Yesuwa 14

Madzaya aba gà ahəɗ gà Kananiya

1 Araha na gà ahəɗ gà təv meleke ana gà Isərayel ta ŋgat ika ahəɗ Kanana ya. Mala məbatsa duwa a Mbulum Eliyazar, Yesuwa kəla Nun, dite nda gà ɓəzla ga ana i gà gwala gà Isərayel, tə dzaya tar aba ya. 2 Ta geye tsetse aka gà ahəɗ ata kamala ana BATSAH kwa ŋa a tsik nda ahər Musa, aà madzaya aba a gà gwala gà mburma ata tswiɗ nda mezehe ŋana tàa ŋgat gà təv meleke tar zukw tsiye. 3 Lewi aka dzaya gà təv meleke daga piŋŋe ndaka tseke lide dulwa Yurdan ŋgiɗ, a gà gwala gà mburma sula nda mezehe ŋa. Ama ka, aka dza təv meleke a gà gwala Lewi tsa. 4 Gà ɓəza Yusufa ka, tàa ne gà gwala sula, gwala Manasse àha gwala Efərayim. Ama gà gwala Lewi ka, tàa dza tar gà ahəɗ bəŋa biy tar tsa, say gà huɗ kwite aà mendze iɗəm, àha gà ahəɗ ana a mbeye a tar aaha ya, aà makəva iɗəm gà dukw gənaw tar, nda gà asiŋ gà limana tar ŋgiɗ ɗekɗek pər a. 5 Kərga taŋa ya, na gà Isərayel tə dzaya aba gà ahəɗ ata kamala bazlam ana BATSAH kwa ŋa a tsik a Musa ya.

Ahəɗ Kalep

6 A pat ŋgiɗ duwa ka, gà mburma ana i gwala Yahuda ya, tə dara a təv Yesuwa a Gilgal a. Kalep kəla Yefunne gà Kenaz, a gwaɗar; « Kà sər dukw ana BATSAH kwa ŋa a tsik a Musa mburma Mbulum aka gər gà, dite aka gər yak i Kades-Barneya ya. 7 Akahər ata iye ka, mive dzik faɗ (40), na i təv ana Musa mala meslire BATSAH kwa ŋa, a slər iye a Kades-Barneya, aà masamata ara ikaba ahəɗ kwite ya ya. I təv ana i mara ya ka, i ɗamar gà dukw ana i sər, i ŋgatarəra ya, ndaka vatwa ŋa lele. 8 Gà damər gà ana mì da akaba ya ka, tàa haɓaya aà ahər aba a gà mayahaba gər gà mburma, ama iye ka, yàa zazam BATSAH gà ŋa Mbulum gà nda gəzləŋ gà ilik. 9 A pat ŋa ata, Musa a mbaɗa, a gwa: ‹ Ahəɗ ana sik yak aka ɓəl a aɗəm a ka, a ne a təv meleke kurum nda gà ɓəza yak aà biybiy, aɗaba ana kà zazam vatwa BATSAH gà ŋa Mbulum gà nda gəzləŋ yak ilik a. › 10 Kaɗeŋ ndzer BATSAH kwa ŋa aka viliŋ mandza aà bəra kamala ana a tsik a. A ki ge ka, mive dzik faɗ gər ŋgar əzləm (45) na BATSAH kwa ŋa a tsikeye gà bazlam ata a Musa, akahər ana gà Isərayel ti de a i dala ika kusak a. Dite araha mbakum ka, iye mive dzik tsamakər gər ŋgar əzləm (85). 11 Ku mege mbakum tekeɗe ndzəɗa aà iye hiywe kamala ana Musa a slər iye a megemir akahər ata ya, ndzəɗa aà iye hiywe biy mada a guvəl, ku mege aà megeye dər gà megemir awara tekeɗe ya. 12 Kinehe ka, viliŋ ahəɗ ana ika gər kwite BATSAH kwa ŋa a fafəl ahər akahər ŋa ata ya. Kàa mbər metsereke ka, gà Anakiya tar mandzayaŋa i gà bàba gà huɗ kwite ana malawarayaŋa nda zlagam tits tits lele ya. Na BATSAH kwa ŋa aka ndza nda iye ka, i delewe tar kamala ana BATSAH kwa ŋa a tsik a! »

13 Yesuwa a pise a ahəm a Kalep kəla Yefunne, dite a vəlar ahəɗ Hevrun a ne təv meleke ŋgar. 14 Kərga taŋa ya na, Kalep kəla Yefunne gà Kenaz a ŋgat Hevrun kamala təv meleke ŋgar a haa mbakum a, aɗaba ana a zazam vatwa BATSAH kwa ŋa, Mbulum gà Isərayel nda gəzləŋ ŋgar ilik a.

15 Akahər ŋa ata tə zalawa a Hevrun ka, Kiriyat-Arba. Arba ka, wele ana meɗe zləm ŋgar riŋ hinne ika magər gà Anakiya ya. I dəba gà dukw ata a geye ba tserdze ya ka, ahəɗ kwite ata a sifik ba aà mege guvəl a.