Yesuwa 18

Tsetse aka gər gà gwala ana ti zeha ya

1 I dəba ana gà mayahaba gər gà Isərayel tə zla ahəɗ kwite ata fit a ka, ti yahaba gər a Silu, dite tə ndwaŋ ga petek mayahaba gər a fata. 2 Ama ika magər gà Isərayel ka, gà gwala riŋ təsəla (7), na tàa ŋgat təv meleke tar zukw tsiye. 3 Yesuwa a gwaɗa a gà Isərayel: « Ki bebwime a ana tsikw aà ndiɗime, na aà mazla ahəɗ ana BATSAH kurum ŋa, Mbulum gà bàba gà tsir kurum, a vəl a kurum a? 4 Palum gà mburma makər makər kəla aà gwala. I slire a tar, ti tiwlike ahəɗ kwite, te fere a ika ba ya, dite te wetseye a gà təv meleke ana kə̀la aà gà gwala tar a. Dite te mbiɗera gər a təv gà ya, ta meyiŋa dər. 5 Ti sese a ikaba ahəɗ ata ya təsəla (7). Gà gwala gà Yahuda ti ndze a ika ahəɗ tar ana ndaka tseke gular a, dite gà mburma ana i gwala Yusufa ya, ti ndze a ika ahəɗ tar ana ndaka tseke are yam a. 6 Wetseywimiŋara gà təv meleke ata təsəla (7), dite ka dumara kà petwimiŋ dər. I te ge a tsetse aka gà ahəɗ ata kə̀la a gà gwala kurum ika miɗ BATSAH kwa ŋa Mbulum kwa. 7 Ama kə̀la ka, gà gwala Lewi ka, ta ŋgete a ahəɗ bəŋa biy tar ika magər kurum tsa, aɗaba meleke tar ka, megemir məbatsa duwa a BATSAH kwa ŋa. Gà gwala Gad, Ruben àha mezehe gà gwala Manasse ka, tàa mbər meŋgete təv meleke ana Musa mala meslire BATSAH kwa ŋa a dzaya tar, nda kadwa lide Yurdan ŋgiɗ a. »

8 Akahər ana gà mburma ata, ta hitse aà mbulum, ti de a à mewetseye a gà təv meleke ata ya ka, Yesuwa a gwaɗa tar: « Dum kà tiwlikum ahəɗ kwite, kà wetseywim, dite kà mbəɗumara gər, a təv gà ya. I te ge a tsetse aka gà tseke gà ahəɗ ata, kə̀la aà gà gwala kurum ika miɗ BATSAH kwa ŋa ɗa i faha i Silu. » 9 Gà mburma ata tə da, tə tiwlik ahəɗ kwite ata fit. Ta wetseye gà duwa aka gər ahəɗ kwite ata tseke təsəla (7) ya, nda gà zləm huɗ kwite ŋa dze, dite ta mbəɗara gər a təv Yesuwa a təv madzəba tar a Silu a. 10 Yesuwa a dzəba aà mege tsetse aka gà ahəɗ ata, ika miɗ BATSAH kwa ŋa i Silu, dite a dzaya ba ahəɗ kwite ata a gà Isərayel kə̀la aà gà gwala, ana ta ŋgeteye ya.

Kwiye ahəɗ gà gwala Bendzamen

11 Malahalah tsetse ana ta ge a ya ka, a dəɗ aka gà ɓəza gà gwala Bendzamen. Ahəɗ ana ta vəl tar nda tsetse ya ka, ika magər gà ahəɗ gà gwala Yahuda nda biy gà gwala Yusufa.

12 Ndaka tseke are yam ka, kwiye ahəɗ tar a gəs i Yurdan a, a tsəl a Yeriku ndaka tseke are yam, a da ndaka gər kwite nda gwa, ndisl aka kusak Bet-Aven. 13 Kwiye ŋa a da i fata ya ndara à Luz, ndaka tseke gular, kamala megweɗe ya ka, a Betel. Dite a tàr a Atarut-Addar ndaka gər kwite ana i gular Bet-Hurun ana nda bəɗ a.

14 Nda gwa ka, kwiye ŋa a ndiɗik dər gər, a mbəɗ aba ndaka tseke gular, gəs ika gər kwite ana ser aka Bet-Hurun ana nda gular a, ndisl a Kiriyat-Baal, ana tə zalawar Kiriyat-Yeyarim a, huɗ kwite gà Yahuda. Taŋa ka, kwiye ana nda gwa ya.

15 Ndaka tseke gular ka, kwiye ŋa a gəs ika metsimiɗ tsimiɗ Kiriyat-Yeyarim a, a da ndara a gular, kwats a slala ndaka biye yam ana i Neftuwah a. 16 Kwiye ŋa a tàr aà sik kwite ana ser aka tulwah Ben-Hinnum ana ndaka tseke are yam tulwah gà Refaya a. A zazam tulwah Hinnum ndaka tseke gular girdzidzih diyis gà Yebusiya, dite a tàr tsikw a En-Rugel. 17 I fata ya ka, kwiye ŋa a mbəɗ aba ndaka tseke are yam ser a En-Semes, a da a Gelilut ana ser aà metsile Adummim a. A tàr təv gurum Buhan kəla Ruben. 18 A gəs i fata ya, a da ndaka tseke are yam, metsember tulwah Arava, kwiye ŋa a tàr a tulwah ata. 19 I fata ya ya, kwiye ŋa a ndiɗik gər ndaka tseke are yam Bet-Hugula, tsimiɗ aka arah yam duluv Məməta nda tseke are yam, ndaka təv ana yam Yurdan a ndabawa dər a duluv ata ya. Taŋa ka, kwiye ana ndaka tseke gular a.

20 Nda kadwa ka, kwiye ŋa ka, Yurdan.

Araha na kwiye təv meleke gà ɓəza gà gwala Bendzamen kə̀la aà məkəs a, ku mege nda tseke awara ya.

21 Araha na gà huɗ kwite gà ɓəza gà gwala Bendzamen ŋa:

Yeriku, Bet-Hugula, Emek-Kitsits. 22 Bet-Arava, Tsemarayim, Betel, 23 Avvim, Para, Ufra, 24 Kefar-Ammunay, Ufni, àha Geva. Gà huɗ kwite ata ta gaw ba fit ka, kurwa gər ŋgar sula (12) nda gà kwite ana ta mbeye tar aaha ya. 25 Gabawun, Rama, Beerut, 26 Mitspe, Kefira, Mutsa, 27 Rekem, Yirpeyel, Tarala, 28 Tsela, Elef, huɗ kwite gà Yebusiya ana tə zalar Yeruzalem a, Giveya àha Kiriyat. Gà huɗ kwite ata ta gaw ba fit ka, kurwa gər faɗ (14) nda gà kwite ana ta mbeye a tar aaha ya.

Taŋa na təv meleke gà gwala Bendzamen, kə̀la aà kəla məkəs a.