Asta 4

Mardukway a wiz aà Asta megeye ika gà Yahuda ya

1 I təv ana Mardukway a tsaraka gà dukw ata a geye a ba ya ka, a kwayaɗa ikaba aà gà petek ŋgar a. A tike akaba buhwa, dite a ndaya akaba bitekwe. A da dər aka ba huɗ kwite, a suwaya dər aka ba riŋ nda gà tuwa nda magala. 2 A ndzeha aka biye hərmaga mada a bəra əbay ka, a hitse a fata. Aɗaba wura a sle a aà mede a a ga, a bəra əbay, nda gà buhwa ikaba tsa. 3 Kə̀la aà gà ɓəza gà ahəɗ ana, ika mekwere ŋgar a, a gà təv ana məpala ahəm əbay ata a ndze aɗəm a ka, gà Yahuda fit tserdze tar i batsah labara, tə dzəba aà mege ndəra, ti tiweye dər nda gà malahaya dər dimis məməta. Gà mburma hinne na tàa dzaya akaba buhwa ya, ta hənaya dər aka bitekwe ya.

4 Gà ɓəza gà dəm nda gà mburma ata gà madadaɗaŋa ta gewa megemir a Asta mandərkwasla məkəs əbay ya, tə daha tə ɗamar dukw ana a ge ba ya. Tsam ka, arəv a da aà məkəs əbay ya hinne. A sləraha gà petek a Mardukway aà mazla ikaba buhwa ŋgar ata ya. Ama, a gəs tsa. 5 Tsam ka, Asta a zal a Hatak, wele ana ilik i liwiŋ gà mburma gà madadaɗaŋa ata əbay, a tike aà mege megemir a Asta ya. A slər ŋgat aà mewize a Mardukway ka, Dukula dze ya na a ge ba ya, dite aɗaba la na a ge kamala taŋa ya ya?

6 Hatak a dara aà maləma akaba nda Mardukway, aka təv mendze na i huɗ kwite, ser aka biye hərmaga mada a bəra əbay ya. 7 Mardukway a ɗamar gà dukw ana a le aà ŋgat a tserdze. Dite a fafəlar, aka gər siŋgwe ana Haman a gwa a dze a a sahər əbay, aà məbatsa gà Yahuda ya. 8 A vəl dər a Hatak wakita məpala ahəm ana ta wetse, tə dzaya i Susa aà medzeye dər aà gà Yahuda ya, asa mbaŋa, aà mə vəl a Asta. Meɗifar à dukw ana a ta ge a ba ya, nda magwaɗar aaka ka, mada a təv əbay, aà mewize ahər mendze are tsehe, Mahamar agəra gà gwala ŋgar gà Yahuda.

9 Hatak a mara, a maya à gà bazlam Mardukway ana a tsiker a, a Asta. 10 Asta a gwaɗa a Hatak, ma ta gwaɗa a Mardukway ka: 11 « Gà mburma tserdze, gəs aà gà ɓəzla megemir əbay a, tsikw aà gà mburma ana mandzaŋa, i gà bàba gà kwite ana ika mekwere ŋgar a, ku mege asləka ŋa, kige tsa məkəs ŋa, tə sər ka, na wura aka dara aka varavada ana i huɗ ga i bəra əbay ya, na aka zalar tsəka, ta kiɗiŋa. Wele ata a ŋgete a məməta tsəka ka, say na əbay aka zikwe ahər zəva gura ŋgar a. Tsaatsa iye ka, aka ndza ka, mehinne dzik makər (30) na əbay aka zeliŋ aà mada aka miɗ ŋgar tsiye! »

12 I təv ana Mardukway a tsaraka bazlam ana Asta a mar dər aakara ya ka, 13 Mardukway a gwaɗar aakaha a Asta: « Ka tə dzala ka, kər a gər yak ilik pəra na ki te be a, ika magər gà Yahuda ya, agəra ana kər madzaŋa i huɗ ga əbay ya tsa. 14 Nda ndzer ka, na akahər ŋa aaha, kàa ndza ba tiytiy ka, gà Yahuda ka, ta ŋgete be a mezleke ndaka tseke ŋgiɗ, ta beyebiŋa. Ama kər nda gà mburma ana i ga i bəra dede yak a ka, ta betse a kurum. Gà biy ŋgiɗ tsa a agəra mesle dukw kamala naha ya, na ka ne məkəs əbay a ya ana, weke na a sər a? »

15 Asta a mar aakaha à mifefile a Mardukway nda magwaɗar ka: 16 « Daha yaha gər a gà Yahuda ana i Susa ya tserdze. Gəsum ndəra agəra iye, ka zəmum dukw mezime tsa, ka sum yam tsa, gà həpat nda həvəɗ mehinne makər. Mər nda gà dəm ana ta gewiŋ megemir a tserdze ya tekeɗe, mìi ge a mbaŋa. Dite i dəba ŋa ya ka, i de a təv əbay, ku mege məpala ahəm aka viliŋ ahər vatwa aà mada a təv əbay tsa tekeɗe ya, ku mege i mite tekeɗe ka, i mət ŋa pəra. » 17 Tsam ka, Mardukway a da, dite a ta ge kamala ana Asta a tsikarra ya.