Məpala ahəm agəra mandza tsəɗaŋŋa
17–27
Məpala ahəm aà mazəma məmbəz
17
1 BATSAH kwa ŋa a gwaɗa a Musa: 2 « Tsik a gà Haruna nda gà ɓəza ŋgar, dite a gà Isərayel fit tserdze, gwaɗa tar: ‹ Araha na dukw ana BATSAH kwa ŋa a hitse dər a: 3 Biy tsa wura ilik ika magər gà Isərayel a, a waya makəɗa sla, təmaŋ kige tsa awak i təv mandzəba tar, kige tsa i bəra tsakalak aà təv mandzəba ya ka, 4 say a gis a dukw gənaw ata aka biye hərmaga ga petek mayahaba gər dzekwiŋ, say a pete a dər kamala məvəla dukw taf a, a BATSAH kwa ŋa, ika miɗ ga petek ŋgar. Na aka ge dər kamala taŋa ya tsəka, wele ata aka ne mala bakal, agəra məmbəz ana a dza dər a bəɗ a, dite ti delewe a ŋgat ika magər gà mayahaba gər gà mburma ŋgar a. 5 Məpala ahəm aaha mehitse dər ŋa ya ka, a tike a balaari aà gà Isərayel, aà ta batsawa gà dukw gənaw i dala asa tsa. Say ti dewe a dərra ivaɗ ka, aka biye hərmaga ga petek mayahaba gər, aka miɗ mala məbatsa duwa Mbulum a, aà məvəla dukw taf ŋa a BATSAH kwa ŋa, biy matawala fəla magawuba ya. 6 Mala məbatsa duwa a Mbulum, a gwetsekeye a à məmbəz dukw gənaw ata aka gər təv madula aaka duwa a BATSAH kwa ŋa, ana ika biye hərmaga ga petek mayahaba gər a. A dwile a gà təv gà məŋgəl aka gər təv madula aaka duwa, dite meze hədzək ŋana hwaŋŋa ya, a tsahən aà BATSAH kwa ŋa. 7 Kamala taŋa ya, na gà Isərayel, ta miyeke a à məvəla dukw taf matawala fəla, a gà mbulum ana tar gà ndzer ŋa tsiye, ta vaɗa ti ndzekeɗeba gà vugul a, ta gaw ba nda gà tar a. Məpala ahəm ata ka, gà Isərayel ti zezemewe a, wa ahər kəla wa ahər kəla ›.8 Ki gweɗe a ter a asa mbaŋa: ‹ Biy tsa wura ilik ika magər gà Isərayel a, kige tsa ika magər gà slele ana tar mandzaŋa ika magər tar a, a waya aà məvəla dukw taf matawala fəla ana tə dulawa ya, kige tsa dukw taf matawala fəla ŋgiɗ a ka, 9 say a gis a dukw gənaw ata, aka biye hərmaga ga petek mayahaba gər, na a vile a a BATSAH kwa ŋa ya. Na aka ge dər kərga taŋa ya tsəka, ti delewe a ŋgat ika magər gà mayahaba gà mburma ŋgar a ›.
10 Na wura ilik ika magər gà Isərayel, kige tsa gà slele ana mandzaŋa ika magər tar, aka zəm məmbəz ka, i ge a guvəl a wele ata, dite i delewere a ŋgat ika magər gà mayahaba gər gà mburma ŋgar a. 11 Aɗaba i məmbəz, na mesife mandza à bəra gà dukw ana ti ndze a a bəra ya. I vəl a kurum vatwa aà megemir nda məmbəz ka, ika gər təv madula aaka duwa, aà maŋgata məpəla bakal kurum. Nda ndzer kaɗəŋ, nda məmbəz na məpəla à bakal a, aɗaba ana mesife ka, i məmbəz a. 12 Aɗaba taŋa, na i gwaɗa a gà Isərayel: ‹ Wura ilik ika magər kurum a, ku mege slele ana ana ika magər kurum a tekeɗe ka, vatwa ŋgar riŋ aà mazəma məmbəz ɓav tsa ›.
13 Biy tsa asa, wura ilik ika magər gà Isərayel a, kige tsa, ilik aà gà slele ana ika magər gà Isərayel a, aka da mege gà kəra, aka gəs dukw dala, kige tsa ɗiyeŋ ana, tàa vəl ahər vatwa aà mipepiɗe ya ka, say mandza aà məmbəz ŋa aka ahəɗ, dite məpəsa aaka ahəɗ. 14 Mandza aà bəra gà dukw ana ti sife a ya ka, i məmbəz tar. Agəra taŋa na, ì gwaɗa a gà Isərayel ka: ‹ Ki ti zimwim a məmbəz diydiy tsidze ya, aɗaba mesife dukw ana a ndze a aà bəra ya ka, i məmbəz ŋgar. Na biy tsa wura aka zəm ka, ti delewe a ŋgat ika magər gà mburma ŋgar a ›.
15 Na wura ilik ika magər gà ɓəzla kwite ya, kige tsa gà slele ana ika magər tar a, aka papəɗ slu dukw ana a mət mimitiya, kige tsa dukw dala ŋgiɗ, na a kəɗ a ka, say wele ata ka, a bere a aà gà petek ŋgar a, dite a bere a ba ŋgar fit i bəɗ a. A ndze a i dukw zlaŋgatsak ŋa tsikw a hawa. I dəba ŋa ya ka, dukw zlaŋgatsak a ge a ihər asa tsa. 16 Na aka bara aà gà petek ŋgar a tsa, dite aka bara ba ŋgar tsəka, wele ata ka, bakal ŋa ika gər ŋgar . »