Asta 9

Gà Yahuda ta bats gà ɓəzla mene are tar

1 Nda mehinne kurwa gəra makər, kiye makurwa gəra sula ŋana, tə zalar Adar a mbəz a ka, a pat ŋa ata, na ta ge a megemir nda məpala ahəm əbay ya. Gà ɓəzla mene are gà Yahuda tə dzala ka, ta mbe aà teriŋa. Tsaatsa duwa aka mbəɗ aba aka tar, gà Yahuda ivaɗ na ta mbe a aà gà mburma ana ti ne ter a are ya. 2 I gà huɗ kwite gà bàba gà ahəɗ na ika mekwere əbay Ahaswerus a fit a ka, gà Yahuda ti yahayaba gər, tə dzəba aà mege guvəl, aà gà ana ta waya mege tar dukw ana ŋgwal ŋa tsiye. Wura ilik a hitse a ter a a vatwa asa tsa. Aɗaba gà mayahaba gər gà mburma ata tserdze ya, magəɗa gà Yahuda a gasa tar. 3 Gà bàba gà ɓəzla megemir əbay, gà bàba ŋana ta kwereye a gà bàba gà ahəɗ a, gà bàba ŋana ta kwereye a gà ɓəza gà ahəɗ a, nda gà ɓəzla sik əbay, tə zlak gà mburma gà Yahuda, aɗaba magəɗa Mardukway a ge tar. 4 Kaɗəŋ ndzer Mardukway ka, batsah ŋa, na i ga i bəra əbay ya, zləm ŋgar a ɗe, i gà huɗ gà bàba gà ahəɗ kwite ata tserdze ya. Ndzəɗa wele ata a səkah aka miɗ aka miɗ.

5 Kərga taŋa ya na, gà Yahuda ta bats gà ɓəzla mene are tar, nda masalama tar a. Ta bats tar, ti dzeye à tar fit tserdze. Ta ge à gà ɓəzla mene are tar, kamala ana ta waya ya. 6 I Susa i təv ata malawaraŋa nda zlagam tits ɗekɗek ka, gà Yahuda tàa bats gà asləka dərməka əzləm (500), tàa dzeye à tar fit. 7 Tàa bats mbaŋa asa gà Parsandata, Dalfun, Aspata, 8 Purata, Adaliya, Aridata, 9 Parmasta, Arisay, Ariday àha Vayzata, 10 gà ɓəza Haman kəla Hammedata ana ŋgat mala mene are gà Yahuda ya, kurwa (10). Ama ka, tàa ndzaka aà tar gà limana tar a tsa.

11 Pat ŋa ata, ti tsik aha a əbay gà mburma ana ta bats i Susa i təv ata malawara ŋa nda zlagam tits a. 12 Əbay a gwaɗa a Asta mandərkwasla məkəs əbay : « I Susa i təv ata malawara ŋa nda zlagam tits a ka, gà Yahuda tàa bats, tàa dzeye a à gà mburma dərməka əzləm (500), dza aakaha, gà ɓəza Haman aaha kurwa ya. Ndaw na ta bats i gà asiŋ gà ahəɗ gà kwite ŋgiɗ ana ika mekwere gà ya? Ama na kà waya mewize a iye gà asiŋ gà dukw ŋgiɗ asa ka, i vilekiŋa, i gik a dukw ana kà waya ya fit tserdze. »

13 Asta a gwaɗar aaka: « Əbay gà, na kàa fər ahər lele ka, vəl vatwa a gà Yahuda ana i Susa ya, ta ge ndidwe kamala məpala ahəm ana mbakum a asa. Vəl vatwa asa ka, ta hiriweye slu ba gà ɓəza Haman aaha kurwa ya (10) aà dizl. » 14 Əbay a tike məpala ahəm a vəl vatwa aà mege kamala taŋa ya. Ta pàt a məpala ahəm ŋgiɗ pam i huɗ kwite Susa dite ta hiriweye slu ba gà ɓəza Haman aaha kurwa (10) ya, aà dizl. 15 Gà Yahuda ana i Susa ya, tə yahaba gər nda mehinne kurwa gəra faɗ ŋa asa, nda kiye na tə zalar Adar a. I huɗ kwite Susa ata ka, tàa bats gà asləka dərməka makər (300), ama tàa ndzaka gà limana tar tsa.

16 Gà asiŋ gà Yahuda ana tar mandza ŋa, i gà bàba gà kwite ana ika mekwere əbay Ahaswerus a, tàa yahayaba gər mbaŋa, aà megeye ika mandza a bəra tar a. Tə dəgəz aba gà ɓəzla mene are tar a, tàa bats gà mburma dəbuw dzik təsəla gəra əzləm (75 000), i liwiŋ gà na ti ne ter a are ya, ama ka, tàa ndzaka gà limana tar tsa. 17 Dukw ata a geye ba ka, i huɗ mehinne kurwa gəra makər, nda kiye ana tə zalar Adar a. Nda mehinne kurwa gəra faɗ ŋa ka, ti sifik ba, pat ŋa ata ka, deye gà baba gà ɗaf nda maŋgayaba. 18 Ama gà asiŋ gà Yahuda ana i Susa ya, ti yahaba gər ka, nda mehine kurwa gəra makər ŋa (13), nda mehinne kurwa gəra faɗ (14) kiye ata, na ta pəl ba tar aà gà ɓəzla mene are tar a. I huɗ mehinne kurwa gəra əzləm a ka, ti sifik ba, a pat ŋa ata na ti deye gà baba gà ɗaf nda maŋgayaba ya. 19 Aɗaba taŋa na, gà Yahuda ana tar mandzaya ŋa i dala, i gà huɗ kwite ana malawaraŋa tsiye ka, ti deyewa gà baba gà ɗaf nda maŋgayaba nda mehinne kurwa gəra faɗ ŋa (14), i kiye ana tə zalar Adar a. Tə slərayawa ba aha gà dukw taf a gà mburma tar ilik nda ilik.

