Lewi 25

Gà viye ana pam biy Mbulum a

a) Viye mesifikaba guvah

1 BATSAH kwa ŋa a fafəlar a Musa ika gər kwite Sinay: 2 « Tsik a gà Isərayel, gwaɗa tar: ‹ I təv ana kàa ndzwim aka ahəɗ ana i vile a kurum a ya ka, ki misekewume a à ahəɗ a sifikaba, ahər ata ka, a ti ne a Sabba nda zləm BATSAH kwa ŋa. 3 I huɗ mive ndilik a ka, ki sligeyewume a gà guvah kurum. Ki slesleɗeyewume a aà gà dizl viŋye kurum a, dite ki geyewume a gà dukw kurum i dala ya. 4 Ama aà mive matəsəla ŋana ka, Sabba ahəɗ kwite kurum a sifikaba nda zləm BATSAH kwa ŋa. Ki sligwim a gà guvah kurum tsa, dite ki slesleɗeywim a aà gà dizl viŋye kurum a tsa mbaŋa, 5 ki pelwim a gà miviye dukw ana tə sləl nda ahər tar, i bəɗ a tsa, ki ŋgilwim a manaha mawa viŋye ana kàa slaslaɗum aà dizl ŋa ya tsiye tsa, aɗaba mive ata ka, ahəɗ a sifikaba kweleŋ. 6 Gà dukw ana ti slile a i bəɗ a, viye Sabba ya ka, ki zimwimiŋa, kurum ŋa, gà ɓəzla meslire kurum gà asləka ŋana, nda gà dəm ŋana, gà ɓəzla megemir kurum, nda gà slele ana tar mandzaŋa ika magər kurum a. 7 Gà dukw ata ka, ti ne a gà dukw mezime gà dukw gənaw kurum, nda gà dukw dala ana, ika ahəɗ kwite kurum a mbaŋa ›.

b) Viye maŋgayaba

8 ‹ Ki ɗemwime a mive Sabba təsəla, ha a da a təsəla. Kamala megweɗe ya ka, mive dzik faɗ gər ŋgar tswiɗ (49). 9 I dəba taŋa ya ka, nda mehinne kurwa kiye matəsəla ŋa ata ka, taŋa ka, batsah pat məpəla à bakal. Ki vetwim a mezleliŋ, ika ahəɗ kwite kurum fit tserdze. 10 Kamala taŋa ya, na ki nwim a à mive dzik əzləm (50) ŋa ata mive ana pam biy BATSAH kwa ŋa ya. Ki miyekwim a à meziwe gər a gà mburma ana ika ahəɗ ata ya fit tserdze. Mive ata a ne a biy maŋgayaba. Ku mege weke ika magər kurum a ka, gà guvah ŋgar a mere a à ahər ŋgar asa. Dite a mere a təv gà gwala ŋgar a. 11 Kamala taŋa ya, na ki girivewume a mive maŋgayaba, kə̀la na aka ndze mive dzik əzləm a (50). Ki sligwim a duwa a gà guvah kurum tsidze. Ki pelwime a gà miviye gà dukw ana tə sləl i bəɗ a tsa. Ki ŋgilwime a manaha mawa viŋye kurum ana kàa slaslaɗum ihər tsiye tsa. 12 Nda ndzer a ne ka, mive maŋgayaba, mive ana tsəɗaŋŋa biy kurum a. Ki slwime a aà mezime a gà dukw ana tə sləl nda ahər tar i bəɗ i guvah kurum a.

