Yesuwa 17

Kwiye ahəɗ gà mezehe gwala Manasse

1 Araha na tseke ahəɗ ana ta vəl a gà gwala Manasse, maləkwara Yusufa nda tsetse ya. Makir tsir Galaad, maləkwara Manasse, tàa mbər madzayar Galaad nda Basan, aɗaba ŋgat ka, mala mege guvəl ana yam a dzar are tsiye. 2 Tàa vəl ahəɗ nda tsetse a gà asiŋ gà ɓəza Manasse ŋgiɗ kə̀la aà kəla məkəs: Gà ɓəza Aviyezer, Helek, Asiriyel, Sehem, Hefer, Semida. Gà mburma ata na tar gà ɓəza Manasse kəla Yusufa, kə̀la aà kəla məkəs a.

3 Tsəlufehad, kəla Hefer, kəla Galaad, kəla Makir, kəla Manasse ka, gà ɓəza ŋgar gà asləka ŋa tar riŋ tsa, ama gà dəm ŋa ɗekɗek pəra. Araha na gà zləm tar a: Mahla, Nuwa, Hugula, Milka, dite Tirtsa. 4 Gà dəm ata, tə dara a təv mala məbatsa duwa a Mbulum Eliyazar a, a təv Yesuwa kəla Nun a, àha nda gà əbay ana ika magər gà mayahaba gər gà mburma ya. Ta gwaɗa a tar: « BATSAH kwa ŋa aka gwaɗa ɗa a Musa ka, mə vəl a mə̀r təv meleke ika magər gà damər mə̀r. » Tsam ka, ta vəl tar təv meleke ata ika magər gà damər dede tar, kamala ana BATSAH kwa ŋa a gwa ya. 5 Tàa dza gà ahəɗ ŋgiɗ kurwa (10) a gà gwala Manasse aka gər gà ahəɗ kwite Galaad nda Basan, ana nda kadwa lide Yurdan ŋgiɗ a. 6 Kamala taŋa ya, tə dzaya gà təv meleke ka, a gà ɓəza gà asləka ŋana i gwala Manasse ya ɗekɗek tsa, ama tàa dzaya a gà dəm ŋana gwala tar ilik a mbaŋa. Ahəɗ Galaad ka, biy gà asiŋ gà ɓəza gwala Manasse ŋgiɗ.

7 Kwiye ahəɗ Manasse a gəs ka, i Aser a, tsikw a Mikmetat ana ser aka Sehem a. A tar a gular a bəra gà mburma ana mandzaŋa i En-Tappuwah ya. 8 Ahəɗ kwite Tappuwah ka, biy Manasse, ama huɗ kwite Tappuwah ana ika gər kwiye ya ka, biy gà ɓəza Efərayim. 9 Kwiye ŋa a tàr ndaka tseke gular dulwa Kana. Ama kə̀la ka, gà huɗ kwite ana i fata ya ka, biy gà gwala Efərayim, ku mege tar ka, ika ahəɗ Manasse tekeɗe ya. Kwiye ahəɗ Manasse a da ndaka tseke are yam dulwa, a ndisl aka Batsah duluv. 10 Ahəɗ ana ndaka tseke gular a ka, biy gà gwala Efərayim. Mala ana ndaka tseke are yam a ka, biy gà gwala Manasse. Batsah duluv na a ne kwiye tar a. Ahəɗ Manasse ana ndaka tseke are yam a ka, a ndze a Aser, mala ana nda kadwa ya ka, a ndze a Issakar. 11 Ika ahəɗ gà Issakar nda Aser ka, gà gwala Manasse tàa ŋgat gà huɗ kwite Bet-Seyan nda Yivleyam, nda gà huɗ kwite ana a ta mbeye a tar aaha ya. Dite asa ka, huɗ kwite Dur, En-Dur, Taanak, Megiddu nda gà mburma ana mandzaŋa iɗəm a fit tserdze, àha nda gà huɗ kwite ana a mbeye a tar aaha ya. Kamala megweɗe ya ka, ahəɗ kwite makər.

12 Ama gà ɓəza Manasse ka, tàa sle aà maduŋa gà Kananiya ana i gà huɗ kwite ata ya tsa, aɗaba ta mə̀r aàba aà mandza ika ahəɗ kwite ata. 13 Akahər ana gà Isərayel tə ta meŋgete ndzəɗa ya ka, ti tike megemir balaari aà gà Kananiya, ama tàa dalawa tar tsa.

Ahəɗ gà gwala Yusufa a sle tar tsa

14 Gà ɓəza Yusufa tə dara, ta gwaɗa a Yesuwa: « A gər əla na, kà vəl a mə̀r təv meleke ka, tseke ahəɗ ŋgiɗ ilik pəra ya? Tsaatsa ka, BATSAH kwa ŋa aka pise a mə̀r ahəm, maa wa ba hinne ya. »

15 Yesuwa a gwaɗa tar aaka: « Na kurum mawa ba ŋa hinne, ahəɗ ana i gər kwite Efərayim a sle a kurum tsa ka, dum ka ta tsatsuŋum ahəɗ ga dizl ɗaf gà Perizziya nda Refaya a. »

16 Gà ɓəza Yusufa ta gwa: « Nda ndzer kaɗəŋ ka, ahəɗ ana ika gər kwite ya ka, a sle a mə̀r a tsa, ama gà Kananiya ana tar mandzaŋa i tulwah a, nda gà na i Bet-Seyan a, nda gà huɗ kwite ana ta mbeye tar aaha ya, dite gà na ika tulwah Yizereyel ka, gà muta piris ndzemde mege guvəl tar riŋ. »

17 Yesuwa a gwaɗa a gà Efərayim nda Manasse, gà ɓəza Yusufa: « Kurum ka, gà mayahaba gər gà mburma ana mawa ba ŋa hinne ya, dite ndzəɗa aà kurum hinne asa ya. Aɗaba taŋa, ki ŋgetwime a ka, tseke ahəɗ ilik pəra tsa. 18 Ki te ŋgetwime a ahəɗ ana ika gər kwite ya asa mbaŋa, ku mege ga dizl ɗaf tekeɗe ka, ki te tsetswimimiŋe a dite a ne a biy kurum ndisl ndisl aka gà kwiye. Ki te delewime a iɗəm gà Kananiya ya, ku mege gà muta piris ndzemde tar a riŋ, dite tar gà ndzəɗa ŋa hinne tekeɗe ya. »