Lewi 19

Gà məpala ahəm aka gər mendzena tsəɗaŋŋa nda ndzer a

1 BATSAH kwa ŋa a gwaɗa a Musa: 2 « Tsik gà məpala ahəm aaha mehitse dər ŋa ya, a gà mayahaba gər gà Isərayel: ‹ Ndzum tsəɗaŋŋa, aɗaba iye Batsah ŋa Mbulum kurum ka, tsəɗaŋŋa. 3 Ku mege weke ika magər kurum a ka, mahəna a gər à bəɗ, a gà dede ŋgar nda mama ŋgar, dite mazazam gà pat Sabba gà, iye na Batsah ŋa Mbulum kurum a.

4 Ka ta mbəɗum aba a təv gà mbulum ana, gà ndzer ŋa tsiye tsa. Ka ta vaɗum gà mbulum kamala gà mendzikiɗe ba, gà dukw ana ta vaɗawa nda zara ya tsa. Iye na Batsah ŋa Mbulum kurum a.

5 I təv ana ki vilwimiŋ a dukw matawala fəla magawuba kurum nda gà Iye ya ka, gwim ka, kamala dukw ana i hitse dər, i gwa ya, dite na i gise a kurum a ya. 6 Papəɗum slu dukw gənaw ata, a pat matawala fəla, dite ndidwe ŋana asa, ama aà mehinne məmakər ŋana ka, ki dzwim a aà mezehe ŋana a akwa. 7 Na bəla wura aka papəɗ slu ata, aà mehinne məmakər ŋana ka, slu ata aka ne dukw zlaŋgatsak, dite i gise a matawala dukw ŋgar ata asa tsa. 8 Na bəla wura aka papəɗ ka, bakal ŋa ika gər ŋgar, aɗaba aka ne dukw zlaŋgatsak aà dukw ana pam biy BATSAH kwa ŋa ya. Ti delewe a wele ata ika magər gà mburma ŋgar a.

9 I təv ana ki gwimera duwa i dala ya ka, ka ta palum ndisl aà kwiye tsa. Gà dukw ana ta matsawa a bəɗ a ka, ka ta mum aka məpalaŋa tsa. 10 Ka ta ŋgulum mawa viŋye kurumara i ɗaf a fit tsa, kige tsa məpala gà wur gà dukw ana a dzaya à bəɗ a tsa. Miyakum dər a gà ɓəzla matawak nda gà slele ana ika ahəɗ kwite kurum a. Iye na Batsah ŋa Mbulum kurum a.

11 Ka ta gwim akəl tsa, kà sasum parsa tsa, ka ta bazum za a gà ɓəzla biye hərmaga kurum tsa. 12 Ka ta mbaɗum nda zləm Mbulum aka gər parsa tsa. Na kàa gwim kataya ka, kàa nwim dukw zlaŋgatsak aà zləm gà. Iye na Batsah ŋa ya.

13 Ka ta bana duwa aà mala biye hərmaga yak a tsa, dite ka ta ge ihər akəl a tsa. Ka ta tike aba dukw avukw mala megemir a, aà ndidwe ŋgiɗ tsa. 14 Ka ta ndavum a mala mandakazləm tsa, ka ta tikwim duwa a vatwa a mala guluf tsa. Ama gwim magəɗa ivaɗ ka, a Mbulum kurum. Iye na Batsah ŋa.

15 Ka ta nwim gà mburma ana gà ndzer ŋa tsiye tsa, na i təv mege seriye ya. Ka ta sakumaha a gà ɓəzla matawak tsa, ka ta sakumaha a gà ɓəzla limana tsa. Ama gwim seriye a gà ɓəzla biye hərmaga kurum ka, nda ndzer ŋa. 16 Ka ta nwim gà ɓəzla məwala aà mburma ya tsa. Ka ta sasum parsa a wura, ti tike ŋgat a daŋgay aà məməta tsa. Iye na Batsah ŋa ya.

17 Ka ta nwim are a wura i gəzləŋ kurum tsa. Na bəla damər yak aka gik bakal duwa ka, tsikar ahər parakka, aɗaba ka ta ŋgat bakal aɗaba ŋgat tsa. 18 Ka ta mayum aba aɗəm à gà bakal ika magər kurum tsa. Ka ta tikwim dəgun aà gà damər kurum ana i mayahaba gər kurum a tsa, ama say waya mala biye hərmaga yak, kamala ana kà waya ba yak ŋa ya seyiŋ ivaɗ. Iye na Batsah ŋa ya.

