Lewi 22

Mazəma dukw matawala fəla tsəɗaŋŋa ŋana, ta vəl a Mbulum a

1 BATSAH kwa ŋa a gwaɗa a Musa: 2 « Tsik a gà Haruna nda gà ɓəza ŋgar, ta hitse diriŋ aà gà dukw taf ana tsəɗaŋŋa, gà Isərayel tə dza pam biy gà ya, na dite ti ne a dukw zlaŋgatsak aà zləm gà ana tsəɗaŋŋa ya tsiye. Iye na Batsah ŋa ya. 3 Ki gweɗe a ter a ka:

‹ Wa ahər kəla, wa ahər kəla aka miɗ mba ka, wura ilik i gwala gà ɓəzla məbatsa duwa a Mbulum a, i dukw zlaŋgatsak ka, a sirikeha a təv dukw taf ana tsəɗaŋŋa gà Isərayel ti dziŋ aàba ya pam a iye, Batsah kurum ŋa ya tsa, ta vəlar vatwa aà megiŋ megemir tsa. Iye na Batsah kurum ŋa ya. 4 Mala məbatsa duwa a Mbulum gà gwala Haruna, mbəlak ba ihər, kige tsa yam ba aka dara ihər a ka, say a bere a aàba dukw zlaŋgatsak ata ihər a, na dite a zime a dukw taf ana pam biy Mbulum a. Ar ka, kalkal nda wele ana a ləm aà dukw ana məməta ŋa, a ne à ŋgat dukw zlaŋgatsak a, na nda biy wele ana mbərtak aka zlalara ihər a ya, 5 nda biy wele ana a ləm a gà ɓəza gà dukw ana dukw zlaŋgatsak a, kige tsa aà wele ana dukw zlaŋgatsak ihər a. Ku mege dukw zlaŋgatsak wara ya tekeɗe ya. 6 Ku mege mala məbatsa duwa a Mbulum, aka ləm ahər ka, a ndze a i dukw zlaŋgatsak tsikw a hawa. Say məbara ba ŋgar i bəɗ a fit, dite na a zim a dukw taf ana ta vəl pam a Mbulum a. 7 I dəba ana pat aka dəɗ a ka, dukw zlaŋgatsak ihər asa tsa, a sle a aà mezime a dukw ana ta vəl pam a Mbulum a, aɗaba dukw mezime ata ka, biy ŋgar. 8 Mala məbatsa duwa a Mbulum, a pepiɗe a slu dukw ana a mət mimitiye, kige tsa dukw dala a kəɗ a tsa. Tsəka a ne a ŋgat a dukw zlaŋgatsak. Iye na Batsah ŋa ya. 9 Gà ɓəzla məbatsa duwa a Mbulum ka, say ta gəs ahəm aà gà məpala ahəm gà, na dite ti ne a gà ɓəzla bakal, agəra dukw mezime tar ata tsiye. Na tàa ne dər dukw zlaŋgatsak à dukw mezime ata ka, ta metiŋa. Iye na Batsah ŋa ya, dite Iye na a ndzək tar pam aà megiŋ megemir gà ya.

10 Wura ilik ika magər gà Isərayel a, a sle a aà mezime dukw mezime ana ta vəl pam a Mbulum a tsa, na ŋgat ka, mala məbatsa duwa a Mbulum a tsiye. Ku mege mbəlakw ana, i ga i bəra mala məbatsa duwa a Mbulum a, ku mege mala megemir ŋgar tekeɗe ka, a zim a ɓav tsa. 11 Ama na mala məbatsa duwa a Mbulum, aka səkəm ɓele ka, wele ata a sle a aà mezime a dukw mezime ana ta vəl a Mbulum a tsik. Ɓele ana ta wa ŋgat i ga i bəra mala məbatsa duwa a Mbulum a ka, a sle a aà mezime a mbaŋa. 12 Na dəm mala məbatsa duwa a Mbulum, a da a zal ka, a bəra wele ana ŋgat mala məbatsa duwa a Mbulum a tsiye ka, vatwa ŋgar riŋ aà mazəma dukw ana tə tsakal ika gà dukw taf ana, ta vəl pam a Mbulum a asa tsa. 13 Ama na dəm mala məbatsa duwa a Mbulum, aka ne madakwa ŋa, kige tsa a mara i zal a, gà ɓəza ŋgar riŋ tsa, dite a mbəɗ gər aà gama a bəra tsir ŋgar, kamala na ndeɗiŋa aka da a zal zukw tsiye ka, a sle a aà mezime a dukw mezime ata kamala dede ŋgar a, tsəka masaka mburma a sle a aà mezime dukw ana ta vəl dukw taf ŋa a Mbulum a tsa, na ŋgat ka, mala məbatsa duwa a Mbulum a tsiye.

