Lewi 23

Gà pat megirive gà Isərayel

a) Sabba

1 BATSAH kwa ŋa a gwaɗa a Musa: 2 « Tsik a gà Isərayel, gwaɗa tar: ‹ Aka təv ana ki girivwim a gà bàba gà megirive nda zləm gà ya ka, ki yehwim a ba gər aà mezlibe a à iye, Batsah kurum ŋa. Araha na gà pat megirive ŋa ya.

3 Mehinne ndilik i huɗ kwaskwa ya ka, biy mege gà megemir kurum, ama mehinne matəsəla ŋana ka, Sabba, pat mesifikaba. Pat ŋa ata ka, metike ŋa pam. Ki yehwim a ba gər nda zləm gà, Batsah kurum ŋa, ki gwim a megemir tsidze, taŋa ka, Sabba. Ki gwim a metsehe a pat ata aɗaba Iye, Iye Batsah kurum ŋa, ku mege i ŋga i gà təv ana kurum mandzaŋa iɗəm a.

4 Gà bàba gà megirive ŋgiɗ ana ki yehwim ba gər nda zləm gà Batsah kurum ŋa ya ka, ki girivewim a ka, aà gà pat məpasla ahər ŋana mehitseye dər ŋa ya ›.

b) Megirive Paska

5 ‹ Nda malahalah kiye ana i huɗ mive ya, nda mehinne kurwa gər ŋgar faɗ ŋa, aka pat ana a diɗe a ya ka, ki girivwime a Paska a BATSAH kwa ŋa. 6 Nda mehinne kurwa gər ŋgar əzləm ŋa i huɗ kiye ŋa ata ya ka, ki girivwime a megirive peŋ ana giɗe ikəka tsiye, nda zləm BATSAH kwa ŋa. I huɗ mehinne təsəla ya ka, ki zimwim a ka, peŋ ana ti de giɗe ikəka tsiye. 7 Aka malahalah pat ana i huɗ kwaskwa ata ya ka, ki yehwim a ba gər nda zləm gà Batsah kurum ŋa. A pat ŋa ata ka, ki gwim a gà megemir kurum ana kə geyewum a tsa. 8 Kə̀la a wur gà pat ana i huɗ kwaskwa ata ya, ki vekwimiŋa dukw matawala fəla ana ta vakawa ya. Aà mehinne matəsəla ŋana ka, ki yehwim a ba gər nda zləm gà Batsah kurum ŋa asa. Pat ŋa ata ka, ki gwim a gà megemir kurum ana kə geyewum a tsa › . »

ɓ) Megirive malahalah gà dukw ana ta ge ara i dala ya

9 BATSAH kwa ŋa a gwaɗa a Musa asa: 10 « Tsik a gà Isərayel, gwaɗa tar: ‹ I təv ana kàa dum aka ahəɗ ata i vəl a kurum a ka, aka ndze ahər mege ara gà duwa i dala ya ka, ki deneywimera gà malahalah gà gər daw kurum ana kà sasum a, a mala məbatsa duwa a Mbulum a. 11 Mala məbatsa duwa a Mbulum a petiŋaha aà gà malahalah gà gər daw ata kà sasum a, mehinne ilik i dəba pat Sabba ya. I fata ya ka, i gis a aà kurum ŋa. 12 A pat ata ki petwimiŋ aha aà gà malahalah gà gər daw ata ya ka, ki vilwimiŋa dukw taf, kəla hagwala ana mive ide, dukw metire ihər tsiye, biy matawala fəla ana tə dulawa ya asa. 13 Akahər ŋa ata ka, ki vilwimiŋa dukw taf, məmbaɗa gufa kiliw ndilik, mahəlaɓa ŋa nda mal, kamala dukw taf ana ta vakawa ya, dite meze hədzək ŋana hwaŋŋa ya ka, a tsahən a aà BATSAH kwa ŋa. Ki peslwimiŋa dukw taf guzum viŋye liter nda mezeheŋa mbaŋa. 14 Ka ta zəmum gà dukw ana, kə gwimara i dala ya, ələk ŋana a ti ndze a pat ana ki ta vilwime a gà dukw taf, malahalah gà daw ana awiyaŋa a Mbulum kurum a tsa. Kà ta zəmum peŋ tsa, gər daw ana məvakəŋa ya tsa, gà wur gà dukw ana awiya ŋa ya tsa. Taŋa ka, məpala ahəm ana a ndze a aà biybiy ya. Ki giswim a ahər a ahəm ka, wa ahər kəla, wa ahər kəla, i gà təv ana ki ta ndzwim a iɗəm a ›.

