Gà məpala ahəm ana ta hitseye dər, agəra gà ɓəzla məbatsa duwa a Mbulum a
21
1 BATSAH kwa ŋa a gwaɗa a Musa: « Fafəl a gà ɓəzla məbatsa duwa a Mbulum ana tar gà ɓəza Haruna ya, gwaɗa a tar: ‹ Mala məbatsa duwa a Mbulum ka, mene aba ŋgar dukw zlaŋgatsak nda maləma à məməta ana a mət i gwala ŋgar a tsa, 2 say a sle a aà melime a ka, aà məməta gà mburma ana i huɗ ga i ma ŋgar a: Aà biy mama ŋgar, dede ŋgar, kəla ŋgar, dəm ŋgar, damər ŋgar, 3 kige tsa a sle a aà mene aba ŋgar dukw zlaŋgatsak nda maləma aà məməta damər ŋgar dəm ŋana aka da a zal zukw tsa, ŋgat a gama mba ya. 4 Ika magər gà mburma ana i gwala ŋgar a ka, mala məbatsa duwa a Mbulum ka, mala aka miɗ tar. Kərga taŋa ya, ŋgat ka, mene aba ŋgar dukw zlaŋgatsak tsa. Aɗaba ma tə zla aba mezlibe ŋgar a tsa.5 Na biy tsa, gà ɓəzla məbatsa duwa a Mbulum nda gà tuwa aà are ka, tə da ɗelɗel gər tsa, ti ɗelɗel guva gumət tar tsa. Ku mege magwazayaha duwa aà ba tar tekeɗe ya. 6 Ta vəl ba tar ka, aà megiŋ megemir a iye Mbulum tar, na dite ti ne a dukw zlaŋgatsak à zləm gà tsiye. Nda ndzer ka, tar na ta vekewiŋa gà dukw matawala fəla ana a ne gà dukw mezime gà ya, Iye na Batsah ŋa Mbulum tar a. Aɗaba taŋa ti ndze a ka, tsəɗaŋŋa.
7 Mala məbatsa duwa a Mbulum, ma tə zla məkəs ana muva ŋa ya tsa, ku mege məkəs ana aka zla aba mezlibe ŋgar a, kige tsa məkəs ana a mara i zal a, aɗaba mala məbatsa duwa a Mbulum ka, mandza tsəɗaŋŋa aà megiŋ megemir gà. 8 Ku mege Isərayel wara, mahəna a gər a bəɗ a gà ɓəzla məbatsa duwa a Mbulum kamala gà mburma ana gà tsəɗaŋŋa ŋa ya. Aɗaba tar na te vilewiŋa gà dukw mezime ana ki dzewimiŋa a Iye Mbulum kurum a. Gà ɓəzla məbatsa duwa a Mbulum ti ne i təv kurum ka, gà mburma ana tar gà tsəɗaŋŋa ŋa ya, aɗaba iye Batsah ŋa ka, tsəɗaŋŋa. Dite Iye na i ne a gà Isərayel gà tsəɗaŋŋa ŋa ya.
9 Na biy tsa dəm mala məbatsa duwa a Mbulum aka zla aba mezlibe nda mene aba mala muva ka, a zla mezlibe taŋa ka, aà dede ŋgar a. Ta wànà iɗəm ŋgat a.
10 Batsah mala məbatsa duwa a Mbulum ŋgat ka, mala aka miɗ gà ɓəzla məbatsa duwa a Mbulum, tàa dza aaka mal metike mburma a megemir, a pat ana ta vəlar megemir a, tàa dza aaka gà petek ana tsəɗaŋŋa ya. Aɗaba taŋa, mə məsak aà ambəz ŋgar sivve tsa, ma kwayaɗa aà gà petek ŋgar tsa, na ŋgat nda gà tuwa aà are ya, 11 ma ta sərəkaha aà məməta wura ilik tsidze, ma ti ne aàba dukw zlaŋgatsak tsa, ku mege i dede ŋgar, kige tsa mama ŋgar. 12 Vatwa ŋgar riŋ aà madara a bəra i ga tsəɗaŋŋa ŋa ata ya, aà mada aka tuwa tsa, tsəka a ti zle a mezlibe aà ga Mbulum ŋgar ana tsəɗaŋŋa ya. Aɗaba tàa ne aà ŋgat pam aà mege megemir, a iye Mbulum ŋgar, nda mandza aaka aà mal metike mburma a megemir. Iye na Batsah ŋa ya.