14 Na wura aka zəm, aka səra aàba tsəka, a me a à dukw ata a mala məbatsa duwa a Mbulum tits aà biy ana a zəm a, dite a sikehe a dər aaka dukw ilik i huɗ dukw əzləm a, biy tsakala dukw taf ata. 15 Gà ɓəzla məbatsa duwa a Mbulum ka, ti ti ne dukw zlaŋgatsak à dukw taf, gà Isərayel ana pam ta vəl a BATSAH kwa ŋa ya tsa. 16 Na tàa məsak aà gà Isərayel aà mazəma dukw taf ata tsəɗaŋŋa ya, tar i dukw zlaŋgatsak ka, tàa ne a à gà Isərayel gà ɓəzla bakal, ta piliŋa. Ndzer ka, Iye na Batsah ŋa ya. Dite iye na i dza gà ɓəzla məbatsa duwa a Mbulum pam, aà ta giŋ megemir gà ya › . »

Mandza gà dukw gənaw matawala fəla a Mbulum

17 BATSAH kwa ŋa a gwaɗa a Musa: 18 « Gwaɗa a gà Haruna nda gà ɓəza ŋgar, dite à gà Isərayel fit tserdze: ‹ Na bəla wura ilik ika magər kurum i Isərayel a, kige tsa ika magər gà mbəlakw ana tar mandzaŋa ika magər kurum a, aka waya miviliŋ, a iye Batsah kurum ŋa, dukw taf matawala fəla ana tə dulawa ya, aà dukw ana a tsik i sida ya, kige tsa kamala ana a waya a vile a nda meziwe gər ŋgar a, 19 na aka waya i gəs ahər ka, say a gisere a mbuluv sla ana dukw metire ihər tsiye, hagwala, kige tsa vugul. 20 Miviliŋ ka, dukw gənaw ana dukw metire ihər a tsiye, tsəka i te a gise a ahər a tsidze. 21 Na bəla wura a waya miviliŋ, a iye Batsah kurum ŋa, dukw matawala fəla magawuba ana a tsik i sida ya, kige tsa kamala ana i meziwe gər ŋgar a vile a ya. I gis a ahər ka, dukw gənaw ana dukw metire ihər tsiye, sla, təmaŋ, kige tsa awak. 22 Ka ta vilwimiŋ, a iye Batsah kurum ŋa dukw gənaw ana guluf ŋa, mahəɓa ŋa, videl ŋa, madugula ihər a, mbəlak ihər a, kige tsa dukw məməta kwiye ba ŋgiɗ ihər a tsa. Ka ta vəlum medzibe gà dukw taf dukw gənaw ata, aà məvaka aka gər təv madula aaka duwa ya tsa. 23 Na bəla dukw gənaw ŋa ka, mbuluv sla, təmaŋ, kige tsa awak sik ŋa ilik zubul ŋa, kige tsa desl ka, kà vilwimiŋ i meziwe gər kurum a ka, i gis a à kurum ŋa, ama na aà maraha aà dukw ana kà tsikwim i sida ya ka, i gis a aà kurum a tsa. 24 Ka ta vilwimiŋ dukw gənaw ana madadaɗa ŋa, kige tsa masasa ŋa ya tsa. Ka ta geywim gà dukw ata aà gà dukw gənaw kurum ika ahəɗ kwite kurum tsa. 25 Ka ta sakamum medzibe gà dukw gənaw ata, aà wele ana kà sərum ŋgat tsiye, aà miviliŋ kamala dukw mezime, à Iye Mbulum kurum a tsa. Taŋa ka, gà dukw gənaw ana, dukw metire a tar, dite ka, i gis a a kurum a tsiye › . »

26 BATSAH kwa ŋa a gwaɗa a Musa: 27 « Kəla sla, kəla təmaŋ, kige tsa kəla awak ka, ta ge mehinne təsəla idəba ana ta wa tar a, i təv gà məmər tar. Aà mehinne matsamakər ŋana ka, i gis a na ki vilwimiŋ a aà dukw taf matawala fəla ana ta vakawa ya. 28 Ama ka ta batsum gà məmər sla, məmər təmaŋ, kige tsa məmər awak, a pat ŋa ilik tar nda kəla ŋgar tsa.

29 Na ki vilwimiŋ a, a iye Batsah kurum ŋa dukw matawala fəla, aà megiŋ dər kəkaaha ya ka, gwim dər kamala ana məpala ahəm gà a gwa ya, na dite i gis a aà kurum a ya. 30 Papəɗum slu dukw gənaw ata a pat ŋa ata, ka zwim dəraha aà ndidwe tsa. Iye na Batsah ŋa ya.

31 Kaslum gà məpala ahəm gà, kə gəsum aà tar ahəm, Iye na Batsah ŋa ya. 32 Ka nwim dukw zlaŋgatsak aà zləm gà ana tsəɗaŋŋa ya tsa, na dite ka, zləm gà mandza tsəɗaŋŋa hiywe i magər kurum gà Isərayel a. Iye na Batsah ŋa ya, i ne a à kurum gà tsəɗaŋŋa ŋa ya. 33 Iye na a ndzəkara kurum ika ahəɗ Ezipt ya, aà mene Mbulum kurum a, Iye na Batsah ŋa ya . »