Gà lalampa
24
1 BATSAH kwa ŋa a gwaɗa a Musa: 2 « Gwaɗa a gà Isərayel, tə tafakara gà mal uliviye ana ti ɗwitswewa ŋgwal ŋa lele ya. Dite ka, gà lalampa tə ndzawa məvataŋa kə̀la hawa tserdze. 3 Kə̀la hawa ka, Haruna a lembeɗewe a aà akwa ana i gà lalampa i huɗ ga petek mayahaba gər i aka miɗ madana petek ana a kaha sahər magəsa masla ya, aà dite ka, gà lalampa ata tə ndzawa məvataŋa gəs aà hawa ya, haa mekwede ika miɗ BATSAH kwa ŋa. Taŋa ka, məpala ahəm ana a ndze a aà biybiy ya. 4 A lembeɗewe a a akwa ana i gà lalampa ana ika miɗ BATSAH kwa ŋa, ika gər dukw mandza aaka ŋana ta ge nda gura ana za iɗəm tsiye. Tə ndzawa məvatayaŋa kə̀la həvəɗ . »5 BATSAH kwa ŋa a gwaɗa a Musa: « Ndzək məmbaɗa gufa, kà de gà gatuw kurwa gər ŋgar sula, biy kiliw ndilik ndilik. 6 Ki dze a aka tabəl ana ta bah nda gura ana za iɗəm tsiye, aka miɗ BATSAH kwa ŋa, ndilik ndilik təv sula. 7 Ki ndeye a makərɗa dizl ana ze hwuŋŋa lele ya, aka gər mayaha gər gà gatuw ata təv sula ya. I dəba ŋa ya, ta wene a iɗəm a nda zləm BATSAH kwa ŋa ya, avukw peŋ biy dukw taf məməbara à duwa a gər a. 8 Kə̀la pat Sabba ka, Haruna a dzewe a gà medzibe gà gatuw ata avukw gà Isərayel, aka miɗ BATSAH kwa ŋa, taŋa ka, magəsa masla ana a ndze a à biybiy ya. 9 Gà gatuw ata ka, biy gà Haruna nda gà ɓəza ŋgar ti zimewe ka, i təv ana tsəɗaŋŋa ya. Nda ndzer ka, gà gatuw ata ka, tsəɗaŋŋa ndeyndey, tə ndzaka ka, ika gà dukw taf ana ta vakawa a BATSAH kwa ŋa ya. Gà gatuw ata ka, ti ne bəŋa biy tar aà biybiy . »
Seriye agəra dukw bakal ana ki ge ya
10 A pat ŋgiɗ duwa ka, maàga a hitse i təv madzəba gà Isərayel, ika magər gà wele duwa gà Isərayel nda wele duwa tsir ŋgar, gà Eziptiya, dite mama ŋgar tekeɗe dəm gà Isərayel. 11 Dəm gà Isərayel ata ka, zləm ŋgar Səlumit, dəm Dibri ana i gwala Dan a. Kəla ŋgar ata a ndavaya a Mbulum nda mayar mezelme, tsam ka, ta gəs ŋgat aka miɗ Musa. 12 Ti tike ŋgat a ga, ta kasla ŋgat, haa təv ana BATSAH kwa ŋa a pete a aà dukw ana ta ger a ya.
13 I dəba ŋa ya ka, BATSAH kwa ŋa a gwaɗa a Musa: 14 « Da à wele aka a ndeveyiŋa, diriŋ aà təv madzəba ya, dite gà mburma ana tserdze tə tsaraka mendeveye ata ya ka, tə dza ahər tar aka gər ŋgar, dite ka, gà mayahaba gər gà Isərayel tserdze ta kalawa ŋgat nda kur məmət. 15 I dəba ŋa ya ka, araha na dukw ana ki tsik a a gà Isərayel a. Na bəla wura aka ndavaya a Mbulum ŋgar ka, bakal məməta ŋgar ika gər ŋgar. 16 Kəɗum wele ana aka ndavaya a zləm BATSAH kwa ŋa ya. Gà mayahaba gər gà Isərayel fit, ta kalawa ŋgat nda kur məmət. Ku gà slele ana tar mandzaŋa ika magər kurum a, nda gà ɓəzla kwite, say ta kəɗ ŋgat, aɗaba aka ndavaya a zləm BATSAH kwa ŋa.
17 Na bəla wura aka kəɗ mburma ka, ta kəɗ ŋgat mbaŋa. 18 Na bəla a kə kəɗ dukw gənaw mburma ka, a mere a dər aɗəm. Mesife a pile a mesife. 19 Na bəla wura aka ge dukw metire aà mburma ka, ta gere a aɗəm a dukw ata kalkal kamala, taŋa ya mbaŋa: 20 Mehiɓe a pile a mehiɓe, are a pile a are, zlir a pile a zlir. Ta mere aɗəm a à dukw metire kalkal kamala ana a ge ya. 21 Na bəla wura aka kəɗ dukw gənaw mburma ka, a piler a aɗəm ŋa. Ama na a kəɗ mburma ka, say ta kiɗ a aɗəm a ŋgat mbaŋa. 22 Kurum gà ɓəzla kwite nda gà slele ana ika magər kurum a ka, məpala ahəm kurum ka, ilik. Aɗaba Iye Batsah ŋa, Mbulum kurum a . »
23 Araha na gà bazlam ana Musa a gwaɗa a gà Isərayel a. I fata ya ka, tə da à wele ata, a ndavaya a Mbulum a diriŋ aà təv madzəba ya. Ta kalawa ŋgat nda kur. Kamala taŋa ya na, gà Isərayel ta ge dukw ana BATSAH kwa ŋa a tsik a Musa ya.