Lewi 26

Mipise ahəm agəra magəsa ahəm

1 « Ka ta vaɗayum aba gà mbulum ŋgiɗ tsa. Ka ta hitseyum aà gà dukw ana ka papazayum a tsa, ku mege kur, ka nwim dər mbulum kurum a tsa. Ka ta hitseyum aà gà kur ana mewetseye ŋa ika ahəɗ kurum à mazambaɗa à tar a tsa. Iye na Batsah ŋa Mbulum kurum a. 2 Zazamum gà pat Sabba gà, dite zambaɗum aà ga gà ata tsəɗaŋŋa ya. Iye na Batsah ŋa ya.

3 Na kàa zazamum gà məpala ahəm gà, na kàa hənum a gər a bəɗ a gà dukw ana i tsik a kurum a, dite na kàa gwim dər megemir ka, 4 i tiɗe a kurumara yam ndaka vatwa ŋa ya, na aka ndze ahər ŋa ya, dite ahəɗ a ge a duwa lele, dite gà dizl ɗaf te we a mbaŋa. 5 Ahər magazla gà duwa a ndze a ka, tsikw aà gà manaha gà viŋye kurum, dite maŋgəla manaha mawa dukw kurum tekeɗe a ndze a ka, tsikw aà meslige duwa asa. Ki ŋgetwime a gà dukw mezime hinne, dite ki ndzwim a nda zay ika ahəɗ kwite kurum. 6 I tike a mendze a zay aka ahəɗ kwite kurum. Wura a sle a aà mewise a kurum a a gər, na kurum ika mendze are ya tsa. I dzeye a a gà dukw dala ana ta betseye a mburma ya, dite wura a ta ge a aà kurum a guvəl nda masalama tsa. 7 Ki digizwim a gà ɓəzla mene are kurum, ki betswim a tar nda masalama kurum. 8 Gà Isərayel əzləm ka, ti delewe a gà ɓəzla mene are tar ana dərməka ya (100). Gà Isərayel tàa ge dərməka ka (100), ti digize a gà ɓəzla mene are tar ana dəbuw kurwa ya (10 000). Ki betswim a tar nda masalama kurum. 9 I pete a à kurum a à ŋgwal gà, ki te wum a ba hinne, dite i kesle a magəsa masla gà ana i gəs nda kurum a. 10 Ki te gwim a duwa i dala ya hinne, ki slwime a à mezime a gà miviye, gà dukw ata kə gwim ara i dala ya, a ndze a hinne. Ki meywimera iɗəm aà miviya ŋana a zeha ya. dite ki dzwime a aɗəm a gà awiya ŋana kə gwim ara i dala ya. 11 I ge a ga petek gà ika magər kurum, dite i mbiɗe a kurum a dəba tsa. 12 I ti ndze a ika magər kurum hiywe, i ne a Mbulum kurum, dite kurum ki nwim a gà mayahaba gər gà mburma gà. 13 Iye na Batsah ŋa Mbulum kurum a, i ndzəkara kurum ika ahəɗ Ezipt a ka, aà kà nwim gà ɓele gà Ezipt asa tsa. Yàa həɓ à zukw ana ti tike aka kurum mibe ŋa ya, dite kà dum ka, nda meziwe gà gər kurum.

Mezelme Mbulum

14 Ama na ki dzwim a zləm a məpala ahəm gà tsa, ki gwim a dər megemir tsa, 15 na kàa ywim gà məpala ahəm gà a dala, kàa nwim are a dukw ana i hitse a dər a, dite ki giswim a dukw ana i gwaɗa a kurum gwim a tsəka, taŋa kà həɓum ka, aà magəsa masla gà ana ika magər kwa ya. 16 Araha na dukw ana i ge a kurum a ya: I slire a aka kurumaha gà bàba gà mesewere are, gà dukw məməta ana mburma a mbile a iɗəm a tsiye, gà maraɓaraɓ, gà dukw ata ka, ta geyeha a bəɗ a are kurum, dite ti sese a ika mandza a bəra kurum a. Ki sligeywim a gà guvah kurum, ama biy taf, aɗaba gà ɓəzla mene are kurum na ti zime a dukw kurum ana i dala ya. 17 I mbiɗe a aà kurum a ala, dite gà ɓəzla mene are kurum ta mbe a kurumiŋa. Gà ɓəzla mene are kurum, na ta kwere a kurum a, ki ta tizwim a a gər kurum, ku mege wura a kurum i dəba tsa tekeɗe ya.

