ga BATSAH kwa ŋa ya . » 30 I fata ya ka, gà ɓəzla məbatsa duwa a Mbulum nda gà gwala Lewi, ta gis a à kurum a gà dukw ata mekeŋa ya tserdze. Gà ndzemde məvə̀ɗa kur siŋgwe, nda gura, nda gà dukw maslàwa ana tsakala ŋa hinne a sìkim a ba tsiye, ti sle a aà mendzìke a gà dukw ata a Yeruzalem, a batsah ga mbulum, Mbulum kwa ata.

Ezra a ndze a Yeruzalem

31 Nda malahalah kiye nda mehinne 12 ka, mì mah ba aà guva dulwa Ahava ya, aà mada a Yeruzalem. I huɗ mesiweye ata ya fit tserdze ka, Mbulum mə̀r aka kasla mə̀r, i təv gà ɓəzla guvəl nda gà ɓəzla gərlaka ana, ti dze a aà mə̀r a maŋgwaɓa zləmana ya. 32 I fata ya, mì ndze a Yeruzalem a ka, mi sifik ba, mehinne makər. 33 Aà mehinne məfaɗ ŋana ka, mì keye gà ndzemde məvə̀ɗa kur siŋgwe, nda gà gura, dite nda gà dukw maslawa ana tsakala ŋa hinne a sìkim a ba tsiye, i huɗ batsah ga mbulum, Mbulum mə̀r. I dəba ŋa ya, mì dza a mala məbatsa duwa a Mbulum Məremut, kəla Uriya. Tar a riŋ ka, nda Eliyazar, kəla Pinihas, nda gà gwala Lewi, gà Yuzabad, kəla Yeesuwa, aha Nuwadiya kəla Binnuwi. 34 Gà dukw ata tserdze ya ka, tàa ɗama, dite tàa keye. I dəba ŋa ya, ta gaw akaba, gà mibiŋa ta wetse a huɗ wakita.

35 Gà na ta gasa tar ta mara a ma i slele ya ka, tə dza gà dukw taf ana tə dulawa fit kweleŋ, a Mbulum gà Isərayel. Nda zləm gà mayahaba gər, gà Isərayel fit tserdze. Tə dzaya ka, gà mbə̀luv sla 12, gà hagwala 96, dite gà ɓəza gà təmaŋ 77. Tə dzaya asa ka, gà vugul 12, gà taŋa ka, dukw taf biy məpəla a bakal. Gà dukw gənaw ata tserdze ya ka, tə dulwayaha kweleŋ a BATSAH kwa ŋa. 36 Dite asa ka, tə dzəba aà məmaya à məpala ahəm Əbay, a gà ɓəzla makwàrà ahəɗ Perisiya, nda gà ɓəzla megemir ana ika ahəɗ ana, a mbe aka tseke pat ana a dəɗawa aɗəm ika lide dulwa ŋgiɗ a. Tar tekeɗe, ta vəl ahər ndzəɗa a gà Isərayel aà gà dukw ata tserdze, a pər aà batsah ga mbulum a.