Esdras 5

1 Ama pat ŋgiɗ duwa ka, mala məmà à bazlam Mbulum Haggay, nda mala məma guma Mbulum Zakariya kəla Iddu, ta mà tar a dukw ana Mbulum a tsik a gà Yahuda ana i Yeruzalem a, dite nda gà mburma ana i kwite Yahuda ya fit tserdze, nda zləm Mbulum gà Isərayel ana, a ne Mbulum ika gər tar a. 2 I fata ya ka, Zurubabila kəla Salatiyel nda Yeesuwa kəla Yusadak, ta mà aka mazlazla à batsah ga mbulum ata i Yeruzalem a. Gà ɓəzla məma à guma Mbulum tə zlak a ahər tar, nda məvəla a tar ndzəɗa.

3 Akahər ŋa ata kuɗa ka, Tatnay mala makwara ahəɗ ana a mbe, aka tseke pat ana a dəɗawa aɗəm ika lide dulwa ŋgiɗ a. Sətar-Buznay nda gà mburma ana ta gewa akaba megemir a təv ilik ŋa ya, tə dara ti le aà tar. Ta gwaɗa a tar: « Weke na a vəl a kurum vatwa aà məma à batsah ga mbulum aaha nda gà dukw mazlawa megemir mazlazla ga aaha ya? 4 Mì waya masəra zləm gà mburma ana ti zlezle a ga aaha ya . » 5 Kərga taŋa ya, ta maha à dukw ata a ge ba ya a Dariyus, dite gà mburma ata, tə dza zləm a dukw ana a tsik a a ter aaka ya. Ama ka, Mbulum a riŋ a kèsle a gà bàba ŋana i Yahuda ya. Kamala taŋa ya ka, wura aka tike aka tar balaari aà məmiyàkà à megemir tar ata asa tsa, na akahər ata ya.

1 Wakita ana ta wetseha a Əbay Dariyus a

6 Araha na gà bazlam ana i huɗ wakita ana Tatnay, mala makwara ahəɗ ana ika lide dulwa ŋgiɗ a, Sətar-Buznay, nda gà mburma ana ta gewa akaba megemir a təv ilik ŋa ika ahəɗ ata ya, tə sləraha a Əbay Dariyus a. 7 Gà bazlam ana ta wetseraha ya ka, araha:

A kər Əbay Dariyus, gər a gwa ka, mandza a bəra yak mada aka miɗ! aka miɗ!

8 Əbay mə̀r, mì waya à meɗifek dərraha ka, maa da aka ahəɗ gà Yahuda, ga Mbulum batsah ŋa ata ka, tàa dzəba à mazlazla ŋa dər aà mbulum, nda gà kur ana məpàpàzà ŋa ya, nda gà bàba gà dizl ana tə dzaya aka magər gà mazlazla zlagam a. Tàa vəl ba aà mege megemir ŋa, ndaka vatwa ŋa, dite a riŋ a de a aka miɗ ka, tsəmma tsəmma. 9 Maa wize a ya gà bazlam aà gà bàba tar ŋa ya. Dukw ana mì wiz aà tar a ka, araha: « Weke na a vəl a kurum vatwa aà məma à batsah ga mbulum aaha nda gà kazlaŋa megemir mazlazla ga aaha ya? » 10 Maa wize a ya a tar, gà zləm tar asa. Kamala taŋa ya, mìi sle a aà mivileke a gà zləm gà na tə ndza aka miɗ megemir ata ya.

11 Ta gwaɗa a mə̀r aaka ka:

Mər ka, gà ɓəzla megemir Mbulum ana a ge gà gəza mbulum nda gər ahəɗ a. Mìi me a à batsah ga mbulum ana batsah Əbay gà Isərayel, a zlazl a, a bəra, dite a ndəv dər aka ndza hinne ya.^* 12 Ama gà bàba gà tsir mə̀r, tàa ge dukw ana a ləm aà matsəɓatsəɓ Mbulum ana ŋgat i gər ŋa i Mbulum a. Aɗaba taŋa, na a dza tar ahər, a Nevuhadnetsar gà Kaldiya, Əbay gà Babila, aà makwàrà tar a. Wele ata na a mbazla à batsah ga mbulum ata, dite na a gasa gà mayahaba gər gà mburma ata aka ahəɗ ŋgar a. 13 Tsaatsa ka, aka malahalah mive ana Sirus, a ne Əbay i Babila ya ka, ŋgat na a vəl vatwa aà məma à batsah ga mbulum aaha a bəra ya. 14 Əbay Nevuhadnetsar aka ndzək gà kazlaŋa gura, nda gà dukw ana ta vaɗa nda ndzemde məvə̀ɗa kur siŋgwe, i batsah ga mbulum ata i Yeruzalem a. Dite a da a dza a ga mbulum gà Babila. Əbay Sirus na a ndzəkara gà dukw ata i ga mbulum a, a dza ahər a wele ana zləm ŋgar Sesbatsar, a ne a ŋgat mala makwàrà ahəɗ gà Yahuda ya. 15 Sirus a gwaɗar: « Ndzək gà dukw aaha, da mà dər a huɗ batsah ga mbulum ana i Yeruzalem a. Ka zlazlum à ga mbulum ata, a təv madzàha ŋa ata, piŋŋe ya . » 16 I fata ya ka, Sesbatsar ŋa ata kuɗa ka, a dara a faha, a Yeruzalem a, dite ŋgat na a lah mandzəba aà madzàha awiya batsah ga mbulum ata ya. Daga à gər megemir ana tə dzahərba aà mege ŋa ya, ama haa kinehe ka, aka ndəv zukw tsa.

17 Kinehe ka, Əbay mə̀r, na kàa samata lele ka, ki sle a aà meyehe gà bazlam ata, i miviye gà wakita ana gà Əbay gà Babila ta wetse aɗəm piŋŋe ya. Kamala taŋa ya, na dite ki sir a dər ndzer ka, wànà Əbay Sirus aka vəl ahər vatwa nda ndzer, na aà məma à batsah ga mbulum ata i Yeruzalem a, a bəra ya ya. Ama kinehe ka, mì hamak, slər a mə̀rra madzala gà gər yak ana kà dzala aka gər gà bazlam ata ya.