Yesuwa 10

Gà Isərayel tə zəm gà əbay gà Amuriya

1 Aduni-Tseɗek, əbay gà Yeruzalem a tsaraka ka, Yesuwa aka zəm huɗ kwite Ay, aka dzeye dər iɗəm a kweleŋ. A ge dər ka, kamala ana a ge aà huɗ kwite Yeriku nda əbay ŋgar a. A tsaraka asa ka, gà Gabawun tàa gəs masla nda gà Isərayel, tar mandzaŋa ika magər tar. 2 Aduni-Tseɗek nda gà mburma ŋgar ta ge magəɗa hinne, aɗaba Gabawun ka, batsah huɗ kwite, a za huɗ kwite Ay, ar ka, kamala gà asiŋ gà bàba gà huɗ kwite ana gà əbay ta kwere a ya, dite gà sliwdze ŋgar tserdze ka, yam a dza tar are tsa. 3 Aɗaba taŋa, Aduni-Tseɗek əbay gà Yeruzalem ata, a slər gà ɓəzla məmaya à labara ŋgar a təv Huham əbay gà Hevrun, a təv Pireyam əbay gà Yarmut, a təv Yafiya əbay gà Lakis, dite a təv Devir əbay gà Eglun. A gwaɗa a tar: 4 « Dumara zlakum iye, aà mege guvəl aà huɗ kwite Gabawun, aɗaba gà mburma ana mandzaŋa iɗəm a ka, tàa gəs masla aà gà Yesuwa nda gà Isərayel. » 5 Kərga taŋa ya, na gà əbay gà Amuriya ata əzləm a, na i Yeruzalem a, na i Hevrun a, na i Yarmut a, na i Lakis a, dite nda na i Eglun a, ta gaw ba nda gà sliwdze tar fit tserdze, tə da, tə ta melewere Gabawun, dite ta ge ahər guvəl.

6 Gà Gabawuniya, tə slər gà ɓəzla məmaya à labara a təv Yesuwa, a təv mandzəba tar a Gilgal, aà ta gwaɗar: « Ka ta miyak a mə̀r gà ɓəzla meslire yak tsa. Dara tsəmma kà zlak mə̀r, kà beye a aà mə̀r, aɗaba gà əbay gà Amuriya ana tar mandzaŋa ika gà ahəɗ ana ika gər kwite ya tserdze, tàa mà akaba aà mə̀r ahəm. » 7 Tsara ka, Yesuwa a maharaba i Gilgal a nda gà mayahaba gər gà sliwdze ŋgar a, nda gà na yam a dza tar are tsiye fit tserdze. 8 BATSAH kwa ŋa a gwaɗa a Yesuwa: « Ki ge à tar magəɗa tsa! Aɗaba i dzeke a gà mburma ata ahər yak. Wura ilik ika magər tar a, a sle a aà mehitseke a a vatwa tsa. »

9 Yesuwa a da i Gilgal a ndaavəɗ, a ndzeha ka, a kaɗa aka tar, tàa sər aba tsa. 10 BATSAH kwa ŋa a wise à gər a gà Amuriya ika miɗ gà Isərayel, a bats tar hinne i Gabawun. Tə zazam gà mezehe ŋa aaha aà metsile ana i Bet-Hurun a, ti ndiɗik gər aà məbatsa tar tsikw a Azeka nda Makkeda. 11 Akahər ana gà Amuriya ti tize a ika miɗ gà Isərayel a, ti ndze aà girdzedzih Bet-Hurun ka, BATSAH kwa ŋa a dza aka tarəra aà gà bàba gà aləndza ya, tsikw a Azeka, ta mata dər hinne. Gà na ta mata aà aləndza ya ka, a za na gà sliwdze gà Isərayel ta bats nda masalama tar a.

12 A pat ŋa ata BATSAH kwa ŋa a dza gà Amuriya a ahər a gà Isərayel a ka, Yesuwa a fafəl a BATSAH kwa ŋa, aà are gà Isərayel tserdze a gwa:

« A kər pat, hitse dzeŋ aka gər Gabawun!