Megirive Purim

20 Gà dukw ata ta geye ba ya ka, Mardukway a wetseye. A sləraya aaha gà wakita ata a gà Yahuda ana i gà bàba gà huɗ kwite ana ika mekwere əbay Ahaswerus a tserdze, a gà ana bise ya, nda gà na tar diriŋ a. 21 A gwaɗa aà tar, ta gewa magwalum kə̀la viye, i huɗ gà mehinne kurwa gəra faɗ, (14) nda kurwa gəra əzləm (15) kiye ana tə zalar Adar a. 22 Aɗaba i huɗ gà pat ŋa ata ya, na gà Yahuda tə dəgəz aàba gà ɓəzla mene are tar, ti sifik ba ya. I huɗ kiye ŋa ata ya asa mbaŋa na, mesewere are, a ne aka tar maŋgayaba ya, tuwa tar a ne aka tar megirive ya. Aɗaba gà pat ata ti ne a ka, gà pat medeye gà baba gà ɗaf nda maŋgayaba. Ku mege weke a dewe a gà batsah ɗaf, nda masləraya ba aha gà dukw taf a gà mburma tar ilik nda ilik. Ti dzeye a gà dukw taf a gà ɓəzla matawak. 23 Gà Yahuda tə zazam gà dukw ana Mardukway a tsik a tar a tserdze, dite megirive ata a ne aka tar fəla tar.

24 Ta ge kamala taŋa ya ka, aɗaba Haman kəla Hammedata ana, i gwala Agag, ŋgat mala mene are gà Yahuda ya, a hadzal ba aà məbatsa tar. A ge tsetse ana tə zalar Pur a, aà madza à tar magəɗa nda medzeye aà tar fit kweleŋ. 25 Ama i təv ana əbay a tsaraka gà dukw ata ya ka, a tike məpala ahəm a aaha, ta wetse mewetse: Mesewere are ana Haman a dzala aà medzeye dər aà gà Yahuda ya ka, məmar a gər a ŋgat ŋa, ta hiriweye tar aà dizl nda gà ɓəza ŋgar. 26 Aɗaba taŋa, na tə zal a zləm pat megirive ata ka, Purim a. Zləm ata a dara ka, i Pur a. Kamala megweɗe ya ka, tsetse. Agəra gà dukw ana Mardukway a wetseye ya, agəra gà dukw ana tar ta ŋgatar nda are tar a, nda gà dukw ana a le aà tar tserdze ya ka, 27 gà Yahuda ti tike megirive ata aà ahər kamala fəla tar a, aka ba tar ŋa, aka gà ɓəza tar, dite aka gà na ti ti neye a aba gà Yahuda tserdze ya. Agəra taŋa na kə̀la viye aka ndze ahər ŋa ka, ta girivewe a megirive ata pat sula, ta kiɗewa iɗəm a tsa. 28 Ta mewe abara aà gà pat ata a gər a hiywe, ta gewe a megirive ata wa ahər kəla, wa ahər kəla, kə̀la i gà gwala gà Yahuda, i gà bàba gà kwite tar, nda gà huɗ kwite tar, ta miseke a à mege megirive ana tə zalar Purim a tsa, dite gà dukw ana a ge ba a gà pat ŋa ata ya ka, məməts ɗa gər a gà ɓəza tar tsa.

29 Asta mandərkwasla məkəs əbay dəm Avihayel, nda Mardukway gà Yahuda ka, ta wetse masula wakita asa nda ndzəɗa mekwere tar, aà mene a wakita megirive Purim dukw ana ndzer a. 30 Tə slərayaha gà wakita a təv gà Yahuda tserdze, ika gà bàba gà ahəɗ kwite ata dərməka nda dzik səla gəra təsəla (127) ika mekwere Ahaswerus a. Na i huɗ wakita ata ka, gà bazlam mandza zay nda mege dukw ana ndaka vatwa ŋa ya. 31 Gà wakita ata ka, ti tike balaari aka gà Yahuda aà megirive Purim na aka ndze ahər ŋa ya, kamala ana Mardukway gà Yahuda, nda Asta mandərkwasla məkəs əbay ta wetse ya. Kərga na gà Yahuda ti tike akaba tar ŋa, aka gà ɓəza tar, gà pat mege ndəra nda malaha dimis məməta ya. 32 Gà məpala ahəm Asta ata ka, biy mene aà megirive Purim dukw ana ndzer a, dite na ta wetse a huɗ wakita aaha ya.