Gà kur məməbara a gà duwa a gər a
4
1 I təv ana gà mayahaba gər gà mburma tserdze tə ndəv aà matsala i Yurdan a ka, BATSAH kwa ŋa a gwaɗa a Yesuwa: 2 « Kinehe ka, palum gà mburma kurwa gəra sula ika magər kurum a, ilik ilik kəla aà gwala. 3 Gwaɗa a tar, ta pala dər gà kur kurwa gəra ŋgar sula, i Yurdan i faha ya, i təv aaha gà ɓəzla məbatsa duwa a Mbulum ta ɓala a ɗəm gà sik tar a. Gà mburma ata tə ndzike a dər gà kur ata, dite tə dze a a təv ana ta hine a iɗəm ndaavəɗ ata ya. »4 Tsam ka, Yesuwa a zal a gà mburma ata kurwa gəra sula a pala tar ika magər gà Isərayel kəla a à gwala ya. 5 Dite Yesuwa a gwaɗa a tar: « Ndzum aà miɗ a sahər magəsa masla BATSAH kwa ŋa Mbulum kurum, dite kà dum aka magər dulwa Yurdan. I təv ata ka, ku weke a zle a kur ilik aka dzahdzah ŋgar, kəla aà gà gwala gà Isərayel. 6 Gà kur aaha ta mewe a a kurumara à dukw ana a ge ba i faha ya, a gər a. Na aka miɗ mba, gà ɓəza kurum tàa wiz a kurum: ‹ Gà kur aaha ti ne ana dukula na i təv kurum dziye? › 7 ki te a gweɗwim a ter a aakiŋa: ‹ Yam ana a zlele a i Yurdan a, a sas ba ikaba ya, ika miɗ sahər magəsa masla BATSAH kwa ŋa ya. Akahər ana ti tsil a à sahər ata i Yurdan a ka, yam ana i dulwa ya, a sas ba ikaba ya. Gà kur aaha ka, ta mewe a dərra a gər a a gà Isərayel hiywe aà dukw ana a ge ɗa ba i faha ya. › »
8 Gà Isərayel, ta ge kamala ana Yesuwa a gwaɗa a tar gwim a. Tə ndzək gà kur ata kurwa gəra sula ika magər Yurdan a, kəla aà gà gwala gà Isərayel, kamala ana BATSAH kwa ŋa a tsik a Yesuwa ya. Tə ndzəkara, tə dza a təv ana ta həna iɗəm ndaavəɗ ŋa ata ya. 9 Yesuwa a hitseye a aà gà kur ŋgiɗ kurwa gəra sula, aka magər Yurdan, a təv mehitse ana gà ɓəzla məbatsa duwa a Mbulum, ana ti zle a sahər magəsa masla ata, ta hitse a aɗəm a. Gà kur ata riŋ i fata haa mbakum.
10 Dite gà ɓəzla məbatsa duwa a Mbulum ata ti zle a sahər magəsa masla ata ya, ta hitse a fata dzeŋŋe dzeŋŋe aka magər Yurdan, haa gà mayahaba gər gà mburma ta ge dukw ana tserdze BATSAH kwa ŋa a tsik tar nda ahər Yesuwa ya, nda gà dukw ana Musa a gwaɗar ge ya. Dite gà mayahaba gər gà mburma, ta mba aba aà matsala i dulwa ata ya. 11 I təv ana gà Isərayel fit tserdze tə ndəv aà matsala aka lide ŋgiɗ a ka, gà ɓəzla məbatsa duwa a Mbulum, ta mbəɗ gər aà mandza aka miɗ nda gà sahər magəsa masla BATSAH kwa ŋa. 12 Gà sliwdze ana yam a dza tar are tsa, i gwala Ruben a, i gwala Gad nda gà na i mezehe gà gwala Manasse ya, tə tsala, tə ndza aà miɗ a gà Isərayel nda gà dukw ahər tar, kamala ana Musa a tsik a a tar a. 13 Gà sliwdze ti sle a dəbuw dzik faɗ (40 000) gà mahadzala ba ŋa, aà mege guvəl, tə ndza aà miɗ a BATSAH kwa ŋa ya, ser aka varavada Yeriku. 14 A pat ŋa ta ka, BATSAH kwa ŋa a ne à Yesuwa batsah ŋa, aà are gà Isərayel fit tserdze, dite ta gəs ahər ahəm kamala ana ta gəsawa ahəm aà Musa i huɗ mandza a bəra ŋgar a.
15 I dəba ŋa ya ka, BATSAH kwa ŋa a gwaɗa a Yesuwa: 16 « Gwaɗa a gà ɓəzla məbatsa duwa a Mbulum ana ti zle a sahər sidaª ya, tə tsalara i Yurdan a. » 17 Yesuwa a gwaɗa a gà ɓəzla məbatsa duwa a Mbulum: « Tsalumara i Yurdan a. » 18 I təv ana gà ɓəzla məbatsa duwa a Mbulum ana, tə zle a sahər magəsa masla BATSAH kwa ŋa ya, te tsalara i Yurdan a, aha ŋana tə ɓala gà sik tar aka ahəɗ ana makula ŋa ya ka, yam a mbəɗ gər a təv mendze ŋgar, faɗəɗɗa asa, a mà aka mezlele a dulwa kamala ana piŋŋe ya. 19 Nda mehinne kurwa ŋa, kiye malahalah ŋana i huɗ mive ya, na gà Isərayel tə tsala i Yurdan a. Ta ge təv madzəba tar i Gilgal, ika metsimiɗtsimiɗ Yeriku nda kadwa.
20 Yesuwa a hitseye aà gà kur ata kurwa gəra sula, tə ndzəkara i Yurdan a, a Gilgal. 21 A gwaɗa a gà Isərayel: « Aka miɗ mba, i təv ana gà ɓəza kurum, tàa wiz a kurum: ‹ Gà kur a aaha ti ɗife a dzena aà dukula ›? 22 Ki gweɗwime a a ter aaka ŋa: ‹ Gà kur ata, ta me a dərra a gəra ka, meme na gà Isərayel tə tsala i Yurdan aaha, sifek sifek a. › 23 Kaɗəŋ, BATSAH kwa ŋa Mbulum kurum aka se à yam Yurdan, haa kàa tsalum iɗəm a, kamala ana a se à duluv Awasl ata, akahər ata, ka tsalakwa iɗəm a ya. 24 A ge kərga taŋa ya ka, aà gà mayahaba gər gà mburma ana ika gər ahəɗ a fit tserdze, tə sər ka, BATSAH kwa ŋa ka, mala ndzəɗa, dite kurum tekeɗe ki gwim a magəɗa a BATSAH kwa ŋa Mbulum kurum kəla pat. »