Yesuwa 7

Bakal Akan

1 Ama gà Isərayel tàa ge batsah bakal nda təv gà dukw ana biy medzeye a dər iɗəm a ya. Akan kəla Karmi, kəla Zavdi, kəla Zerah, gà gwala gà Yahuda, a ndzək gà asiŋ gà dukw ana biy dzeye dər iɗəm a ya. BATSAH kwa ŋa a ge matsəɓatsəɓ aka gər gà Isərayel hinne.

2 Yesuwa a slər gà mburma i Yeriku a, a Ay ana bise nda Bet-Aven nda kadwa i Betel a. A gwaɗa a tar: « Dum ka ta samatumara ika ba huɗ kwite Ay ya. » Gà mburma ata tə da aà masamata ara ika ba huɗ kwite ya, 3 ta mbəɗara gər a təv Yesuwa ya, ta gwaɗar: « Gà sliwdze tə da fit tsa, gà sliwdze dəbuw sula (2 000) kige tsa dəbuw makər (3 000) pəra ka, ti sle a aà mazəma huɗ kwite Ay. Tsəna aàmala na ki yekwe a ba aà gà sliwdze kwa fit a, aɗaba tar ka, ndaw tsiye a. » 4 Gà sliwdze ta ge a dəbuw makər (3 000) na tə da a mege guvəl aà Ay ya. Ama ka, tàa təz aà gà mburma ana i fata ya. 5 Gà mburma Ay tə zazamara gà Isərayel a daga ara ika biye hərmaga huɗ kwite ata ya tsikw a Sevarim, ta bats tar aà girdzidzih ŋa a fata, ta ge a dzik makər gəra ndilik (36). Tsam ka arəv a da aà gà mayahaba gər gà mburma ya kweleŋ fetitte, ndzəɗa aà tar asa tsa.

6 Gà Yesuwa nda gà bàba ŋana i Isərayel a, ta kwayaɗaya ikaba aà gà petek tar a, tə ndaya ba ahəɗ a gər butum butum, te dzawa aba aka miɗ sahər BATSAH kwa ŋa ndup yemere aka ahəɗ, tə ndza i fata tsikw a hawa. 7 Yesuwa a gwa: « Da BATSAH gà ŋa, Mbulum gà, aàmala na kà tsalara aà mayahaba gər gà mburma aaha i Yurdan a, aà mandza mə̀r a ahər a gà Amuriya, aà ta dzeye aà mə̀r a? Ŋgulum mìi ndza ba ndeɗiŋe ndaka tseke lide Yurdan ŋgiɗ aaka! 8 Batsah gà ŋa, i gik kamkam, ama i gweɗeke dzena dukula asa ya, na i dəba ana gà Isərayel tàa təz aà gà ɓəzla mene are tar a? 9 Gà Kananiya nda gà asiŋ gà mburma ana tar mandza ŋa ɗa ika ahəɗ kwite aha fit tserdze ya, ti tsereke a labara aaha, ti te lewara mə̀r, ti te dzeye a aà mə̀r a ika ahəɗ kwite aha ya. Dite ki ge dzena meme na agəra meɗe zləm yak aha hinne ya? »

10 BATSAH kwa ŋa a gwaɗa Yesuwa: « Hitse à mbulum! Aàmala na kà ye ba ndup yemere aka ahəɗ a? 11 Gà Isərayel ka, tàa ge bakal, tàa sas ikaba magəsa masla gà ana i gwaɗa a tar tə zazam a. Tàa ndzaka gà asiŋ gà dukw ana i gwaɗa tar, ti dzeye dər iɗəm a nda akəl, tàa kaha a liwiŋ gà kazlaŋa tar. 12 Aɗaba taŋa na kinehe ka, gà Isərayel ti sle a, aà mehitse a aka miɗ gà ɓəzla mene are tar asa tsiye. Ti tizewe ika miɗ tar a hiywe, aɗaba ana tar ŋa tàa neye gà dukw ana biy medzeye dər iɗəm a ya. I sle a aà medze nda gà kurum asa tsa, na kàa dzeyum aà gà dukw ana biy medzeye dər iɗəm a, ika magər kurum a tsiye. 13 Kinehe ka, hitse aà mbulum kà bara dukw zlaŋgatsak aà gà mayahaba gər gà mburma ya. Ki gweɗe a ter a ŋa: ‹ Barayum aba dukw zlaŋgatsak a, biy pat ana ndidwe ya, aɗaba araha na dukw ana BATSAH kwa ŋa, Mbulum gà Isərayel a gwa ya. Dukw ana biy medzeye dər iɗəm a ya ka, ar ika magər kurum gà Isərayel! Ki slwime a aà mehitse aka miɗ gà ɓəzla mene are kurum diydiy asa tsidze, na kàa dzeywim aà dukw ana biy medzeye dər iɗəm a ika magər kurum a tsiye ›. 14 Ndidwe i mekwede ka, ki dwimera, gwala nda gwala ya. Gwala ana yàa gəs iɗəm a ya ka, gwala ata a dera kəla məkəs aà kəla məkəs. Kəla məkəs ana yàa gəs iɗəm a ya ka, kəla məkəs ata a dera, ga nda ga. Ga ana yàa gəs iɗəm a ya ka, ga ata a dera mburma ilik nda ilik. 15 Wele ana tàa gəs iɗəm a, a ndzək gà dukw ana biy medzeye dər iɗəm a ya ka, ki ywim a ŋgat a akwa akaba nda gà dukw ana a ne gà biy ŋgar a fit tserdze. Aɗaba ana aka sas ikaba magəsa masla BATSAH kwa ŋa ya, dite a ge ka dukw ana ŋgwal ŋa tsiye ndeyndey, na i Isərayel a. »

