Asta 2

Asta a ne mandərkwasla məkəs əbay

1 I dəba gà mendze zaakwa ya ka, matsəɓatsəɓ əbay Ahaswerus a nikiɗ, dite a məbara a Vasti a gər a, nda dukw ŋgar ana a ge ya, dite nda madzala gà gər ana tə zla aka ŋgat a. 2 Gà ɓəza gà gawla ana i megemir əbay ya ta gwa: « Ti yahara gà dəm gama ana wura aka ləm aà tar ilik tsiye, dite gà matsahəna ŋa lele a əbay ya. 3 Gər a gwa ka, əbay mə pala gà mburma ika gà ahəɗ gà kwite ŋgar ata tserdze ya, ti yahara gər a gà dəm ata wura aka ləm aà tar ilik tsa, gà matsahəna ŋa lele ya fit tserdze, ara a Susa a təv ana malawara ŋa nda zlagam tits a, a ga gà məkəs ana i ahər Hege, wele madadaɗaŋa ata əbay a tike aɗəm ŋgat aà makaslawar gà məkəs a, dite ma dzayawa a tar gà ŋgwal gà mal matsahəna aba. 4 Dəm ana aka tsahən aà are əbay hinne ya ka, a ne a mandərkwasla məkəs əbay avukw Vasti. » Bazlam ata a da gər a əbay, dite a ge kamala taŋa ya.

5 Wele duwa a riŋ gà Yahuda zləm ŋa Mardukway i Susa i təv ata malawara nda zlagam tits a. Ŋgat ka, kəla Yayir, kəla Simhi, kəla Kis, gà gwala Bendzamen. 6 Ŋgat i liwiŋ gà mburma ana Nevuhadnetsar əbay gà Babila a gasa tar i Yeruzalem a, akaba nda gà Yekuniya əbay gà Yahuda ya. 7 Mardukway na a gəl Hadassa ana tə zalar Asta dəm damər dede ŋgar a. Dəm ata ka, kəla megile ŋa, gà tsir nda məmər ŋgar riŋ tsa. A gər məməta gà tsir nda məmər ŋgar a ka, Mardukway a zla ŋgat kamala dəm ŋgar a. Dəm ata ka, metsehine ŋgar a bəra tsa.

8 I dəba ana ti neye gà məpala ahəm əbay ata, ku mege a ŋga ya ka, ti yaha gər a gà ɓəza gà dəm ata hinne, a Susa a təv ata malawaraŋa nda zlagam tits a, ndakahər Hege. Kərga taŋa ya na, tə da a Asta a bəra əbay ndakahər Hege mala makasla gà məkəs a. 9 Asta a da a gər a Hege hinne, a gewar ŋgwal, a mbawa aàba, aà madzayar gà mal matsahəna aba nda gà dukw mezime ŋgar ka, tsəmma tsəmma. A dzar gà ɓəzla meslire gà dəm ŋa təsəla, gà na a pala tar ika magər gà dəm ana i bəra əbay a. A tike Asta a ga mehinne ana ŋgwal ŋa, aà gà asiŋ gà ga gà məkəs a, akaba nda gà ɓəzla meslire ŋgar gà dəm ŋa ata. 10 Asta ka, aka ɗif à gwala ŋgar dite a dara ana i ŋga ya tsa, aɗaba Mardukway aka mbər məpalar ahəm aà metsikiŋ a. 11 Kə̀la wur gà pat ka, Mardukway a suwayawa ika biye hərmaga varavada ga gà məkəs ata, aà masəra mandza zay Asta, dite dukula na ta gewar a.

