Yesuwa 8

Gà Isərayel tə zəm huɗ kwite Ay

1 BATSAH kwa ŋa a gwaɗa a Yesuwa: « Magəɗa ma gək, arəv mada a kər a tsa. Ndzək gà sliwdze yak fit, ka da ge guvəl aà huɗ kwite Ay. Araha yàa dzak gà əbay Ay nda gà mayahaba gər gà mburma ŋgar, gà huɗ kwite ŋgar nda ahəɗ ŋgar fit tserdze ahər yak. 2 Ki ge a aà huɗ kwite Ay nda əbay ŋgar ka, kamala ana ki ge aà kwite Yeriku nda əbay ŋgar a mbaŋa. Ama ki ndzikwime a aba gà limana tar nda gà dukw gənaw tar kamala dukw mayaba guvəl kurum a. Hadzal ba aà mandza aà tarəra maŋgwaɓa ara ndaka dəba huɗ kwite ya. »

3 Gà Yesuwa nda gà sliwdze ŋgar ta hitse aà mege guvəl aà huɗ kwite Ay. A pala gà sliwdze ana yam a dza tar are tsiye dəbuw dzik makər (30 000), a slər tar ndaavəɗ. 4 A tsikeye tar gà bazlam aaha: « Dum, ka ta dzum maŋgwaɓa aka dəba huɗ kwite, ama kəla ka, kà ta ndzum ihər a diriŋ tsa, dite ki ndzwime a ka, mahadzala ba ŋa biy mege guvəl. 5 Mər nda gà sliwdze ŋgiɗ aaha ka, mìi sirikehe a à huɗ kwite ata. I təv ana gà mburma ana tar mandza ŋa i huɗ kwite ata ya, ti dere a aka mə̀r a ya, kamala malahalah ŋana ya ka, mìi tize a ika miɗ tar a. 6 Ti delewere a mə̀r i dəba ya, mìi benere a tar diriŋ aà huɗ kwite ya. Ta gweɗe a ka, ‹ ti tize a aà mə̀r a kamala malahalah ŋana ya. › Ama i huɗ metize mə̀r ata ya ka, 7 ki hitswimera i təv maŋgwaɓa kurum a, ki zimwime a huɗ kwite ata. BATSAH kurum ŋa, Mbulum kurum, a aka vəl à kurum huɗ kwite ata ahər a kurum. 8 I təv ana kàa zəmum huɗ kwite ata ya ka, tikwim a ahər akwa, kamala ana BATSAH kwa ŋa a tsik a. Zazamum gà bazlam gà ana i tsik a kurum a. »

9 Yesuwa a slər gà sliwdze, tə da a mandza maŋgwaɓa aka magər gà Betel nda Ay, a Ay nda gwa ŋana. Gà Yesuwa ta həna ndaavəɗ ŋa ata, nda gà asiŋ gà sliwdze ŋgiɗ aaha ti zeha ya.

10 Yesuwa a hitse a aà mbulum, i mekwede ŋana hedwe, a hadzal gà sliwdze ŋgar. I dəba ŋa ya, ŋgat nda gà bàba ŋana i Isərayel a, tə ndza aka miɗ a gà sliwdze aà mege guvəl aà huɗ kwite Ay. 11 Gà sliwdze fit tserdze tə tsala akaba nda gà ŋgat, ti ndzeha aka ahəm huɗ kwite Ay ka, tə dza maŋgwaɓa ndaka tseke are yam, tulwah ika magər tar nda huɗ kwite ata. 12 Yesuwa a ndzək gà sliwdze a ge a dəbuw əzləm (5 000), a dza tar a maŋgwaɓa, aka magər gà Betel nda Ay nda gwa huɗ kwite ata ya. 13 Gà asiŋ gà sliwdze ŋgiɗ aaha ta ge təv mandzəba tar ndaka tseke are yam huɗ kwite ata. Gà sliwdze ana tə dza maŋgwaɓa ya ka, tə dza tar nda gwa huɗ kwite ata ya. Yesuwa a həna ndaavəɗ ŋa ata ika magər tulwah.

14 Nda mekwede ŋana hedwe, i təv ana əbay gà Ay a ŋgat a a gà Isərayel a ka, ta mbara aàba i huɗ kwite ya tsəmma, nda gà sliwdze ŋgar a fit, aà mege guvəl aà gà Isərayel, i təv ata tə lah mege iɗəm guvəl ser aka Arava ya. Ama aka sər aà àba ka, tàa mbər mandza aà tarəra maŋgwaɓa ndaka dəba kwite ya tsa. 15 Gà Yesuwa nda gà Isərayel fit tserdze ta ge a aba kamala ana ta mba a tar a, tə təz ser a kusak. 16 Tə zal a gà asləka gà mburma ana i Ay ya tserdze, aà mazazama tar. Tə zazam gà Yesuwa, ta banara àba tar a, diriŋ aà huɗ kwite ya. 17 Wura ilik aka zeha i Ay nda Betel a tsa. Tə zazam gà Isərayel, ta miyak aà gà biye hərmaga huɗ kwite kataya, wura riŋ aà makasla ŋa tsa.

18 BATSAH kwa ŋa a gwaɗa a Yesuwa: « Zla badzar yak à mbulum ser aka Ay, aɗaba yàa vəlak ahər yak. » Yesuwa a zla badzar ŋgar ata a mbulum ser aka huɗ kwite ata. 19 I təv ana a zla ahər a mbulum a ka, gà Isərayel ta hitsera i təv maŋgwaɓa tar ana tar iɗəm a tsəmma. Tə təz tsikw a huɗ kwite ata, dite tə dzəba aà mazəma ŋa, i dəba ŋa ya, ti tike ahər akwa tsara.