13 I huɗ mive maŋgayaba ata ya ka, ku mege weke ika magər kurum a ka, gà guvah ŋgar ta mere a ahər ŋgar. 14 Na biy tsa kàa kalum à guvah a mala biye hərmaga kurum ka, kige tsa kàa səkəmum ihər guvah a ka, kà ta gwim ihər wirwir a tsa. 15 Ki sikim a guvah a mala biye hərmaga yak a ka, ki ɗemwime a gà mive ana gəs aà mive maŋgayaba ana a dara i dəba ya ya, dite, a kelek a dər ka, tits aà gà mive ana a zeha, ki ge iɗəm duwa ya ya. 16 Na mive ŋa aka ge hinne ka, gana guvah a sikehe a mbaŋa. Ama na mive ŋa a kige hinne tsəka, gana guvah ata a nikiɗe a asa mbaŋa. Nda ndzer masəkəma guvah ka, ki ɗemewime a ka, gà mive ana ki pelwime a iɗəm gà dukw mezime ya. 17 Wura ma ta ge wirwir aà mala biye hərmaga ŋgar a tsa. Ama hənum a gər a bəɗ a Mbulum kurum, aɗaba iye na Batsah ŋa Mbulum kurum a.

18 Hənum à gər a bəɗ a məpala ahəm gà, kaslum gà dukw ana i hitse dər a, dite kə gəsum aà tar ahəm, dite na ki ndzwime a nda zay ika ahəɗ kwite ata ya. 19 Gà guvah kurum, te gewe a dukw mezime hinne. Ki zimewume a dukw mezime a slewe a kurumiŋa, dite ki ndzewume a nda zay asa mbaŋa. 20 Bəla tsa, ki wizwime a aàba duwa, ki gweɗwime a, ki ti zimekwe a ana dukula na nda viye məmətaha a guvah ŋa ya, aɗaba wura a slige a duwa tsa, dite wura a gere a duwa i dala ya ɓav tsa asa ya? 21 Sərum dər ka, aà mive mendilik ŋana ka, i te pise a kurum a ahəm, ahəɗ a ge a duwa biy mive makər. 22 Aà mive matsamakər ŋana ka, ki sligwime a duwa a gà guvah kurum. Ama aà mive ŋa ata ka, ki zimwime a gà miviye gà dukw mezime kurum ana kə gwimara i dala ya hiywe pəra. Dukw mezime a ge a ba hinne, a leke a kurum tsim aà mive metswiɗ ŋana ki gwimara gà duwa i dala ya ›.

ɓ) Viye məmburɗwa gà guvah

23 ‹ Vatwa kurum riŋ aà makala a guvah aà dzeŋe tsa. Aɗaba ahəɗ ka, biy gà, dite kà nwim i ma gà ka, kamala gà mbəlakw nda gà slele ya. 24 Aɗaba taŋa, na ika ahəɗ kwite ata i ta vile a kurum a ya ka, ki ta hitswime a aà gà məpala ahəm ana a vile a kurum a vatwa aà məmburɗaya gà guvah a.

25 Na damər yak, aka ge matawak, aka kal aà guvah ŋgar ilik ka, wele ana i gwala ŋgar bise, vatwa ŋgar riŋ aà məmburɗwa guvah ata ka, a sle a aà medeha aà məmburɗaŋa. 26 Na mburma ŋa wur ŋgar riŋ ilik i gwala ŋgar bise aà sle a aà məmburɗwa a guvah ata tsəka, na aka ta meŋgete duwa mba ka, a mburɗwe a ba guvah ŋgar nda ahər ŋgar ŋa. 27 Na kərga taŋa ya ka, a gewe akaba gà siŋgwe gà mive ana a zeha, tsikw aà mive meziwe gà gər a, a piliŋ a, dite guvah ŋgar a mere a ahər. 28 Na bəla siŋgwe ihər aà məmburɗwa dər guvah ŋgar tsəka, guvah ata a ndze a, i ahər wele ana a səkəm a tsikw aà mive maŋgayaba. I huɗ mive ata ya kuɗa ka, guvah ata a mere a ahər ŋgar a kuɗa.