13 Batsah mala məbatsa duwa a Mbulum ma zla daala ka, dəm gama. 14 Ma tə zla madakwa məkəs tsa, kige tsa məkəs ana a mara i zal a tsa, ku mege məkəs ana aka burwa aba ŋgar nda mege muva ilik a tsa. Ma zla ka, dəm gama, dəm ana i gwala gà ɓəzla məbatsa duwa a Mbulum a. 15 Kamala taŋa ya, na gà ɓəza ŋgar ti ti ne a ka, gà gwala ana pam, tar gà dukw zlaŋgatsak a tsiye. Iye na Batsah ŋa ya. I zla batsah mala məbatsa duwa a Mbulum ka, pam aà megiŋ megemir › . »
16 BATSAH kwa ŋa a gwaɗa a Musa: 17 « Fafəl a Haruna: ‹ Aka miɗ mba, wa ahər kəla wa ahər kəla ka, i liwiŋ gà ɓəza gà ɓəza yak a, gà na dukw metire aà tar a ka, ti sle a aà mesirikaha a təv madula aaka duwa Mbulum aà məvəlar dukw mezime tsa. 18 Nda ndzer ka, wele ana dukw metire ihər a ka, a sle a aà mesirikaha aà təv madula aaka duwa a Mbulum tsa. Kamala megweɗe ya, mala guluf, wele ana a tsilgeɗe a ya, wele ana hitir ŋgar manəsa ŋa ya, kige tsa asa ka, wele ana gà sik ŋgar tə za ba ya, 19 wele ana sik ŋgar, kige tsa ahər ŋgar mahəɓa ŋa ya, 20 wele ana madzəgər a təɗa aaka ba ya, kige tsa wele ana kizkiz a, wele aka ɗe tsa ndeyndey ya, wele ana ndezleezliɗ ika are ya, wele ana madugula ihər a, dukw məməta ana mimbwirɗwiɗwe mimbwirɗwiɗwe ya ihər a, wele ana a mətsaha gwiɗisl a. 21 I liwiŋ gà ɓəza Haruna, mala məbatsa duwa a Mbulum a ka, biy tsa wura riŋ dukw metire ihər ka, ma ta sərəkaha aà təv madula aaka duwa a BATSAH kwa ŋa aà miviliŋ dukw mezime ana ta vakawa ya tsa. Agəra dukw metire ŋgar ata ka, a sle a aà mesirikaha a təv madula aaka duwa a Mbulum tsa. 22 Ama a sle a aà mazəma dukw mezime Mbulum ŋgar, gà dukw taf ana tsəɗaŋŋa ndeyndey a, nda gà dukw taf ana tsəɗaŋŋa ya. 23 Ama a sle a aà mesirikaha a təv madana petek ana tə sas dər ikaba ga ata ya tsa, ku mege a təv madula aaka duwa a Mbulum. Agəra dukw metire ŋgar ata ka, ma tə zla mezlibe aà təv ga ata tsəɗaŋŋa ya tsa. Iye na Batsah ŋa ya. Dite Iye na i dza gà ɓəzla məbatsa duwa a Mbulum pam, aà ta giŋ megemir a › . »
24 Musa a mà aà gà bazlam ata a gà Haruna nda gà ɓəza ŋgar, dite a gà Isərayel tserdze.