Gà ahəɗ gà kwite ana ti zeha, ti dwiŋa tar a
13
1 Yesuwa aka ge mandawal, aka dza à bəra hinne, BATSAH kwa ŋa a gwaɗar: « Araha kinehe ka, kàa ge mandawal, kàa dza à bəra hinne, tsaatsa gà ahəɗ kwite riŋ hinne asa na ti zekeha ki dwiŋeya tar a. 2 Araha na gà ahəɗ kwite ana ti zeha ya:Mekwere ahəɗ gà Filistiya fit dite mekwere ahəɗ gà Gesuriya fit, 3 gəs ika dulwa Sihur ana ika kwiye gà Eziptiya ya, tsikw aka ahəɗ Ekrun ndaka tseke are yam. Mekwere ahəɗ kwite ata ka, biy gà Kananiya. Gà əbay gà Filistiya ata əzləm a tə ndzawa ka, ika gà ahəɗ ata. Ta kwarawa ka, gà ahəɗ kwite Gaza, Asdud, Askalun, Gat, Ekrun dite àha ahəɗ kwite gà Avviya 4 ana nda ka tseke gular a. Ahəɗ kwite gà Kananiya fit, gəsara ika ahəɗ Ara ana ahəɗ gà Siduniya ya, tsikw a Afek, ndisl aka kwiye gà Amuriya. 5 Asa ka, ahəɗ gà Giviliya, ahəɗ Liban ana nda kadwa ya fit, gəs i Baal-Gad ana aà sik kwite Hermun a, tsikw aka vatwa madà a Hamat. 6 Asa ka, ahəɗ gà mburma ana ika gər kwite ya fit, gəsara Liban a tsikw a Misrefut-Mayim, ana gà Siduniya tə ndzawa iɗəm a.
Iye BATSAH kurum ŋa i delewe a gà mburma ana mandzaŋa ika gà ahəɗ ata ya, ika miɗ gà Isərayel a. Dite kər ka, dzaya aba gà ahəɗ kwite ata a gà Isərayel nda mege aaka tsetse, ti neye meleke tar, kamala ana i gwaɗak a. 7 Kinehe ka, dzaya aba gà ahəɗ ata, a gà gwala ata tswiɗ a, dite nda mezehe gà gwala Manasse ŋgiɗ ana ti zeha ya, meneye meleke tar. »
Madzaya aba gà ahəɗ ana nda kadwa Yurdan a
8 Gà gwala Ruben nda biy Gad, àha nda mezehe gwala Manasse ŋgiɗ ka, tàa mbər meŋgete gà meleke tar ana Musa a dzaya a tar aba nda kadwa ika lide Yurdan ŋgiɗ a, kalkal kamala ana Musa mala meslire BATSAH kwa ŋa a dzaya a tar aba ya.
9 Kwiye ahəɗ tar a gəs ka, i Aruwer ana aà guva dulwa Arnun a, gəs i huɗ kwite ana ika magər tulwah a, dala gər kwite Medeva fit, tsikw a Divun, 10 dite nda gà huɗ kwite Sihun əbay gà Amuriya ana a kwara i Hesbun a, tsikw a aka kwiye gà Ammuniya. 11 Asa ka, ahəɗ kwite Galaad fit, ahəɗ kwite gà Gesuriya nda gà Maakiya, kwite Hermun fit, ahəɗ Basan fit tsikw a Salka. 12 Ahəɗ mekwere Ug ana i Basan ŋa fit, ŋgat a kwara i Astarut nda Edreyi ya, ŋgat ilik na a zeha i liwiŋ gà Refaya ya.
Musa aka bats gà əbay ata dite a zəm ahəɗ gà kwite ata fit. 13 Ama kə̀la ka, gà Isərayel tàa duŋ gà Gesuriya nda gà Maakiya tsa, aɗaba taŋa na, gà mburma ata ka, tar riŋ mandza ŋa ika magər gà Isərayel haa mbakum a.
