Əbay a vəl mezlibe a Mardukway
6
1 I huɗ həvəɗ ŋa ata ya ka, mendze are aka gəsar are a əbay tsa. A wiz aà tə zlarra wakita ana mewetse ŋa iɗəm gà labara mekwere ana a da a dəba ya. Tə dzəba aà medzeŋger ŋa ika miɗ ŋgar. 2 Tə dzeŋge ndeyndey ŋana ka, təv ana a fafəl aka gər mandza aka ahəm gà Bigtan nda Teres, ana Mardukway a pàt dər a. Gà wele ata sula ya ka, gà madadaɗaŋa, gà ɓəzla megemir ana, ta kaslawa biye hərmaga ana a da a bəra əbay ya. Ta waya makəɗa əbay Ahaswerus akahər ata ya. 3 Əbay a wiz dər ikaba ya: « Dukw mayaba wara, nda mezlibe wara na Mardukway a ŋgat agəra taŋa ya? » Gà ɓəzla megemir ŋgar ta gwaɗar aaka: « Aka ŋgat duwa ilik tsa. »4 Əbay a wiz: « Weke na a riŋ ika varavada ya? » Tsaatsa ka, ar ŋa ata na Haman a ndzeha aka varavada ata i bəra ya. A dehe a a wiz a vatwa aà əbay ka, ta hiriwe Mardukway aà dizl ana a ndwaŋ agəra ŋgat a. 5 Gà ɓəzla megemir ta gwaɗar aaka: « Haman na a riŋ ika varavada ya. » Əbay a gwa: « Ma dara a ga ya. »
6 Haman a daha, tsam ka, əbay a wiz ahər: « Na əbay a vile a mezlibe a wura dzena, a ge a na meme? » Haman a dzala: « Na əbay aka zlaŋa a vile a mezlibe a mburma ka, a ge a taŋa ka, iye tsəna a weke asa ya. » 7 Haman a gwaɗa a əbay: « Araha na dukw ana ki ge ya, na ki vile a mezlibe a wura ya: 8 Vəlar petek əbay yak ana kàa tike akaba ilik a, piris əbay yak ana kàa tsəl aaka, tàa tiker mendiwiɗe gər əbay a gər ilik a. 9 Tə dza gà petek nda piris ata a mburma ilik i liwiŋ gà bàba gà ɓəzla megemir əbay ya. Metike petek aka wele ata dite matahar a aka piris, malaka dər ŋgat ndaka təv mendze ana i huɗ kwite ya, nda gà mewideye ika miɗ ŋgar: Araha na dukw ana əbay a ge a à wele ana a waya məvəlar mezlibe ya! »
10 Əbay a gwaɗa a Haman: « Haya lele, daha tsəmma tsara zla petek, nda piris kamala ana kə gwa ya, dite ki ge kamala taŋa ya à Mardukway gà Yahuda aaha, i təv megemir ŋgar ana ika biye hərmaga mada a bəra əbay a. Ge ka, kalkal kamala ana kà tsik a, duwa məməsak iɗəm gər a tsa. » 11 Haman a da a mandzəkara gà petek nda piris a. A tike petek aka Mardukway dite a tahar aka piris. I dəba ŋa ya ka, a suwaya à ŋgat ika təv mendze ana i huɗ kwite ya, nda gà mewideye ika miɗ ŋgar: « Araha na dukw ana əbay a ge à wele ana a waya məvəlar mezlibe ya! »
12 I dəba ŋa ya ka, Mardukway a mbəɗara gər aka biye hərmaga əbay ya. Haman a mbəɗ gər a ma tsəmma tsara, səraf a kaha are ŋgar agəra hwarwa ana a ger a ya. 13 Tsam ka, Haman a ɗama gà dukw ana a leye a aà ŋgat a fit a məkəs ŋgar Zeres, nda gà masla ŋgar aaha tserdze. Gà ɓəzla meɗifer à metsehe nda gà məkəs ŋgar ata ta gwaɗar: « Araha Mardukway ka gà Yahuda, kàa dzəba aà menikiɗe i ika miɗ ŋgar, ki sle a aà mege duwa à wele aaka asa tsa. Ama sər dər dzer ka, ki nikiɗewe a ika miɗ ŋgar hiywe. » 14 I təv ana tar a riŋ aà mifefile mba ya ka, gà ɓəzla megemir əbay ata gà madadaɗa ŋa ya, tàa ndzeha, tə laka Haman tsara aka ŋgwal ɗaf ana Asta a de ya.