29 Na bəla wura aka kal a ga ŋgar, i batsah huɗ kwite ana malawaraŋa nda zlagam tits a ka, vatwa ŋgar a ge a riŋ aà məmburɗaŋa ka, i huɗ gà mendze zaakwa ya pəra, kamala megweɗe ya, mive ilik i dəba ana a kal dər a. 30 Na tàa mburuɗ ga ata, i huɗ kwite ya, i huɗ mive ŋa ata ya tsəka, ga ata a mitse a a wele ana a səkəm a aà biybiy nda gà ɓəza ŋgar. Ti te sle a aà məmburɗaŋa asa tsa, ku mege aka ndze a ahər viye maŋgayaba tekeɗe ya. 31 Ama na gà ga ana i huɗ kwite ana malawaraŋa nda zlagam tsiye ka, məpala ahəm ŋa ka, ilik nda gà guvah ana ika ahəɗ ata ya. Wele ana aka kal à ga ŋgar a ka, a sle a aà mimburɗe a ga ŋgar hiywe, ku mege meme tekeɗe ka, ga ŋgar a mere a ahər dukw ŋgar, na mive maŋgayaba aka ndze aɗəm a. 32 Ama kə̀la ka, gà gwala Lewi ka, vatwa tar riŋ aà məmburɗaya gà ga tar ana i huɗ gà huɗ kwite gà gwala tar a. 33 Ku mege tar gà gwala Lewi ŋa, na tàa səkəm aba medzibe gà ga ata i huɗ kwite ya ka, a me a ahər a wele ana malahalah ŋa ya, a viye mive maŋgayaba. Aɗaba na a ne limana gà gwala Lewi ika magər tar gà Isərayel ka, gà ga tar ɗekɗek pəra. 34 Gà guvah ana a lawara gà huɗ kwite tar a ka, ta kele a dər tsa. Aɗaba taŋa na a ne bəŋa biy tar aà biybiy ya ›.

d) Magəsa gwedere a gà ɓəzla matawak

35 ‹ Biy tsa, ilik ika magər gà damər kurum gà Isərayel a, aka ge matawak, dite a sle a aà mime a kurum a aɗəm a duwa tsəka, ki zlekwim a ŋgat, ku mege mbəlakw kige tsa slele ana ika ahəɗ kwite kurum a, aà mandza ika magər kurum. 36 Ma ta mà a kurum à gwedere nda yam ŋa tsa, kige tsa nda nuba ŋa tsidze. Kərga taŋa ya, na ki petwimiŋa aà mahəna a gər kurum a bəɗ, à Iye Mbulum kurum a, dite na, gà damər kurum ti sle a aà mendze a ika magər kurum a. 37 Na bəla kàa gəsumar gwedere siŋgwe ka, mə mà a kurum dər nda yam ŋa tsa. Na bəla kà vəlumar ka, dukw mezime ka, mə mà a kurum dər, ma səkah dər aka gər ŋa tsa. 38 Iye na Batsah ŋa Mbulum kurum a. I ndzəkara kurum ika ahəɗ Ezipt a, aà məvəla a kurum ahəɗ Kanana, aà dite i ne Mbulum kurum ›.

ɗ) Məmburɗwa gà ɓele

39 ‹ Na bəla tsa, damər kurum gà Isərayel matawak ŋa, aka kal a kurum aà ba ŋgar ka, kà ta vəlumar megemir kamala gà ɓele ana ta gewe ya tsa. 40 Mege megemir i ma kurum ka, kamala wele ana a ge a megemir ka, ta pil a dukw avukw ŋgar a, kige tsa, kamala wele ana mbəlakw ŋa a siweye a be a ya. A ge a kurum a megemir ka, tsikw a mive maŋgayaba. 41 Viye ŋa ata ka, a ŋgete a meziwe gà gər ŋgar, ŋgat ŋa nda gà ɓəza ŋgar. A mbiɗe a gər a ma a təv gà gwala ŋgar, aka ahəɗ gà bàba gà tsir ŋgar. 42 Aɗaba gà Isərayel ka, gà ɓəzla megemir gà, yàa beyera à tar ika ahəɗ Ezipt a. Agəra taŋa na wura a dzewe a aà ter a, kamala gà ɓele ana tə dzawuwa à tar a tsiye. 43 Ka ta kwarum tar nda ndzəɗa tsa, kərga taŋa ya, na ki petwim a dər ka, kà hənum a gər a bəɗ ka, à Iye Mbulum kurum a.

