Esdras 3

Ta mà à təv məvəla aaka duwa a Mbulum a bəra

1 I təv ana a ndze a kiye matəsəla^ª ŋana i huɗ mive ya ka, gà Isərayel tàa ndzaya a gà kwite tar. Gà mayahaba gər gà mburma ti yahàba gər, dìts a təv ilik ŋa, a Yeruzalem tserdze. 2 I fata ya ka, mala məbatsa duwa a Mbulum Yeesuwa kəla Yusadak, tar nda gà damər ŋgar gà ɓəzla məbatsa duwa a Mbulum ŋgiɗ aaha, Zurubabila kəla Salatiyel, tar nda gà mburma ana i gwala tar a. Tə dzəba aà məma à təv məvəla aaka dukw taf a Mbulum gà Isərayel a bəra. Aà madulawar aaka gà dukw taf, kamala ana a riŋ mewetse ŋa i wakita məpala ahəm Musa mburma Mbulum a. 3 I fata ya ka, ta ge magəɗa a gà mburma ana mandza a riŋ ika ahəɗ tar a. Tsaatsa ka, ti zlezle a aà təv məvəla aaka dukw ata ka, aka miviye təv ana tə dzàha piŋŋa ya. I dəba ŋa ya, ta vile a aaka dukw taf a BATSAH kwa ŋa kamala dukw ana ta kəɗawar kəla mèkwède, kəla hawa ya. 4 I dəba ŋa ya ka, ta ge megirive mekirewe gà ga petek, kamala ana a riŋ mewetse ŋa ya. Kəla pat, ta vəlawa gà dukw taf tserdze biy ana tə dùlawa a Mbulum kamala ana məpala ahəm a gwa ya. 5 I dəba taŋa ya ka, ta vəlawa dukw taf ana tə dùlawa kəla wur gà pat a. Gà dukw taf ana ta hitse dər pìnŋe, ta vəlawa Mbulum a ka, nda malahalah mehinne pat ana i huɗ kiye ya, dite gà ahər megirive ana pam ta gewa a BATSAH kwa ŋa ya, nda gà dukw taf ana gà mburma tə vəlawa nda meziwe a gà gər tar a BATSAH kwa ŋa ya. 6 Aka malahalah mehinne ata i huɗ kiye matəsəla ŋana ya ka, gà Isərayel tə dzawa ba aà madzaya gà dukw taf ana tə dulawa a BATSAH kwa ŋa ya. Tsaatsa ka, ga BATSAH kwa ŋa ata, ti dze a dərraha ahəɗ awiyeŋa ya ka, tàa dzəba aà madzàha ŋa zukw tsa. 7 I dəba ŋa ya kuɗa ka, tə dzaya gà siŋgwe a gà ɓəzla məpàpàzà gà kur, nda gà ɓəzla malàmbàɗà gà dizl. Tə dzaya gà dukw mezime, gà dukw mese, nda gà mal, a gà Siduniya nda gà Tirus dite ka, tə ndzakawara gà ŋgwal gà dizl ana gà ndzəɗa ŋa, ara i Liban a, ndaka gər yam a, tsikw ara a huɗ kwite Yafa ya. Ta ge kamala taŋa ya ka, tə zazam taŋa ka, məpala ahəm Sirus Əbay gà Perisiya ana a gwaɗa a tar a.

Tə dzəba aà madzàha ga mbulum awiya ŋa ata

8 I huɗ mive masula ŋana, i dəba ana ta mbəɗara gər a Yeruzalem, a huɗ kwite ata batsah ga mbulum iɗəm a, Zurubabila kəla Salatiyel, Yeesuwa kəla Yusadak, gà damər tar gà asiŋ gà ɓəzla məbatsa duwa a Mbulum ŋgiɗ, gà Lewi nda gà mburma ana fit tserdze ta mbəɗ akabara gər i slele ya, tə dzəba aà megemir i huɗ kiye masula ŋa ata ya. Tə ndzək gà gwala Lewi ana tar, gəs aà mive dzik səla ya, da aka miɗ a, aà mandza aka miɗ megemir ga mbulum BATSAH kwa ŋa ata. 9 I gà gwala Lewi ya ka, gà Yeesuwa nda gà ɓəza ŋgar, nda gà damər ŋgar, gà Kadamiyel nda gà ɓəza ŋgar, tə dara i gwala Yahuda ya. Ta gaw ba a tə̀cvəməŋa ilik dìts aà mandza aka miɗ à gà ɓəzla megemir ana ta ge a megemir i batsah ga mbulum ata ya. Gà Lewi ana tə dara i gwala Henadad a, tə zlak ahər tar.

10 I təv ana gà ɓəzla mazlazla ga, ti dzèhe a ga mbulum BATSAH kwa ŋa batsah ŋa ata ya ka, gà ɓəzla məbatsa duwa a Mbulum ka, nda gà petek megemir tar, tə lah aka miɗ nda gà məvata gà mezleliŋ. Gà gwala Lewi ana tə dara i gwala Asaf a, tə zàzam tar nda gà ndzemde ana ta gəzlawa aka malaha dimis a. Ku mege weke a lah dimis mazambàɗa a BATSAH kwa ŋa, kamala na Dawda Əbay gà Isərayel a gwa ya. 11 I huɗ dimis tar ata ya ka, ta ge kəkaaha, tə zləb à BATSAH kwa ŋa, dite ku mege weke a gwaɗa aaka nda dimis: « Haya, BATSAH kwa ŋa ka, ŋgwal ŋa, dite meweye ŋgar ana i təv gà Isərayel a ka, a ndze a ka, aà biybiy . » Gà mayahaba gər gà mburma tserdze mbaŋa, tə lah dimis mezlibe a a BATSAH kwa ŋa, ta wìdeya, ta ŋgayaba. Aɗaba ana gà ɓəzla mazlazla ga tàa dzaha batsah ga BATSAH kwa ŋa ata ya.

12 Bagwal ŋa, gà ɓəzla məbatsa duwa a Mbulum, nda gà gwala Lewi nda gà ɓəzla ga, tar ka, gà bàba ŋa, mive tar hinne, tàa mbər meŋgete a malahalah batsah ga mbulum ata ya ka, tə dza akaba tuwa ɓùhh, na i təv ana gà ɓəzla mazlazla ga, tə dzàha ga awiya ŋa ata a təv are tar a. Ama gà mburma hinne ta wideye nda maŋgayaba mbaŋa. 13 Tar ata fit tserdze ya, ta wideye nda magala. A ɗe a gà təv ana diriŋ diriŋ a. Gà mburma, ti sle aà megeye ikaba gà Mewideye maŋgayaba gà misle ŋgiɗ a, nda Mewideye matsəɓatsəɓ gà misle ŋgiɗ a tsa.