Məpala ahəm aka gər mahəna nda gà məkəs
18
1 BATSAH kwa ŋa a gwaɗa a Musa: 2 « Tsik gà dukw aaha a gà Isərayel: ‹ Iye na Batsah ŋa Mbulum kurum a. 3 Ka ta gwim dukw ana ta gewa ika ahəɗ Ezipt i təv ana kà ndzawum iɗəm a tsa. Kà ta gwim kamala dukw ana ta gewa ika ahəɗ Kanana, i təv ana i de aɗəm a à kurum a ya tsa, kà zazamum metikaba mendze gà mayahaba gər gà mburma ata tsidze. 4 Hənum a gər a bəɗ a gà dukw ana i hitse dər a, gəsum ahəm aà gà məpala ahəm gà terwihhwe lele. Iye na Batsah ŋa Mbulum kurum a. 5 Kaslum gà məpala ahəm gà, nda gà dukw ana i hitse dər a, na wura aka zazam ka, a ŋgete a mesife. Iye na Batsah ŋa ya.6 Wura ilik ika magər gà Isərayel a, ma ta həna nda məkəs ana i gwala ŋgar bise ya tsa. Iye na Batsah ŋa ya.
7 Ka ta həna à mama yak tsa, a ne ka, kà ndaɗa hwarwa aka dede yak. Kà ndaɗa a hwarwa taŋa ka, aka mama yak, asa mbaŋa. Aɗaba ŋgat ka, mama yak.
8 Ka ta həna à məkəs dede yak ŋgiɗ tsa, ki ndeɗe a hwarwa taŋa ka, aka dede yak.
9 Ka ta həna à damər yak dəm ŋana, dede kurum ilik a tsa, kige tsa à damər yak dəm ŋana məmər kurum ilik a tsa. Ku mege ta gəl riŋ ŋgat ka, i huɗ ga, kige tsa ara i bəra misle ŋgiɗ a tekeɗe ya.
10 Ka ta həna à dəm kəla yak, kige tsa à dəm, dəm yak tsa. Taŋa kà ndaɗa hwarwa ka, aka biy yak ŋa.
11 Ka ta həna à dəm məkəs dede yak ŋgiɗ ana dede kurum ilik tsiye tsa, aɗaba dede yak na a gəl a, ŋgat ka, damər yak mbaŋa.
12 Ka ta həna à damər dede yak məkəs ŋana tsa. Aɗaba ŋgat ka, damər dinde dede yak.
13 Ka ta həna à damər mama yak məkəs ŋana tsa. Aɗaba ŋgat ka, damər dinde mama yak.
14 Ka ta ndaɗa hwarwa aka damər dede yak nda mahəna à məkəs ŋgar tsa, aɗaba ŋgat ka, məkəs damər dede yak.
15 Ka ta həna à məkəs kəla yak tsa. Ŋgat ka, məkəs kəla yak.
16 Ka ta həna à məkəs damər yak tsa, kà ndaɗa aka ŋgat taŋa ka, hwarwa.
17 Ka ta həna à məkəs, dite à dəm ŋgar, dite asa à dəm kəla ŋgar, kige tsa à dəm dəm ŋgar tsa. Aɗaba tar ka, dinde tar ilik nda məkəs ata. Taŋa ka, dukw hwarwa ndeyndey asa.
18 Ka ta zla damər məkəs yak à daala tsa, na məkəs yak riŋ nda mesife mba ya. A ti zle aka kurumara sələk a.
19 Ka ta həna à məkəs ana meŋge huɗ ihər a tsa. Aɗaba ŋgat ka, i dukw zlaŋgatsak.
20 Ka ta həna à məkəs damər yak Isərayel ŋgiɗ tsa. Na wura aka ge taŋa ka, aka ne dukw zlaŋgatsak.
21 Ka ta vəl aà gà ɓəza yak a, ilik dukw taf ŋa a mbulum Mulek tsa. Na kàa ge a dər kamala taŋa ya ka, kàa nwim dukw zlaŋgatsak à zləm gà. Iye na Batsah ŋa Mbulum yak a.
22 Ka ta həna à asləka mburma kamala na ta hənawa à məkəs a tsa. Taŋa ka, dukw ana ŋgwal ŋa tsa ndeyndey.
23 Ka ta həna à dukw gənaw, nda gà à dukw dala tsa. Na bəla wura aka ge kamala taŋa ya ka, ŋgat i dukw zlaŋgatsak. Məkəs ma ta vəl ba ŋgar a dukw gənaw tsa. Na bəla aka ge kamala taŋa ya ka, a ge taŋa ka, dukw ana ŋgwal ŋa tsiye ndeyndey.
24 Ka ti nwim aba kurum gà dukw zlaŋgatsak nda mege dukw ana kamala taŋa ya tsa. Gà asiŋ gà mayahaba gər gà mburma ana, i delewe a tar ika miɗ kurum a ka, tàa neye a aba tar gà dukw zlaŋgatsak, nda mege dukw ana kamala taŋa ya ya.
25 Ahəɗ Kanana ŋana dze nda gər ŋgar a ka, aka ne dukw zlaŋgatsak, i ta vilere a mesewere are agəra dukw bakal ŋgar ata. Ahəɗ kwite ata a ta vineheª a à gà mburma ana tar mandzaŋa i kwite ata ya.
26 Kurum gà ɓəzla kwite, kige tsa gà slele ana tar riŋ mandzaŋa ika magər kurum a, gəsum ahəm aà gà məpala ahəm gà, nda gà dukw ana i hitse dər a. Ka ta gwim gà dukw ana ŋgwal ŋa tsa ndeyndey ya tsidze. 27 Gà mburma ana tə lah mendze i Kanana akahər ŋa ata, kàa ndzwimaha zukw tsiye ka, tàa geye a gà dukw ata ŋgwal ŋa tsa ndeyndey ya. Nda taŋa na ahəɗ kwite ata a ne dukw zlaŋgatsak a. 28 Ka ti nwim dukw zlaŋgatsak aà ahəɗ kwite ata tsa, tsəka a vinehere a à kurum a, kamala gà mayahaba gər gà mburma ana ti ndze a riŋ iɗəm, akahər ana kàa ndzwimaha zukw tsiye. 29 Kərga taŋa ya, gà mburma ana tserdze ta ge a, gà dukw ana ŋgwal ŋa tsa ndeyndey ya ka, ti delewe a tar ika magər gà mayahaba gər gà Isərayel a. 30 Gəsum ahəm aà gà məpala ahəm gà. Ka ta gwim gà dukw ana gà ŋgwal ŋa tsa ndeyndey, kamala ana ta gewa akahər ana kàa ndzwimaha zukw tsiye tsa. Ka ti nwim aba kurum gà dukw zlaŋgatsak nda mege gà dukw ata tsa. Iye na Batsah ŋa Mbulum kurum a › . »