Asta 1

Asta

Əbay Ahaswerus a geye gà bàba gà megirive

1 Labara aaha a ge ba ka, akahər əbay Ahaswerus, ana a kwere a gà ahəɗ kwite dərməka nda dzik səla gəra təsəla (127), gəs i End a, tsikw a Etiyupi ya. 2 Akahər ŋa ata ka, əbay Ahaswerus riŋ a kwere ara ika təv mendze mekwere əbay ŋgar a, i Susa i təv ana malawaraŋa nda zlagam tits a. 3 I huɗ mive məmakər ŋana a ge a ika mekwere ya ka, a ge batsah megirive a gà bàba gà ɓəzla megemir ŋgar, nda gà mburma ana ta gewa akaba megemir a, nda gà bàba ŋana ika miɗ gà sliwdze gà Perisiya nda Mediya ya, nda gà dzagal gà mburma, nda gà na ta kwere a gà ahəɗ kwite ata ya, ti yahabaha gər aka miɗ ŋgar. 4 A pataya a tar à gà bàba gà limana mekwere ŋgar, nda gà dukw ŋgar ana gà ŋgwal hinne, ti sir a dər ŋgat ka, batsah ŋa ya. Megirive ata ka ndza ka kiye ndilik.

5 Aka mandəvandəv ŋa ka, əbay a ge batsah megirive a gà mburma ana meɗe zləm tar a riŋ nda gà na meɗe zləm tar a riŋ tsiye fit tserdze i Susa, i təv ana malawaraŋa nda zlagam tits a. Megirive ata a ndza ka, mehinne təsəla, ika varavada dzidzel ga əbay ŋgar. 6 Tə danaya gà sla petek leŋ ana tə ndzaya herre, àha mbulum mbulum a, nda gà ɓəza liɓir ana tə ndzaya tizlzle, àha nduzzwa ya, tə slalaya dər i gà matsərəɗ ana ta vaɗa nda ndzemde məvəɗa kur siŋgwe ya. Tə danaya dər aà gà gawla mere ana tə zlazla nda gà kwàtama ana ta papazaya ya. Gà məpa ka, nda gura, nda ndzemde məvəɗa kur siŋgwe, madzaŋa ika gà dambazla ana ta geye nda gà beeliŋ kur ana zakəla zakəla ya, herre ya, liviŋliviŋ ŋa ya, dite nda gà na ahəɗ ahəɗ a. 7 Tə tafaya dukw mese a mburma ka, nda gà dukw ana nda gura, mendzikiɗe ba ŋa pampam a. Əbay a dzaya guzum a gà mburma hinne ka, agəra ana a vəl ahər a. 8 Ku mege weke a sa ka, kamala ana a waya ba ya, aɗaba ana əbay aka mbər megweɗe aàba a gà ɓəzla zlaŋgwaɗ a, ta ge ka, dukw ana a de a gər a gà mburma ana a zal a tar a. 9 Dite Vasti mandərkwasla məkəs əbay, a ge batsah megirive a bəɗ a gà məkəs i huɗ ga mekwere əbay Ahaswerus.

Əbay a dəgəz Vasti mandərkwasla məkəs ŋgar

10 Aka pat megirive matəsəla ŋana ka, hayaffa na ba a dza aka əbay Ahaswerus a, aɗaba guzum ana a sa ya. A gwaɗa a gà mburma ana gà madadaɗaŋa, ta gewar megemir təsəla ya, gà Mehuman, Bizta, Harvuna, Bigta, Avagta, Zetar àha Karkas, 11 tə lakara Vasti mandərkwasla məkəs əbay ya, nda gà mendiwiɗe gər məkəs əbay ŋgar i gər, aka miɗ ŋgar a, aà məpata à metsehine ŋgar ana, a tsahən hinne ya, à gà mayahaba gər gà mburma ata, nda gà bàba gà ɓəzla megemir ŋgar a. 12 Ama Vasti, mandərkwasla məkəs əbay a niw me de aka mezele əbay ata gà mburma gà madadaɗaŋa ata, tə daha ta mədər a. Tsam ka, a tsəɓ a əbay turturtur hinne.

