Lewi 20

Seriye agəra megeye gà bakal ana pampam a

1 BATSAH kwa ŋa a gwaɗa a Musa: 2 « Tsik gà dukw aaha mehitse dər ŋa ya, a gà Isərayel: ‹ Na wura ilik i liwiŋ gà Isərayel, kige tsa ika magər gà slele ana ika magər kurum a, aka vəl kəla ŋgar dukw taf ŋa, a mbulum Mulek a ka, say ta kiɗe a ŋgat, gà mburma ana ika ahəɗ ata ya, ta kelewa a ŋgat. 3 Iye nda gər gà ŋa, na i ge a guvəl aà wele ata ya, i delewe a ŋgat ika magər gà mayahaba gər gà Isərayel a. Aɗaba ana a vəl aà gà ɓəza ŋgar a ilik dukw taf ŋa, a Mulek a. Kərga taŋa ya na a ne dukw zlaŋgatsak aà ga gà tsəɗaŋŋa ŋana ya, dite aka tike zləm gà ana tsəɗaŋŋa ya aà ahər tsa. 4 Ama na gà mburma ana mandzaŋa ika ahəɗ ata ya ka, tàa handaka ba aka are tar, akahər ana wele ata a vile a kəla ŋgar a Mulek a, tàa kəɗ a ŋgat tsəka, 5 iye ŋa, nda gər gà ŋa, na i hitse a aà wele ata nda gà mburma ana i gwala ŋgar i ma ŋgar a, i delewe a tar ika magər gà mayahaba gər gà Isərayel a, ŋgat ŋa nda gà mburma ana ta gaw ba nda gà Mulek a.

6 Na bəla wura a de a a metike yam, kige tsa a de a a təv gà mahəram, tàa gaw ba nda tar, iye ŋa nda gər gà i hitse a aà wele ata, i delewe a ŋgat ika magər gà mayahaba gər gà ŋgar a. 7 Nwim aba kurum gà tsəɗaŋŋa ŋa, kà ndzum kamala gà mburma ana tsəɗaŋŋa ya, aɗaba iye na Batsah ŋa Mbulum kurum a. 8 Gəsum ahəm aà gà məpala ahəm gà fit lele. Iye na Batsah ŋa ya, i pala kurum ka, aà kà nwim gà mayahaba gər gà mburma ana tsəɗaŋŋa ya.

9 Na bəla wura aka vəl mezelme a dede ŋgar, kige tsa a mama ŋgar ka, say ta kəɗ ahər wele ata. Bakal məməta ŋgar ka, ika gər ŋgar ŋa, aɗaba ana a vəl mezelme a dede ŋgar, kige tsa a mama ŋgar a.

10 Na bəla wura, aka həna à məkəs mala biye hərmaga ŋgar ka, say ta bats gà wele ata nda məkəs ata. Tar gà ɓəzla muva sula məma.

11 Na bəla wura aka həna à məkəs dede ŋgar ka, a ndaɗa hwarwa taŋa ka, aka gər dede ŋgar. Ta betse a gà ɓəzla bakal ata sula ya, bakal məməta tar ka, ika gər tar ŋa.

12 Na bəla wura aka həna à məkəs kəla ŋgar ka, ta bats gà ɓəzla bakal ata sula ya. Ta ge taŋa ka, mezelme ana ŋgwal ŋa tsiye ndeyndey. Bakal məməta tar ka, ika gər tar ŋa.

13 Na bəla asləka mburma aka həna à asləka ŋgiɗ, kamala ana ta hənawa à gà məkəs a ka, tar ata sula ya ka, ta ge ka, dukw ana ŋgwal ŋa tsa ndeyndey ya. Ta bats iɗəm tar a, bakal məməta tar ka, ika gər tar ŋa.

14 Na bəla tsa wura a ndzək gà dəm nda məmər ŋgar aà daala ka, taŋa ka, ta ge ka, dukw hwarwa ndeyndey. Ta wànà iɗəm gà wele ata nda gà məkəs ata ya. Kərga taŋa ya, na dukw hwarwa ata ge a ba ika magər kurum asa tsiye.