18 Na idəba gà dukw ata ya, kàa dzwimiŋa aaka zləm tsa hiywe pəra ka, i sewere a kurum a are medzige təsəla agər gà dukw bakal kurum ata. 19 I hiɓe a à ndzəɗa magəla a gər kurum, i ne a aà gəza mbulum kamala ndzemde ya. Dite gà ahəɗ kurum, ta kwiliŋa, a mire a kamala virzegene ya. 20 Ki ywim a ba taf masakaŋa, ahəɗ a ge a duwa tsa, dite gà dizl ɗaf ana ika ahəɗ kurum a, ta we a ɓav tsa asa.

21 Na kàa tsalum aba aà segeme a gər, kàa niwum aà medziŋ a aaka zləm ka, i sikehe a à kurum a, aà mesewere are medzige təsəla asa, agəra gà dukw bakal kurum ata hiywe. 22 I slire a aka kurumaha gà dukw dala, ta betse a gà ɓəza kurum, ti dzeye a aà gà palam gà dukw gənaw kurum, ti nikiɗe a a kurumiŋa, gà vatwa kurum ti neye a gà kusak.

23 Na i dəba gà dukw mesewere are ata ka, kàa gəsum metsehe gà ana i ɗif a kurum a dər a tsa hiywe pəra, na ki ndiɗikwime a gər aà mege aà iye guvəl hiywe pəra ka, 24 iye tekeɗe i ge a a kurum a guvəl mbaŋa. I vile a a kurum a mesewere are ndaaswanunnwa sik təsəla asa agəra gà bakal kurum. 25 I hitse aka kurumara aà guvəl nda masalama ya, a vile a kurum a mesewere are, aɗaba ana kà sasum ikaba magəsa masla gà ana i gəs nda kurum a. Ki te keheywim a ba, a gà bàba gà huɗ kwite kurum. Ama i slire a aka kurumaha dukw məməta meslesle duwa. Dite i dze a kurum ahər a gà ɓəzla mene are kurum. 26 I ti niw a a kurum a, aà dukw mezime, gà məkəs kurwa ti ta de a kurum a peŋ ika liwit peŋ ŋa ilik, ti sese a kurum a akahər mesese, ki zimwiməŋa, ama a sle a kurum a tsa.

27 Na idəba gà dukw ata a geye ba tserdze ya ka, kàa tsarakumiŋ dər tsa hiywe, ki ndiɗikum a gər aà matsalaba aà segeme a gər, nda təv ga hiywe ka, 28 i mbiɗe a ba aà matsalaba aà segeme a gər, aka gər kurum, nda mege matsəɓatsəɓ batsah ŋa, i vile a a kurum a mesewere are medzige təsəla asa nda ahər gà ŋa, agəra gà bakal kurum. 29 Ki te pepeɗwim a gà ɓəza kurum nda gà dəm kurum. 30 I ta mbezleye a à gà təv wuda kurum, i ta betseye a gà təv madula aaka wirde kurum, i ta dzeye a gà məməta kurum aka gər gà məməta gà dukw ana kà nwim dər gà mbulum kurum a, i dze a kurum a dala. 31 I ta mbezle a à gà bàba gà huɗ kwite kurum kweleŋ, dite wura a ta ge a riŋ i təv kurum ata, kà nwim dər tsəɗaŋŋa ya asa tsidze. I ta gise a aà kurum a gà dukw ana kà dulewimiŋ hədzək ŋa hwaŋŋa ya asa tsa. 32 Iye ŋa nda gər gà ŋa na, i mbezle a à ahəɗ kwite kurum a. Gà ɓəzla mene are kurum ana ti dere a ti ndze a iɗəm a ka, a ge a ter a, kamala dukw mene a mburma ya. 33 I ta ge a aà kurum a guvəl nda masalama, i ti gwitse a aà kurum a aka magər gà mayahaba gər gà mburma ŋgiɗ. Ahəɗ kwite kurum a ne a mandazla. Gà huɗ kwite kurum ti neye a gà təv mayaha gər a gà kur.

