Ezra a ndze a Yeruzalem
7
1 I dəba gà dukw ata a geye ba akahər ŋa ata ya ka, i təv ana Artahsasta ŋgat Əbay gà Perisiya ya ka, wele duwa a riŋ tə zalar Ezra kəla Səraya, kəla Azariya, kəla Hilkiya, 2 kəla Salum, kəla Tsaduk, kəla Ahitub, 3 kəla Amariya, kəla Azariya, kəla Merayut, 4 kəla Zerakhiya, kəla Uzziyas, kəla Bukki, 5 kəla Abisuwa, kəla Pinihas, kəla Aliyazer, ŋgat ka, kəla batsah mala məbatsa duwa Mbulum Haruna. 6 Ezra ata, a dara ka, i Babila ya, ŋgat ka, mala medzèŋe məpala ahəm Mbulum, məpala ahəm ana BATSAH kwa ŋa, Mbulum gà Isərayel, a vəl a Musa ya, a tsaraka lele. BATSAH kwa ŋa Mbulum ŋgar aka kasla ŋgat, aɗaba taŋa, na Əbay a dzawar gà dukw ana aka wiz ahər tserdze ya. 7 I huɗ mive təsəla ana Artahsasta a ge i Əbay ya ka, gà asiŋ gà mezehe gà Isərayel ŋgiɗ, gà ɓəzla məbatsa duwa a Mbulum, gà gwala Lewi, gà ɓəzla malaha dimis, gà ɓəzla makasla gà biye hərmaga, dite nda gà ɓəzla megemir ana i ga mbulum batsah ŋana ya, ta mbəɗara gər a Yeruzalem a. 8 Ti ndze akabara nda gà Ezra ya ka, nda kiye mìi əzləm ŋa ya i huɗ mive ŋa ata ya. 9 A tike məpasla ahər pat mà dara i Babila ya ka, nda mehinne ilik ŋa, i huɗ malahalah kiye ya, . Dite a ndzere a Yeruzalem a ka, nda mehinne ilik i huɗ kiye mìi əzləm a, aɗaba ŋgwal Mbulum aka kasla ŋgat. 10 Aɗaba Ezra aka mbər məvəl ba nda gəzləŋ ŋgar ilik, aà matsaraka məpala ahəm BATSAH kwa ŋa, dite nda magəsa ahər ahəm. A yaha vatwa asa, aà medzeŋger a gà Isərayel, gà məpala ahəm nda gà dukw ana a da ndaka vatwa məpala ahəm ata ya.Əbay Artahsasta a dza gà megemir pam pam a Ezra
11 Araha na dukw ana a riŋ mewetse ŋa, i huɗ wakita ana Əbay Artahsasta a vəlar a mala məbatsa duwa a Mbulum Ezra, ŋgat na mala medzeŋgè məpala ahəm, a tsaraka lele, na məpala ahəm ana BATSAH kwa ŋa a vəl a gà mayahaba gər gà Isərayel a.
12 « Iye Artahsasta, Əbay ana ika gər gà Əbay tserdze ya, i wetseha wakita aaha ka, a mala məbatsa duwa a Mbulum Ezra, mala medzeŋgè məpala ahəm Mbulum ana, i gər ŋa i mbulum a.ª I gik wusa.
13 Araha na gà mepàlà ahəm gà ana i tsik a, gà mayahaba gər gà Isərayel ana ika mekwere gà tserdze ya, gà ɓəzla məbatsa duwa a Mbulum, gà gwala Lewi, na ta waya məmbəɗa gər a Yeruzalem akaba nda gà kər a ka, ti sle a aà mediŋa. 14 Iye ŋa nda gər gà, nda gà ɓəzla meɗifiŋ aà metsehe gà ana təsəla ya, mìi slər a kər a Yahuda, dite aka ahəɗ Yeruzalem. Wakita məpala ahəm Mbulum yak a ge a a kər a ihər, dite ki sir a dər ikaba ya, meme na ta gəs ahəm aà məpala ahəm ata ya. 15 Ki ti dzik a dər gà siŋgwe nda gà gura ana, iye nda gà ɓəzla meɗifiŋ aà metsehe gà, mì waya mìi vile a a Mbulum gà Isərayel ana ŋgat mandza ŋa i təv tsəɗaŋŋa ŋana i Yeruzalem a. 16 Ki dzik a dər asa ka, gà siŋgwe nda gà gura ana ki ta gese a tserdze ika ahəɗ Babila ya fit. Dite nda gà dukw taf ana gà mayahaba gər gà mburma, gà ɓəzla məbatsa duwa a Mbulum ana ta vəl nda meziwe gà gər tar, aà batsah ga mbulum, Mbulum tar ana i Yeruzalem a. 17 I təv ana kàa ndzeha a fata ya ka, ki ge a metsehe a siŋgwe ata lele, nda siŋgwe ata ka, ki sekeme a dər gà mbuluv sla, gà hagwala, gà ɓəza gà təmaŋ, dite nda gà dukw ana a da dər aà məvəla dukw taf ŋa ya, kamala taŋa ya mbaŋa, na ki ge a aà gà dukw taf dukw mezime ana, ta ge ika ahəɗ a, dite nda dukw taf gà guzum a. Ki dze a gà dukw ata tserdze ya ka, aka gər təv madula aaka duwa i ga mbulum, Mbulum kurum ana i Yeruzalem a. 18 Gà mezehe siŋgwe, nda gura ata mbaŋa ka, gwim dər dukw ana a da a kurum a gər ŋgwal ŋa ya, kər nda gà na ki gewim akaba megemir, kamala ana Mbulum kurum a waya ya. 19 Gà kazlaŋa megemir ana mì dzak aà megemir i batsah ga mbulum mbulum yak ka, ki ti dze a gà dukw ata aka miɗ Mbulum ana i Yeruzalem a. 20 Na gà asiŋ gà dukw megemir ŋgiɗ a riŋ ŋgwal ŋa ki sekeme a aà batsah ga mbulum, Mbulum yak ata asa ka, ki pileye a ka, nda siŋgwe ana i sahər Əbay ya.
