Yesuwa 5

1 Gà əbay gà Amuriya ana tserdze tar mandza ŋa, i Yurdan nda gwa ya, nda gà əbay gà Kananiya ana tserdze tar mandza ŋa, bise nda Batsah duluv a, tə tsaraka labara aaha: BATSAH kwa ŋa aka se a a yam i Yurdan, ika miɗ gà Isərayel a tàa tsalara iɗəm a. Arəv a da à gà əbay ata ya, fetitte kweleŋ, ndzəɗa tar riŋ aà mehitse a tar a a vatwa tsa.

Tə sasa gà Isərayel i Gilgal a

2 Akahər ata kuɗa ka, BATSAH kwa ŋa a gwaɗa a Yesuwa: « Papaza gà awis kur, kà sasa gà Isərayel ana masasaya ŋa tsiye. » 3 Yesuwa a papaza gà awis kur, dite a sasa dər gà Isərayel ika gər diyis ana tə zalar diyis Masasa ba ya. 4 Araha, aɗaba la na Yesuwa a sasa tar a: Gà asləka gà mburma ana tserdze tar mege guvəl ide ya, tàa mata i dala i kusak idəba ana tə dara i Ezipt ya. 5 Tsaatsa ka, gà asləka gà mburma ana tə dara i Ezipt ya ka, tàa mbər mesese tar. Ama gà ɓəza ana ta waya tar aà vatwa madara i Ezipt i kusak a ka , tàa sasa tar tsa. 6 Gà Isərayel tàa ndza aà vatwa aà mede a kusak a ka, mive dzik faɗ (40), haa gà mburma ana tə dara i Ezipt ya, tar mege guvəl ide ya, tàa mata fit kweleŋ. Aɗaba ana tàa gəs ahəm aà BATSAH kwa ŋa tsiye. BATSAH kwa ŋa aka zəm mimbeɗe, a gwa: « Ta ŋgete a a ahəɗ ana i gwaɗa a gà bàba gà tsir tar i sida ya, i vile a ter a ya tsa. Ahəɗ ata ka, gà awah nda amum na a zlele ya iɗəm a. » 7 Avuk gà mburma ata, BATSAH kwa ŋa a dza aɗəm gà ɓəza tar. Gà taŋa na Yesuwa a sasa tar a, aɗaba ana tàa sasa tar aà vatwa tsiye. 8 I dəba ana tə sasa aba tar a ka, gà mayahaba gər gà mburma fit, tə ndza i təv mandzəba, haa a təv ana ta mbala ya. 9 I dəba ŋa ya, BATSAH kwa ŋa a gwaɗa a Yesuwa: « Mbakum ka, Yàa zla ika kurum dukw hwarwa gà Ezipt ya ana kà dum dər akabara ya. » Aɗaba taŋa na, tə zal a təv ata ka, Gilgal^ª, haa mbakum a.

Malahalah megirive Paska ana i Kanana ya

10 Gà Isərayel ta ge təv mandzəba tar i Gilgal, ta ge megirive Paska, nda mehinne kurwa gəra faɗ ŋa, i huɗ kiye ŋa ata ya, nda hawa ŋana, ika varavada Yeriku a. 11 Ndidwe ŋana i mekwede idəba Paska ya ka, tə dzəba aà mazəma gà dukw mezime ana tə lahər aaha ika ahəɗ ata ya, gà peŋ ana giɗe ikəka tsiye, dite nda gà masawula wur gà duwa. 12 Gəs a pat ŋa ata ya, mana ana gà Isərayel tə zəmawa ya ka, a riŋ asa tsa. Viye ŋa ata na, tə dzəba aà mazəma gà dukw ana a sləlawa ika ahəɗ Kanana ya.

Melime gà Yesuwa nda mala aka miɗ gà sliwdze BATSAH kwa ŋa

13 A pat duwa ka, Yesuwa riŋ bise nda huɗ kwite Yeriku. A zla gər a mbulum ka, a ŋgat a a wele duwa riŋ mehitse ŋa dzeŋŋe ser ika miɗ ŋgar. Wele ata ka, masalama riŋ ihər ŋgar, mandzahaŋara i ga ŋa ya. Yesuwa a sərəkaha a təv ŋgar a gwaɗar: « Wànà ka dara ana a mazlaka mə̀r a ya, tsəna a mazlaka gà ɓəzla mene are mə̀r a ya? » 14 Wele ata a gwaɗar aaka: « Awaŋ, iye ka, biy wura ilik ika magər kurum a tsa. Iye ka, mala aka miɗ gà sliwdze BATSAH yak ŋa, dite ar ŋa ata na i ndzera ya. » I fata ya ka, Yesuwa a dzar gurmits a biye, luz yemere aka ahəɗ, dite a gwaɗar: « Batsah gà ŋa, iye ka, mala meslire yak, dukula na kà waya i təv gà ya ya? » 15 Mala aka miɗ gà sliwdze BATSAH kwa ŋa ata a gwaɗar aaka: « Ndzək gà tsapa i sik a, aɗaba təv ana kər mehitse ŋa iɗəm a ka, tsəɗaŋŋa. » Yesuwa a ge kamala taŋa ya.