16 Yesuwa a hitse aà mbulum i mekwede hedwe, dite a zalaya à gà Isərayel fit tserdze, gwala nda gwala. Ta gəs iɗəm gwala Yahuda ya. 17 Yesuwa a zal a gwala Yahuda, kəla məkəs aà kəla məkəs, ta gəs iɗəm kəla məkəs Zerah a. A zal a kəla məkəs Zerah ga nda ga, ta gəs iɗəm huɗ ga Zavdi ya. 18 A zal a gà mburma na i huɗ ga i bəra Zavdi ya, mburma ilik ilik, ta gəs iɗəm Akan kəla Karmi a, kəla Zavdi, kəla Zerah gwala gà Yahuda ya.

19 Yesuwa a gwaɗa a Akan: « Kamkam kəla gà, sər BATSAH kwa ŋa Mbulum gà Isərayel ka, batsah ŋa, zləb aà ŋgat. Tsikiŋ dukw ana ki ge ya, kà həmbər aà iye tsidze. » 20 Akan a gwaɗar aaka a Yesuwa: « Haya nda ndzer, iye na i ge bakal nda təv BATSAH kwa ŋa, Mbulum gà Isərayel a. Araha na dukw ana i ge ya, 21 i ŋgatar i liwiŋ gà limana gà ɓəzla mene are kwa, ŋgwal baramusa gà Babila, kur siŋgwe dərməka sula (200), dite mezehe kiliw gura. Te giŋ are hinne, dite i ndzək aba. Ki ti lwim a ahər a makaha ŋa, i ahəɗ i magər mekiriwe ga petek gà. Siŋgwe ŋana ka, i dza aà huɗ ŋa. »

22 Yesuwa a slər gà mburma, a mekiriwe ga petek Akan, tə da tsara. Ti leha aà gà dukw ata makaha ŋa, i mekiriwe ga petek ŋgar, nda gà siŋgwe ata madzaŋa aà huɗ ŋa kaɗəŋ. 23 Tə ndzəkara gà dukw ata i huɗ mekiriwe ga petek ŋgar ata ya, tə da dərra a gà Yesuwa nda gà Isərayel a fit. Tə dza gà dukw ata aka miɗ BATSAH kwa ŋa. 24 Gà Yesuwa nda gà Isərayel fit tserdze ta gəs Akan, kəla Zerah. Tə ndzək gà siŋgwe aaha nda baramusa, nda gà gura, gà ɓəza ŋgar, gà dəm ŋgar, gà sla ŋgar, gà hezweŋe ŋgar, gà təmaŋ ŋgar, gà awak ŋgar, dite ga petek ŋgar nda gà dukw ŋgar fit tserdze. Tə da à tar à tulwah Akur. 25 Yesuwa a gwaɗa a Akan: « Aàla na kà zla aka mə̀rra mesewere are ya? Nda ndzer kinehe mbakum ka, gà gər a gwa, BATSAH kwa ŋa mə vəlak mesewere are. » I fata ya ka, gà Isərayel ta kəɗ ŋgat, nda makalawa ŋgat nda kur. Ti dzeye aà gà mburma ana i ga i ma ŋgar a, nda gà dukw ŋgar fit, kamala taŋa ya mbaŋa. Dite ta wana iɗəm tar a fit birɗek kweleŋ.

26 I dəba ŋa ya ka, ti yaha aaka gər a kur serrre, a riŋ haa mbakum. Aɗaba taŋa na haa mbakum, tə zalawa a təv ata ka, « tulwah Akur a.^ª » I dəba ŋa ya, matsəɓatsəɓ BATSAH kwa ŋa a nikiɗ.