Asta 5

Asta a da təv əbay

1 I dəba mege ndəra ana ta ge mehinne makər a ka, Asta a dza akaba petek mandərkwasla məkəs əbay ŋgar, dite a da a hitse dər aka varavada mada ga a bəra əbay. Əbay riŋ mandzaŋa, ika təv mendze mekwere əbay ŋgar i ga, ser aka biye hərmaga mada a ga. 2 I təv ana a ŋgat a Asta mandərkwasla məkəs əbay mehitse ŋa ika varavada ya ka, a dara a gər, əbay a zikwer zəva gura ŋgar ana ihər i ahər a. Asta a sərəkaha a ləma a gər zəva ata. 3 Əbay a wiz ahər: « Dukula na a ge ba ya, Asta mandərkwasla məkəs əbay? Kà waya na əla? Ki wize a na əla? Yàa hadzal ba aà məvəlak ŋa, ku mege mezehe mekwere gà tekeɗe ya. » 4 Asta a gwaɗar aaka: « Əbay gà, na ka waya lele ka, ki dwimera mbakum nda Haman a, aà mazəma ŋgwal dukw mezime ana yàa mbər medek a. »

5 Əbay a slər mburma tsəmma tsara aà mazalaha a Haman, aà maŋgama aka mezele Asta. I dəba ŋa ya, gà əbay tə da nda Haman aka dukw mezime ana Asta a de ya. 6 Akahər ana tar aà masa guzum mba ya ka, əbay a gwaɗa a Asta: « Kà waya na əla ? Yàa hadzal ba aà məvəlak dukw ana ka waya ya, ki wize a na əla ? Ku mege mezehe mekwere gà tekeɗe i vilekiŋa. » 7 Asta a gwaɗar aaka: « Dukw ana i waya aà mewize kər a ka, araha. 8 Əbay gà, na kàa waya megiŋ ŋgwal, aka dak a gər lele ka, mbəɗumara gər nda Haman a, aka dukw mezime ana i hedzele ahər a ba, aà mede a kurum a. Ndidwe ŋa ata na, i fefileke a aka mewize yak ata ya. »

Haman a waya mehirwe Mardukway

9 A pàt ŋa ata Haman a dara i ga ya ka, həɗəmma nda gà maŋgayaba i gəzləŋ ŋgar. Aka ana a riŋ aà medeye ya ka, a ŋgata a Mardukway riŋ ika biye hərmaga mada a bəra əbay. Wele ata ka, aka hitse a mbulum tsa, aka ɓazla aba kwizikw biy mahənar à gər a bəɗ tsidze. Tsam ka, Haman a rah nda matsəɓatsəɓ aka gər ŋgar. 10 Ama Haman a gəs aba gəzləŋ, a da ba a ma ŋgar. A zalayara a gà masla ŋgar nda məkəs ŋgar Zeres a. 11 Haman a fafəl a tar aka gər gà bàba gà limana ŋgar, nda gà ɓəza ŋgar ana tar riŋ hinne ya. A ɗama a tar meme na, əbay a səkah aà ŋgat, a vəlar təv mendze mekwere ana batsah ŋa ya, aka gər gà bàba ŋana nda gà ɓəzla meslire ŋgar ana gà ŋgwal ŋa ya fit tserdze ya. 12 A səkah dər aaka nda megweɗe asa: « Asta mandərkwasla məkəs əbay, a zeliŋ ka, a iye ilik a gər gà, na aà malaka əbay aka dukw mezime ana a de mbakum a. Araha aka zeliŋ ndidwe masula ŋa asa, mìi de a nda əbay. 13 Ama gà dukw ata fit tserdze ya ka, a ne aka iye ka, dukw taf məfara ŋa, na i təv ana i ŋgete a a Mardukway gà Yahuda aaha hiywe i təv mendze megemir ŋgar ana ika biye hərmaga mada a bəra əbay ya. »

14 Zeres məkəs ŋgar, nda gà masla ŋgar ta vəlar metsehe ŋgiɗ, ta gwaɗar: « Tə ndwaŋ zubul dizl ana metir dzik səla gəra əzləm a (25). Ndidwe i mekwede ka, kà wiz aà əbay ta hiriwe ahər Mardukway. Tsam ka, ki de a ba nda maŋgayaba aka dukw mezime ana ki leke a aaka əbay ya. » Metsehe ata ka, a da a gər a Haman, ta ge kamala taŋa ya.