Yesuwa 9

Wirwir gà Gabawuniya nda mesewere are tar

1 Gà əbay ana fit tserdze tar mandza ŋa ika ahəɗ ana a mbe nda gwa ika lide Yurdan ŋgiɗ a, gà na ika ahəɗ ana ika gər kwite ya, nda gà na ika ahəɗ ana a mbe ndara a bəɗ a, dite nda gà na ika varavada ana a zazam guva Batsah duluv a, tsikw a Liban, gà Hittiya, gà Amuriya, gà Kananiya, gà Perizziya, Hivviya dite nda gà Yebusiya, tə tsaraka ka, gà Isərayel tàa zəm huɗ kwite Ay ka, 2 ti yahaba gər, tə dza akaba ahəm fit tserdze, aà mege guvəl aà gà Yesuwa nda gà Isərayel.

3 Gà mburma ana mandza ŋa i Gabawun a, tə tsaraka dukw ana Yesuwa a ge aà gà huɗ kwite Yeriku a nda Ay ya ka, 4 tə dzala aà mege wirwir, ti ne a ba tar pam. Ti yaha gər à gà dukw mezime, tə dzaya a gà miviye gà buhwa, gà miviye kiwa kwiye guzum ana matamaya ŋa, tə dapaya aɗəm medepe ya, tə dzaya aka gà hezweŋe tar. 5 Tə dzaya gà miviye gà tsapa ana gà madapaya ŋa ya a sik, gà petek ana miviye ŋa ya aka ba, tə ndzaka dər gà batutukw peŋ ana makula ŋa ya, 6 tə da a təv mandzəba a Gilgal, ta gwaɗa a gà Yesuwa nda gà Isərayel: « Mì dara ka, ika ahəɗ kwite ana diriŋ a, kinehe ka, mìi wize a magəsa masla nda gà kurum. »

7 Gà Isərayel ta gwaɗa a tar aaka a gà Hivviya ata: « Gà biy ŋgiɗ tsa kinehe kurum mandza ŋa ka, bise nda gà mə̀r? Na kamala taŋa ya ka, mìi sle aà magəsa masla nda gà kurum tsa. » 8 Gà Hivviya ta gwaɗar aaka a Yesuwa: « Mər ka, mahadzala ba ŋa, aà mene gà ɓəzla meslire yak. » Yesuwa a gwaɗa a tar aaka asa mbaŋa: « Kurum dzena gà weke? Kà dumara dzena i ŋa ya? »

9 Ta gwaɗar aaka: « Mər ka, mahadzala ba ŋa, aà mene gà ɓəzla meslire yak, mì dara ka, ika ahəɗ diriŋ ŋa ya ndeyndey. Aɗaba màa tsaraka meɗe zləm BATSAH kwa ŋa Mbulum yak, nda gà dukw ana a ge ika ahəɗ Ezipt ya fit tserdze, 10 dukw ana a ge a gà əbay gà Amuriya ata sula tar tə ndzawa ika tseke lide Yurdan ŋgiɗ a: Sihun əbay gà Hesbun, nda Ug əbay Basan ana i Astarut a. 11 Gà bàba mə̀r ŋa, nda gà mburma ana mandzaŋa ika ahəɗ mə̀r a fit, ta gwaɗa a mə̀r: ‹ Ndzəkum dər gà dukw mezime aà ahər, aà mede dər ika vatwa ya. Dum kà ta ləmum akaba nda gà Isərayel. › Gwaɗum a tar: Mìi waya mìi ne a gà ɓəzla meslire kurum. Kinehe ka, gəsakwa masla nda gà kurum. 12 Samatum gà peŋ mə̀r kwaŋ, a pat ana mìi maharaba i ma ya ka, ar ka huzzwa mba, ama kinehe ka, aka kula, aka ne batutukw ŋa. 13 Dite gà kiwa kwiye guzum aaha, i təv ana mì rahaya aɗəm aà gà guzum a ka, tar gà awiya ŋa. Ama kinehe ka, tàa kwayaɗaya fit, ku mege gà petek mə̀r nda gà tsapa mə̀r tekeɗe ka, tàa geye miviye, agəra zubul vatwa ana mì da dərra ya. »

14 Gà Isərayel ta gəs dukw mezime gà Gabawuniya ata, ama tàa wiz aà masəra madzala gà gər BATSAH kwa ŋa tsa. 15 Gà Yesuwa tə dza akaba ahəm, ta gəs aàba masla nda gà mburma ata, aà mimiyak a tar nda mesife. Gà əbay ana ika magər gà mayahaba gər gà Isərayel a, tə zəm mimbeɗe.

