Əbay Dariyus a ŋgama a tar aakaha
6
1 I fata ya ka, Əbay Dariyus a vəl məpala ahəm, aà ma ti yaha gà bazlam ata a Babila, a huɗ gà ga ana, ta kaslawa iɗəm, gà miviye gà wakita nda gà ŋgwal gà kazlaŋa ya. 2 Ama i Ekbaten, huɗ batsah kwite ana ŋgwal ŋa lele malawaraŋa nda zlagam ika ahəɗ gà Mediya ya, na ti le aɗəm à wakita ata məpaɗa ŋa ya, araha na gà bazlam ana ta wetse aɗəm, a huɗ məpaɗa wakita ata ya:3 « I huɗ malahalah mive ana Sirus, a ne Əbay ya ka, aka vəl məpala ahəm aaha a gwa: Ga mbulum batsah ŋa ata i Yeruzalem a ka, ta mə dər aà mbulum. A ne a ka, təv ana ta betsewe a iɗəm, gà dukw taf ana ta vile a a Mbulum kamala dukw taf a. Tə zlazl ka, aka təv madzàha miviye ŋana. Batsah ga mbulum ata a ge a ka, gwetitikª kurwa gəra əzləm na zubul ŋana a da a mbulum a, dite zlabatum ŋana tekeɗe mege gwetitik kurwa gəra əzləm mbaŋa. 4 Ti dze a aaka, madzànàpà makər nda kur ana məpapazaya ŋa ya. I dəba ŋa ya ti tike a aaka batsah dizl are ilik. Ta pileye a gà megemir ata ka, nda limana ana i sahər Əbay ya. 5 Gà kazlaŋa ana nda gura, nda ndzemde məvə̀ɗa siŋgwe ana i ga mbulum a, Nevuhadnetsar a ndzək a Babila ya ka, ta mə dər a ga mbulum ata i Yeruzalem a. Dite kəla aà gà dukw ata tə ndzək i ga mbulum a fit tserdze ya ka, ki meye a dər a gà təv ana tə ndzək iɗəm i ga mbulum ata i Yeruzalem a.
6 Kinehe ka, a kər Tatnay, mala makwara ahəɗ ana a mbe aka tseke are pat ana a dəɗawa aɗəm ika lide dulwa ŋgiɗ a, a kər Sətar-Buznay nda gà mburma ana ki gewim akaba megemir a təv ilik ŋa ya, nda gà ɓəzla makwàrà ahəɗ ana ika mekwere ata ya: Ndzum aba aà megemir ŋa ya tsakalàk. 7 Məsakum à megemir mazlazla ga mbulum ata, ta ge. Mala makwara ahəɗ Yahuda nda gà bàba ŋana ika miɗ gà Yahuda ya, ta mə dər, aka təv ana tə zlazl aɗəm piŋŋe ya.
8 I vile a a kurum a məpala ahəm aaha: Zlakum gà bàba gà Yahuda, aà mazlazla batsah ga mbulum ata. Ki pilwim a ter a gà limana tar ana ti dzeye dər aà megemir a, nda siŋgwe ana i sahər Əbay ya. Kamala magweɗe ya ka, nda siŋgwe gà làmpa ana ika mekwere ahəɗ ana a mbe aka tseke are pat ana a dəɗawa aɗəm ika lide dulwa ŋgiɗ a. Ki mwime a ter a dər a gà mburma ata ka, duwa ilik a mezehe tsa, dite ta vavawa miveve tsa asa. 9 Ki dzewim a gà dukw ana a da dər a ge a ŋgulum a gà ɓəzla məbatsa duwa a Mbulum ana i Yeruzalem a kəla pat, tits à dukw ana ta wiz a kurum a. Ki geswim a a ter a gà ɓəza gà mbuluv sla, gà hagwala dite gà ɓəza gà təmaŋ, aà madularaha dukw taf ŋa, a Mbulum ana i gər ŋa ya. Ki dzwim a a ter a asa ka, gà bleª, gà sləwul, gà guzum dite nda gà mal. 10 Kamala taŋa ya, na ti sle a aà mivileha a Mbulum ana i gəza mbulum a, gà dukw taf ana ti dwilwereha ka, hədzək ŋa a zereha hwaŋŋa lele ya. Dite ta heme a agəra mendze gà Əbay, nda gà ɓəza tar.
