Yesuwa 6

Mbulum a vəl Yeriku ahər a gà Isərayel

1 Gà biye hərmaga huɗ kwite Yeriku ka, mahandaka ŋa aɗəm tits tits lele, aà gà Isərayel a. Wura a sle a aà medere a iɗəm a tsa, wura a sle a aà mada aɗəm tsa asa. 2 BATSAH kwa ŋa a gwaɗa a Yesuwa: « Araha, yàa vəlak Yeriku, əbay ŋgar, dite nda gà sliwdze ŋgar ana yam a dza tar are tsiye, ahər yak tserdze. 3 Dite kurum nda gà sliwdze yak tserdze ka, ki tewilikwime a huɗ kwite ata tiwlik tits sik ilik kəla pat, haa mehinne ndilik. 4 Gà ɓəzla məbatsa duwa a Mbulum təsəla, ti te ndzike a dər gà mezleliŋ mbəkum hagwala aà ahər, ti te ndze a dər aka miɗ sahər magəsa masla ata. Aà mehinne matəsəla ŋana ka, ki te tewilikwime a, huɗ kwite ata sik təsəla, gà ɓəzla məbatsa duwa a Mbulum ka, tar aà məvataya dər gà mezleliŋ tar ata. 5 Aka təv ana tàa dzəba aà məvataya gà mezleliŋ hagwala tar ata ya ka, na kàa tsarakum meɗe gà mezleliŋ tar ata tàa zar dər i gər a hinne ka, gà mayahaba gər gà mburma tserdze ta wideye a mewideye mege guvəl nda magala hinne. Tsam ka, gà zlagam ana tə lawaraya huɗ kwite ata ya, te mbezleyiŋa. I dəba ŋa ya, gà Isərayel ti tsele aà mege guvəl, ku mege weke a vele a ka, ser aka miɗ ŋgar. »

6 Tsam ka, Yesuwa kəla Nun, a zal a gà ɓəzla məbatsa duwa a Mbulum, a gwaɗa a tar: « Zlum sahər magəsa masla aha, dite gà ɓəzla məbatsa duwa a Mbulum təsəla tə ndzek dər gà mezleliŋ mbukum hagwala təsəla, tə ndza dər aka miɗ sahər BATSAH kwa ŋa. » 7 I dəba ŋa ya, a gwaɗa a gà mayahaba gər gà mburma: « Dum kà tiwlikwim huɗ kwite aha, dite gà mburma ana nda gà dukw ahər a, tə ndza aà miɗ a sahər BATSAH kwa ŋa. »

8 Gà dukw ata ta geye ba tserdze fit ka, kamala ana Yesuwa a tsik a tar a. Gà ɓəzla məbatsa duwa a Mbulum ata təsəla nda gà mbəkum hagwala aà tar ihər təsəla ya, tə ndza aka miɗ BATSAH kwa ŋa nda gà məvata gà mezleliŋ tar, sahər magəsa masla BATSAH kwa ŋa i dəba tar. 9 Gà sliwdze ana nda gà dukw ahər a, tə ndza aà miɗ a gà ɓəzla məbatsa duwa a Mbulum ana ta vete a gà mezleliŋ a. Gà sliwdze ŋgiɗ, tar aà mazazamaha sahər i dəba ya. Meɗe gà mezleliŋ aka nde iɗəm tizle ya tsidze. 10 Yesuwa aka tsik aàba bazlam aaha, a gà mayahaba gər gà mburma ya: « Kə ŋglakum duwa tsa, biye ɗa kurum meɗe tsa, bazlam mibera aà kurum a ilik tsidze, haa pat ana yàa gwaɗa a kurum a wideywim a ka, ki wideywime ŋa . » 11 Tsam ka, ti tiwlik huɗ kwite ata nda sahər BATSAH kwa ŋa tiwlik tits sik ilik. Dite ta mbəɗara gər, a təv mandzəba tar a, ta həna.

12 Yesuwa a hitse aà Mbulum ndidwe i mekwede ŋana hedwe, dite gà ɓəzla məbatsa duwa a Mbulum ta mà aka mazla sahər magəsa masla BATSAH kwa ŋa. 13 Gà ɓəzla məbatsa duwa a Mbulum ata təsəla nda gà mbəkum hagwala aà tar i ahər a, tə ndza aà miɗ a sahər BATSAH kwa ŋa ata, nda məvataya dər gà mezleliŋ. Gà sliwdze ana nda gà dukw ahər a, ika miɗ tar, dite gà sliwdze ŋgiɗ aaha i dəba sahər BATSAH kwa ŋa. Akahər ana tar riŋ aà mede ye ka, tar aà məvataya dər gà mezleliŋ, meɗe gà mezleliŋ kà nde iɗəm tizle ya tsidze. 14 Nda mehinne masula ŋana ka, ti tiwlik huɗ kwite ata tiwlik tits sik ilik asa. I dəba ŋa ya, ta mbəɗara gər a təv mandzəba tar a. Ta ge dər kamala taŋa ya, haa mehinne ndilik.