14 Gà gwala Lewi ilik na Musa aka sas a tar təv meleke tsiye. Gà dukw matawala fəla ana ta vakawa nda akwa ika miɗ BATSAH kwa ŋa, Mbulum gà Isərayel a na a ne bəŋa biy tar a, kamala ana BATSAH kwa ŋa tsikar a.
Kwiye ahəɗ gà gwala Ruben
15 Musa aka mbər mivile bəŋa biy tar a gà gwala Ruben, kə̀la aà kəla məkəs aà kəla məkəs.
16 Kwiye ahəɗ tar a gəs ka, i Aruwer ana aà guva dulwa Arnun a, dite huɗ kwite ana ika magər tulwah a, ahəɗ dala gər kwite Medeva fit, tsikw a Divun, 17 Hesbun nda gà huɗ kwite ŋgar ana ika dala gər kwite ya: Divun, Bamut-Baal, Bet-Baal-Meyun, 18 Yahats, Kedemut, Mefaat, 19 Kiriyatayim, Sivma, Tseret-Sahar ana tar ika gər kwite ana i tulwah a, 20 Bet-Peyur, gà girdzidzih ana aà sik kwite Pisga, nda Bet-Yesimut a. 21 Asa ka, gà huɗ kwite ana ika dala gər a fit, mekwere Sihun əbay gà Amuriya ana a kwara ɗa i Hesbun a fit. Ŋgat ana batsah ŋa, ika gər gà əbay gà Madiyan ana ika mekwere ŋgar, gà zləm tar ka, Evi, Rekem, Tsur, Hur nda Reva, Musa a bats akaba tar fit. 22 Ika magər gà mburma ana gà Isərayel ta bats tar nda masalama ya ka, Balaam kəla Beyur mala mahəram ata iɗəm mbaŋa.
23 Kwiye ahəɗ gà gwala Ruben ka, Yurdan nda gà tulwah ŋgar ŋa. Taŋa na gà huɗ kwite nda gà kwite ana a ne meleke gà gwala Ruben, kə̀la aà kəla məkəs, kəla məkəs a.
Kwiye ahəɗ gà gwala Gad
24 Musa aka vəl bəŋa biy gà gwala Gad daga piŋŋe, kə̀la aà kəla məkəs, aà kəla məkəs.
25 Kwiye ahəɗ tar ka: Yaazer, gà huɗ kwite Galaad fit, dite mezehe ahəɗ gà Ammuniya, tsikw a Aruwer ana bise nda Rabba ya. 26 A da i Hesbun a, tsikw a Ramat-Mitspe dite tsikw a Betunim, a gəsara i Mahanayim a ndisl aka kwiye Devir. 27 I tulwah Yurdan ka, gà huɗ gà kwite Bet-Haram, Bet-Nimra, Sukkut dite Tsafun, kamala megweɗe ya ka, mezehe mekwere Sihun əbay gà Hesbun. Kwiye ŋa ka, Yurdan, a da tsikw aka ahəm duluv Kinneret, taŋa ka, lide Yurdan ŋgiɗ ana nda kadwa ya.
28 Taŋa ka, meleke bəŋa biy gà gwala Gad, gà huɗ kwite nda gà kwite ana a mbeyeraha ya fit.
Kwiye ahəɗ mezehe gà gwala Manasse ŋgiɗ
29 Musa aka vəl tseke ahəɗ ŋgiɗ daga piŋŋe à gà mezehe gà gwala Manasse, kə̀la aà kəla məkəs, aà kəla məkəs.
30 Kwiye ahəɗ tar a gəs ka: I Mahanayim a, ahəɗ Basan fit, ahəɗ mekwere Ug əbay Basan fit, gà huɗ kwite Yayir ana dzik ndilik (60) ika mekwere Basan a. 31 Mezehe ahəɗ Galaad, Astarut dite Edreyi, gà huɗ kwite mekwere Ug əbay Basan ka, tə dza a gà ɓəza Makir, kəla Manasse. Kamala megweɗe ya ka, a mezehe gà ɓəza Makir, kə̀la aà kəla məkəs, aà kəla məkəs.