13 I fata ya ka, gà əbay tə dza akaba ahəm nda gà ɓəzla masəra ikaba aà gà ahər gà duwa ya. Aɗaba kərga taŋa ya, na dukw ana a slewa aà əbay a gewa ba ka, ika miɗ gà mburma ana tə sər ikaba aà gà məpala ahəm nda gà dukw ana ndaka vatwa ŋa ya. 14 Karsena, Setar, Admata, Tarsis, Meres, Marsena, Memukan, tar ka, gà bàba gà ɓəzla megemir gà Perisiya nda gà Mediya ana ta mbeha bise a əbay ya. Gà tar ata təsəla ya na ika gà təv mendze na gà malahalah ŋa i mekwere ŋgar a. 15 Əbay a gwaɗa a tar: « Iye əbay Ahaswerus, yàa slər gà mburma gà madadaɗaŋa ata a təv Vasti məkəs əbay, ama a niw magəsa ahəm aà dukw ana ì tsikar a. I huɗ məpala ahəm kwa ya ana, dukula na ki gekwere ya? »

16 Memukan a fafəl ika miɗ əbay nda gà bàba ŋana tserdze ya: « Bakal ata Vasti məkəs əbay a ge ya ka, nda təv əbay ɗekɗek tsa, ama nda təv gà bàba ŋana asa mbaŋa, dite nda təv gà mayahaba gər gà mburma ana mandzaŋa ika mekwere əbay Ahaswerus a fit a tserdze. 17 Aɗaba dukw aha məkəs əbay a ge ya ka, a ɗe aà gà məkəs fit tserdze, ti te witeye gà zal tar, na i təv are tar a, nda megweɗe ka: ‹ Əbay Ahaswerus nda ahər ŋgar ŋa, aka zal a məkəs ŋgar Vasti aà madaha aka miɗ ŋgar a ka, ama aka niw medeha. › 18 Gəs a mbakum a, gà məkəs gà bàba ŋana ika gà ahəɗ Perisiya nda Mediya ya, na tàa tsaraka metike ba məkəs əbay aaha ka, tar tekeɗe ti ta ge a aà gà zal tar kamala taŋa ya. Taŋa ka, a sekehe a aà mewiteye gà zal tar nda mege a tar matsəɓatsəɓ hiywe. 19 Na əbay aka samata lele ka, metike məpala ahəm. Ta wetse a huɗ wakita məpala ahəm gà Perisiya nda Mediya. Məpala ahəm ata ka, ta mbiɗere a à ahər diydiy tsidze. Ma gwa ka: ‹ A ge a ba tsa na Vasti a dere a aka miɗ əbay Ahaswerus asa ya. Dite əbay məvəl zləm mandərkwasla, a məkəs ana a te ge a ŋgulum aà Vasti ya. › 20 I təv ana məpala ahəm əbay aka ɗe aka ahəɗ mekwere fit a ka, gà məkəs fit tserdze ti te zlibewe a aà gà zal tar, gəs aà gà mburma ana meɗe zləm tar a riŋ a, nda gà na meɗe zləm tar a riŋ tsiye. »

21 Bazlam ata a da a gər a gà əbay nda gà bàba ŋana, dite əbay a zazam metsehe Memukan ata. 22 A sləraya gà wakita aka gà ahəɗ kwite ata ika mekwere ŋgar a fit tserdze. Ta wetseye ka, nda medzibe mewetse dukw gà mburma ana ika ahəɗ gà kwite ata ya, ku mege gà mayahaba gər gà mburma wara ka, ndaka ahəm tar, dite ku mege asləka wara mene ka, mala ga na i ma ŋgar a, mə fafəlawa ka, ndaka ahəm kwite ŋgar.