Meme na gà ɓəzla mene are gà Isərayel ta palà tar ahəm aà məma à ga mbulum a bəra ya
4
1 I təv ana gà ɓəzla mene are gà mburma Yahuda nda gà mburma Bendzamen tə tsaraka ka, gà mburma ana ta mara ma i slele ya ka, tar a riŋ ti zlezle a à ga mbulum BATSAH kwa ŋa, Mbulum gà Isərayel. 2 I fata ya ka, tə dara ti le a aà Zurubabila nda gà ɓəzla ga. Ta gwaɗa a tar: « Mì waya ka, mìi zleke a kurum aà mazlazla batsah ga mbulum aaha! Aɗaba mì dzawa gurmits a biye a Mbulum kurum ana kà dzàwumar gurmits a biye ya mbaŋa. Mì dzawar gà dukw taf daga a gər Asarhaddun Əbay gà Assiriya ana a ndzəkara mə̀r a faha ya ya . » 3 Ama Zurubabila, Yeesuwa nda gà asiŋ gà ɓəzla ga gà Isərayel ŋgiɗ ta gwaɗa tar aaka: « A da dər tsa, na kurum ki zlekwim a mə̀r aà mazlazla ga mbulum mə̀r a. Mər a gər mə̀r na mìi zlezle a ya. Aɗaba a ne a ka, ga mbulum BATSAH kwa ŋa Mbulum gà Isərayel. Kamala na, məpala ahəm Sirus Əbay gà Perisiya a vəl a mə̀r a » 4 I fata ya ka, gà mburma ana mandza ŋa ika ahəɗ ata ya, ta ge kamala taŋa ya tserdze ka, aà mahaɓa tar aba aà ahər a gà Yahuda. Ti yehe a vatwa ka, aà mandza a tar magəɗa, na dite ta me a a ga mbulum ata a bəra asa tsiye. 5 I huɗ gà mendzena Sirus Əbay gà Perisiya ya, tsikw a ndze a ahər ana Dariyus a ne Əbay ya ka, tə dzawa siŋgwe a gà ɓəzla meɗife a metsehe a Əbay. Ta waya ka, tar na ta hitse à megemir gà Yahuda ata aà ta ge asa tsiye.Gà mburma ta ge gudze aà gà Yahuda a təv gà Əbay Ahaswerus nda Artahsasta
6 I dəba gà mive diŋ a, akahər ana Ahaswerus a dzəba aà mene Əbay ya ka, gà mburma ana ika ahəɗ ata ya, ta wetser aaha wakita aà məma bakal a gà mburma ana mandza ŋa i Yahuda nda Yeruzalem a. 7 I dəba gà mive diŋ a, akahər Artahsasta ana ŋgat Əbay gà Perisiya ya ka, gà Bisəlam, Mitiridat, Tavel nda gà mburma ana ta gewa akaba megemir a, ta wetser aaha wakita asa mbaŋa. Wakita ata ta wetse ya ka, ndaka ahəm gà Aramaniya. Ta mbəɗ dər asa mbaŋa. Araha na ndaka ahəm Aramaniya ya.
8 Rehum, mala makwara ahəɗ, nda Simsay mala mewetse duwa, tar mbaŋa, ta wetsèha wakita a Əbay Artahsasta aka gər Yeruzalem, ta wetse wakita ata ka, kamala naha ya:ª
9 « Wakita aaha ka, biy gà Rehum mala makwara ahəɗ, nda Simsay mala mewetse duwa, nda gà asiŋ gà mburma ana ta gewa akaba megemir ika mekwere Din, Afarsatak, Tarpel, Afaras, Erek, Babila, Susa, Deha, Elam, 10 nda gà asiŋ gà mburma ana Asnappar wele ana meɗe zləm ŋgar a riŋ hinne, a gasa tar, a dzə̀ tar a huɗ gà bàba gà kwite ana i Samariya ya, nda gà, a huɗ gà mezehe gà ahəɗ ana a mbe aka tseke are pat, ana a dəɗawa aɗəm ika lide dulwa ŋgiɗ a . »
11 Kinehe ka, araha na gà bazlam ana ta wetse a huɗ wakita ata ya:
Əbay Artahsasta, na a wetseha wakita aaha ka, mə̀r gà ɓele yak, gà mburma ana mandza ŋa ika lide dulwa ŋgiɗ a: 12 Əbay mə̀r, dukw ana mì waya mìi ɗifeke a dər aaha ya ka, araha, gà Yahuda ana tə dara i ma yak a ka, araha tàa ndzera aka magər mə̀r a, a Yeruzalem a. Tar a riŋ ta me a aà mazlazla huɗ kwite aaha, segeme ŋa, dite ŋgwal ŋa tsiye, a bəra. Tar a riŋ ti lembeɗeye a à gà madzàha gà dava ŋana, dite ti zlezleye a à gà zlagam ŋana asa.