44 Na kàa wayum gà ɓele, gà asləka ŋa, kige tsa gà məkəs ŋa ka, ki sekemwime a tar i təv gà mayahaba gər gà mburma ana tə lawara kurum a. 45 Kige tsa ki sekemwime a ika magər gà slele ana, ti dehe a ti ndze a ika magər kurum a, kige tsa ika magər gà gwala tar ana ta waya riŋ tar ika ahəɗ kwite kurum a. Gà ɓele ata ka, ti ne a gà biy kurum. 46 Aka miɗ mba ka, ki misekwim a dər a gà ɓəza kurum, ti ne a gà biy tar, ki dzwim a tar a bəɗ, kamala gà ɓele ya, aà biybiy. Wura ma ta kwara damər ŋgar gà Isərayel nda ndzəɗa tsa.

47 Biy tsa, slele kige tsa mbəlakw ana mandzaŋa ika magər kurum a, aka ne mala limana. Na bəla aà gà Isərayel a, ilik aka ne mala matawak, dite a aka kal aà ba ŋgar a slele, kige tsa a wura ilik i gwala gà slele ata ya ka, 48 vatwa riŋ na aà məmburɗwa ŋgat a, i dəba ana a kal a ba ŋgar a. Ilik ŋa a gà damər ŋgar a, a sle a aà mimburɗe a ŋgat. 49 damər dede ŋgar, kige tsa kəla damər dede ŋgar, kige tsa wur ana bise i gwala ŋgar a, a sle a aà mimburɗe a ŋgat. Kige tsa na ŋgat ŋa, duwa ihər ihər ka, a sle aà mimburɗe a ba ŋgar. 50 Na a sle a à mimburɗe a ba ŋgar ŋa ka, ti ɗeme a nda mala ga ŋgar, gà mive ana, ika magər, mive ana a kal a ba ŋgar a, nda mive maŋgayaba ya. Məpəla siŋgwe ŋa ka, tits aà maɗama gà mive ata. Siŋgwe biy mive ilik ka, ta gewe akaba, siŋgwe ana ta pile a dər mala megemir i huɗ miveke ya. 51 Biy tsa mive riŋ ika miɗ hinne mba, na dite a ndze a mive maŋgayaba ya ka, wele ana a waya məmburɗwa ba ŋgar a ka, a me a a siŋgwe bagwal ŋa, aà siŋgwe ana mala ga ŋgar a səkəm dər ŋgat a. 52 Na bəla mive a zeha ka, hinne tsa na a ndze a a mive maŋgayaba ya ka, ti ɗeme a gà mive ŋa, i dəba ŋa ya ka, a mburɗe a ba ŋgar aà mala ga ŋgar a ka, tits aà gà mive ata a zeha ya. 53 Kəla gà Isərayel ata a sle a aà mendze a, kamala mala megemir a, i bəra mala gà ŋgar, a gisewa dukw avukw ŋgar i huɗ mive ya. Ama ka, kà vəlum vatwa a mala gà ŋgar ma kwara ŋgat nda ndzəɗa tsa. 54 Ku mege meme na tàa sle aà məmburɗwa Isərayel ata tsəka, ti ta ŋgete a meziwe gà gər tar nda gà ɓəza ŋgar aà mive maŋgayaba. 55 Aɗaba gà Isərayel ta giŋa megemir ka, a iye. Tar ka, gà ɓəzla megemir gà ana i ndzəkara tar ika ahəɗ Ezipt ya. Iye na Batsah ŋa Mbulum kurum a › . »