A kər kiye, hitse dzeŋ aka gər tulwah Ayyalun! »

13 Pat a hitse, dite kiye tekeɗe a ndza ndaslsla, haa a təv ana gà mayahaba gər gà Isərayel ta mba aà gà ɓəzla guvəl tar a dzekwiŋ. A riŋ mewetse ŋa i huɗ wakita Mala Ndzer: « Pat a hitse dzeŋ a magər gəza mbulum, a ge marəɗakw aà mediɗe, biy mehinne ilik. » 14 Medzibe pat ata ka, aka ge ba diydiy ilik tsa, dite diydiy a te ge a ba aka miɗ mba ɓav tsa asa mbaŋa, na BATSAH kwa ŋa a ge a duwa kamala ana mburma a wiz ahər a, aɗaba BATSAH kwa ŋa nda gər ŋgar ŋa, na a ge guvəl ika gà Isərayel a. 15 I dəba ŋa ya, gà Yesuwa nda gà sliwdze gà Isərayel fit tserdze ta mbəɗara gər a təv mandzəba tar, a Gilgal a.

Yesuwa a bats gà əbay gà Amuriya

16 Tsaatsa ka, gà əbay gà Amuriya ata əzləm tàa təz àba, tə da mekeheba a sləlak a Makkeda. 17 Tə dara ta gwaɗa a Yesuwa: « Gà əbay ata əzləm a ka, tàa le a tar makahaba ŋa i sləlak i Makkeda. » 18 Yesuwa a gwa: « Tapazlum gà bàba gà kur aka biye sləlak ata, dite kà ndzəkum ahər gà mburma aà makasla tar. 19 Ama kurum ŋa ka, kà mətsum aà duwa i fata tsa, zazamum gà ɓəzla mene are kurum. Lahayum aà tar aka gà vatwa, kà vəlum a tar vatwa aà məmbəɗa gər a gà huɗ kwite tar asa tsa, aɗaba BATSAH kurum ŋa, Mbulum kurum aka dza kurum tar ahər. » 20 Gà Yesuwa nda gà Isərayel tàa bats gà Amuriya bagwal ŋa hinne, haa tə ndəv à məbatsa tar fit. Say gà asiŋa na ta beye, ta mbəɗ gər a gà huɗ kwite tar ana malawaraŋa nda zlagam tits, lele ya. 21 Gà Isərayel ta mbəɗara gər a təv madzəba tar a, nda zay a təv Yesuwa a Makkeda ya. I dəba ŋa ya ka, wura aka tsik duwa aka gər gà Isərayel ilik asa tsidze.

22 I dəba ŋa ya ka, Yesuwa a gwa: « Tapaslumara gà kur ika ahəm sləlak ata ya, dite kə geswimiŋara iɗəm gà əbay gà Amuriya ata əzləm a. » 23 Ta gəs ahəm aà bazlam ŋgar ata, ta gasaraha gà əbay ata əzləm a: əbay Yeruzalem, Hevrun, Yarmut, Lakis nda Eglun. 24 Akahər ana ti de a aha aà gà əbay ata aka miɗ Yesuwa ya ka, a yaha gər a gà Isərayel fit tserdze. A gwaɗa a gà ɓəzla aka miɗ gà sliwdze ana ta ge akaba guvəl nda gà ŋgat a: « Dumara kà dzayum a tar sik aka ɗa a gà əbay ya aaha. » Tə sərəkaha tə dzaya tar sik aka ɗa. 25 Yesuwa a gwaɗa a tar asa: « Ki gwim magəɗa, arəv mada a kurum a tsa! Mum àba aà ndzəɗa, kà mum àba aà arəv! BATSAH kwa ŋa a ta ge à gà ɓəzla mene are kurum ana ki ta gwim a guvəl nda gà tar tserdze ya ka, kamala naha ya mbaŋa. » 26 I dəba ŋa ya, Yesuwa a bats gà əbay ata, a hirweye tar aà gà dizl ɗaf əzləm. Tə ndza ihər mehirweye ŋa i fata tsikw a hawa. 27 Aka pat ana a diɗe a ya ka, Yesuwa a gwa: Tə ndzəkara gà məməta tar aà gà dizl ɗaf a, tə dza aà tar a sləlak ata ta kahaya aɗəm ba ya. I dəba ŋa ya, ta həndək aka biye ata nda gà bàba gà kur. Gà kur ata riŋ i fata haa mbakum mba.

Yesuwa a zəmaya gà huɗ kwite ana ndaka tseke gular a

28 Yesuwa a zəm huɗ kwite Makkeda, a pat ŋa ata mbaŋa, a kəɗ əbay tar nda masalama. A dzeye a iɗəm aà tar a nda gà mburma ana mandza ŋa i huɗ kwite ata ya tserdze. Wura ilik aka zehe nda mesife tsa. A ge aà əbay Makkeda ka, kamala ana a ge aà əbay Yeriku a.