12 Gà ɓəza gà dəm ata tar i gà ga gà məkəs a ka, ti zezem a mege aba mal matsahəna aba, i huɗ mive ilik a: I huɗ kiye ndilik a ka, ta beheye a aba gà mal dizl ana a ze hwaŋŋa ya, dite i huɗ gà kiye ndilik ŋa aaha a da a aka miɗ a ka, ti geheye a aàba mal wirde, nda gà asiŋ gà dukw biy matsahəna aà kwiye ba gà məkəs. I dəba ŋa ya ka, gà ɓəza gà dəm ata ti deye a a təv əbay Ahaswerus kuɗa, ku mege weke, na aka ndze akahər ŋgar a. 13 Araha meme na ku mege dəm wara, a de a a təv əbay ya: Ti dzere a gà dukw ana a waya ya fit tserdze, a de a dər akabara i ga gà məkəs a, a ga a bəra əbay ya fit. 14 I hawa ŋana ka, ti te dze a nda əbay. Ndidwe ŋana kuɗa ka, a de a a ga gà məkəs ŋgiɗ, ndakahər Sahasgaz wele madadaɗaŋa ana, a kaslawa masula ga gà kəra gà məkəs əbay tə ndzawa iɗəm a. Dəm ata ka, a mbiɗe a gər a təv əbay asa tsa. Na əbay aka waya məmbəɗaha gər a təv ŋgar asa ka, say na aka zalar nda zləm ŋgar a.

15 I təv ana ahər ŋa, i Asta dəm Avihayel ana Mardukway damər dede ŋgar a gəl a, a ndze aɗəm, a de a təv əbay ya ka, a wiz ka, gà dukw ana Hege wele madadaɗaŋa ata a kaslawa ga gà məkəs, a gwaɗar mandzək a. Gà mburma ana tserdze ta ŋgat a Asta ya ka, a da a tar a gər. 16 Tə laka Asta a meɗikwir əbay Ahaswerus i huɗ mive matəsəla ŋana a ge a ika mekwere ya, nda kiye makurwa ŋana tə zalar Tevet a. 17 Əbay a waya Asta hinne, aà gà dəm ata fit tserdze ya, a ŋgat mezlibe i təv ŋgar a, a waya ŋgat hinne a za dər biy gà ɓəza gà dəm ata fit tserdze ya. A tiker mendiwiɗe gər mandərkwasla məkəs əbay a gər, dite a ne à ŋgat mandərkwasla məkəs əbay a təv mendze Vasti. 18 Əbay a de batsah dukw mezime, a gà mburma ŋgar gà bàba ŋana tserdze ya, nda gà mburma ana ta gewa akaba megemir a, aà mazləba dər aà Asta. A mbete aà mandza hadam ika gà ahəɗ ana ika mekwere ŋgar a, dite a dzaya gà dukw taf ka, agəra ana a vəl ahər a.

Mardukway a be à ɗaf a əbay

19 Ti yaha gər a gà ɓəza gà dəm masula ŋa asa, akahər ŋa ata ka, Mardukway a gewa megemir ika hərmaga madà a ga a bəra əbay. 20 Asta aka ɗif à gwala ŋgar dite a dara ana i ŋga ya tsa, hiywe, kamala ana Mardukway aka mbər magwaɗar a. A gəs ahəm aà Mardukway kamala ana ŋgat ka, ika mekwere ŋgar a hiywe.

21 Akahər ŋa ata ka, Mardukway i təv megemir ŋgar ika hərmaga əbay. Gà madadaɗa gà mburma sula, gà Bigtan nda Teres, ana ta kaslawa biye hərmaga madà ga əbay ya, duwa a tsəɓ a tar aà əbay Ahaswerus, ta mà akaba ahəm aà makəɗa ŋgat. 22 Mardukway a tsaraka bazlam ata tsara ka, a mà à bazlam ata a Asta mandərkwasla məkəs əbay, ŋgat na a ta me a à labara ŋa a əbay nda zləm Mardukway ya. 23 I təv ana tə zazam vatwa ŋa ya ka, bazlam ata ka, ndzer kaɗəŋ. Ta hiriweye gà mburma ata sula ya aà dizl. Ta wetse dukw ata i təv are əbay, a huɗ wakita labara gà əbay.