Yesuwa a bats gà əbay gà Kananiya
11
1 Akahər ana Yavin əbay gà Hatsur a tsaraka gà labara ata ya ka, a sləraya gà ɓəzla məmaya à labara a təv Yuvav əbay gà Madun, a təv əbay gà Simrun, dite a təv əbay gà Akəsaf, 2 a təv gà əbay ana ika gər kwite ndaka tseke are yam a, a təv gà ana i Arava ndaka tseke gular duluv Kinneret a, a təv gà na ika ahəɗ ana a mbe a bəɗ a, dite a təv gà ana ika gà diyis Dur nda gwa ya. 3 A sləraya tar mbaŋa a təv gà Kananiya ana nda kadwa, nda gà na i Yurdan nda gwa ya, a təv gà Amuriya, gà Hittiya, gà Perizziya, gà Yebusiya ana tar mandzayaŋa ika ahəɗ ana ika gər kwite ya, a təv gà Hivviya ana tar a sik kwite Hermun ika ahəɗ Mitspa ya. 4 Gà əbay ata tserdze ya, tə dzəba à mede, tar nda gà sliwdze tar hinne, ti ɗeme a ba tsa, kamala hewyeŋ ana i dulwa ya, nda piris tar, nda gà muta piris tar hinne ti ɗeme a ba tsa mbaŋa. 5 Gà əbay ata tserdze ya, tə yahaba gər, ta ge təv madzəba tar a təv ilik ŋa, bise nda biye yam ana i Merum a, aà mege guvəl a gà Isərayel.6 BATSAH kwa ŋa a gwaɗa a Yesuwa: « Ki ge a tar magəɗa tsa, aɗaba ndidwe kərga naha ya ka, i dze a tar ahər a gà Isərayel, i geye ter a mbəlak à məməta. Ki sese a gà mazləŋazləŋ aà gà piris tar a, dite ki weneya gà muta piris tar. » 7 Gà Yesuwa nda gà sliwdze ŋgar, tə da a mege guvəl aà gà ɓəzla mene are tar bise nda yam ana i Merum a, ta kaɗa aka tar, tàa sər aàba tsa. 8 BATSAH kwa ŋa a dza tar ahər a gà Isərayel, ta bats tar, tə zazam tar tsikw a batsah huɗ kwite Sidun, tsikw a Misrefut-Mayim, dite tsikw aka tulwah Mitspe, nda kadwa. Tàa bats tar fit kweleŋ, dite wura ilik aka zehe nda mesife tsa. 9 Yesuwa a ge a tar ka, kamala ana BATSAH kwa ŋa a tsiker a. A sasa gà mazləŋazləŋ aà gà piris tar a, dite a wanaya gà muta piris tar.
10 Akahər ŋa ata, aà vatwa mbəɗara gər a ka, Yesuwa a zəm huɗ kwite Hatsur, a kəɗ əbay ŋgar nda masalama. Hatsur piŋŋe ka, batsah huɗ kwite ana a kwere gà ahəɗ gà əbay ata tserdze ya. 11 Ta bats gà dukw ana iɗəm nda mesife fit tserdze, nda masalama. A dzeye iɗəm aà tar a fit, duwa ilik aka zeha nda mesife tsa. I dəba ŋa ya a tike akwa aà Hatsur. 12 Yesuwa a zəm gà huɗ kwite gà əbay ata tə dza akaba ahəm a fit tserdze ya, a gasa gà əbay tar, dite a bats tar nda masalama. A dzeye iɗəm aà tar a fit, kamala ana Musa mala meslire BATSAH kwa ŋa a tsiker a. 13 Ama kə̀la ka, gà Isərayel tàa dzeye akwa aà gà huɗ kwite ana ika gər gà diyis a tsa, say huɗ kwite Hatsur ana Yesuwa a wànà ya ɗekɗek. 14 Gà Isərayel tə ndzaka gà limana tar, nda gà dukw gənaw ana i gà huɗ kwite ata ya, kamala dukw mayaba guvəl tar a. Ama tàa bats gà mburma fit tserdze nda masalama, tàa dzeye aà tar ndes fit, duwa ilik aka zeha nda mesife tsa. 15 Gà bazlam ana BATSAH kwa ŋa a tsikeye a Musa mala meslire ŋgar a ka, Musa a maya dər a Yesuwa, dite Yesuwa a zazam gà bazlam ata, aka məsak à duwa ilik tsidze na i gà bazlam ana BATSAH kwa ŋana a tsikeye a Musa ya.
Gà ahəɗ ana Yesuwa a zəmaya ya
16 Kamala taŋa ya, na Yesuwa a zla ahəɗ kwite fit a: Gà huɗ kwite ana ika gər kwite ya, gà na ndaka tseke gular a fit, ahəɗ Gusen fit, ahəɗ kwite ana i bəɗ a, ahəɗ Arava, ahəɗ ana ika gər kwite gà Isərayel a nda gà ahəɗ ŋgar ana i bəɗ a. 17 Daga ara i gər kwite Halak ana a tsəl nda Seyir a, tsikw a Baal-Gad ana ika tulwah Liban ana a sik kwite Hermun a. A gasa gà əbay tar fit, dite a bats tar. 18 Yesuwa aka ndza à mege guvəl aà gà əbay ata ka, hinne. 19 Huɗ kwite riŋ ilik na aka gəs masla nda gà Isərayel a tsa, say gà Hivviya ana mandza ŋa i Gabawun ilik. Gà asiŋ gà huɗ kwite ŋgiɗ aaha fit tserdze ya ka, tàa zəmaya tar nda guvəl. 20 Aɗaba BATSAH kwa ŋa aka kulaya tar a gəzləŋ, aà mege guvəl aà gà Isərayel, dite ka ti dzeye iɗəm a tar a, zirwe meze a taraha tsidze, aà dite ti dzeye iɗəm aà tar fit kweleŋ kamala ana BATSAH kwa ŋa a gwaɗa a Musa ya.
21 Akahər ŋa ata na Yesuwa a da, mibetse gà Anakiya ana ika gər kwite i Hevrun a, i Devir a, i Anav a, dite ika gà ahəɗ ana ika gər gà kwite Yahuda fit nda gà kwite Isərayel, nda gà huɗ kwite tar ŋa fit kweleŋ. Yesuwa a dzeye iɗəm aà tar a fit. 22 Gà Anakiya tàa zeha ika ahəɗ Isərayel ilik asa tsa. Ama ti zeha ka, i Gaza, i Gat, dite i Asdud pəra. 23 Yesuwa a ndzaka gà ahəɗ kwite ata fit ka, kalkal kamala ana BATSAH kwa ŋa a gwaɗa a Musa ya. A ne meleke tar, a dzaya aàba aà gà Isərayel kə̀la aà gà gwala tar. I dəba ŋa ya, ahəɗ kwite ata, a sifik ba aà guvəl a.