d) Megirive malahalah masasa gər daw

15 ‹ Ki ɗemwim a kwaskwa təsəla tetsitstse gəs a mehinne ilik ana i dəba Sabba ya. Taŋa ka, pat ana ki vilwim a dukw taf gà malahalah gà gər daw kurum a, nda mege dər gà dukw ana ta pàtawa dər a. 16 Ki ɗemwim a ka, mehinne dzik əzləm (50), kamala megweɗe ya ka, gà pat Sabba təsəla tsikw aà mehinne ilik ŋana i dəba Sabba ya. A pat ŋa ata ka, ki vilwimiŋa dukw taf gà awiya, gà dukw kurum ana kə gwimara i dala ya. 17 Ki ndzekwimera i gà ma kurum a, gà peŋ a sula, aà meviliŋ dukw taf ŋa, nda mege dər gà dukw ana ta pàtawa dər a. Ki dwim a peŋ ilik ka, biy məmbaɗa gufa kiliw makər, giɗe mege ikəka. Dukw taf ata a dere a ka, i malahalah gà dukw kurum ana kə gwimara i dala ya. 18 Aka gər gà peŋ ata ka, ki dzwimiŋa gà ɓəza hagwala ana dukw metire aà tar tsa mive ide ide ya, təsəla, mbuluv sla ilik nda gà hagwala sula, biy matawala fəla ana tə dulawa ya, akaba nda gà dukw taf gufa, nda məpasla guzum, ana a da dər biy megemir a pat ŋa ata ya. Taŋa ka, gà dukw matawala fəla ana ta vakawa ya, dite gà meze hədzək ŋana hwaŋŋa ya, a tsahən aà BATSAH kwa ŋa ya. 19 Dite asa ki vilwimiŋ a vugul ilik, biy matawala fəla məpəla à bakal kurum, nda gà ɓəza hagwala sula mive ide ide, biy matawala fəla magawuba. 20 Mala məbatsa duwa a Mbulum, a dziŋa gà dukw ata ka, nda mege dər gà dukw ana ta pàtawa dər a. A dziŋa gà dukw taf gà ɓəza hagwala ata sula ya, ahər ŋa ilik akaba nda gà peŋ ata. Gà dukw taf tar ata ka, pam gà biy BATSAH kwa ŋa, ti ne gà biy mala məbatsa duwa a Mbulum. 21 A pat ŋa ata ka, ki yehwim a ba a gər nda zləm gà. Ki gwim a megemir kurum ana kə geyewum a tsa. Taŋa ka, məpala ahəm ana a ndze a aà biybiy ya, ki giswim a ahər a ahəm wa ahər kəla, wa ahər kəla i gà təv ana ki ta ndzwim a iɗəm a.

22 I təv ana ki gwimera gà duwa i dala ya ka, ka ta sasum gà daw tsikw aà kwiye kurum tsa, ka ta mbəɗum gər aka məpala hwaluŋ ŋa tsa. Miyakum dər a gà ɓəzla matawak, nda gà slele ana tar mandzaŋa ika magər kurum a. Iye na Batsah kurum ŋa Mbulum kurum a › . »

ɗ) Megirive məvataya gà mezleliŋ

23 BATSAH kwa ŋa a gwaɗa a Musa: 24 « Tsik a gà Isərayel, gwaɗa tar: ‹ Nda kiye matəsəla ŋa, nda malahalah pat ana i huɗ kiye ata ya ka, taŋa a ne a biy kurum ka, pat mesifikaba. Ki yehwim a ba a gər nda zləm gà. Taŋa ka, pat məməbara à duwa a gər a, nda məvataya gà mezleliŋ. 25 Ki slwim a aà megeye gà megemir kurum ana kə geyewum a tsa, dite ki vilwimiŋa dukw taf matawala fəla ana ta vakawa a BATSAH kwa ŋa ya › . »

e) Batsah pat məpəla à bakal

26 BATSAH kwa ŋa a gwaɗa a Musa: 27 « Nda kiye matəsəla ŋa, nda mehinne kurwa i kiye ata ya ka, taŋa ka, batsah pat məpəla à bakal, ki yehwim a ba gər nda zləm gà. Ki gwim a ndəra, dite ki vilwimiŋa dukw taf matawala fəla ana ta vakawa ya. 28 A pat ŋa ata ka, ki gwim a megemir duwa tsidze, aɗaba pat ata ka, batsah pat məpəla à bakal, ta geye ika kurum gà dukw ana ta geyewa dər biy məpəla à bakal a, ika miɗ BATSAH kwa ŋa, Mbulum kurum a. 29 Na bəla wura aka ge ndəra a pat ŋa ata tsəka, ti delewe a ŋgat ika magər gà mayahaba gər gà Isərayel a. 30 Zləməŋa wele ana a aka ge megemir a pat ŋa ata ya ka, i ta dzeye a dər ika magər gà mayahaba gər gà Isərayel a. 31 A pat ŋa ata ka, ki ta gwim a megemir tsidze. Taŋa ka, məpala ahəm ana a ndze a aà biybiy ki giswim a ahər a ahəm, wa ahər kəla wa ahər kəla, i təv ana ki ti ndzwim a iɗəm a. 32 Biy kurum a pat ŋa ata ka, pat mesifikaba, kamala ana nda Sabba ŋa ya. Dite ki gwim a ndəra. Ki girivwim a pat mesifikaba Sabba, gəs aà mehinne tswiɗ i kiye ata i hawa ŋana ya, tsikw aà ndidwe ŋana nda hawa ŋgiɗ asa . »