16 A ge mehinne makər i dəba magəsa masla tar ata ya ka, gà Isərayel ti ta mesire aà gà mburma ata ka, tar ika dəba sik tar. 17 Gà Isərayel ta mah ba i təv madzəba tar a, ti ndze a gà huɗ kwite gà mburma ata mandza ŋa iɗəm a ka, i huɗ mehinne makər a. Gà huɗ kwite ata ka, Gabawun, Kefira, Beerut, nda Kiriyat-Yeyarim. 18 Ama ka, gà Isərayel tàa ge aà tar guvəl tsa, aɗaba gà əbay ana ika magər gà mayahaba gər gà Isərayel a, tàa mbər mimbeɗe ika miɗ tar nda zləm BATSAH kwa ŋa Mbulum gà Isərayel. Tsam ka, gà Isərayel tserdze tə dzəba aà mawala aà gà əbay tar a. 19 Gà əbay ata ta gwaɗa a gà mayahaba gər gà mburma: « Ki slekwe a aà mege a ter a dukw ana ŋgwal ŋa tsiye asa tsa, aɗaba kàa mbər mimbeɗekwa ika miɗ tar nda zləm BATSAH kwa ŋa Mbulum gà Isərayel. 20 Ki miyekikwe a a ter a nda mesife, aɗaba ana kàa zəmakwa mimbeɗe ya, tsəka matsəɓatsəɓ BATSAH kwa ŋa, a dere a aka gər kwa ya. Ama araha na dukw ana ki gikwe a a ter a ya: 21 Ki miyekikwe a a ter a nda mesife, ama kəla ka, ti ne a gà ɓəzla masasa kwa tsalaka, gà ɓəzla matafa yam a gà mayahaba gər gà mburma fit tserdze. » Taŋa na dukw ana gà əbay ti tsik a tar a.

22 Yesuwa a yaha gər a gà Gabawuniya, a gwaɗa a tar: « Aɗaba la na kà pasum a mə̀r za nda magwaɗa a mə̀r ka: ‹ Mər ka, diriŋ aà kurum a, › tsaatsa, kurum ɗa ka, ika dəba sik mə̀r a? 23 Gəs aà kinehe ya ka, kàa ŋgatum mezelme. Ki ndzwim a ka, gà ɓele hiywe, ki sesemwim a tsalaka nda matafa yam a ga Mbulum gà. »

24 Gà Gabawuniya ta gwaɗar aaka a Yesuwa: « Mì ge kamala taŋa ya ka, aɗaba maa mbər metsereke labara aaha: ‹ BATSAH yak ŋa, Mbulum yak, aka mbər megweɗe, a mala meslire ŋgar Musa ka, məvəl a kurum a ahəɗ aaha fit, nda məbatsa iɗəm gà mburma ana mandza ŋa ɗa ika ahəɗ aaha ya tserdze, na kàa ndzwimara ya. Agəra taŋa na, mì ge magəɗa hinne aɗaba mesife mə̀r a. 25 Kinehe mə̀r ka, ihər yak, ge a aà mə̀r dukw ana a deke a, a gər ŋgwal ŋa lele ya. › » 26 Yesuwa a ge a tar kamala ana ti tsik a: A beye a a tar i hər gà Isərayel a, tàa bats tar tsa. 27 A pat ŋa ata tsara ka, Yesuwa a ne aà tar gà ɓəzla masasa tsalaka nda matafa yam, a gà mayahaba gər gà mburma, nda təv madula aaka duwa a Mbulum, ana BATSAH kwa ŋa a ti ɗife a dər a. Haa mbakum gà gwala tar, riŋ ihər ta ge a megemir ata mba hiywe pəra.