Yesuwa 1

Yesuwa

Yesuwa a zla təv mendze Musa

1 I dəba ana Musa mala meslire BATSAH kwa ŋa a mət a ka, BATSAH kwa ŋa a gwaɗa a Yesuwa kəla Nun ana ŋgat mala mazlaka Musa ya: 2 « Musa mala meslire gà aka mət. Kinehe ka, hadzal ba aà matsəla i dulwa Yurdan aaha ya, kər nda gà mayahaba gər gà mburma aaha fit, aà mada aka ahəɗ kwite ana, ì vəl a gà Isərayel a. 3 Zləməŋa gà təv ana kàa ɓəlum aɗəm sik kurum a ka, i vile a kurumiŋa, kamala ana yàa mbər metsike a Musa ya. 4 Kwiye ahəɗ kurum a gis a ka, ika kusak ana nda gular a, tsikw a Liban ndaka are yam, nda kadwa ka, a gəs ika batsah dulwa Efrat a, tsikw aka Batsah duluv nda gwa, ana a ne ahəɗ kwite gà Hittiya. 5 Wura a sle a mehitse a a kurum a a vatwa tsa, na i huɗ mandza a bəra yak a. I ndze a nda kər kamala ana i ndzara nda Musa ya mbaŋa. I miyeke a à kər a tsidze, i mbiɗeke a dəba tsa.

6 Mà aba arəv, ne ka, mala ndzəɗa aɗaba kər na, ki ta vile a ahəɗ ata a gà mayahaba gər gà Isərayel a ne meleke tar a, i mbaɗa i gwa i te vile a a gà bàba gà tsir tar a. 7 Asla ka, mà aba arəv ɓəŋɓəŋ lele, ne mala ndzəɗa aà magəsa ahəm aà məpala ahəm gà ana mala meslire gà Musa a vəlak a fit. Ka ta kəzlaha ika vatwa ya, ndaka tseke ahər mezime, kige tsa ndaka tseke ahər gula tsa, na dite ki ta ŋgete a mege gara i gà dukw ana ki te geye a fit tserdze ya. 8 Dzeŋgewa wakita məpala ahəm a aaha hiywe, dzalawa aaka gà gər i huɗ gəzləŋ yak, ndaapat ndaavəɗ, aà mə məra aba, aà magəsa ahəm aà gà dukw ana mewetse ŋa iɗəm a fit tserdze ya. Kamala taŋa ya, na ki sle a aà meŋgete a mege gara i gà dukw ana ki geye fit tserdze. 9 Məməsak gər tsa, na i təv ana i gwaɗak ka, mà aba arəv a, kà ne mala ndzəɗa ya. Magəɗa megik tsa, ka dzadzar tsa, aɗaba Iye, BATSAH yak ŋa Mbulum yak, i ndze a nda kər, na i gà təv ana ki deye a aɗəm a fit tserdze ya. »

Mahadzala ba gà Isərayel aà matsala i Yurdan a

10 Yesuwa a gwaɗa a gà ɓəzla aka miɗ ana ika magər gà mayahaba gər gà Isərayel a: 11 « Sawyum i gà təv madzəba, aà məma a gà bazlam à mayahaba gər gà mburma: ‹ Yahum gər a gà dukw mezime, aɗaba i huɗ mehinne makər a ka, ki te tselwime a i dulwa Yurdan aaha ya, aà ma tə zla ahəɗ ana BATSAH kurum ŋa, Mbulum kurum, ana a vəl a kurum, a ne a meleke kurum a. › »

12 I dəba ŋa ya, Yesuwa a fafəl a gà mburma ana i gwala Ruben nda Gad a, dite nda mezehe gà gwala Manasse, a gwaɗa tar: 13 « Mum aba ara à gər aà gà bazlam ana Musa mala meslire BATSAH kwa ŋa a tsik a kurum a. A gwaɗa a kurum ka: ‹ BATSAH kurum ŋa, Mbulum kurum a vile a kurum mesifikaba, ika ahəɗ ata a vəl a kurum, nda kadwa Yurdan a. › 14 Gà məkəs kurum, gà ɓəza kurum, nda gà palam gà dukw gənaw kurum ti ndze a ɗa ika ahəɗ aaha Musa a vəl a kurum ɗa, ndaka tseke Yurdan aaha ya. Ama kurum, gà sliwdze na yam a dza kurum are tsiye, ki tselwime a i Yurdan a, nda gà dukw ahər kurum, ika miɗ gà damər kurum gà Isərayel. Ki zlekwime a tar, 15 haa ti te ŋgete a mesifikaba, kamala ana BATSAH kurum ŋa, a vəl a a kurum a, dite tar tekeɗe ti zle a ahəɗ ana BATSAH kurum ŋa, Mbulum kurum a vəl a tar a mbaŋa. I dəba ŋa ya, ki mbiɗwimer gər a, aà mazla ahəɗ kwite ana Musa mala meslire BATSAH kwa ŋa a vəl a kurum ɗa nda kadwa i Yurdan aaha ya, a ne a meleke kurum. »

16 Ta gwaɗar aaka a Yesuwa: « Mìi ge a dukw ana kà tsik a mə̀r a tserdze, mìi de a ku mege ndawara a gà təv ana, ki slir a aɗəm a mə̀r a. 17 Mìi gis a ahəm a dukw ana fit tserdze ki tsik a mə̀r a ya lele, kamala ana mì gəsara ahəm a Musa ya. Aslaka BATSAH yak ŋa Mbulum yak mandza nda kər, kamala ana a ndzara nda Musa ya. 18 Ku weke na aka ta metsele aba aà segeme a gər, aka dukw ana ki tsike a ya ka, dite aka niw magəsa ahəm aà gà məpala ahəm yak ka, ta kiɗe a ŋgat. Aslaka, ma aba arəv, ne mala ndzəɗa. »