11 Na wura aka gəs ahəm à dukw ana i tsik a tsəka, araha na məpala ahəm ana iye Dariyus i vəl a: Ti ndzèhera aà gà aram ana a tsaɓa dər ga ŋgar a, ta hitse a dər dzeŋ, dite tike a aaka a wele ata, aka gər aram ata, mazlalar i ba ya. I dəba ŋa ya, ti ne a ga ŋgar ka, təv mayaha gər gà dukw aruwàŋ. Aɗaba ana aka gəs ahəm aà mə̀palà ahəm ata tsiye. 12 Mbulum ana a patawa a ba ŋgar i Yeruzalem a ka, madalawa gà Əbay ika təv mendze tar a tserdze, dite nda gà mburma ana tserdze, ti dzike a ba aà mimbiɗera ahər a məpala ahəm gà, nda məmbàzlà à gà Mbulum ata ya. Iye, Dariyus, na i vəl məpala ahəm ata ya. I waya ka, ku mege weke ma gəs ahər ahəm ndaka vatwa ŋa kalkal lele . »
13 I fata ya ka, Tatnay mala makwàrà ahəɗ ana a mbe aka tseke pat ana a dəɗawa aɗəm ika lide dulwa ŋgiɗ a, Sətar-Buznay nda gà mburma ŋgar ana ta gewa akaba megemir a təv ilik ŋa ya, ta ge kalkal kamala na Əbay Dariyus a slər a tar aaha ya.
Megirive mandə̀ɗa ga mbulum a bəra
14 I fata ya ka, gà bàba ŋana i Yahuda ya, tə da aà megemir mazlazla ga ata aka miɗ aka miɗ, ta məba aà ndzəɗa ka, nda gà bazlam gà ɓəzla məbatsa duwa a Mbulum Haggay, nda Zakariya kəla Iddu, tə ndəv aà mazlazla ŋa, kamala ana Mbulum gà Isərayel a wiz a, dite kamala gà məpala ahəm Əbay gà Perisiya ya, Sirus, Dariyus nda gà Artahsasta ya. 15 I huɗ mive ndilik ŋana Dariyus i Əbay ya, nda mehinne makər kiye ana tə zalar Adarª a, na ga mbulum ata a rah a. 16 Gà Isərayel ana tar, gà ɓəzla məbatsa duwa a Mbulum a, gà gwala Lewi ya, nda gà asiŋ gà mayahaba gər gà mburma ana ta màra i slele ya, ta ge megirive mandəvandəv gà megemir ana a ndəv a. Nda mandə̀ɗa ga mbulum ata a bəra nda maŋgayaba ŋa. 17 Agəra megirive mandə̀ɗa ga mbulum ata a bəra ya ka, ta bats gà dukw taf, gà mbuluv sla 100, gà hagwala 200, dite gà ɓəza gà təmaŋ 400. Biy məpəla à bakal a gà Isərayel ana tserdze ya ka, tə dza gà vugul 12, ilik kəla aà gwala. 18 I dəba ŋa ya ka, tə ndzaka ikaba gà ɓəzla məbatsa duwa a Mbulum a, nda gà gwala Lewi ya pam pam. Kamala taŋa ya, na ta gewere a megemir a Mbulum ana i Yeruzalem a, nda mazazama dukw ana mewetse ŋa a riŋ i wakita Musa ya.
Megirive Paska
19 Gà mburma ana tserdze ta màra i slele ya, ta ge megirive Paska, nda mehinne kurwa gəra faɗ ŋa, i huɗ malahalah kiye ya. 20 Gà ɓəzla məbatsa duwa a Mbulum tserdze, nda gà gwala Lewi tserdze, ti ne aba gà tsəɗaŋŋa a təv ilik ŋa, tar fit gà tsəɗaŋŋa ŋa. I fata ya ka, ti zleye a ɗa a gà ɓəza gà təmaŋ, aà megirive Paska ata, biy gà mayahaba gər gà mburma ana ta mara a ma, i slele ya, nda gà biy damər tar, gà ɓəzla məbatsa duwa a Mbulum, dite gà biy tar ŋa mbaŋa. 21 Gà Isərayel ana tserdze ta mara a ma, i slele ya ka, tàa zəm akaba ɗaf Paska a təv ilik ŋa nda gà mburma ana tserdze ika ahəɗ ata ta miyak à gà dukw tar ana ŋgwal ŋa tsiye ya, aà mazlìbe a BATSAH kwa ŋa, Mbulum gà Isərayel. 22 Mehinne təsəla, na ta ge a megirive peŋ ana giɗe ikəka tsiye, nda maŋgayaba ya. Aɗaba BATSAH kwa ŋa aka rah a tar aba aà maŋgayaba, agəra ana aka mbəɗ aà gəzləŋ a Əbay gà Assiriya agəra tar a. Kamala taŋa, na Əbay ata a vəl a tar aba ndzəɗa aà megemir ana ta mə dər aà batsah ga mbulum, Mbulum gà Isərayel a bəra ya.