Yesuwa 3

Gà Isərayel tə tsala i Yurdan a

1 Yesuwa a hitse i mekwede hedwe, ŋgat nda gà Isərayel fit tserdze tə da i Sittim a, ti ndze aà guva Yurdan ka, ta həna i fata, aà məvava ahər ana ti tsele a idəm a. 2 I dəba mehinne makər a ka, gà ɓəzla aka miɗ gà mayahaba gər gà mburma ya, tə suwaya i təv mandzəba tar ata tserdze, 3 ta vəl məpala ahəm aaha a gà mayahaba gər gà mburma, ta gwaɗa a tar: « I təv ana kàa ŋgatum a gà ɓəzla məbatsa duwa a Mbulum, gà gwala Lewi nda gà sahər magəsa masla BATSAH kurum ŋa Mbulum kurum a ka, hitswim, kà zazamum tar i dəba ya. 4 Ama kəla ka, ka sərəkum bise nda sahər ata tsa, maŋgalaɓats mege ika magər kurum nda gà sahər ata dayday kiliwmeter ilik. Kərga taŋa na, ki slwime a aà mesirwim a dər ikaba ya, vatwa wara na ki dwim a dər a, aɗaba kàa dum ndaka vatwa aha ilik tsa. »

5 I dəba ŋa ya, Yesuwa a gwaɗa a gà mayahaba gər gà mburma: « Barayum aà ba dukw zlaŋgatsak a, aɗaba ndidwe ka, BATSAH kwa ŋa, a ge a gà dukw mene aà mburma ika magər kurum. » 6 Ndidwe ŋana ka, Yesuwa a gwaɗa a gà ɓəzla məbatsa duwa a Mbulum: « Zlum sahər magəsa masla aha, dite kà ndzum dər a miɗ a gà mayahaba gər gà mburma. » Ta ge kərga taŋa ya.

7 BATSAH kwa ŋa a gwaɗa a Yesuwa: « Gəs aà mbakum a ka, i ne a à kər a batsah ŋa, aà are gà Isərayel fit tserdze, na ti sire a dər ka, iye riŋ mandza ŋa nda kər a, kamala ana i ndzara nda Musa ya mbaŋa. 8 Dite kər ka, tsik bazlam aaha a gà ɓəzla məbatsa duwa a Mbulum ana ti zle a sahər magəsa masla ya: ‹ I təv ana kàa ndzwim aà guva Yurdan, kàa ɓalum gà sik kurum a yam ka, hitswim a fata. › » 9 Tsam ka, Yesuwa a gwaɗa a gà Isərayel: « Sərəkumara, kà dzum zləm a gà bazlam BATSAH kurum ŋa, Mbulum kurum. » 10 Yesuwa a gwa: « Ki sirwim a dər, Mbulum ana mandza ŋa a bəra nda mesife ya, ŋgat riŋ mandza ŋa ika magər kurum, a delewe a gà Kananiya, nda gà Hittiya, nda gà Hivviya, nda gà Perizziya, nda gà Girgasiya, nda gà Amuriya dite nda gà Yebusiya nda ndzer ika miɗ kurum ka, 11 nda, sahər magəsa masla wele ana Batsah ŋa, gər ahəɗ fit tserdze i ahər ŋgar, a tsil a i Yurdan a, ika miɗ kurum. 12 Kinehe ka, palum gà mburma kurwa gəra sula ika magər kurum a, ilik ilik kəla aà gwala gà Isərayel. 13 Ələk ana gà ɓəzla məbatsa duwa a Mbulum, ti zle a sahər magəsa masla wele ana Batsah ŋa a kwere a gər ahəɗ tserdze ya, tàa ɓəl sik tar a Yurdan tsara ka, yam a sese a ba ikaba ya, a zlelere a i kadwa ya asa tsa, a hitse dzeŋ kamala zlagam a. »

14 I təv ana gà mayahaba gər gà mburma tə dara i təv mandzəba tar a, aà matsala i Yurdan a ka, gà ɓəzla məbatsa duwa a Mbulum ana ti zle a sahər magəsa masla ya, tə lah mendze aà miɗ a gà mayahaba gər gà mburma. 15 Akahər mege ara gà duwa i dala ya, ahər ŋa ata ŋa, na i huɗ mive ya ka, Yurdan a rahawa a zawar i gər a ya. Ama ələk ana gà ɓəzla məbatsa duwa a Mbulum ana tizle a sahər magəsa masla ti ndzeha a Yurdan, ta ɓala sik tar a yam tsara ya ka, 16 yam ana a zlelere a i kadwa ya, a yahaba gər, a hitse dzeŋ kamala zlagam a diriŋ, bise nda huɗ kwite Adam ana bise nda Tsartan a. Nda gwa ŋana ka, yam ana a zlele a a duluv a Arava ya, kamala megweɗe ya ka, a duluv Məməta ya, a hitse dzeŋ a zlele a asa tsa, dite gà mayahaba gər gà mburma tə tsala i Yurdan ana ser aka huɗ kwite Yeriku a. 17 Gà ɓəzla məbatsa duwa a Mbulum ana ti zle a sahər magəsa masla BATSAH kwa ŋa ya, ta hitse aka ahəɗ ata mesiweŋa sifek sifek ika magər Yurdan a. Akahər ata ka, gà Isərayel fit tserdze, tə da ndaka vatwa ata mesiweŋa sifek sifek a, haa gà mayahaba gər gà mburma, tə tsala i Yurdan a fit tserdze.