21 Iye Əbay Artahsasta, araha na məpala ahəm ana i tsik a gà na tserdze ta ge a megemir nda siŋgwe, ika ahəɗ ana a mbe aka tseke pat ana a dəɗawa aɗəm ika lide dulwa ŋgiɗ a: Ta ge a ka, kalkal kamala ana mala məbatsa duwa a Mbulum Ezra, ŋgat ana mala medzeŋgè məpala ahəm mbulum, Mbulum ana i gər ŋa, a wize a a ter a ya. 22 Ti dzeɗewere ka, mazawa i gər a kur siŋgwe kiliw 3 000, ble kiliw 30 000, guzum liter 4 000, mal liter 4 000 tsa, dite sləwul ka, kamala ana ta waya ya pəra. 23 Gà dukw ana fit tserdze Mbulum ana i gəza a mbulum a wiz aɗaba ga ŋgar ata ya ka, ki gwim a ndaka vatwa ŋa terwihhwe lele. Kamala taŋa ya, na duwa a tsiɓere a Mbulum, agəra mekwere gà, dite aka gər gà ɓəza gà tsiye. 24 Dite asa ka, araha, na dukw ana, ki ta tsike a, a gà ɓəzla megemir ana, ta ge a megemir nda siŋgwe ya, tserdze: Gà ɓəzla məbatsa duwa a Mbulum, gà gwala Lewi, gà ɓəzla malaha dimis, gà ɓəzla makasla gà biye hərmaga, gà asiŋ gà ɓəzla megemir, kige tsa, gà mburma ana fit tserdze ya, gà na ta ge a megemir i huɗ batsah ga mbulum ata ya ka, vatwa a riŋ tsa, na. Ta pilewe a gà làmpa, gà matsakala duwa nda wakita guvah, asa ya tsa.
25 Dite kər, Ezra, nda metsehe ana kə ŋgat i təv Mbulum a ka, pala gà ɓəzla mege seriye, nda gà ɓəzla masasa ikaba seriye ya, a gà na tə sər məpala ahəm Mbulum yak a tserdze, ika magər gà mburma ana tar mandza ŋa ika tseke pat ana a dəɗawa aɗəm ika lide dulwa ŋgiɗ a. Dzeŋgwim a gà mburma ana tə sər məpala ahəm Mbulum ata tsiye. 26 Na wura aka gəs ahəm ndaka vatwa ŋa, aà məpala ahəm Mbulum yak tsa, kige tsa, aà məpala ahəm Əbay tsəka, ta ger a seriye: Ta kiɗe a ŋgat, kige tsa, ti delewe a ŋgat ika ahəɗ ata ya, kige tsa, ti dzik a ihər gà limana ŋgar a, kige tsa, ti tik a ŋgat a daŋgay . »
27 I fata ya ka, Ezra a gwa: « Mezlibe mege ka, biy BATSAH kwa ŋa Mbulum gà bàba gà tsir mə̀r! Ŋgat na a tike madzala gà gər a gəzləŋ a Əbay aà məvə̀l mezlibe a ga mbulum BATSAH kwa ŋana i Yeruzalem a. 28 BATSAH kwa ŋa aka giŋ ŋgwal ŋgar, aà are Əbay nda gà ɓəzla meɗifer aà metsehe, dite nda gà asiŋ gà mburma ana gà ŋgwal ŋa fit tserdze ta mbeyereha ya. Iye ka, BATSAH kwa ŋa Mbulum gà aka viliŋ ndzəɗa, ahər ŋgar ika gər gà. Yàa yaha gər a gà asiŋ gà bàba gà ɓəzla ga ŋgiɗ ana i Isərayel a əŋgal, aà mə̀mbəɗa akabara gər a nda gà iye ya. »