20 Gà mburma ana i Ay ya, ta fərra a dəba tar ka, ta ŋgataha a hədzək riŋ sursursur a dwizwe a i huɗ kwite tar a, ndara a gəza mbulum. Wura a sle aà meŋgete a ndzəɗa aà mivele ndaka tseke aaha kige tsa ndaka tseke ŋgiɗ aaka asa tsa. Tsam ka, gà Isərayel ana ndeɗiŋe ti tize a ndara a kusak a ka, wudəgər ta mbəɗara aàba aà mege guvəl aà gà mburma aaha ti zezemeha tar a. 21 I təv ana gà Yesuwa nda gà Isərayel, tə samata ka, gà sliwdze ana tar i maŋgwaɓa ika dəba kwite ya, tàa zəm huɗ kwite ata, tàa tike ahər akwa, hədzək riŋ a dere a iɗəm a ka, wudəgər ta mbəɗara aàba aà mege guvəl aà gà mburma Ay ya. 22 Gà asiŋ gà Isərayel ŋgiɗ aaha, tə dara i huɗ kwite ya, aà mege a aà tar guvəl asa mbaŋa. Tə dza tar a magər, ta bats tar fit kweleŋ. Wura ilik aka zehe nda mesife tsa, wura ilik aka be tsa asa mbaŋa. 23 Əbay gà Ay ka, ta gəs nda are, tə da dərra a təv Yesuwa ya.

24 I təv ana gà Isərayel tə ndəv aàba aà məbatsa gà ɓəzla mene are tar nda masalama, i dala i kusak, i təv ana tə zazamaha aɗəm tar a. Gà Isərayel ta mbəɗara gər a huɗ kwite ya, ta bats gà mezehe gà mburma ana ti zeha i huɗ kwite Ay ya nda masalama. 25 Gà mburma Ay ana ta bats tar pat ŋa ata ya ka, gà asləka nda gà məkəs, gà mburma dəbuw kurwa gəra sula (12 000). 26 Yesuwa aka mà aà badzar ŋgar ata a zla a mbulum ser aka Ay ya a bəɗ tsa, haa a təv ana ti dzeye iɗəm aà gà mburma ana mandza ŋa, i huɗ kwite ata ya ndeyek fit kweleŋ a dzekwiŋ. 27 Ama gà Isərayel tàa ndzaka aba kamala dukw mayaba guvəl a, gà dukw gənaw nda gà asiŋ gà limana ŋgiɗ ana tə lehər i huɗ kwite ata ya, kərga na BATSAH kwa ŋa a tsik a Yesuwa ya. 28 Yesuwa a tike akwa à Ay, a ne dər təv mayaha aɗəm a gər a gà kur aà biybiy, a ne dər kusak, a riŋ kamala taŋa ya haa mbakum. 29 Tə hirwe əbay gà Ay aà dizl ɗaf, məməta ŋa a ndza ihər i fata tsikw a hawa. Aka pat ana a diɗe a ya ka, Yesuwa a gwa tə zlara məməta ŋgar aà dizl a. Ti ye aba ya, aka biye hərmaga huɗ kwite ata ya, ti yaha aaka gər a kur serre, a riŋ haa mbakum mba.

Yesuwa a dzeŋge məpala ahəm Musa a gà Isərayel

30 Tsam ka, Yesuwa a zlazl təv madula aaka duwa a BATSAH kwa ŋa, Mbulum gà Isərayel, ika gər kwite Ebal. 31 A zlazl ka, kamala ana Musa mala meslire BATSAH kwa ŋa a tsik a gà Isərayel a. Kərga na a riŋ mewetse ŋa i huɗ wakita məpala ahəm Musa ya, a gwa ka: « Zlazlum təv madula aaka duwa a Mbulum, nda gà kur ana tàa ge dər megemir ilik tsa, dite tàa ləm ahər aà ndzemde tsiye »^*. Gà Isərayel tə dza aaka gà dukw matawala fəla ana tə dulawa ya, nda gà dukw taf matawala fəla magawuba. 32 I fata na, Yesuwa a wetse aà gà kur aà are gà Isərayel, məpala ahəm ana Musa a wetse ɗa aba ya ya. 33 Gà Isərayel fit tserdze, gà bàba tar ŋa, gà ɓəzla aka miɗ gà mayahaba gər gà mburma, nda gà ɓəzla mege seriye ana ika magər tar a, nda gà slele, nda gà ɓəzla kwite ta hitseya, aka gà guva sahər magəsa masla BATSAH kwa ŋa ata, ika miɗ gà ɓəzla məbatsa duwa a Mbulum, gà gwala Lewi ana, tə zlawa ya. Gà mezehe ŋa, ta hitse aà guva kwite Garizim, mezehe ŋa ŋgiɗ ŋa aaha ka, ta hitse aà guva kwite Ebal, kamala taŋa ya na Musa mala meslire BATSAH kwa ŋa, a tsik ɗa aàba a gà Isərayel a, ta pise a ahəm aka gər gà mayahaba gər gà Isərayel a. 34 I dəba ŋa ya ka, Yesuwa a dzeŋge wakita məpala ahəm Musa fit, gà mipise ahəm nda mezelme kamala ana a riŋ mewetse ŋa i wakita məpala ahəm Musa ya. 35 Bazlam ilik aka mətsa aà Yesuwa ana a dzeŋge gà məpala ahəm Musa ata ya tsa. A dzeŋge ka, ika miɗ gà mayahaba gər gà Isərayel fit tserdze, gà məkəs, gà ɓəza, nda gà slele ana mandza ŋa ika magər tar riŋ mbaŋa.