ə) Megirive mekiriwe ga petek

33 BATSAH kwa ŋa a gwaɗa a Musa: 34 « Tsik a gà Isərayel: ‹ Nda kiye matəsəla ŋa, gəs aà mehinne kurwa gər ŋgar əzləm i kiye ata ya ka, ki gwim a megirive mekiriwe ga petek, nda zləm BATSAH kwa ŋa, haa a mehinne təsəla. 35 Aka malahalah pat ka, ki yehwim a ba a gər nda zləm gà. A pat ata ka, ki gwim a gà megemir kurum ana kə geyewum a tsa. 36 Kə̀la wur gà pat ana i huɗ kwaskwa ata ya, ki dzwimiŋa gà dukw taf matawala fəla ana ta vakawa ya. Aà mehinne matsamakər ŋana ka, ki yehwim a ba gər nda zləm gà asa, dite ki vilwimiŋ a dukw taf matawala fəla ana ta vakawa ya asa. Taŋa ka, a pat mandəvandəv megirive. A pat ŋa ata asa ka, ki gwim a gà megemir kurum ana kə geyewum a tsa.

37 I təv ana ki gwim a gà bàba gà megirive ata nda zləm gà ya ka, ki yehwim a ba gər, aà meviliŋ gà dukw matawala fəla ana ta vakawa ya, gà dukw matawala fəla ana tə dulawa ya, gà dukw taf gufa ana mahəlaɓaŋa nda mal a, àha gà dukw matawala fəla magawuba, nda gà məpasla guzum, kamala gà məpala ahəm ana i tsik ahər kə̀la aà gà pat gà megirive ya. 38 Gà dukw matawala gà fəla ata ka, ki sekehwime a dər aka gər gà dukw taf ana kà vilwimiŋ a gà pat Sabba ya. Ki sekehwime a dər aka gər gà dukw taf, gà dukw matawala fəla ana kà vilwimiŋ nda meziwe gər kurum, kige tsa aà maraha à dukw ana kà tsikwim i sida ya.

39 Ama nda mehinne kurwa gər ŋgar əzləm, i huɗ kiye matəsəla ŋa ata ya, aka mandəvandəv gà mege ara gà dukw kurum ana i dala ya ka, ki dzwim a ba aà megirive nda zləm BATSAH kwa ŋa, haa mehinne təsəla. Malahalah mehinne, nda pat matsamakər ŋana ka, ti ne a gà pat mesifikaba. 40 Aà malahalah pat ata ka, ki ndzekwimere a gà ŋgwal gà mawa dizl ɗaf, nda gà slambah təɓah a, nda gà ahər gà dizl ɗaf ana gà slambah ihər lele ya, kige tsa gà ahər gà dizl ɗaf ana aà guva dulwa ya. Ki petwim a dər à gà maŋgayaba kurum aka miɗ BATSAH kwa ŋa Mbulum kurum, i huɗ gà pat ata təsəla ya. 41 Kə̀la mive ka, ki gwim a megirive ata nda zləm BATSAH kwa ŋa haa mehinne təsəla. Taŋa ka, məpala ahəm ana a ndze a aà biybiy ya. Ki gewim a megirive ata i huɗ kiye matəsəla ŋa ata ya. 42 I huɗ gà mehinne təsəla ŋa ata ya ka, kurum gà ɓəzla kwite ana i Isərayel a tserdze, ki ndzwim a ka, i huɗ mekiriwe ga petek, 43 na dite ka, gà ɓəza kurum, nda gà ɓəza gà ɓəza kurum, ti ta sir a ka, yàa dza gà bàba gà tsir kurum gà Isərayel, a mekiriwe ga petek na akahər ana i ndzəkara tar, ika ahəɗ Ezipt ya. Iye na Batsah ŋa Mbulum kurum a › . »

44 Kərga taŋa ya, na Musa a ɗif aà gà mehinne gà pat megirive ana gà Isərayel ta girivewe a nda zləm BATSAH kwa ŋa ya.