29 Gà Yesuwa nda gà Isərayel fit tserdze ta hitse i Makkeda ya, tə da a huɗ kwite Livna. Ta ge guvəl aà huɗ kwite ata. 30 BATSAH kwa ŋa a dza gà Livna nda əbay ŋgar ahər gà Isərayel asa mbaŋa. Ta bats gà mburma ana mandza ŋa i fata ya fit tserdze nda masalama, wura ilik aka zeha nda mesife tsa. Ta ge aà əbay ŋgar ka, kamala ana ta ge aà əbay Yeriku a.

31 Gà Yesuwa nda gà Isərayel, ta mah ba i Livna ya, tə da a Lakis, tə lawara huɗ kwite ata, aà ta ge ahər guvəl. 32 BATSAH kwa ŋa a vəl Lakis ahər a gà Isərayel, tə zəm i huɗ masula pat guvəl a. Ta bats gà mburma ana mandza ŋa i fata ya fit tserdze nda masalama wura aka zeha ilik nda mesife tsa, kamala ana ta batsara i Livna ya. 33 Akahər ata ka, Huram əbay gà Gezer a da a mazlaka gà mburma ana i huɗ kwite Lakis a, ama Yesuwa a bats tar, ŋgat nda gà sliwdze ŋgar fit tserdze, aka zeha a wura ilik nda mesife tsa.

34 Gà Yesuwa nda gà Isərayel fit tserdze ta hitse i Lakis ya, tə da a Eglun, tə lawara huɗ kwite ata, ta ge aà tar guvəl. 35 Tə zəm huɗ kwite ata i huɗ pat ŋa ata ya, dite ta bats gà mburma ana mandza ŋa iɗəm a fit nda masalama. Tə dzeye iɗəm aà huɗ kwite ata ya, kamala ana ta ge a Lakis a.

36 Gà Yesuwa nda gà Isərayel fit tserdze ta hitse i Eglun a, tə tsala a Hevrun, ta ge ahər guvəl. 37 Tə zəm huɗ kwite ata, ta kəɗ əbay ŋgar, ta bats gà mburma ana i huɗ kwite ata ya fit nda masalama. Tə zəmaya gà huɗ kwite ana ta mbeyeraha ya, ta bats gà mburma ana mandzayaŋa iɗəm a fit tserdze. Kamala ana i Eglun a, Yesuwa a dzeye iɗəm aà gà huɗ kwite ata nda gà mburma ana mandzayaŋa iɗəm a fit kweleŋ, wura ilik aka zeha nda mesife tsa.

38 Gà Yesuwa nda gà Isərayel fit tserdze ta mbəɗara gər a dəba ya, tə da a Devir, ta ge ahər guvəl. 39 Tə zəm huɗ kwite ata, ta gəs əbay ŋgar, dite tə zəm gà huɗ kwite ana ta mbeyeraha ya. Ta bats gà mburma ana mandzayaŋa i fata ya fit nda masalama. Tə dzeye iɗəm aà tar fit kweleŋ, wura ilik aka zeha nda mesife tsa. Yesuwa a ge a Devir, nda əbay ŋgar ka, kamala ana a ge à Hevrun, dite kamala ana a ge a Livna nda əbay ŋgar a.

40 Yesuwa a zəmaya gà ahəɗ kwite ata tserdze: Gà ahəɗ ana tserdze ika gər kwite ya, varavada ana nda tseke gular a, gà na ika ahəɗ ana a mbe a bəɗ a, nda gà na aà girdzidzih a. A bats gà əbay tar fit tserdze, aka zeha a wura ilik nda mesife tsa. A dzeye iɗəm aà gà dukw ana nda mesife ya fit tserdze kamala ana BATSAH kwa ŋa, Mbulum gà Isərayel a gwaɗar a. 41 Yesuwa a zəmaya gà ahəɗ kwite ana, gəsara i Kades-Barneya nda Gaza ya, ahəɗ gà Gusen fit ndisl a Gabawun. 42 Yesuwa a zəmaya gà kwite ata, a bats gà əbay tar fit, i huɗ guvəl ana ta ge sik ilik a, aɗaba BATSAH kwa ŋa Mbulum gà Isərayel nda gər ŋgar ŋa, na a ge guvəl ika gà Isərayel a. 43 I dəba ŋa ya ka, gà Yesuwa nda gà Isərayel fit tserdze ta mbəɗara gər a təv mandzəba tar a Gilgal a.