15 Nda mehinne matəsəla ŋana kuɗa ka, ta hitse aà mbulum i mekwede aka pat a mbizere ya, ti tewleke huɗ kwite ata sik təsəla kamala ana ta gewa dər a. A pat ŋa ata ilik, na ti tewleke sik təsəla ya. 16 Aà sik matəsəla ŋana, akahər ana gà ɓəzla məbatsa duwa a Mbulum, aà vataya gà mezleliŋ a ka, Yesuwa a gwaɗa a gà mayahaba gər gà mburma: « Wideyum! Aɗaba BATSAH kwa ŋa aka vəl a kurum huɗ kwite aaha ahər a kurum. 17 Huɗ kwite aaha, nda gà dukw ana iɗəm a fit tserdze ka, a dzeye dər iɗəm ba ya agəra BATSAH kwa ŋa ya. Ama kəla ka, ki miyekwime a aà Rahab, məkəs ata muva ŋa ya nda mesife, àha nda gà mburma ana tar riŋ ikaba i ga i ma ŋgar a fit tserdze. Aɗaba aka kaha gà ɓəzla masamata ika ba huɗ kwite ata kà slərakwara tar a ya. 18 Ama gwim metsehe! Ka ta ndzakum gà dukw ana biy medzeye dər iɗəm a tsa. Tsəka, ki nwime a aà təv madzəba gà Isərayel, dukw ana ti dzeye a dər iɗəm a ya, dite ki nwime a gà ɓəzla mazla aakara mesewere ya. 19 Gà ndzemde məvəɗa kur siŋgwe fit, gà gura, dite gà dukw ana ta vaɗa nda virzegene ya, nda gà zara ya ka, ti ne a pam biy BATSAH kwa ŋa, dite ki dzwime a a ga makasla limana BATSAH kwa ŋa. »

20 Gà ɓəzla məbatsa duwa a Mbulum ta vataya gà mezleliŋ, dite gà mayahaba gər gà mburma ta wideye. Akahər ana gà mayahaba gər gà mburma tə tsaraka meɗe gà mezleliŋ a ka, ta wideye nda magala hinne, tsam ka, zlagam ata birim a mbazla. Gà mayahaba gər gà mburma tə tsala a huɗ kwite, ku mege weke a val ser aka miɗ ŋgar. Tə zəm huɗ kwite ata. 21 Ti dzeye iɗəm aà gà dukw ana i huɗ kwite ata ya fit tserdze nda masalama ya. Gà asləka nda gà məkəs, gà ɓəza nda gà mandawal gà mburma, gà sla, gà təmaŋ nda gà hezweŋe.

Yesuwa a miyak a Rahab nda mesife

22 Yesuwa a gwaɗa a gà mburma ata sula, tə da a masamata ara ikaba ahəɗ kwite ya: « Dum a ga bəra Rahab məkəs muva ŋa ata, kà ndzəkumara iɗəm ŋgat a, nda gà mburma ana i ga i ma ŋgar a tserdze, kamala ana kà mbaɗumar a. » 23 Gà ɓəza gà gawla ata sula ya, tə da a ga bəra Rahab, tə zlara iɗəm ŋgat a, dede ŋgar a, mama ŋgar a, gà damər ŋgar a, dite nda gà asiŋ gà mburma ana i gwala ŋgar a. Tə dza tar, aà dəba təv mandzəba gà Isərayel. 24 I dəba ŋa ya ka, gà Isərayel ta wànà huɗ kwite ata nda gà dukw ana iɗəm a fit tserdze. Ama gà ndzemde məvəɗa kur siŋgwe, gà gura, gà dukw ana ta vaɗa nda virzegene ya, àha zara ya ɗekɗek na tə dza a ga makasla gà limana BATSAH kwa ŋa ya. 25 Yesuwa a miyak aà mesife Rahab, məkəs muva ŋa ata, dite aà gà mburma ana i ga i bəra dede ŋgar, àha nda gà mburma ana i ga i ma ŋgar a fit tserdze. A ndza ika magər gà Isərayel haa mbakum. Aɗaba ana a kaha gà ɓəzla məma aà labara ata, Yesuwa a slər tar aà masamata ara ikaba huɗ kwite Yeriku a.

26 Akahər ata ka, Yesuwa a mbaɗa a gwa:

« Mezelme BATSAH kwa ŋa,

mege ika gər wele ana a dze a ba

aà məma à mazlazla huɗ kwite Yeriku aaha a bəra ya.

Malukwara kəla ŋgar a mitiŋa,

na i təv ana a le a biye madzaha ŋa ya.

Kudər kəla ŋgar a mitiŋa,

na i təv ana a dzeye aɗəm a gà dukw mahəndəka biye hərmaga ŋa ya^* . »

27 BATSAH kwa a ndza nda Yesuwa, dite Yesuwa a ɗe zləm hinne ika ahəɗ kwite ata fit tserdze.