Asta 3

Haman a waya medzeye aà gà Yahuda

1 I dəba gà dukw ata tserdze fit ta geye ba ya ka, əbay Ahaswerus a səkah a Haman kəla Hammedata ana i gwala Agag a, a vəlar təv mendze mekwere ana batsah ŋa ya. A ne à ŋgat malahalah mala aka miɗ gà bàba ŋana ika miɗ gà ɓəzla megemir ŋgar a. 2 Gà ɓəzla meslire əbay ana ika biye hərmaga əbay tserdze ya, tə dzawa gurmits a bəɗ aka miɗ Haman, luz yemere aka ahəɗ, kamala ana əbay a gwaɗa a tar ta gewa ya. Ama Mardukway ka, a dzawa gurmits a bəɗ, luz yemere aka ahəɗ tə tsa. 3 Gà asiŋ gà ɓəzla meslire əbay aaha te gewa megemir ika biye hərmaga əbay ya, ta gwaɗa aà Mardukway : « Aàmala na kà ɓəl aka məpala ahəm əbay ya? » 4 Kə̀la wur gà pat na ta wizewa ahər gà bazlam ata ya, ama ka, a tikewa mifefile tar aà ahər tsa. Tə da məma à bazlam ata a Haman, dite aà masamata dər ka, wànà Mardukway a gewe a ana kamala taŋa ya hiywe ya ya. Kamala ana a gwaɗa a tar ka, ŋgat ka, gà Yahuda ya. 5 I təv ana Haman a ŋgata a Mardukway, a niw mandza gurmits a biye luz yemere aka ahəɗ a ka, a rah nda matsəɓatsəɓ hinne. 6 Akahər ana Haman a tsaraka Mardukway ŋgat gà Yahuda ya ka, a samata medzeye à Mardukway a gər ŋgar ilik ka, a sle duwa tsa. A yaha vatwa aà məbatsa gà gwala ŋgar, kamala megweɗe ya ka, gà Yahuda ana tar mandzayaŋa ika ahəɗ mekwere Ahaswerus a fit tserdze.

7 I huɗ mive makurwa gəra sula ŋana əbay Ahaswerus a ge a ika kwere ya, aka malahalah kiye ana tə zalar kiye Nisan a, ta ge tsetse ana tə zalar Pur a, kə̀la aka gà mehine gà kiye ana i huɗ mive ya, ika miɗ Haman, aà masəra dər kiye wara na ta ge a dukw ana ta waya ya. Tsetse ata a dəɗ aka kiye makurwa gəra sula (12) ŋana tə zalar kiye Adar a.

8 Haman a gwaɗa a əbay Ahaswerus: « Gà mayahaba gər gà mburma ŋgiɗ ɗa pam, tàa gwitse aàba aka magər gà mayahaba gər gà mburma, tàa ləm aka gà bàba gà ahəɗ ana ika mekwere yak a. Gà məpala ahəm tar tekeɗe ka, pam aà biy gà asiŋ gà mayahaba gər gà mburma ŋgiɗ a. Ta gəs ahəm aà məpala ahəm əbay tsa. A da dər tsa na ki miseke a ter a, ti ziwe gər tar a. 9 Na kàa samata ŋgwal ŋa ka, tike məpala ahəm, ta wetseye mewetse aà məbatsa tar. I dze a kur siŋgwe kiliw dəduw dərməka makər (300 000) a gà ɓəzla megemir yak ana ika mekwere yak a. Ti dze a siŋgwe ata a sahər əbay. »

10 Tsam ka, əbay a zlara matsərəɗ ana ihər i ahər a, a vəl a Haman kəla Hammedata ana i gwala Agag mala mene are gà Yahuda ya. 11 Əbay a gwaɗa a Haman: « I misekike a à siŋgwe yak, nda gà mayahaba gər gà mburma ata a ahər yak, ge dukw ana kà waya, mege ya. »

12 Ti yaha gər a gà ɓəzla mewetse dukw ana i bəra əbay a, nda mehinne kurwa gəra makər ŋana (13), i huɗ malahalah kiye ya. Ta wetseyeha gà bazlam ana Haman a tsikeye ya fit, a gà bàba ŋana ta kwereye a gà bàba gà ahəɗ a, a gà bàba ŋana ta kwereye a gà ɓəza gà ahəɗ a, dite a gà bàba ŋana ika miɗ gà mayahaba gər gà mburma ya, nda medzibe mewetse dukw gà mburma ana i huɗ gà kwite ata ya, ku mege gà mayahaba gər gà mburma wara ka, ndaka ahəm tar. Gà ɓəzla mewetse dukw ata ta wetseye ka, nda zləm əbay Ahaswerus, dite ti tike aaka lambà matsərəɗ ŋgar. 13 Gà ɓəzla sik əbay tə daya aà gà wakita ata, kə̀la aà gà ɓəza gà ahəɗ ana ika ahəɗ mekwere ata ya. Wakita ata ta wetseye ya, a vile a vatwa ka, aà mibetse, nda medzeye dər, dite nda mandəva iɗəm aà gà Yahuda ya fit tserdze. Gà ɓəza gà gawla, nda gà bàba ŋana, gà ɓəza nda gà məkəs, dite nda madzaka gà limana tar. Dukw ata a ge a ba ka, i huɗ pat ŋa ya ilik a, nda kiye makurwa gəra sula ŋana (12) tə zalar kiye Adar a, nda mehinne kurwa gəra makər ŋa (13). 14 Tə dzaya gà wakita ata ta wetseye ya, kə̀la aà gà ahəɗ ana ika mekwere ata ya, kamala məpala ahəm a. Ti ɗifeye dər a gà mburma fit tserdze, ku mege weke ka, mahadzal ba aà mege dukw ana ta hitse dər a pat ŋa ata ya.

15 Gà ɓəzla sik əbay tə daya dər, tsəmma tsəmma nda zləm ŋgar, ti ɗifeye à dukw ana, ti tike aaka madzala gà gər i Susa i təv ata malawaraŋa nda zlagam tits a. Gà əbay nda Haman, tə dzəba aà masa dukw mese. Tsaatsa ka, huɗ kwite Susa ka, i batsah magəɗa.