Yesuwa 2

Gà ɓəzla masamata ikaba huɗ kwite Yeriku a

1 Yesuwa kəla Nun a, a slərra gà mburma sula nda wirwir, i Sittim a, nda magwaɗa tar: « Dum a masamata ara ikaba ahəɗ kwite ya, ndeyndey ŋa ka, huɗ kwite Yeriku. » Tə da, ti ndzeha a fata ka, ta patsa a ga a bəra məkəs duwa muva ŋa, zləm ŋgar Rahab, ta həna a fata. 2 Wura da a megweɗe a əbay gà Yeriku: « Araha gà Isərayel naha, tàa dara ndaavəɗ ŋa aaha ya, aà masamata ikaba ahəɗ kwite kwa ya. » 3 Tsam ka, əbay gà Yeriku a slər gà mburma a təv Rahab, aà ta gwaɗar: « Gà mburma ana tə dara, a ma yak ka, tə dara ka, aà masamata ikaba ahəɗ kwite kwa ya. Ndzək a mə̀rra tar a bəra ya. »

4 Ama Rahab aka ndzək gà mburma ata sula ya, a kə kaha tar. Dite a gwaɗa a tar: « Haya kaɗəŋ ndzer, gà mburma tàa dara a ma gà ya, ama i sər təv ana tə dara iɗəm a tsa. 5 Akahər ana mahandaka a gà biye hərmaga huɗ kwite ide ya, aka həvəɗ ana a ge a ya ka, tàa mbəɗ dər akaba gər. I sər təv ana tə da aɗəm a tsa. Mbum aàba aà mazazama tar tsəmma tsəmma, ki lwim a a teriŋa. » 6 Tsaatsa ka, aka tsala aà gà mburma ata aka gər ga ŋgar, dite aka kaha tar aà huɗ guvukw leŋ ana a yahabar gər, ika gər ga ŋgar ata ya. 7 Gà mburma ata tə zazam tar, tə zla vatwa ana a da a dulwa Yurdan, ndaka tseke ana ti sle a aà metsile a dər iɗəm a nda sik tsik a. Ələk ŋana tə dara i huɗ kwite ya tsara ka, ta handaka a gà biye hərmaga huɗ kwite.

8 Akahər ana gà mburma ata sula, tàa ndze are zukw tsiye ka, Rahab a tsəl a təv tar, aka gər ga ŋgar ata. 9 A gwaɗa a tar: « I sər ka, BATSAH kurum ŋa aka vəl a kurum ahəɗ kwite aaha ahər a kurum. Mər riŋ mandza ŋa ka, nda magəɗa ŋa hinne. Gà mburma ana mandza ŋa ika ahəɗ kwite aaha tserdze ya ka, arəv aka da aà tar a hinne agəra kurum. 10 Aɗaba màa matsaraka na, BATSAH kurum ŋa a se à duluv Awasl ika miɗ kurum a, na akahər ana kà dumara i kwite Ezipt ya. Màa tsaraka asa mbaŋa, kàa batsum gà əbay gà Amuriya sula, gà Sihun nda Ug, ana tar mandza ŋa ika kadwa Yurdan a, kàa dzeywim aà tar fit kweleŋ. 11 I təv ana mì tsaraka, gà labara ata ya ka, magəɗa aka gasa mə̀r, arəv a da aà mə̀r a fetite kweleŋ. Wura a sle a à mehitse a kurum a a vatwa ya tsa. Aɗaba BATSAH kurum ŋa, Mbulum kurum ka, Mbulum ana i gər ŋa i gəza mbulum a, dite ŋgat ɗa i bəɗ ika gər ahəɗ asa mbaŋa ya. 12 Kinehe ka, i ge kurum kamkam, gwim ŋgwal a gà mburma ana i ga i ma gà ya, kamala ana i ge kurum ŋgwal a mbaŋa. Mbeɗwimiŋ nda zləm BATSAH kurumiŋa, petwimiŋ a dukw ana i sər a dər ka, ndzer a. 13 Ki miyekwime a à dede gà, à mama gà, gà damər gà, gà asləka ŋana, nda gà dəm ŋana, dite nda gà mburma tar fit tserdze nda mesife, ki beywime à mə̀r a aà məməta ya. » 14 Gà mburma ata ta gwaɗar aaka: « Mìi zəme a mimbeɗe ka, nda mesife mə̀r, ama kəla ka, kà ta pàt aà dukw mə̀r na mìi ge ya tsa. I təv ana BATSAH kwa ŋa aka vəl a mə̀r ahəɗ kwite aaha ya ka, mìi gise ahəm aà dukw ana mì tsik a, mìi gike a ŋgwal. »

15 Rahab a tarəra aà tar nda liɓir a, ndaka biye mendiwek a, aɗaba ga ŋgar ka, aà zlagam ana a kesle a huɗ kwite ata ya. 16 Tsam ka, a gwaɗa a tar: « Tsalum a kwite aà mibeye aà gà mburma ana ti yehe a kurum a. Ndzum riŋ i makahaba i fata mehinne makər, haa tsikw aka təv ana ta mbəɗara gər a. I dəba ŋa ya, ki mbiɗwim ba a gər aka vatwa kurum a. »

17 Gà mburma ata ta gwaɗa a məkəs ata: « Araha meme na mìi ge a dukw ana mìi zle a ba dəra liɓir i ɗa ya. 18 Aka təv ana maa dzəba aà mazəma ahəɗ kwite aaha ya ka, ki dene a kəla liɓir aaha nduzzwa ya, aà biye mendiwek ana kà tar dərra iɗəm a mə̀r a ya. I dəba ŋa ya ka, ki yehe a gər, a gà dede yak, mama yak, gà damər yak, nda gà mburma ana i ga ma yak a tserdze, a huɗ ga a ma yak. 19 Na wura aka dara a bəra, i ga i ma yak a ka, bakal məməta ŋgar ika gər ŋgar ŋa, tsəka ahəm mə̀r iɗəm asa tsa. Ama kəla ka, wele ana riŋ i ga i ma yak, tàa zla aakahər a mbulum ka, bakal ŋa a ge a ika gər mə̀r. 20 Ama na kàa neye gà bazlam mə̀r aha mìi tsikeye a yak, a gà misle ŋgiɗ a ka, màa beye i mimbeɗe yak ana kà mbaɗa a mə̀r a. » 21 Rahab a gwa: « Yàa gəs kamala ana kà tsikum a. » A məsak a tar, tə da ba. Tsam ka, a dan kəla liɓir nduzzwa ŋa ata aà biye mendiwek ga ŋgar.

22 Gà ɓəzla masamata ikaba huɗ kwite ata sula ya, tə tsala a kwite, tə ndza riŋ i makaha ba i fata mehinne makər, tsikw akahər ana gà mburma ata tə zazam tar, aà mayaha tar, ta ŋgat tar tsiye, ta mbəɗara gər a Yeriku a ya. 23 Tsam ka, gà ɓəzla masamata ika ba kwite ya, tə tarəra i gər kwite ya, tə tsala i dulwa Yurdan a. Ta mbəɗara gər a təv Yesuwa kəla Nun a ya. Tə ɗamar gà dukw ana a le a a tar a fit tserdze. 24 Ta gwaɗa a Yesuwa: « Nda ndzer ka, BATSAH kwa ŋa aka vəl a kwa ahəɗ kwite ata fit, a huɗ ahər kwa. Gà mburma ana mandza ŋa i kwite ata ya tserdze ya ka, arəv aka da aà tar a hinne a gər a kwa ya. »