34 I huɗ gà mive ana, kurum ika ahəɗ gà ɓəzla mene are kurum a ka, gà guvah kurum ana kà miyakum dər a ka, ti sifik a ba. Taŋa a mburɗe a aɗəm a ba, avukw ahər mesifikaba ana kə gəsum a ahər ahəm tsiye. 35 I fata ya ka, ahəɗ a sifikaba, avukw gà mive mesifikaba ana kà məsakawum dər a tsiye, na akahər ana kurum mandzaŋa ika ahəɗ kwite kurum a.

36 Gà mburma ana ika magər kurum ti ta ndiɗik a gər aà mendze i kwite gà ɓəzla mene are kurum a ka, i te dze a aà ter a magəɗa, miɓizle slambah dizl ɗaf ana a diɗer a a bəɗ a ilik a ka, ti ti tize a ihər a. Ti ti tize a ka, kamala ana ti tize a a mala mene are tar ana nda gà masalama ya, ti dzewe a bəɗ təɗup, ku mege wura riŋ a delewe a tar i dəba ya tsa tekeɗe ya. 37 Ti te dzewe akaba ka, misle ŋgiɗ a diɗe a aka gər misle ŋgiɗ kamala ana ti tize a ka, ika miɗ gà ɓəzla mene are tar ana nda masalama ya. Tsaatsa ka, wura riŋ ilik a delewe tar tsa. Ki te slwim a aà meŋgete ndzəɗa aà meŋgirsle ika miɗ gà ɓəzla mene are kurum a tsa. 38 Ki dzeywim a ika magər gà mayahaba gər gà mburma ana ɗa ika gər ahəɗ a. Dite ki metwime a ika ahəɗ kwite gà ɓəzla mene are kurum. 39 Gà na ika magər kurum ti ta ndiɗik a gər a mendze i kwite gà ɓəzla mene are kurum a ka, gà ndzəɗa tar ti dzeyiŋ a, agəra gà dukw bakal tar, nda bakal gà bàba gà tsir tar.

Mbulum à mibera aà magəsa masla ŋgar a gər a

40 Ama gà mburma ana ti ndze a a bəra ya ka, ti ta ɗife a à gà bakal tar nda biy gà bàba gà tsir tar, ti ta gweɗe a, màa ge batsah bakal a BATSAH kwa ŋa, màa tsalaba aà segeme a gər nda təv ŋgar. 41 I fata ya ti te sire a mbaŋa ka, iye tekeɗe yàa tsalaba aà segeme a gər nda təv tar, dite yàa duŋ tar, aka ahəɗ kwite gà ɓəzla mene are tar. Ti nikiɗe a aà ba tar ika miɗ gà, nda masəra dər ka, tàa gəs aà iye ahəm tsa. Dite ta gise a akaba mesewere are agəra dukw bakal tar. 42 I fata ya ka, i mibera à magəsa masla ana i gəs nda gà bàba gà tsir tar a a gər a, gà Zakup, Izak àha Abəraham. I mibe a dərra a gər a, aà ahəɗ kwite ana i tsik, i sida ya i gwa i ta vile a ter a ya. 43 Kərga taŋa ya, i təv ana tar ɗa ika ahəɗ kwite aaha asa tsiye ka, ahəɗ a sle a aà mesifike a ba kuɗa. I huɗ mendze ata ya ka, ta gise a akaba mesewere are dukw bakal ana a le a ter a ya, aɗaba ana tàa ye məpala ahəm gà a dala, dite ta ge guvəl aà dukw ana i hitse dər a. 44 Tsaatsa ku mege tar riŋ, ika ahəɗ kwite gà ɓəzla mene are tar ka, i dze a aà ter a a dala tsa, i ge a aà ter a guvəl tsa, i dzeye a aà ter a tsa, i miyeke a aà magəsa masla gà ana i gəs nda gà tar a tsa. Aɗaba iye na Batsah ŋa Mbulum tar a. 45 I fata ya ka, i mibera aà magəsa masla ana i gəs nda gà bàba gà tsir tar, a gər a. I ndzəkara tar ika ahəɗ Ezipt a ka, parakka aà are gà mayahaba gər gà mburma tserdze, aà i ne Mbulum tar, Iye na Batsah ŋa ya › . »

46 Gà taŋa ka, gà dukw ana a gwaɗa a tar gwim a, gà dukw ana mehitse dər ŋa, nda gà məpala ahəm ana BATSAH kwa ŋa a vəl a gà Isərayel nda ahər Musa ika gər kwite Sinay ya.