19 Gəsum ahəm aà gà məpala ahəm gà aaha. I gà dagara kurum a ka, ka ta məsakum a gà dukw gənaw kurum ana gwala tar pampam a, tə tsala akaba tsa. Ka ta sligwim hwilfe duwa pampam sula a guvah ŋa ilik tsa. Ka ta dzum akaba gà petek ana ta ŋgar nda slewize pampam sula ya tsa.

20 Na bəla wura aka həna à məkəs ana ɓele ya, dite ŋgat ka, makasl mburma ya, tàa mburuɗ ŋgat tsa, dite tàa vəlar meziwe gà gər tsa asa ka, wele ata ka, a pile a gər. Ama wura ma ta bats gà mburma ata ta ge bakal a tsa, aɗaba məkəs ata ka, ɓele ŋa mba. 21 Wele ata a giser a hagwala aka biye hərmaga ga petek mayahaba gər a, dite a vile a dukw taf ŋa a BATSAH kwa ŋa aà matawala fəla məpəla gər dukw bakal. 22 Mala məbatsa duwa a Mbulum a geye a gà dukw ana biy məpəla à bakal a, ika miɗ BATSAH kwa ŋa, nda hagwala matawala fəla məpəla gər dukw bakal. I fata ya ka, wele ata a ŋget a məpəla à bakal, agəra bakal ana a ge ya.

23 I təv ana kàa ndzwim aka ahəɗ Kanana ya ka, ki ti dzevwime a zləməŋa gà dizl ana ta we a, ti zime a ya. Fərum a mewe tar kamala dukw zlaŋgatsak a, i huɗ mive makər a, ka ta zəmum tsa. 24 Aà mive məfaɗ ŋana ka, ki dzwimiŋa gà mewe tar pam, a iye Batsah kurum ŋa biy megiŋ dər kəkaaha. 25 Aà mive miìzləm ŋana kuɗa ka, ki slwim a aà mezwimwimiŋa. Kərga taŋa ya na, gà dukw kurum ti sikehe a à mewe a hinne ya, Iye na Batsah ŋa Mbulum kurum a.

26 Ka ta papuɗum slu dukw gənaw ana məmbəz aka dara iɗəm tsiye tsa. Ka ta dum a mahəram tsidze. Ka ta dum a bəra gà ɓəzla metike yam tsa. 27 Ka ta ɗeɗelwim ambəz gər kurum tsa. Ka ta ɗeɗelwim aà gumət kurum a tsa. 28 Na kurum nda gà tuwa aà are ka, ka ta kwayahum ba kurum tsa, ka ta gwazahayum duwa aà ba kurum tsa. Iye na Batsah ŋa ya.

29 Ka ta burwayum aà gà dəm kurum a nda metike a aà tar balaari aà mege muva tsa. Tsəka ahəɗ kwite ata, a ta vile a ba a mege muva, nda mege gà dukw hwarwa ndeyndey. 30 Zazamum gà pat Sabba gà, dite zambaɗum aà ga gà ata tsəɗaŋŋa ya. Iye na Batsah ŋa ya.

31 Ka ta yahum vatwa aà metike yam gà məməta tsa. Ka da dum a təv gà mahəram tsa. Aɗaba ti ne a à kurum a dukw zlaŋgatsak. Iye na Batsah ŋa Mbulum kurum a.

32 Hitse aà mbulum na batsah yak ŋa aka daha ya, həna à gər yak a bəɗ a gà mburma ana gà bàba ŋa ya lele. Kamala taŋa ya na, kurum riŋ ki giswim a ahəm aà Mbulum a. Iye na BATSAH kwa ŋa ya.

33 Na slele aka daha a ndze a ika magər kurum, ika ahəɗ kurum a ka, ka ta banum ihər duwa ya tsa. 34 Ama ivaɗ ka, ki ndzwim a nda gà ŋgat ka, kamala ana ŋgat ka, mala kwite, kamala kurum a. Ki weywim a ŋgat kamala ba kurum a, aɗaba ana kàa ndzum i slele ika ahəɗ Ezipt a. Iye na Batsah ŋa Mbulum kurum a.

35 Ka ta nwim gà ɓəzla wirwir i təv gà dukw ana ki livwime a nda mege dər kapaka ya, ki livwime a mibeŋa ya, kige tsa nda liter a tsa. 36 Ki gwim a megemir ka, nda ŋgwal kiliw lele, dite mibiŋa tekeɗe mege ka, ndaka vatwa ŋa lele. Dukw melive dukw kurum mege ndaka vatwa ŋa lele. Iye na Batsah ŋa Mbulum kurum ana a ndzəkara kurum ika ahəɗ Ezipt ya ya.

37 Hənum a gər a bəɗ a gà məpala ahəm gà, nda gà dukw ana i hitse dər a fit, dite kə gəsum aà tar ahəm ndaka vatwa ŋa lele. Iye na Batsah ŋa ya › . »