15 Na bəla wura aka həna à dukw gənaw nda gà dukw dala ka, ta kəɗ wele ata, dite ta kəɗ dukw gənaw ata asa mbaŋa.

16 Na bəla məkəs ŋa, aka həna à dukw gənaw ka, ta kəɗ iɗəm məkəs ata ya, dite ta kəɗ dukw gənaw nda gà dukw dala ata mbaŋa. Say ta bats tar, bakal məməta tar, ika gər tar ŋa.

17 Na bəla wura aka zla damər ŋgar, dəm dede ŋgar, kige tsa dəm mama ŋgar aà daala ka, ta ge taŋa ka, dukw hwarwa. Tə dalawa tar aà are gà Isərayel fit tserdze. Wele ata ka, aka həna nda damər ŋgar, mesewere are bakal ŋa ka, ika gər ŋgar ŋa.

18 Na bəla wura aka həna à məkəs, akahər ana meŋge huɗ ihər mba ya ka, tə dəgəz gà mburma ata sula ya, ika magər gà mayahaba gər gà Isərayel a. Aɗaba tàa həna, tar sula məma akahər ana məmbəz a zlelere a aà məkəs aaha ya mba ya.

19 Ka ta həna à damər mama yak tsa, kige tsa à damər dede yak tsa. Na bəla wura aka həna à məkəs i gwala ŋgar a ka, bakal ŋa ika gər tar sula məma.

20 Na bəla wura aka həna à məkəs damər dede ŋgar ka, a ndaɗa hwarwa taŋa ka, aka damər dede ŋgar. Mesewere are bakal ŋa ka, ika gər tar sula məma, ta mete a a biye ka, ze mawa kəla.

21 Na bəla wura aka zla məkəs damər ŋgar aà daala ka, taŋa ka, dukw ana dukw zlaŋgatsak ndeyndey ya. Wele ata a ndaɗa hwarwa ka, aka gər damər ŋgar. Ta mete a a biye ka, ze mawa kəla.

22 Gəsum ahəm aà gà məpala ahəm gà nda gà dukw ana i hitse dər a tserdze. Kərga taŋa ya ana huɗ kwite ana i de a aɗəm a a kurum a, ki ta ndzwim a iɗəm a, a vinehe a aà kurum a asa tsiye. 23 Ka ta zazamum metikaba mendze gà mayahaba gər gà mburma ata, i digiz a tar ika miɗ kurum a tsa, aɗaba tar ka, tàa geye medzibe gà bakal ata fit tserdze. Ti ne ka, gà dukw ana gà ŋgwal ŋa tsa ndeyndey ya, na i təv are gà ya. 24 Yàa mbər megweɗe a kurum ka: Ki zimwime a ahəɗ kwite ata, iye na i vile a à kurum a aà mene biy kurum a. Na a zlele a ika ahəɗ kwite ata ka, gà awah nda amum. Iye na Batsah ŋa Mbulum kurum ana, a dza kurum pam aà gà mayaha ba gər gà mburma ŋgiɗ a. 25 Aɗaba taŋa, say ki sirwim ikaba aà gà dukw gənaw nda gà dukw dala ana, gà dukw zlaŋgatsak a, nda gà na gà dukw zlaŋgatsak ŋa tsiye, ika magər gà ɗiyeŋ ana gà dukw zlaŋgatsak a, nda gà na gà dukw zlaŋgatsak tsiye. Ka ta nwim aà ba kurum gà dukw zlaŋgatsak ndeyndey nda maləma aà gà dukw gənaw, gà ɗiyeŋ, gà ɓəza gà dukw ana ti de a nda huɗ ika ahəɗ, ti ne gà dukw zlaŋgatsak a tsa. I tike məpala ahəm ata ka, aà ka sərum gà na ti ne gà dukw zlaŋgatsak a. 26 Ndzum gà tsəɗaŋŋa ŋa, pam biy gà. Aɗaba iye Batsah ŋa ka, tsəɗaŋŋa. I dza kurum pam aà gà mayahaba gər gà mburma ŋgiɗ a ka, aà kà nwim gà biy gà.

27 Na biy tsa asləka mburma, kige tsa məkəs ŋa, a tikawa yam, kige tsa a gewa mahəram ka, say ta bats tar ka, nda makalawa tar nda kur. Bakal məməta tar ka, ika gər tar ŋa › . »