13 Əbay mə̀r, mì waya maɗifek dər aaha asa ka, aà dukw aaha: « Na tàa mà à batsah kwite aaha à mbulum, tàa zlazl à zlagam ŋa ka, gà mburma aaha, ta pilewe a gà làmpa, gà matsakala duwa nda wakita guvah, asa tsa. Taŋa aka miɗ mba ka, limana a nikiɗe a ika mekwere yak a. 14 Agəra taŋa, mə̀r ana màa ŋgat mege gara aà megik megemir a ka, mìi sle a à megise a gəzləŋ tsa, na mìi ŋgetere a ka, ti tike a kər aà ahər tsiye, Əbay mə̀r. Aɗaba taŋa na kinehe mi ɗifek dərraha à gà dukw ata ya, Əbay mə̀r. 15 Aɗaba taŋa, ki sle a à meyèhe i huɗ wakita ana a patawa a gà dukw ana a geyewa ba i huɗ gà mekwere ana a da a dəba ya. Ki lehira ka, gà mburma ana i Yeruzalem a ka, tar hiywe ka, gà ɓəzla segeme. Tar ka, ti ye ba tsidze, na aà mege dukw bakal, a gà Əbay nda gà ɓəzla makwara gà ahəɗ ana ta kwara ɗa ya. Daga piŋŋa na batsah kwite ata ka, aka miyak à matsala ba à segeme a gər nda təv gà Əbay tsiye. Agəra taŋa na ta mbàzla a kwite ata ya. 16 Əbay mə̀r mì waya aà məpatak dər ka, na tàa zlazl à kwite ata ka, dite gà zlagam ata tàa lambaɗa dər ka, ki ta mbe a aà makwara tar asa tsa, na gà mburma ata mandza ŋa ika lide dulwa ŋgiɗ a . »
17 Əbay Artahsasta a sləraha mifefile aka gà bazlam ata:
« A Rehum mala makwara ahəɗ, a mala mewetse duwa Simsay, dite a gà mburma ana ta gewa akaba megemir a təv ilik ŋa, tar mandza ŋa ika ahəɗ Samariya ya, dite a gà mezehe ŋana ika lide dulwa ŋgiɗ a. I ge kurumaha wusa.
18 Wakita ana kà wetswìm, kà slərwimiŋara ya ka, tàa mbəɗ dər, tàa dzeŋgìŋ. 19 Iye nda ahər gà ŋa, i vəl vatwa aà mayaha gà dukw ana a geyewa ba i huɗ gà mekwere ana a da a dəba ya. Meyèhe ata ti yaha ya ka, a le ahər ba ka, daga piŋŋe, gà mburma ana i kwite Yeruzalem a ka, segeme i gər tar nda təv gà Əbay, dite tə dzawa ba aà mewise duwa nda matsalaba à gà segeme ŋgiɗ a gər pam pam. 20 Piŋŋe i huɗ kwite Yeruzalem ka, gà Əbay ana gà ndzəɗa ŋa ya, ta gewa a riŋ. Ta kwarawa gà ahəɗ ana ika lide dulwa ŋgiɗ a tserdze. gà mburma ata, ta pəlawa gà làmpa, gà matsakala duwa nda wakita guvah. 21 Ama kinehe ka, palum a tar ahəm, ta miyak à megemir ata. Tə zlazl kwite ata asa tsa, haa a pat ana iye nda ahər gà ŋa, i vile a ahər a vatwa ya. 22 Gwim metsehe, ka ta məsakum a duwa ilik i huɗ gà bazlam ata ya tsa. A tsahən tsa, na gà bazlam ata ti ta ne a batsah bakal, dite ka, a ta vile a magazlavda a gà Əbay ya. »
23 I təv ana ti dzèŋgè wakita Əbay Artahsasta, a Rehum, a mala mewetse duwa Simsay, dite a gà mburma ana ta gewe akaba megemir tserdze ya ka, tə da a Yeruzalem bise tsara. Ti tike balaari aà gà Yahuda, ta miyak à megemir tar ata.
Məma aka mazlazla batsah ga mbulum
24 I fata ya ka, ta miyak à mazlazla ga mbulum ata i Yeruzalem a. A ndza ka, haa tsikw aà mive ma sula ŋana Dariyus a ne Əbay gà Perisiya ya.